వాషింగ్టన్‌: బోయింగ్‌ స్టార్‌లైనర్‌ వ్యోమనౌకలో సాంకేతిక సమస్యలతో అంతర్జాతీయ అంతరిక్ష కేంద్రానికే (ఐఎస్‌ఎస్‌) పరిమితమైన వ్యోమగాములు సునీతా విలియమ్స్, బుచ్‌ విల్మోర్‌ విషయంలో ఉత్కంఠ పెరుగుతోంది. వారు మరో 19 రోజుల్లో వారం అక్కడి నుంచి బయల్దేరకపోతే మరో కీలక ప్రయోగాన్ని నిలిపివేయక తప్పదు. అందుకే నాసా సైంటిస్టులు, బోయింగ్‌ ఇంజనీర్లు ఆందోళన చెందుతున్నారు. స్టార్‌లైనర్‌ స్పేస్‌క్రాఫ్ట్‌లో సాంకేతిక లోపాలను సరిదిద్దడానికి నిరంతరం శ్రమిస్తున్నారు. అయినా పెద్దగా ఫలితం కనిపించడం లేదు. ఎందుకీ ఆందోళన? విమానాల తయారీ దిగ్గజం బోయింగ్‌ సంస్థ తొలిసారి అభివృద్ధి చేసిన స్టార్‌లైనర్‌ స్పేస్‌క్రాఫ్ట్‌ను ప్రయోగాత్మకంగా పరీక్షించేందుకు సునీత, విల్మోర్‌ జూన్‌ 5న ఐఎస్‌ఎస్‌కు బయలుదేరారు. అయితే నింగిలోకి దూసుకెళ్తున్న క్రమంలోనే అందులో సాంకేతిక లోపాలు తలెత్తాయి. 28 థ్రస్టర్లకు గాను 5 మొరాయించాయి. సరీ్వస్‌ మాడ్యూల్‌లో ఐదు చోట్ల హీలియం లీకేజీలు బయటపడ్డాయి. సానా సైంటిస్టులు భూమి నుంచే రిమోట్‌ కంట్రోల్‌తో తాత్కాలిక మరమ్మతులు చేశారు. తర్వాత స్టార్‌లైనర్‌ ఐఎస్‌ఎస్‌తో విజయవంతంగా అనుసంధానమై జూన్‌ 13న సునీత, విల్మోర్‌ ఐఎస్‌ఎస్‌లోకి అడుగుపెట్టారు. షెడ్యూల్‌ ప్రకారం వారం తర్వాత స్టార్‌లైనర్‌లో వెనక్కు రావాలి. కానీ దానికి పూర్తిస్థాయిలో మరమ్మతు చేస్తే తప్ప బయల్దేరలేని పరిస్థితి! మరోవైపు స్పేస్‌ఎక్స్‌ ‘క్రూ–9 మిషన్‌’లో భాగంగా నాసా వ్యోమగాములు జెనా కార్డ్‌మాన్, నిక్‌ హేగ్, స్టెఫానీ విల్సన్, అలెగ్జాండర్‌ గోర్బునోవ్‌ ఈ నెల 18న ఐఎస్‌ఎస్‌కు బయలుదేరాల్సి ఉంది. వారు 23 కల్లా అక్కడికి చేరేలా గతంలోనే షెడ్యూల్‌ ఖరారైంది. ఐఎస్‌ఎస్‌ నుంచి స్టార్‌లైనర్‌ వెనక్కి వస్తే తప్ప ‘క్రూ–9’ను పంపలేని పరిస్థితి! దాంతో ఏం చేయాలో అర్థంకాక నాసా తల పట్టుకుంటోంది. దీనికి తోడు ఐఎస్‌ఎస్‌లో సునీత ఆరోగ్యం క్రమంగా క్షీణిస్తున్నట్లు సమాచారం. స్టార్‌లైనర్‌ త్వరలో సిద్ధం కాకుంటే ఆమెను రప్పించడానికి ప్రత్యామ్నాయం చూడాల్సి రావొచ్చు.

