సాక్షి, కరీంనగర్‌ : జిల్లా మైనార్టీ సంక్షేమశాఖకు ఏడాదిన్నరగా రెగ్యులర్‌ అధికారి కరువయ్యారు. కీలకమైన జిల్లా అధికారి పోస్టును రాష్ట్ర ప్రభుత్వం భర్తీ చేయకపోవడంతో ఏడాదిన్నరగా ఇన్‌చార్జి అధికారుల పాలన సాగుతోంది. ప్రస్తుతం మైనారిటీ సంక్షేమశాఖ ఇన్‌చార్జి అధికారిగా కొనసాగుతున్న పవన్‌కుమార్‌కు అదనంగా మెప్మా పీడీగా, బీసీ సంక్షేమశాఖ అధికారిగా కొనసాగుతున్నారు. నిన్నటి వరకు సైనిక సంక్షేమశాఖ అధికారిగా సైతం విధులు నిర్వహించారు. ప్రస్తుతం మూడుశాఖలు ప్రధానమైనవే కావడంతో పనిభారం పెరిగి పనుల్లో జాప్యం జరుగుతోంది. ఇలా ఒక్క మైనార్టీ సంక్షేమ శాఖ కాదు అన్ని శాఖలకు పూర్తిస్తాయి సిబ్బంది, అధికారులు లేకపోవడంతో ఒత్తిడికి గురై అదనపు భారాన్ని మోయలేక బాధ్యతల నుంచి తప్పుకుంటున్నారు. ఇటు శాఖ పర కార్యక్రమాలు, పథకాల అమలుపై కొంత ప్రభావం కనిపిస్తోంది. జిల్లా మైనార్టీ  సంక్షేమ శాఖకు రెగ్యులర్‌ అధికారిగా మహ్మద్‌ షఫీయొద్దీన్‌ 2018 ఏప్రిల్‌ వరకు పనిచేసి  హైదరాబాద్‌ మైనార్టీ సంక్షేమ శాఖ కార్యాలయానికి బదిలీ అయ్యారు.   ప్రభుత్వం మరో అధికారిని జిల్లాకు పంపకపోవడంతో కలెక్టర్‌ సర్ఫరాజ్‌ అహ్మద్‌ మెప్మా పీడీగా కొనసాగుతున్న పవన్‌కుమార్‌ను ఇన్‌చార్జిగా నియమించారు. 2014–15 ఆర్థిక సంవత్సరానికి సంబంధించి స్వయం ఉపాధి రుణాల కోసం 340 మందికిపైగా దరఖాస్తులు చేసుకోగా కేవలం 42 మందికి రూ. 50 వేల చొప్పున చెక్కులు ఇచ్చిన చేతులు దులుపుకున్నారు. ఇలా మూడేళ్లుగా మైనార్టీ సంక్షేమ శాఖ నుంచి దరఖాస్తులు తీసుకోవడం మినహా రుణాలు అందజేసిన దాఖాలాలు లేవని మైనార్టీ వర్గాల నేతలు ఆవేదన వ్యక్తం చేస్తున్నారు.   రెగ్యులర్‌ అధికారి ఉంటేనే పాలనపై పట్టు....  ఏ శాఖకైనా రెగ్యులర్‌ జిల్లా అధికారి ఉంటేనే పరిపాలన సవ్యంగా జరుగుతుంది. ఇటు ప్రభుత్వ కార్యక్రమాలు, పథకాల అమలు సులువుగా ఉంటుంది. కానీ మైనార్టీ సంక్షేమ శాఖకు 2018 మే నుంచి రెగ్యులర్‌ అధికారి లేకపోవడం మైనార్టీ ప్రజలకు లోటుగానే మారిందనే చెప్పాలి. ముఖ్యంగా ఈ శాఖ ద్వారా జిల్లాలో మైనార్టీ రెసిడెన్షియల్‌ పాఠశాలలు కొనసాగుతున్నాయి. వాటి పర్యవేక్షణకు రెగ్యులర్‌ అధికారి అవసరం. కాగా సంక్షేమ పథకాలైన సబ్సిడీ రుణాలు, వాటి గ్రౌండింగ్‌ , విద్యార్థులకు ఉపకార వేతనాల మంజూరు, తదితర కార్యక్రమాల పర్యవేక్షణ చేయాల్సి ఉంటుంది. ప్రజావాణిలో కూడా మైనార్టీ సంఘాల చాలాసార్లు రెగ్యులర్‌ అధికారిని నియమించాలని కలెక్టర్‌కు వినతిపత్రాలు అందజేశాయి. వాటిని ప్రభుత్వానికి పంపుతున్నా మైనార్టీ శాఖకు రెగ్యులర్‌ అధికారిని నియమించడం లేదు. 


