♦ అడ్వకేట్‌ జనరల్‌ రాజీనామా
 ♦ ప్రభుత్వానికి, గవర్నర్‌కు లేఖ
 ♦ రాజకీయ సంక్షోభం నేపథ్యంలో కొత్త చర్చ
 
 సాక్షి, చెన్నై : ప్రభుత్వం సంక్లిష్ట పరిస్థితుల్లో ఉన్న నేపథ్యంలో అడ్వకేట్‌ జనరల్‌ ముత్తుకుమార స్వామి హఠాత్తుగా పదవికి రాజీనామా చేయడం చర్చనీయాంశంగా మారింది. అనారోగ్య కారణాలను వివరిస్తూ, తనను పదవి నుంచి తప్పించాలని ప్రభుత్వానికి, గవర్నర్‌కు ఆయన మంగళవారం లేఖ రాశారు. గత ఏడాది ఆగస్టులో ప్రభుత్వ ప్రధాన కార్యదర్శిగా ఉన్న సోమయాజులు రాజీనామా చేశారు. ఆయన స్థానంలో ముత్తుకుమార స్వామిని దివంగత సీఎం జయలలిత నియమించారు. ప్రభుత్వం తరపున కోర్టుల్లో అన్ని రకాల వాదనలు ఉంచడమే కాదు, కీలక నిర్ణయాలను సైతం ఆయన అనేక సందర్భాల్లో తీసుకున్నారు.
 
 ప్రభుత్వానికి అనేక న్యాయపర అంశాలతో కూడిన సిఫారసులు కూడా చేశారు. రాజీవ్‌ హత్య కేసు నిందితుడు పేరరివాలన్‌కు పెరోల్‌ ఇచ్చేందుకు సైతం ఆయన సిఫారసు ప్రధాన కారణంగా చెప్పవచ్చు. అడ్వకేట్‌ జనరల్‌తో చర్చించకుండా ప్రభుత్వ వర్గాలు ఎలాంటి నిర్ణయాలను ప్రస్తుతం తీసుకోవడం లేదని చెప్పవచ్చు. తాజాగా, ప్రభుత్వం సంక్లిష్ట పరిస్థితుల్ని ఎదుర్కొంటోంది. ఈ సమయంలో అడ్వకేట్‌ జనరల్‌ పాత్ర ప్రభుత్వానికి న్యాయపరంగా తప్పనిసరిగా మారింది. ఈ నేపథ్యంలో మంగళవారం అనారోగ్య కారణాలతో రాజీనామా చేస్తున్నానని ముత్తుకుమార స్వామి ప్రకటించడం చర్చకు దారితీసింది. హఠాత్తుగా తనను తప్పించరూ..! అంటూ ప్రభుత్వానికి, గవర్నర్‌కు ఆయన లేఖ పంపించడంతో బలమైన కారణాలు ఏవో ఉన్నాయన్న ప్రచారం ఊపందుకుంది. ప్రభుత్వానికి వ్యతిరేకంగా ప్రస్తుతం అనేక పిటిషన్లు కోర్టుల్లో పెండింగ్‌లో ఉన్నాయి. ఇందులో గుట్కా, అసెంబ్లీ రగడ వంటివి ప్రధానంగా> పరిగణించవచ్చు.
 
 ప్రస్తుతం గుట్కా వ్యవహారాన్ని అస్త్రంగా చేసుకుని డీఎంకే సభ్యులపై సస్పెన్షన్‌ వేటుకు ప్రభుత్వం సిద్ధం కూడా అవుతోంది. దీనిని వ్యతిరేకిస్తూ కోర్టును ఆశ్రయించేందుకు డీఎంకే సభ్యులు కసరత్తుల్లో ఉన్నారు. ఈ సమయంలో అడ్వకేట్‌ జనరల్‌ ముత్తుకుమార స్వామి రాజీనామా ప్రభుత్వాన్ని ఇరకాటంలో పెట్టేనా అన్న ప్రశ్న బయలుదేరింది. అదే సమయంలో సీఎం పళని స్వామి ఆదేశాల మేరకే ఆయన తప్పుకున్నట్టుగా కూడా ప్రచారం సాగుతోంది. ఆయన స్థానంలో సీనియర్‌ న్యాయవాది విజయనారాయణను నియమించవచ్చనే సంకేతాలు వెలువడుతున్నాయి. అయితే,  ప్రస్తుతం ప్రభుత్వం సంక్లిష్ట పరిస్థితుల్లో ఉండడంతో అడ్వకేట్‌ జనరల్‌ పాత్ర కీలకంగా ఉంది. ఈ సమయంలో కొత్త వారిని నియమిస్తే, ఏ మేరకు ఫలితాలు ఉంటాయో అన్న అనుమానం వ్యక్తంచేసే వాళ్లూ ఉన్నారు. ఈ దృష్ట్యా, సీఎం ఆదేశాల మేరకు ఆయన రాజీనామా చేసి ఉంటారా..? లేదా, మరెవైనా బలమైన కారణాలు ఉన్నాయా..? అనే చర్చ ఊపందుకుంది.