న్యూఢిల్లీ: ఆదాయ పన్ను పోర్టల్‌ను ఉపయోగించడంలో ఇంకా కొంతమందికి సమస్యలు ఎదురవుతూనే ఉన్నది వాస్తవమేనని ఐటీ దిగ్గజం ఇన్ఫోసిస్‌ అంగీకరించింది. అయితే, ఐటీ విభాగంతో కలిసి వీటిని వేగవంతంగా పరిష్కరించేందుకు కృషి చేస్తున్నామని పేర్కొంది. గత కొన్ని వారాలుగా ఐటీ పోర్టల్‌ వినియోగం క్రమంగా పెరుగుతోందని, సుమారు మూడు కోట్ల మంది పైగా పన్ను చెల్లింపుదారులు లాగిన్‌ అయ్యి విజయవంతంగా వివిధ లావాదేవీలు పూర్తి చేశారని ఒక ప్రకటనలో వివరించింది. కొందరు యూజర్లు సవాళ్లు ఎదుర్కొనడం తాము గుర్తించామని, వీటిని మరింత మెరుగ్గా అర్థం చేసుకోవడానికి 1,200 మంది ట్యాక్స్‌పేయర్లతో సమాలోచనలు జరుపుతున్నట్లు ఇన్ఫీ తెలిపింది. ప్రస్తుతం 750 మంది పైగా తమ సిబ్బంది ఈ ప్రాజెక్టుపై పనిచేస్తున్నారని పేర్కొంది.   రిటర్నుల ప్రాసెసింగ్‌కు పడుతున్న 63 రోజుల సమయాన్ని ఒక్క రోజుకు కుదించేందుకు, రిఫండ్‌ల ప్రక్రియను వేగవంతం చేసేందుకు ఉద్దేశించి.. కొత్త ఐటీ పోర్టల్‌ను రూపొందించే కాంట్రాక్టును 2019లో ఇన్ఫీ దక్కించుకుంది. ఈ ఏడాది జూన్‌లో కొత్త పోర్టల్‌ అందుబాటులోకి వచ్చినప్పటికీ సాంకేతిక లోపాలు పోర్టల్‌ను వెన్నాడుతూనే ఉన్నాయి.

సాక్షి, హైదరాబాద్‌: ఇంటర్మీడియట్‌లో ఇంకా సాంకేతిక తప్పిదాలు ఆగట్లేదు. రోజుకో రకమైన సమస్యలు బయటకు వస్తూనే ఉన్నాయి. వార్షిక పరీక్షల ఫలితాల్లో సాంకేతిక తప్పిదాలతో విద్యార్థుల మార్కుల జాబితాల్లో అనేక తప్పులు ఇచ్చిన ఇంటర్‌ బోర్డు.. అడ్వాన్స్‌డ్‌ సప్లిమెంటరీ పరీక్షల హాల్‌టికెట్లలోనూ సాఫ్ట్‌వేర్‌ సంస్థ పొరపాట్లు చేసింది. దీంతో విద్యార్థులు తీవ్ర ఆందోళనకు గురవుతున్నారు. ఒకే సబ్జెక్టులో పరీక్ష రాసే ఒకే విద్యార్థికి రెండు వేర్వేరు నంబర్లతో హాల్‌టికెట్లు జనరేట్‌ చేసి పంపారు. దీంతో ఆ విద్యార్థి గందరగోళంలో పడ్డారు. జగిత్యాల జిల్లా ఇబ్రహీంపట్నం మండలం వేములకుర్తికి చెందిన న్యావనంది వినోద్‌ గతంలో కెమిస్ట్రీలో ఫెయిల్‌ అయ్యాడు. ప్రస్తుతం ఆ పరీక్ష రాసేందుకు దరఖాస్తు చేసుకున్నాడు. ఈనెల 12న ఆ పరీక్ష ఉంది. అయితే ఆ విద్యార్థికి ఒకే సబ్జెక్టుకు రెండు హాల్‌టికెట్లు పంపించారు. 2 వేర్వేరు హాల్‌టికెట్ల నంబర్లతో వేర్వేరు పరీక్ష కేంద్రాలను కేటాయించారు. 