ఆర్టీసీ చైర్మన్‌ సత్యనారాయణకు సన్మానం
 
 కరీంనగర్‌: మున్నూరుకాపుల ఆత్మీయ సమ్మేళనం(వనభోజనం) ఈ నెల 18న నిర్వహిస్తున్నట్లు ఆ సంఘం జిల్లా అధ్యక్షుడు బొమ్మ రాధాకృష్ణ, ఆహ్వాన కమిటీ కన్వీనర్లు గుగ్గిళ్లపు రమేశ్, బొమ్మ శ్రీరాంచక్రవర్తి తెలిపారు. బుధవారం నగరంలో ఏర్పాటు చేసిన విలేకరుల సమావేశంలో వారు మాట్లాడారు. బొమ్మకల్‌లోని మున్నూరుకాపు హాస్టల్‌ ఆవరణలో ఉదయం పదిగంటలకు నిర్వహించే కార్యక్రమంలో ఆర్టీసీ చైర్మన్, రామగుండం ఎమ్మెల్యే సోమారపు సత్యనారాయణను సన్మానిస్తున్నట్లు చెప్పారు. సాయంత్రం నాలుగుగంటల వరకు సాంస్కృతిక కార్యక్రమాలు ఉంటాయన్నారు. ఎమ్మెల్యేలు గంగుల కమలాకర్, పుట్ట మధు, సంఘం చైర్మన్‌ బొమ్మ వెంకటేశ్వర్‌ హాజరువుతారని, జిల్లా వ్యాప్తంగా ఉన్న మున్నూరుకాపులు కుటుంబ సమేతంగా హాజరు కావాలని కోరారు. 


 *  ఏపీ మున్నూరుకాపు మహాసభ ఉపాధ్యక్షుడు కొండూరి డిమాండ్
 
 సాక్షి, హైదరాబాద్: జనాభా ప్రాతిపదికన మున్నూరుకాపులకు రాబోయే ఎన్నికల్లో సీట్లు కేటాయించాలని రాజకీయ పార్టీలను ఆంధ్రప్రదేశ్ మున్నూరుకాపు మహాసభ రాష్ట్ర ఉపాధ్యక్షుడు కొండూరి వినోద్‌కుమార్ డిమాండ్ చేశారు. ఆంధ్రప్రదేశ్ మున్నూరుకాపు యువకమండలి ప్రధాన కార్యదర్శి బూర్గుభావి రాంమోహన్ ఆధ్వర్యంలో ఆదివారమిక్కడ కాచిగూడలోని మున్నూరుకాపు భవన్‌లో నిర్వహించిన సమావేశంలో ఆయన మాట్లాడారు.
 
 రాష్ట్రవ్యాప్తంగా కోటి మందికిపైగా మున్నూరుకాపులున్నా వారికి తగిన ప్రాతినిధ్యం కల్పించడంలో రాజకీయపార్టీలు నిర్లక్ష్యం వహిస్తున్నాయని కొండూరి ఆరోపించారు. ఓట్లకోసం మున్నూరుకాపులను వాడుకుంటూ సీట్ల విషయంలో పట్టించుకోవట్లేదని విమర్శించారు. మున్నూరుకాపులను నిర్లక్ష్యం చేసే పార్టీలకు గుణపాఠం తప్పదని హెచ్చరించారు. కార్యక్రమంలో మున్నూరుకాపు మహాసభ రాష్ట్ర ప్రధానకార్యదర్శి మణికొండ వెంకటేశ్వర్‌రావు, ఆది నాగేష్, దత్తుమూర్తి, గంప బ్రిజ్‌మోహన్, బండారు శ్రీధర్, అల్లం బాల్‌రెడ్డి తదితరులు పాల్గొన్నారు.