భోపాల్‌: పాకిస్తాన్‌ ప్రజలు సంతోషంగా లేరని ఆర్‌ఎస్‌ఎస్‌ చీఫ్‌ మోహన్‌ భగవత్‌ అన్నారు. దేశ విభజన తప్పని పాకిస్తాన్‌ ప్రజలంతా అంటున్నారన్నారు. అఖండ భారత్‌ వాస్తవం కాగా విభజిత భారత్‌ ఒక పీడకల అని అభివర్ణించారు. భారతదేశ విభజన తప్పనే విషయాన్ని, స్వాతంత్య్రం వచ్చిన ఏడు దశాబ్దాల అనంతరం ఇప్పుడు వారు నమ్ముతున్నారని భగవత్‌ వ్యాఖ్యానించారు. ‘స్వాతంత్య్రానికి ముందు భారత్‌ నుంచి తెగదెంపులు చేసుకుని అహంకారపూరితంగా వెళ్లిన వారింకా సంతోషంగా ఉన్నారా? లేదు, బాధలు పడుతున్నారు’ అంటూ పాకిస్తానీయులనుద్దేశించి ఆయన అన్నారు. రెండు దేశాల మధ్య దెబ్బతిన్న సంబంధాలపై ఆయన.. ‘పాకిస్తాన్‌పై భారత్‌ దాడి చేయాలన్నది నా ఉద్దేశం ఎంతమాత్రం కాదు. ఇతరులపై దాడులు చేయాలంటూ పిలుపునిచ్చే సంస్కృతి భారత్‌లో లేదు. ఆత్మరక్షణ కోసం దాడులకు తగిన బుద్ధి చెప్పాలనేదే భారత్‌ సంస్కృతి. దీనినే ఆచరిస్తాం. ఇదే కొనసాగుతుంది’అని పేర్కొన్నారు. స్వాతంత్య్ర యోధుడు హేము కలానీ జయంతిని పురస్కరించుకుని సింధీలు భోపాల్‌లో శుక్రవారం ఏర్పాటు చేసిన కార్యక్రమంలో భగవత్‌ మాట్లాడారు.


 సంతోష దేశాల జాబితాలో 117వ స్థానంలో భారత్
 అత్యంత సంతోషంగా ఉన్న దేశం స్విట్జర్లాండ్
  
 న్యూయార్క్: ప్రపంచంలో అత్యంత సంతోషంగా ఉన్న దేశాల జాబితాలో భారత్ 117వ స్థానంలో నిలిచింది. ఐక్యరాజ్యసమితి మొత్తం 158 దేశాల్లో ఉన్న స్థూల జాతీయోత్పత్తి (జీడీపీ), అవినీతి, జీవితకాలం, కష్టాల్లో ఉన్నప్పుడు దొరికే సామాజిక మద్దతు, స్వేచ్ఛా నిర్ణయాలు, ఔదార్యం తదితర అంశాల ఆధారంగా నివేదిక రూపొందించింది. ఇందులో 2015కు గాను అత్యంత ఆనందంగా ఉన్న దేశంగా స్విట్జర్లాండ్ మొదటి స్థానాన్ని కైవసం చేసుకుంది.
  
  టాప్ 10లో ఐస్‌లాండ్, డెన్మార్క్, నార్వే, కెనడా, ఫిన్‌లాండ్, నెదర్లాండ్స్, స్వీడన్, న్యూజిలాండ్, ఆస్ట్రేలియా ఉన్నాయి. ప్రపంచ సంతోష నివేదిక పేరుతో ఐరాసకు చెందిన సుస్థిర అభివృద్ధి పరిష్కారాల నెట్‌వర్క్ (ఎస్‌డీఎస్‌ఎన్) సంతోష దేశాల జాబితాను ప్రచురించింది. ఇందులో భారత్ స్థానం పాకిస్తాన్ (81), పాలస్తీనా (108), బంగ్లాదేశ్ (109), ఉక్రెయిన్ (111), ఇరాక్ (112) కంటే దిగువన ఉండటం గమనార్హం. 2013లో 111వ స్థానంలో భారత్ తాజా జాబితాలో మరో 6 స్థానాలు పడిపోయి 117లో నిలిచింది. అమెరికా 15వ ర్యాంక్‌లో ఉండగా, తర్వాత బ్రిటన్ (21), సింగపూర్ (24), సౌదీ అరేబియా (35), జపాన్ (46), చైనా (86) ఉన్నాయి.
  
  అత్యంత తక్కువ సంతోషంగా 10 దేశాల్లో అఫ్ఘానిస్తాన్, సిరియాతోపాటు ఆఫ్రికాలోని టొగో, బురుండీ, బెనిన్, రాండా, బుర్కినా ఫాసో, ఐవరీ కోస్ట్, గినియా, చాడ్ ఉన్నాయి. కాగా, ప్రపంచ జనాభాలో మూడింట ఒకవంతు 18 ఏళ్ల వయసులోపు ఉన్నారని ఐరాస తెలిపింది. పిల్లల అభివృద్ధిలో విద్య, ప్రవర్తన, ఉద్వేగం అనే మూడు అంశాలు కీలక పాత్ర పోషిస్తాయని పేర్కొంది. ప్రపంచవ్యాప్తంగా 20 కోట్ల మంది పిల్లలు మానసిక అనారోగ్యంతో బాధపడుతున్నారని, వీరిలో కేవలం నాలుగోవంతు మాత్రమే చికిత్స పొందుతున్నారని వెల్లడించింది.