  పీకల్లోతు కష్టాల్లో కూరుకుపోయి కటకటాల వెనుక కాలం గడుపుతున్న మాజీ మంత్రి అగ్రి కృష్ణమూర్తికి మరో కష్టం వచ్చి పడింది. పుండుమీద పుట్రలా మరో ఆరోపణల పిడుగు నెత్తినపడింది.
  
  చెన్నై, సాక్షి ప్రతినిధి:తిరునెల్వేలి జిల్లా వ్యవసాయాధికారి ముత్తు కుమారస్వామి గత ఏడాది  రైలు కిందపడి ఆత్మహత్యకు పాల్పడగా, ఇందుకు బాధ్యుడిని చేస్తూ అప్పటి వ్యవసాయశాఖా మంత్రి అగ్రికృష్ణమూర్తిని ప్రభుత్వం పదవి నుంచి తొలగించింది. సీబీసీఐడీ చేపట్టిన విచారణలో ప్రాథమిక సాక్ష్యాధారాలు లభ్యం కావడంతో అగ్రికృష్ణమూర్తిని అరెస్ట్ చేశారు.     బెయిల్ కోరుతూ ఆయన పెట్టుకున్న పిటిషన్‌ను కోర్టు కొట్టివేయగా ప్రస్తుతం ఆయన జైలు జీవితం గడుపుతున్నారు.
  
  అధికధరకోసం బెదిరింపులు: వ్యవసాయశాఖ ద్వారా పంపిణీ చేసే ఎరువులను అధిక ధరకు కొనుగోలు చేయాల్సిందిగా అగ్రి కృష్ణమూర్తి తనను ఒత్తిడి చేశాడని రిటైర్డు అధికారి జయసింగ్ జ్ఞానదురై (58) ఆరోపించాడు. శుక్రవారమే ఉద్యోగ విరమణ చేసిన జయసింగ్‌కు మదురైలో వీడ్కోలు సభను నిర్వహించారు. సభనుద్దేశించి ఆయన మాట్లాడుతూ విధి నిర్వహణలో తాను అనేక ఆటుపోట్లకు గురైనానని, ముఖ్యంగా మాజీ మంత్రి అగ్రి కృష్ణమూర్తి సంఘటనను ఉదహరించారు. శాఖాపరంగా ఎరువుల కొనుగోలుకు గత ఏడాది డిసెంబరులోనే ఆర్డరు పెట్టగా, ఈ విషయం తెలియని సదరు మాజీ మంత్రి..అధిక ధరకు ఎరువు కొనుగోలు చేసేలా ఆర్డరుపై సంతకం పెట్టాలని కోరాడని చెప్పాడు.
  
   అసలు ధర కిలో *60 కాగా *120 కొనుగోలు చేయాలని మంత్రి ఆదేశించారని తెలిపాడు. అయితే ఇందుకు తాను అంగీకరించక పోవడంతో మధురై నుండి చె న్నైకి బదిలీ చేస్తానని బెదిరించాడని చెప్పారు. అయినా తాను ససేమిరా అనడంతో మరో మంత్రి సహచరుడు ఫోన్ చేసి మంత్రి మాట్లాడాలని కోరుతున్నాడని సందేశం పంపాడని అన్నారు. అయినా మంత్రి ఆదేశాలకు తాను లొంగకుండా సెల్‌ఫోన్ స్విచ్‌ఆఫ్ చేశానని తెలిపాడు. జిల్లా కలెక్టర్ మొదలుకుని ఉన్నతాధికారులు అందరూ తనకు అండగా నిలిచినందునే మంత్రి మాటలను ధిక్కరించగలిగానని కృతజ్ఞతలు తెలిపాడు. పీఎంకే రాందాస్ తాజా ఆరోపణలకు స్పందిస్తూ, న్యాయవిచారణ జరిపితే అగ్రి కృష్ణమూర్తి అవినీతి అక్రమాలు మరిన్ని వెలుగుచూస్తాయని రాష్ట్రప్రభుత్వాన్ని శనివారం డిమాండ్ చేశారు. బెయిల్ మంజూరుకాక అసలే బెంగపడిపోయి ఉన్న మాజీ మంత్రి వర్యులకు మరో పిడుగుపాటులా కొత్త ఆరోపణలు చుట్టుకున్నాయి.