గోవా గవర్నర్‌ మృదుల సిన్హా.. గోవా యూనివర్సిటీ స్నాతకోత్సవంలో పట్టభద్రులైన యువతీయువకులందరి చేతా.. ‘ఎన్ని సమస్యలు ఎదురైనా వివాహాబంధాన్ని గట్టిగా నిలుపుకుంటాం’ అని.. రాష్ట్రపతి రామ్‌నాథ్‌ కోవింద్, ముఖ్యమంత్రి మనోహర్‌ పారికర్‌ సమక్షంలో ప్రతిజ్ఞ చేయించారు. నిరుడు ప్రణబ్‌ముఖర్జీ రాష్ట్రపతిగా ఉన్నప్పుడు కూడా మృదుల ఇదే విధమైన ప్రతిజ్ఞ చేయిస్తూ, ‘‘చిన్న చిన్న విషయాలకు గొడవపడి, దాంపత్య బంధం నుంచి బయటికి వచ్చేయకండి. చివరి వరకు కలిసి మెలిసి ఆనందంగా జీవించండి. పెళ్లికి ముందు మ్యారేజీ కౌన్సిలింగ్‌ తీసుకుంటే, పెళ్లి తర్వాత కౌన్సెలింగ్‌ తీసుకునే అవసరం రాదు’’ అని హితవు చెప్పారు ::: హిజ్‌బుల్‌ ముజాహిద్దీన్‌ కమాండర్‌ రెండో వర్ధంతి సందర్భంగా కశ్మీర్‌లో అల్లర్లు చెలరేగి, రాళ్లు విసురుతున్న మూకలను అదుపుచేయడం కోసం భద్రతా దళాలు జరిపిన కాల్పుల్లో ఒక టీనేజ్‌ బాలికతో పాటు ముగ్గురు పౌరులు మరణించారు. సున్నితమైన ప్రాంతాలలో సైనికులు ‘ఏరియా డామినేషన్‌ పెట్రోలింగ్‌’ జరుపుతున్నప్పుడు భవనాలపైకి ఎక్కి సైన్యంపై రాళ్లు రువ్వుతున్న వారిని నియంత్రించడం కోసం తప్పనిసరి పరిస్థితుల్లో కాల్పులు జరిపినప్పుడు అద్లీబ్‌ జాన్‌ అనే 16 ఏళ్ల బాలిక మరణించిన మాట నిజమేనని రక్షణశాఖ ప్రతినిధి ఒకరు అంగీకరించారు :::  త్రిపుల్‌ తలాక్‌కు  వ్యతిరేకంగా ఉద్యమించిన సామాజిక హక్కుల కార్యకర్త షయార బానో భారతీయ జనతా పార్టీలో చేరారు. మూడుసార్లు తలాక్‌ చెబితే చాలు, వివాహబంధం నుంచి తప్పుకోవచ్చనే వెసులుబాటును రద్దు చేయాలని 2016లో కోర్టును ఆశ్రయించి తొలిసారిగా దేశప్రజల దృష్టిలో పడిన ఉథమ్‌సింగ్‌నగర్‌ జిల్లా (ఉత్తరాఖండ్‌) కాశీపూర్‌ నివాసి షయార.. త్రిపుల్‌ తలాక్‌ రాజ్యాంగ విరుద్ధమైనదని 2017 ఆగస్టులో సుప్రీంకోర్టు తీర్పు ఇవ్వడంతో ముస్లిం మహిళాహక్కుల పోరాటయోధురాలిగా గుర్తింపు పొందారు ::: తెలంగాణలో ‘షీ టీమ్‌’లు ఈవారంలో రెండు బాల్య వివాహాలను అడ్డుకుని, బాలిక తల్లిదండ్రులకు కౌన్సెలింగ్‌ ఇప్పించాయి. భువనగిరి పోలీస్‌స్టేషన్‌ పరిధిలో 16 ఏళ్ల బాలికకు 22 ఏళ్ల యువకుడితో, చౌటుప్పల్‌ పరిధిలో 15 ఏళ్ల బాలికకు 26 ఏళ్ల పురుషుడితో జరగబోతున్న వివాహాలను షీ టీమ్‌లు సమర్థంగా నివారించి, బాలికలను రక్షించాయి ::: ఈ ఏడాది మే 21న తొమ్మిదేళ్ల బాలికపై లైంగికదాడి జరిపిన వ్యక్తికి మధ్యప్రదేశ్‌లోని సాగర్‌ జిల్లా కోర్టు మరణశిక్ష విధించింది. పన్నెండేళ్ల లోపు బాలికలపై అత్యాచారానికి పాల్పడినవారికి మరణశిక్ష విధించాలని గత ఏడాది డిసెంబరులో మధ్యప్రదేశ్‌ బీజేపీ ముఖ్యమంత్రి శివరాజ్‌సింగ్‌ చౌహాన్‌ చేసిన ప్రతిపాదన అసెంబ్లీ ఏకగ్రీవ సమ్మతిని పొంది, రాష్ట్రపతి ఆమోదం అనంతరం ఈ ఏడాది ఏప్రిల్‌ 21న అమలులోకి వచ్చాక, ఆ చట్టం కింద న్యాయస్థానం విధించిన తొలి మరణశిక్ష ఇదేనని అంటూ, ఈ మరణశిక్ష నేరస్తులకు ఒక బలమైన భయ సంకేతం అవుతుందని ఆ రాష్ట్ర హోమ్‌ శాఖ మంత్రి భూపేంద్ర సింగ్‌ అన్నారు. రాజకీయ చర్చల్లో ట్విట్టర్‌ ఒక శక్తిమంతమైన వేదికగా అవతరించాక, ఆ చర్చల్లోకి మహిళా జర్నలిస్టులను రానివ్వకుండా పురుష జర్నలిస్టులు తమకు తామే ప్రత్యేక గ్రూపులుగా ఏర్పడుతున్నారని ‘ఇంటర్నేషనల్‌ జర్నల్‌ ఆఫ్‌ ప్రెస్‌/పాలిటిక్‌’లో వచ్చిన ఒక అధ్యయన ఫలితం వెల్లడించింది. ఒకవేళ మహిళా జర్నలిస్టులు ఎవరైనా పురుష జర్నలిస్టుల చర్చలకు రీ ట్వీట్‌ చేసినా, పురుషులు స్పందించడం లేదని, ఆ కారణంగా.. ట్విట్టర్‌లో రాజకీయ వేదికలపై మహిళా జర్నలిస్టులు తీవ్రమైన వివక్షకు గురవుతున్నారని, ఇది ఆరోగ్యవంతమైన పరిణామం కాబోదని.. అధ్యయ నివేదిక ఆందోళన వ్యక్తం చేసింది ::: స్త్రీవాదిగా ప్రసిద్ధుడైన కెనడా యువ ప్రధాని జస్టిన్‌ ట్రూడో రాజకీయాలలోకి రాకముందు రెండు దశాబ్దాల క్రితం ఒక మహిళా జర్నలిస్టు ఒంటిపై ఒకట్రెండు చోట్ల ఉద్దేశపూర్వకంగా చేతులతో తాకినట్లు (గ్రోపింగ్‌) అప్పటి ఒక పత్రిక తన సంపాదకీయంలో రాసిన విషయం.. మళ్లీ ఇప్పుడు కాలగర్భంలోంచి పైకి లేచిన నేపథ్యంలో ‘ఆ మహిళా రిపోర్టర్‌ను నేనే’ అంటూ రోజ్‌ నైట్‌ అనే జర్నలిస్టు ఒక ప్రకటన ఇచ్చారు. ‘‘నేనెందుకు ఆమెను తాకానో తెలియదు కానీ, మీరు అనుకుంటున్న ఉద్దేశంతోనైతే మాత్రం తాకి ఉండను’ అని జస్టిన్‌ ట్రూడో స్టేట్‌మెంట్‌ ఇచ్చిన మర్నాడే రోజ్‌ నైట్‌ ఇలా బహిర్గతం అయ్యారు ::: ప్రముఖ బ్యాడ్మింటన్‌ కోచ్‌ పుల్లెల గోపీచంద్‌ కుమార్తె.. పదిహేనేళ్ల గాయత్రి.. అండర్‌–19 గర్ల్స్‌ సింగిల్‌ టైటిల్‌ గెలుచుకుని ఏషియన్‌ గేమ్స్‌కి ఎంపిక అయింది. కొచ్చిలో జరిగిన ఆలిండియా జూనియర్‌ ర్యాంకింగ్‌ బ్యాడ్మింటన్‌ ఫైనల్‌ పోటీలలో ‘అన్‌ సీడెడ్‌’ అయిన గాయత్రి తన ప్రత్యర్థి, నాలుగో సీడ్‌ ప్లేయర్‌ అశ్వినీభట్‌పై విజయం సాధించింది :::  