 ఇందూరు (నిజామాబాద్‌ అర్బన్‌) : జిల్లాల పునర్విభజనకు ముందే ఉమ్మడి జిల్లాలోని ప్రధాన శాఖల్లో జిల్లా అధికారుల పోస్టులు ఖాళీగా ఉన్నాయి. ఇన్‌చార్జి అధికారులతో ఆయా శాఖలను నెట్టుకొస్తున్నారు. ప్రస్తుతం కామారెడ్డి విడిపోయి జిల్లాగా అవతరించిన అనంతరం నిజామాబాద్‌ జిల్లా పరిస్థితి మరీ దారుణంగా మారింది. సిబ్బంది, అధికారుల కొరతతో కార్యాలయాలు కళ తప్పాయి. ముందే అధికారులు, సిబ్బంది కొరత ఉందంటే పదవీ విరమణ కారణాలతో ఖాళీల సంఖ్య ఎక్కువైంది. నిజామాబాద్‌ ఆర్డీవో పోస్టు నెల రోజులకు పైబడి ఖాళీగా ఉంది. గతంలో ఆర్డీవోగా పనిచేసిన యాదిరెడ్డి డీఆర్వోగా పదోన్నతిపై వేరే జిల్లాకు వెళ్లారు. ప్రభుత్వం రెగ్యులర్‌ అధికారిని పంపడంలో జాప్యం చేస్తోంది.
 
 రెవెన్యూ డివిజన్లలో పెద్దదైన నిజామాబాద్‌ డివిజన్‌కు ఆర్డీవోను నియమించక పోవడంతో రెవెన్యూ పరిపాలన చతికిల పడింది. ఇన్‌చార్జి ఆర్డీవోగా ప్రస్తుత డీఆర్వో పద్మాకర్‌కు బాధ్యతలు అప్పగించారు. అలాగే, జిల్లాకు రెండో గుండెకాయ వంటి జిల్లా పరిషత్‌ కార్యాలయానికి రెగ్యులర్‌ సీఈవో లేరు. మొన్నటివరకు సీఈవోగా పని చేసిన మోహన్‌లాల్‌ డీఆర్వోగా పదోన్నతిపై వేరే జిల్లాకు బదిలీ అయ్యారు. జెడ్పీ డిప్యూటీ సీఈవో గోవింద్‌కు ఇన్‌చార్జీగా బాధ్యతలు అప్పగించారు. నెల రోజులు గడిచినా ఆ పోస్టుకు రెగ్యులర్‌ అధికారిని నియమించలేదు.
 
 గిరిజన సంక్షేమ శాఖలోనూ అంతే..
 జిల్లా గిరిజన సంక్షేమ శాఖ కార్యాలయానికొస్తే డీటీడబ్ల్యూవోగా మొన్నటివరకు పని చేసిన విజయ్‌కుమార్‌ గత డిసెంబర్‌లో పదవీ విరమణ పొందారు. రెగ్యులర్‌ అధికారిని నియమించక పోవడంతో బీసీ సంక్షేమాధికారి విమలాదేవికి ఇన్‌చార్జి బాధ్యతలు అప్పగించారు. అలాగే ఎస్సీ సంక్షేమ శాఖ, కార్పొరేషన్‌కు రెగ్యులర్‌ అధికారులు లేరు. ప్రస్తుతం ఎస్సీ సంక్షేమ శాఖకు జగదీశ్వర్‌ను, ఎస్సీ కార్పొరేషన్‌ బాధ్యతలను మైనార్టీ వెల్ఫేర్‌ అధికారి కిషన్‌కు అప్పగించారు. అలాగే, జిల్లా ట్రెజరీ కార్యాలయంలో డిప్యూటీ డైరెక్టర్‌ పోస్టు సెప్టెంబర్‌ నుంచి ఖాళీగా ఉంది. అప్పటి నుంచి కొందరు అధికారులు ఇన్‌చార్జీలుగా వ్యవహరించగా, ప్రస్తుతం రంగారెడ్డి జిల్లాకు చెందిన ఏటీవో మోహన్‌రెడ్డి అదనపు బాధ్యతలు నిర్వర్తిస్తున్నారు.
 
