న్యూఢిల్లీ: జమ్మూ కశ్మీర్, ఈశాన్య భారతం, నక్సల్స్‌ ప్రభావిత ప్రాంతాల్లో సాపేక్షంగా శాంతిని నెలకొల్పినట్టు కేంద్ర హోం మంత్రి అమిత్‌ షా ప్రకటించారు. ఉగ్రవాదం, చొరబాట్లు, మతపరమైన ఉద్రిక్తతలను సృష్టించే కుట్రలపై పోరాటం కొనసాగుతుందన్నారు. పోలీసు అమరవీరుల సంస్మరణ దినోత్సవం సందర్భంగా సోమవారం జరిగిన కార్యక్రమంలో ఆయన మాట్లాడారు. పోలీసు అమరుల త్యాగం వృథా కాదన్నారు. ‘‘స్వాతంత్య్రం వచ్చినప్పటి నుంచి దేశ భద్రత కోసం 36,438 మంది పోలీసులు ప్రాణత్యాగం చేశారు. గతేడాదే 216 మంది ప్రాణాలు కోల్పోయారు’’ అని ఆవేదన వ్యక్తం చేశారు. వారి త్యాగానికి దేశం ఎప్పటికీ రుణపడి ఉంటుందన్నారు. కొత్త నేర న్యాయ చట్టాలతో భారత న్యాయ వ్యవస్థ ప్రపంచంలోనే అత్యంత ఆధునికంగా మారిందన్నారు. పోలీసు సిబ్బంది, కుటుంబీకులు ఇక ఏ ఆయుష్మాన్‌ ఆసుపత్రిలోనైనా ఉచిత చికిత్స పొందవచ్చని హోం మంత్రి తెలిపారు. ‘‘సీఏపీఎఫ్‌ సిబ్బంది కోసం 13 వేల ఇళ్ల నిర్మాణానికి అనుమతులిచ్చాం. వచ్చే మార్చి నాటికి 11,276 ఇళ్లు సిద్ధమవుతాయి’’ అని వెల్లడించారు. విధి నిర్వహణలో ప్రాణాలర్పించిన పోలీసు సిబ్బందికి ఆయన నివాళులర్పించారు.


 న్యూఢిల్లీ: దేశం కోసం నిస్వార్ధంగా పనిచేసే పోలీస్ వ్యవస్థపై ప్రధాని నరేంద్ర మోదీ ప్రశంసల వర్షం కురిపించారు. దేశ సేవలో భాగంగా ప్రాణాల్నేపణంగా పెట్టిన పోలీసుల శౌర్యాన్ని పదాల్లో వర్ణించలేమన్నారు. మంగళవారం పోలీస్ స్మారకోత్సవం సందర్భంగా  ట్విట్టర్ లో ఈ వ్యాఖ్యల్ని పోస్ట్ చేశారు. 'పనిలో పోలీసులు చూపే నిబద్ధత వెలకట్టలేనిది. వారు దేశానికి సేవ చేసే క్రమంలో ప్రాణాలను కూడా లెక్క చేయరు. వారి శౌర్యాన్ని పదాల్లో వర్ణించలేను'అని తెలిపారు. వారి యొక్క సేవ తమకు ఎప్పుడూ ఆదర్శంగా నిలుస్తోందని మోదీ స్పష్టం చేశారు.