పనాజి : పవిత్రమైన వివాహ బంధాన్ని కలకాలం కాపాడుకోవాలంటూ గోవా గవర్నర్‌ మృదులా సిన్హా విద్యార్థులకు సూచించారు. గోవా యూనివర్సిటీ 30వ స్నాతకోత్సవం సందర్భంగా ముఖ్య అతిథిగా హాజరైన ఆమె విద్యార్థులతో ఐదు ప్రమాణాలు చేయించారు. మహిళా సాధికారతకు కృషి చేయడం, డ్రగ్స్‌కు దూరంగా ఉండటం, తల్లిదండ్రులను వృద్ధాశ్రమాల్లో చేర్పించాలనే ఆలోచన దరి చేరకుండా చూసుకోవడం, చిన్న చిన్న గొడవలకే వివాహ బంధాన్ని విచ్ఛిన్నం చేసుకోకూదనే భావన పెంపొందించుకోవడం వంటి విషయాల పట్ల యువత శ్రద్ధ కలిగి ఉండాలని ఆమె పిలుపునిచ్చారు. స్నాతకోత్సవంలో భాగంగా సర్టిఫికెట్లు అందుకునేందుకు హాజరైన 9 వేల మంది విద్యార్థులను ఉద్దేశించి మృదులా సిన్హా ప్రసంగించారు. ఈ సందర్భంగా మహిళలపై జరుగుతున్న అకృత్యాల గురించి, ప్రీ మారిటల్‌ కౌన్సిలింగ్‌ ఆవశ్యకతను వివరించారు. ‘ పెళ్లి అనేది తప్పనిసరి కాదు.. కానీ అవసరం. ఒక్కసారి వివాహ బంధంలో అడుగుపెట్టిన తర్వాత.. ఆ బంధాన్ని కాపాడుకునేందుకు కృషి చేయాలి. భార్యభర్తలు పరస్పర అవగాహన కలిగి ఉండాలి. ఒకరినొకరు గౌరవించుకోవాలి. అప్పుడే ఆ బంధం ఎక్కువ కాలం కొనసాగేందుకు అవకాశం ఉంటుందంటూ’  ఆమె వ్యాఖ్యానించారు. మహిళలను కించపరిచే సంఘటనలు జరిగినపుడు, వారు ప్రమాదంలో ఉన్నపుడు ప్రాణాలకు తెగించైనా సరే వారిని కాపాడాలంటూ పిలుపునిచ్చారు.