 జిల్లా మహిళా శిశు సంక్షేమ శాఖ (ఐసీడీఎస్‌) ప్రాజెక్టు డైరెక్టర్‌ గత డిసెంబర్‌లో పదవీ విరమణ పొందడంతో ఆ పోస్టు ఖాళీ అయింది. దీంతో నిజామాబాద్‌ రూరల్‌ ప్రాజెక్టు సీడీపీవో ఝాన్సీరాణికి ఇన్‌చార్జి బాధ్యతలు అప్పగించారు. శ్రీరాంసాగర్‌ ప్రాజెక్టు డిప్యూటీ కలెక్టర్‌ పోస్టు కూడా ఖాళీగానే ఉంది. జాతీయ బాల కార్మిక నిర్మూలన సంస్థ (ఎన్‌ఎల్‌పీ) ప్రాజెక్టు డైరెక్టర్‌ సుధాకర్‌రావు అవినీతి, అక్రమాల ఆరోపణలు ఎదుర్కొని ఇటీవలే సస్పెండ్‌ అయ్యారు. ఈ పోస్టులో మరో అధికారిని నియమించలేదు.
 
 నెలాఖరున జేపీ, కలెక్టరేట్‌ ఏవోల పదవీ విరమణ..
 ఓ వైపు జిల్లాలో కీలక పోస్టులు ఖాళీగా మారి ఇన్‌చార్జీల పాలన కొనసాగుతుంటే, ఈ నెలాఖరున మరో రెండు కీలక పోస్టులు ఖాళీ కాబోతున్నాయి. జాయింట్‌ కలెక్టర్‌ రవీందర్‌రెడ్డి ఈ నెలాఖరున పదవీ విరమణ పొందనున్నారు. కలెక్టరేట్‌ పరిపాలన విభాగం (ఏవో) అధికారిగా పని చేస్తున్న గంగాధర్‌ కూడా ఇదే నెలలో రిటైర్డ్‌ కానున్నారు. ఇన్‌చార్జి ఏవోగా సీనియర్‌ తహసీల్దార్‌కు బాధ్యతలు అప్పగించడానికి కలెక్టరేట్‌ అధికారులు కసరత్తు చేస్తున్నారు. జేసీ సహా కీలక పోస్టులన్నీ ఖాళీ కావడంతో పరిపాలనకు మరింత ఇబ్బందులు వచ్చి పడే అవకాశాలున్నాయి.
 
 డివిజన్, మండల స్థాయి పోస్టులూ అంతే..
 ఇక, డివిజన్, మండల స్థాయి పోస్టులు కూడా చాలా వరకు ఖాళీగానే ఉన్నాయి. డివిజన్‌ స్థాయిలో నిజామాబాద్‌ ఆర్డీవో పోస్టు ఒకటి కాగా, ఎస్సీ సంక్షేమ శాఖలో బోధన్, ఆర్మూర్‌ సహాయ సంక్షేమాధికారుల పోస్టులకు రెగ్యులర్‌ అధికారులు లేరు. దీంతో హాస్టళ్లను పర్యవేక్షించే వారే కరువయ్యారు.
 
 అలాగే కొన్ని మండలాల్లో రెగ్యులర్‌ తహసీల్దార్లు లేరు. ఇందల్వాయి, రుద్రూర్, ఏర్గట్ల, ముప్కాల్, నిజామాబాద్‌ రూరల్‌ మండలాల్లో ఇన్‌చార్జిలతోనే కథ నడిపిస్తున్నారు. మోర్తాడ్, బాల్కొండ, రెంజల్, భీమ్‌గల్‌ మండలాలకు ఎంపీడీవోలు లేరు. అక్కడ ఈవోపీఆర్డీలే ఇన్‌చార్జి ఎంపీడీవోలుగా వ్యవహరిస్తున్నారు.


