ఖానాపూర్ : అభం శుభం తెలియని ఆ చిన్నారిని కారు చిదిమేసింది. అప్పుడే నిద్రలేచి ఆరుబయట ఉన్న మూడేళ్లు కూడా నిండని చిన్నారి బాలున్ని కారు రూపంలో మృత్యువు కబళించింది. ఎస్సై సునిల్ తెలిపిన వివరాల ప్రకారం..  కడెం మండల కేంద్రంలోని సుభాష్‌నగర్ కాలనీకి చెందిన నిరుపేద చిరు వ్యాపారి అయిన శేక్ మహ్మద్, పర్సానాబేగం దంపతులకు ఇద్దరు కుమారులు.
 
 పెద్ద కుమారుడు వికలాంగుడు కాగా, చిన్న కుమారుడు శేక్ ఇసాన్(3). ఎప్పటిలాగే ఉదయం 9 గంటల ప్రాంతంలో ఇంటి నుంచి బయటకు వచ్చాడు. అదే సమయంలో కాలనీ నుంచి అతివేగంగా వస్తున్న కారు బాలున్ని ఢీకొట్టింది. కుటుంబ సభ్యులు బయటకు వచ్చి చూసే సరికి కొడుకు రక్తంమడుగులో ఉన్నాడు. తల, కాళ్లు, చేతులకు బలమైన గాయాలు కావడంతో అక్కడికక్కడే చనిపోయాడు. కారు నడుపుతున్న శేక్ షకీల్‌పై కేసు నమోదు చేసినట్లు ఎస్సై చెప్పారు.