 ‘‘రెండో స్థానంలోని పార్టీకి ప్రభుత్వం ఏర్పాటుచేసే హక్కులేదు’’ అంటూ గోవా పరిణామాలపై కేంద్ర మాజీ మంత్రి, కాంగ్రెస్‌ లాయర్‌ పి.చిదంబరం ట్విటర్‌లో నిరసన తెలిపారు. శనివారం ఫలితాలు ప్రకటించిన ఐదు రాష్ట్రాల్లో ఒకటైన గోవాలో ఏ పార్టీకి మెజారిటీ రాకున్నా ముఖ్యమంత్రిగా బీజేపీ నేత మనోహర్‌ పర్రీకర్‌ను గవర్నర్‌ మృదులా సిన్హా నియమించి, ప్రమాణంచేయడానికి ఆహ్వానించడంతో వివాదం తలెత్తింది. లోక్‌సభ, అసెంబ్లీ ఎన్నికల్లో ఏ పక్షానికి మెజారిటీ రాకుంటే సభలో మిగిలిన పార్టీల కన్నా ఎక్కువ సీట్లొచ్చిన పెద్ద పార్టీని(సింగల్‌ లార్జెస్ట్‌ పార్టీ) ఆహ్వానించాలనేది కొన్ని దశాబ్దాలుగా పలు సందర్భాల్లో సంప్రదాయంగా మారింది. మరి గోవాలో ప్రస్తుత పాలకపక్షం బీజేపీ(17) కన్నా ప్రధాన ప్రతిపక్షం కాంగ్రెస్‌కు(21) నాలుగు సీట్లు ఎక్కువొచ్చాయి. మణిపూర్‌లో ఇంకా బీజేపీ నేత ఎవరినీ ప్రభుత్వం ఏర్పాటుకు గవర్నర్‌ ఇంకా పిలవలేదుగాని అక్కడ కూడా ‘గోవా’ పునరావృతం చేయడానికి రంగం సిద్ధమైంది. ఈ నేపథ్యంలో ఇలాంటి సందర్భాల్లో కొన్ని రాష్ట్రాల్లో కొందరు గవర్నర్లు ఏం చేశారో చరిత్రలోకి తొంగిచేస్తే మంచిది.
 