 పదవీ విరమణ కారణంగా కొన్ని పోస్టులు ఖాళీ అవుతున్నాయి. బదిలీల వల్ల మరికొన్ని ఖాళీలు ఏర్పడుతున్నాయి. ఆయా స్థానాల్లో మాత్రం కొత్త అధికారులు రావడం లేదు. జిల్లాలో ఉన్న అధికారులకే ఇన్‌చార్జి బాధ్యతలు అప్పగించి చేతులు దులుపుకుంటోంది ప్రభుత్వం. దీంతో ఏళ్లుగా రెగ్యులర్ అధికారులు లేక ఆయా శాఖల్లో పాలన కుంటుపడుతోంది.
  
 ఇందూరు :  సంక్షేమ పథకాల ఫలాలు ప్రజలకు సక్రమంగా అందాలంటే సమర్థులైన అధికారులుండాలి. కింది స్థాయి ఉద్యోగులతో పని చేయించాలన్నా, వారిని క్రమశిక్షణలో ఉంచాలన్నా ఆయా శాఖలకు రెగ్యులర్ అధికారులు ఉండాలి. అప్పుడే ఆశించిన ఫలితా లు వస్తాయి. అయితే ప్రభుత్వాలు నిర్లక్ష్యంగా వ్యవహరిస్తూ ఖాళీల భర్తీపై దృష్టి సారించకపోవడంతో పాలన కుంటుపడుతోంది. ఇందూరు జిల్లాలో పలు జిల్లా స్థాయి పోస్టులు ఖాళీగా ఉన్నాయి. సంక్షేమ శాఖలు, కార్పొరేషన్లలో జిల్లాస్థాయి అధికారులు కరువయ్యారు. దీంతో చాలా శాఖల్లో ఇన్‌చార్జిలే కని పిస్తున్నారు. ఒక అధికారి బదిలీపై వెళ్లడం వల్లో, ఉద్యోగ విరమణ పొందడం వల్లో ఖాళీ అయిన స్థానాన్ని వెంటనే భర్తీ చేయకపోవడం వల్ల ఈ పరి స్థితి వచ్చింది.
  
 అయిష్టంగానే అయినా..
 ఇష్టం లేకపోయినా ఉన్నతాధికారుల ఆదేశాల మేర కు పలువురు అదనపు బాధ్యతలు స్వీకరిస్తున్నారు. కొందరు అధికారులకు రెండు మూడు శాఖల బాధ్యతలు కూడా అప్పగించారు. రెండు బాధ్యతలు నిర్వర్తించడం తమకు తలకు మించిన భారంగా మారిం దని పలువురు అధికారులు పేర్కొంటున్నారు. తమ సొంత శాఖను చూసుకోవడంతో పాటు అదనంగా మరో శాఖ బాధ్యతలు నిర్వహించడం వల్ల మానసిక ఒత్తిడి పెరుగుతోందని అంటున్నారు. ఒక పూట ఇక్కడ.. మరో పూట అక్కడ విధులు నిర్వర్తించడం సాధ్యం కావడంలేదంటున్నారు. పని భారం తట్టుకోలేక ‘‘నాకు ఇన్‌చార్జి బాధ్యతలు వద్దు’’ అని పలువురు అధికారులు కలెక్టర్‌కు మొరపెట్టుకున్న దాఖలాలున్నాయి. ‘‘రెగ్యులర్ అధికారి వచ్చే వరకు ఎలాగోలా నెట్టుకురండి’’ అంటూ వారిని సముదాయించినట్లు సమాచారం.
  
 గాడి తప్పిన పాలన
 రెగ్యులర్ జిల్లా స్థాయి అధికారి లేకపోవడంతో ఆయా శాఖల పాలన గాడితప్పింది. సిబ్బంది, ఉద్యోగులు క్రమ శిక్షణ తప్పి ఇష్టానుసారంగా వ్యవహరిస్తున్నారనే ఆరోపణలు వస్తున్నాయి. పట్టించుకునే వారు లేకపోవడంతో ప్రభుత్వం అమలు చేసే పథకాలు సక్రమంగా ప్రజలను చేరడం లేదు. తెలంగాణ రాష్ట్రం సిద్ధించిన నేపథ్యంలో ఉద్యోగాలను భర్తీ చేస్తారని, ఆయా శాఖలకు రెగ్యులర్ అధికారులను నియమిస్తారని ప్రజలు ఆశిస్తున్నారు. జిల్లాలో ప్రధాన శాఖల్లో ఖాళీగా ఉన్న జిల్లా స్థాయి అధికారి పోస్టుల్లో రెగ్యులర్ అధికారులను నియమిస్తే బాగుంటుందని ఉద్యోగులు పేర్కొంటున్నారు.
  