 1982 మే హరియాణా అసెంబ్లీ ఎన్నికల్లో ఏ పక్షానికి మెజారిటీ రానప్పుడు గవర్నర్‌ జీడీ తపాసే నిర్వహించిన పాత్ర అత్యంత వివాదాస్పదమైంది. ఈ ఎన్నికల్లో 90 సీట్ల అసెంబ్లీలో మెజారిటీకి అవసరమైన 46 సీట్లు పాలక కాంగ్రెస్‌(36), ప్రతిపక్షం లోక్‌దళ్‌(31)లో దేనికీ రాలేదు. అయితే, ఎన్నికల్లో పొత్తు కుదుర్చుకున్న లోక్‌దళ్, బీజేపీ(6) కూటమికి వచ్చిన సీట్లు 37. అంటే కాంగ్రెస్‌ కన్నా ప్రతిపక్ష కూటమికి ఒక సీటు వచ్చినట్టు లెక్క. మే 22న తనను కలిసిన కూటమి నేత, మాజీ సీఎం దేవీలాల్‌(లోక్‌దళ్‌)ను– 24 ఉదయం పది గంటలకు కూటమి తరఫున ఎన్నికైన ఎమ్మెల్యేలతో రాజ్‌భవన్‌కు రావాలి–అని గవర్నర్‌ కోరారు. కాంగ్రెస్‌ నాయకురాలు ఇందిరాగాంధీ ప్రధానిగా ఉన్న ఈ సమయంలో ఏంజరిగిందోగాని, కాంగ్రెస్‌ శాసనసభా పక్షనేతగా మరోసారి ఎన్నికైన సీఎం భజన్‌లాల్‌తో   మరుసటి రోజు(మే 23) సాయంత్రం ముఖ్యమంత్రిగా తపాసే ప్రమాణం చేయించారు.
 
 గవర్నర్‌పై ‘చేయిచేసుకున్న’ దేవీలాల్‌
 భజన్‌ ప్రమాణం ముగిసిన వెంటనే లోక్‌దళ్‌–బీజేపీ కూటమి నేత దేవీలాల్‌ రాజ్‌భవన్‌కు వెళ్లి తపాసేను కలిసి, భజన్‌ సర్కారును బర్తరఫ్‌ చేసి, తనతో సీఎంగా ప్రమాణం చేయించాలని డిమాండ్‌ చేశారు. మెజారిటీ రాకున్నా అత్యధిక సీట్లు గెలిచిన కాంగ్రెస్‌ నేత భజన్‌తో ప్రమాణం ఇప్పటి వరకూ అనుసరిస్తున్న సంప్రదాయాలకు అనుగుణంగానే చేశానని, గవర్నర్‌కు ఇలాంటి విచక్షణాధికాధికారాలున్నాయని తపాసే వాదించారు. దీంతో ఆగ్రహించిన దేవీలాల్‌ తనపై అనుచితంగా ప్రవర్తించి దౌర్జన్యం చేశారని ఆరోపించారు. వాస్తవానికి భజన్‌ను సమర్థిస్తున్న ఎమ్మెల్యేలు ఎంతమందని అడిగితే, 42–44 అని తపాసే జవాబిచ్చారు. మైనారిటీని మెజారిటీగా మార్చడంలో అప్పటికే ఆరితేరిన భజన్‌ సీఎంగా ప్రమాణం చేసిన రెండు రోజులకే మెజారిటీ కూడగట్టారు. దేవీలాల్‌ గవర్నర్‌ నిర్ణయాన్ని సవాలు చేసినా కోర్టులు భజన్‌కు అనుకూలంగా తీర్పులిచ్చాయి.
 
 హంగ్‌ అసెంబ్లీలో అతి పెద్ద పార్టీకే చాన్స్‌ ఇవ్వాలన్న నిబంధనను అన్నిసార్లూ పాటించలేదు!
 ఎన్నికల్లో పొత్తు పెట్టుకుని కూటమిగా ఏర్పడిన పార్టీలకొచ్చిన సీట్లను కలిపి అవి ఒక పార్టీకి దక్కిన స్థానాలుగా పరిగణించిన సందర్భాలూ గతంలో ఉన్నాయి. 1982 మేలోనే హరియాణాతోపాటే అసెంబ్లీ ఎన్నికలు జరిగిన కేరళలో రెండు రాజకీయ కూటముల్లో(కాంగ్రెస్‌ నేతృత్వంలోని యూడీఎఫ్, సీపీఎం నాయకత్వంలోని ఎల్డీఎఫ్‌) కాంగ్రెస్‌ కూటమికి మెజారిటీ వచ్చింది.( కేరళ చరిత్రలో ఎప్పుడూ ఏ పార్టీకీ సొంత మెజారిటీ ఇంత వరకూ రాలేదు.) విడిగా చూస్తే కూటముల ‘కెప్టెన్లయిన’ కాంగ్రెస్‌కు 20 , సీపీఎంకు 26 సీట్లు వచ్చాయి. పెద్ద పార్టీనే ఆహ్వానించాలనే సంప్రదాయం పాటించాల్సివస్తే సీపీఎం నేతను సీఎంగా గవర్నర్‌ నియమించి, ప్రమాణం చేయించాలి. అయితే, అప్పుడు కాంగ్రెస్‌ నేతనే(సీఎల్పీ) గవర్నర్‌ పిలిచి ముఖ్యమంత్రిని చేశారు. కూటములుగా పరిగణించి చూస్తే 140 మంది సభ్యులున్న అసెంబ్లీలో యూడీఎఫ్‌కే మెజారిటీ ఉంది.
 