  జిల్లాలో ఇదీ పరిస్థితి
 
 *  జిల్లా గిరిజన సంక్షేమాధికారిగా ఉన్న రాములు గత నెలలో పదవీ విరమణ పొందారు. ఆ స్థానంలో సాంఘిక సంక్షేమ శాఖకు చెందిన సహాయ అధికారి(ఏఎస్‌డబ్ల్యూవో) జగదీశ్వర్‌రెడ్డికి ఇన్‌చార్జి బాధ్యతలు అప్పగించారు.
 *  గిరిజన సంక్షేమ శాఖ అసిస్టెంట్ అధికారి(ఏటీడబ్ల్యూవో) పదవీ విరమణ పొందటంతో శంకర్ అనే వార్డెన్ ఇన్‌చార్జ్ గిరిజన సంక్షేమ శాఖ అసిస్టెంట్ అధికారిగా కొనసాగుతున్నారు.
 *   జిల్లా సాంఘిక సంక్షేమ శాఖలో డిప్యూటీ డెరైక్టర్ పోస్టు ఏడాదికిపైగా ఖాళీగా ఉంది. సాంఘిక సంక్షేమ శాఖ జాయింట్ డెరైక్టర్ ఖాలేబ్ ఆ బాధ్యతలు కూడా చూస్తున్నారు.
 *  జిల్లా ఎస్సీ కార్పొరేషన్ అధికారి రాజేశ్వర్ 16 నెలల క్రితం వేరే జిల్లాకు బదిలీపై వెళ్లారు. ఇంత వరకు ఆయన స్థానంలో రెగ్యులర్ అధికారి నియామకం కాలేదు. సాంఘిక సంక్షేమ శాఖ జేడీ ఖాలేబ్ అదనపు బాధ్యతలు చూస్తున్నారు.
 *  రెండేళ్లుగా జిల్లా సాంఘిక సంక్షేమాధికారి(డీఎస్‌డబ్ల్యూవో) లేరు. ప్రస్తుతం అల్ఫోన్స్ అనే అధికారి ఇన్‌చార్జిగా ఉన్నారు.
 *  జిల్లా వెనుకబడిన తరగతుల సంక్షేమ శాఖ అధికారిగా పనిచేసిన రాజయ్య ఏడాది క్రితం పదవీ విరమణ పొందారు. ఇప్పటివరకు రెగ్యులర్ అధికారిని నియమించలేదు. ఏడాదిగా బోధన్ ఏబీసీడబ్ల్యూవో విమలాదేవి ఇన్‌చార్జి బీసీడబ్ల్యూవోగా కొనసాగుతున్నారు.
 *  బీసీ కార్పొరేషన్ ఈడీగా పని చేసిన రాజశేఖర్ రెండేళ్ల క్రితం వేరే జిల్లాకు బదిలీ అయ్యారు. అర్బన్ ఐకేపీ పీడీ సత్యనారాయణ ఇన్‌చార్జి బాధ్యతలు నిర్వర్తిస్తున్నారు.
 *  డీఆర్‌డీఏ ఏపీడీ(అడిషనల్ ప్రాజెక్టు డెరైక్టర్) పోస్టు రెండేళ్లుగా ఖాళీగా ఉంది. ఇన్‌చార్జి బాధ్యతలు సైతం ఎవరికీ అప్పగించలేదు.
 *  జిల్లా అదనపు జాయింట్ కలెక్టర్(ఏజేసీ) శేషాద్రి ఆనారోగ్యం కారణంగా సెలవులో ఉన్నారు. జిల్లా పరిషత్ ముఖ్య కార్యనిర్వహణ అధికారి రాజారాం ఇన్‌చార్జి ఏజేసీగా కొనసాగుతున్నారు.
 *  సైనిక సంక్షేమ శాఖకు ఏడాదిగా రెగ్యులర్ అధికారి లేరు. ఐకేపీ పీడీ వెంకటేశం ఇన్‌చార్జి అధికారిగా వ్యవహరిస్తున్నారు.
 * జిల్లా పరిషత్‌లో తొమ్మిది నెలలుగా డిప్యూటీ సీఈఓ లేరు. ఏఓ పోస్టు కూడా ఖాళీగా ఉంది.