 1983లో మేఘలయలోనూ ‘పెద్ద పార్టీ’ సంప్రదాయం గాలికొదిలిన గవర్నర్‌!
 1983 ఫిబ్రవరిలో 60 మంది సభ్యుల మేఘలయ అసెంబ్లీకి జరిగిన ఎన్నికల్లో ఏ పక్షానికీ మెజారిటీ రాలేదు. కాంగ్రెస్‌ 25 సీట్లతో అతి పెద్ద పార్టీగా అసెంబ్లీలో అవతరించింది. ప్రతిపక్షాలు ఆల్‌పార్టీ హిల్‌లీడర్స్‌ కాన్ఫరెన్స్‌(ఎపీహెచ్చెల్సీ)కు 15, హిల్‌స్టేట్‌ పీపుల్స్‌ డెమోక్రాటిక్‌ పార్టీ(హెచ్చెస్పీడీపీ)కి 15, పబ్లిక్‌డిమాండ్స్‌ ఇంప్లిమెంటేషన్‌ కన్వెన్షెన్‌(పీడీఐసీ)కి రెండు సీట్లు వచ్చాయి. పెద్ద పార్టీ నేతగా తననే సర్కారు ఏర్పాటుకు ఆహ్వానించాలని కాంగ్రెస్‌ శాసనసభా పక్ష నేత కెప్టెన్‌ విలియంసన్‌ సంగ్మా గవర్నర్‌ను కోరారు. మరోపక్క మెజారిటీకి అవసరమైన 32 మంది(15, 15, 2 కలిపితే 32) సభ్యుల మద్దతు ఉందంటూ ఎపీహెచ్చెల్సీ, హెచ్చెస్పీడీపీ, పీడీఐసీ కూటమి నేతగా ఎన్నికైన బి.బి.లింగ్డో గవర్నర్‌ను ఫిబ్రవరి 23న కలిసి తనను సమర్ధించే  ఎమ్మెల్యేల జాబితా సమర్పించారు.
 
 ఈ మూడు ప్రాంతీయపక్షాలూ యునైటెడ్‌ మేఘాలయా పార్లమెంటరీపార్టీ(యూఎంపీపీ) పేరుతో కొత్త కూటమి ఏర్పాటుచేశాయి. అంతా ఆలోచించాక, ప్రభుత్వం ఏర్పాటుకు లింగ్డోను గవర్నర్‌ మార్చి ఒకటిన ఆహ్వానించారు. అంటే ఇక్కడ అతి పెద్ద పార్టీని సర్కారు ఏర్పాటుకు ఆహ్వానించాలన్న సంప్రదాయం పాటించలేదు. అంటే సందర్భాన్ని బట్టి పెద్ద పార్టీని పిలవాలా? మెజారిటీ శాసనసభ్యుల మద్దతున్న కూటమి నేతను సీఎంగా నియమిస్తూ ఉత్తర్వు జారీచేసి, సీఎంగా ప్రమాణం చేయించాలా? అనే విషయంలో గవర్నర్‌కు ‘విచక్షణాధికారాలు’ ఉన్నాయని, సందర్భాన్ని బట్టి రాజ్యపాల్‌ ఆ పనిచేస్తారని 1952 నుంచీ జరిగిన ఎన్నికల చరిత్ర, సర్కార్ల ఏర్పాటు వివరాలు పరిశీలిస్తే అర్ధమౌతుంది.
 
 1990 ఫిబ్రవరిలో మణిపూర్‌ అసెంబ్లీకి ఎన్నికలు జరిగినప్పుడు కూడా సింగల్‌లార్జెస్ట్‌ పార్టీ కాంగ్రెస్‌కు ప్రభుత్వం ఏర్పాటు చేసే అవకాశం గవర్నర్‌ ఇవ్వలేదు. అప్పుడు వీపీ సింగ్‌ నేతృత్వంలోని నేషనల్‌ ఫ్రంట్‌ సర్కారు కేంద్రంలో అధికారంలో ఉంది. ఇలా కేంద్రంలో అధికారంలో ఉన్న పార్టీ లేదా కూటమి ప్రభావం,  గవర్నర్ల వ్యక్తిత్వం వివిధ సందర్భాల్లో విభిన్న సంప్రదాయాలు అనుసరించడానికి కారణాలవుతున్నాయి.
 
 (సాక్షి నాలెడ్జ్‌ సెంటర్‌)


 తాను ఇంకా పుట్టకముందే తన తల్లి తనను చంపేద్దామనుకున్నారని గోవా గవర్నర్ మృదులా సిన్హా తెలిపారు. తన తల్లి 40 ఏళ్ల వయసులో గర్భం దాల్చడంతో.. జనం ఏమనుకుంటారోనని ఆమె అలా చేశారని గవర్నర్ చెప్పారు. పణజిలో జరిగిన ఓ కార్యక్రమంలో మాట్లాడుతున్న సందర్భంగా ఆమె ఈ విషయాన్ని వెల్లడించారు. ఆడ శిశువులను రక్షించాలని ప్రధాని నరేంద్రమోదీ పిలుపు ఇస్తున్నప్పుడు తనకీ సంఘటన గుర్తుకొచ్చిందని, తన తండ్రే తన ప్రాణాలు కాపాడారని ఆమె చెప్పారు. అబార్షన్ కోసం తన తల్లి అప్పట్లో ఏవో మాత్రలు మింగారని, అయితే తన తండ్రి సమాజం గురించి భయపడకుండా ఆమెను వెంటనే సమీపంలోని నగరంలో గల ఆస్పత్రికి తీసుకెళ్లి చికిత్స చేయించి.. తనను బతికించారని గవర్నర్ వెల్లడించారు. అంతకుముందున్న సంప్రదాయ బంధనాలను తన తండ్రి ఛేదించి.. తన కాళ్ల మీద తాను నిలబడేలా మంచి చదువు చెప్పించారని అన్నారు.
 
 ఇప్పుడున్న 'బేటీ బచావో, బేటీ పఢావో' అన్న నినాదానికి అదనంగా 'పరివార్ బచావో' అనే నినాదం కూడా ఇవ్వాల్సి ఉందని మృదులా సిన్హా చెప్పారు. ఒకప్పుడు అమ్మాయిలను కూడా అబ్బాయిల్లా పెంచాలని చెప్పేవారని.. ఇప్పుడు అలా చెప్పాల్సిన అవసరం ఇక లేదని, పల్లెటూళ్లలో కూడా చాలామంది తండ్రులు తమ పిల్లలను బాగా చదివిస్తున్నారని ఆమె ప్రశంసించారు. మన సంస్కృతి, సంప్రదాయాలు, నైతిక విలువలను పాటించాలని అందరికీ సూచించారు.


 పణజి: స్వచ్ఛ భారత్ కోసం ఒకరోజు కేటాయించాలని హాస్పిటాలిటి పరిశ్రమ వర్గాలను గోవా గవర్నర్ మృదులా సిన్హా కోరారు. ప్రతినెల చివరి శనివారం 'క్లీన్ డే'గా పాటించాలని సూచించారు. కనీసం గంట సమయం పరిసరాల పరిశుభ్రత కోసం కేటాయించాలన్నారు.
 
 గోవా పర్యాటక రాష్ట్రం అయినందున స్వచ్ఛభారత్ కు ప్రత్యేక ప్రాధాన్యం ఇవ్వాలని విజ్ఞప్తి చేశారు. హాస్పిటాలిటి స్టేక్ హోల్డర్ల సమావేశంలో శుక్రవారం గవర్నర్ పాల్గొన్నారు.


 మహిళా పారిశ్రామిక వేత్తలను ప్రభుత్వం ప్రోత్సహించాలి
 గోవా గవర్నర్ మృదులా సిన్హా
 ప్రారంభమైన మహిళా పారిశ్రామిక వేత్తల సదస్సు
  
 సాక్షి, హైదరాబాద్: ‘మగవారి కంటే మహిళల్లోనే వ్యాపార మెళకువలు మెండుగా ఉంటా యి. పారిశ్రామిక, రాజకీయ రంగాల్లో వారి ప్రాతినిధ్యం మరింత పెరగాలి. ఈ దిశగా  కేం ద్ర, రాష్ట్ర ప్రభుత్వాలు మహిళా పారిశ్రామిక వేత్తలకు తగిన విధంగా ప్రోత్సాహకాలను అందించాలి’ అని గోవా రాష్ట్ర గవర్నర్ మృదులా సిన్హా సూచించారు. మహిళా పారిశ్రామిక వేత్తల సమాఖ్య(కోవె) ఆధ్వర్యంలో శనివారమిక్కడ హెచ్‌ఐసీసీలో నిర్వహించిన అంతర్జాతీయ సదస్సు ‘వైజ్- 2014’ను మృదులా సిన్హా ప్రారంభించారు.
  
   ప్రపంచ వ్యాప్తంగా వివిధ దేశాల నుంచి 750 మంది మహిళా పారిశ్రామిక వేత్తలు ఈ సదస్సుకు హాజరయ్యారు. గవర్నర్ మృదులా సిన్హా మాట్లాడుతూ తాము స్థాపించిన పరిశ్రమల ద్వారా వినూత్న ఉత్పత్తులను తెచ్చేందుకు మహిళా పారిశ్రామిక వేత్తలు ఎంతగానో శ్రమిస్తున్నారని, మెరుగైన ఆలోచనలు చేస్తున్నారని చెప్పారు. ఆయా ఉత్పత్తులకు సరైన విమర్శకు లు కూడా మహిళలేనన్నారు.
  
  రవాణామంత్రి పి.మహేందర్‌రెడ్డి మాట్లాడుతూ మహిళా పారి శ్రామికవేత్తలను ప్రోత్సహించేందుకు తెలంగాణ ప్రభుత్వం ప్రత్యేక ఏర్పాట్లు చేసిందన్నారు. పరిశ్రమలు స్థాపించాలనుకున్న వారికి కేవలం 15 రోజుల్లో అన్ని అనుమతులు, మౌలిక వసతులు కల్పించేలా సీఎం కేసీఆర్ చర్యలు చేపట్టారని చెప్పారు. ఈ సందర్భంగా పలువురు ఔత్సాహిక పారిశ్రామిక వేత్తలకు గవర్నర్ మృదులా సిన్హా, మంత్రి మహేందర్‌రెడ్డి చేతుల మీదుగా అవార్డులను ప్రదానం చేశారు. అవార్డులను అం దుకున్న వారిలో పారిశ్రామిక వేత్తలు వందన, లలిత, విజయశారద, రుమానా, జానకి, శైలశ్రీ, జ్యోత్స్న, రిఖితాభాను, రాజేశ్వరి తదితరులున్నారు. కార్యక్రమంలో మహిళా పారిశ్రామిక వేత్తల సమాఖ్య(కోవె) అధ్యక్షురాలు సౌదామినీ, ఉపాధ్యక్షురాలు గిరిజారెడ్డి, కార్యదర్శి గీతాగోటే, ఐఎఎస్ అధికారులు ప్రదీప్‌చంద్ర, రత్నప్రభ తదితరులు పాల్గొన్నారు.


 పనాజీ: గోవా గవర్నర్గా బీజేపీ సీనియర్ నాయకురాలు, రచయిత్రి మృదుల సిన్హా (71) ఆదివారం పనాజీలోని రాజ్భవన్లో ప్రమాణ స్వీకారం చేశారు. మహారాష్ట్ర హైకోర్టు ప్రధాన న్యాయమూర్తి మెహిత్ షా ఆమె చేత ప్రమాణ స్వీకారం చేయించారు. ఈ కార్యక్రమానికి గోవా ముఖ్యమంత్రి మనోహర్ పరికర్తోపాటు మంత్రివర్గ సహాచరులు, ఉన్నతాధికారులు హాజరయ్యారు.
 గోవా గవర్నర్గా పదవి చేపట్టిన మొదటి మహిళగా మృదుల సిన్హా రికార్డు సృష్టించారు. గతంలో గోవా గవర్నర్గా ఉన్న బీవీ వాంఛూను చాపర్ల కుంభకోణంలో సీబీఐ ఆయన్ని ప్రశ్నించింది. దాంతో ఆయన ఆ పదవికి రాజీనామా చేశారు. దీంతో గోవా గవర్నర్ పదవి ఖాళీ అయింది. దాంతో మోడీ ప్రభుత్వం మృదుల సిన్హాను గోవా గవర్నర్గా నియమించాలని రాష్ట్రపతికి సిఫార్స్ చేసిన సంగతి తెలిసిందే.