1936316671 నంబర్‌తో ఒక హాల్‌టికెట్, 1936316509 నంబర్‌తో మరో హాల్‌టికెట్‌ పంపించారు. దీంతో ఏ హాల్‌టికెట్‌తో ఎక్కడ పరీక్ష రాయాలో అర్థం కాని స్థితిలో ఆ విద్యార్థి ఉన్నాడు. మరికొంత మంది విద్యార్థుల హాల్‌టికెట్లలో ఫొటోలు లేకుండా, ఇంకొంత మంది విద్యార్థులు హాల్‌టికెట్లలో ఫొటో లు ఉండి వివరాలు లేకుండా వచ్చినట్లు తెలిసింది. ఈ పరిస్థితుల నేపథ్యంలో బోర్డు హెల్ప్‌లైన్‌కు (040–24600110) ఫోన్‌ చేస్తే ఫోన్‌ కలవట్లేదని, ఒక వేళ కలిసినా ఎవరూ ఫోన్‌ లిఫ్ట్‌ చేయట్లేదని విద్యార్థులు ఆందోళన చెందుతున్నారు.   జిల్లాలకు అందని వొకేషనల్‌ మెటీరియల్‌ ఇంటర్మీడియట్‌ వొకేషనల్‌ పరీక్షలకు సంబంధించిన మెటీరియల్‌ గురువారం రాత్రి వరకు జిల్లాలకు అందలేదు. శుక్రవారం ఉదయం 7 గంట లకు చీఫ్‌ సూపరింటెండెంట్లు తమ సిబ్బంది ఒకరిని డీఐఈవో/ఆర్‌ఐవో కార్యాలయాల దగ్గరికి పంపించి వొకేషనల్‌ కోర్సుల పరీక్షలకు సంబంధించిన డీ–ఫారమ్స్‌ తీసుకెళ్లాలని ఇంటర్మీడియట్‌ బోర్డు ఆదేశాలు జారీ చేసింది. అయితే బోర్డు ఆదేశాలు బాగానే ఉన్నా.. డీఐఈవో/ఆర్జేడీ కార్యాలయాలకు తమ కాలేజీల నుంచి వెళ్లాలంటే మూడు నాలుగు గంటలపాటు ప్రయాణం చేయాల్సినంత దూరంలో ఉన్న కాలేజీలు ఉన్నాయి. అలాంటి కాలేజీల్లో ఇబ్బందులు తప్పేలా లేవు. మరోవైపు హాల్‌ టికెట్లలో తప్పులు దొర్లితే చీఫ్‌ సూపరిం టెండెంట్లు డీఐఈవోల దగ్గరకు వెళ్లి కరెక్షన్‌ చేయించుకోవాలని బోర్డు ఆదేశాలు జారీచేసింది. అయితే వాటిల్లో హాల్‌టికెట్లు కరెక్షన్‌ చేస్తారు కానీ మాన్యువల్‌ బార్‌ కోడ్‌ షీట్లు వాడాల్సి ఉంటుంది. సాధారణంగా జెనరేట్‌ అయిన హాల్‌టికెట్‌ ప్రకారమే ఓఎంఆర్‌ బార్‌కోడ్‌ షీట్లను ముద్రించి పంపిస్తారు. హాల్‌టికెట్లలో కరెక్షన్‌ చేసినా, ముందుగా జెనరేట్‌ చేసి పంపిన ఓఎంఆర్‌ బార్‌కోడ్‌ షీట్లలో మార్పు చేసే వీలుండదు. అప్పుడు మాన్యువల్‌ బార్‌కోడ్‌ షీట్లను వినియోగిస్తారు. దీంతో పేపర్‌ వ్యాల్యుయేషన్‌ సమయంలో సమస్యలు వస్తాయి.   డౌన్‌లోడ్‌ కాని జవాబు పత్రాలు రీవెరిఫికేషన్‌ జవాబు పత్రాలను డౌన్‌లోడ్‌ చేసుకునేందుకు, హాల్‌టికెట్లను డౌన్‌లోడ్‌ చేసుకునేందుకు బోర్డు వెబ్‌సైట్‌ను సంప్రదిస్తే అదీ పని చేయట్లేదు. వెబ్‌సైట్‌ ఓపెన్‌ కాకపోవడంతో వేల మంది విద్యార్థులు గురువారం తీవ్ర ఇబ్బందులు పడాల్సివచ్చింది. శుక్రవారం నుంచే పరీక్షలు ప్రారంభం కానున్నాయి. ఈ పరిస్థితుల్లో హాల్‌టికెట్లలో తప్పులు దొర్లడం, హెల్ప్‌లైన్‌కు ఫోన్‌ చేసినా స్పందన లేకపోవడంతో విద్యార్థులు తీవ్ర ఆందోళనలో పడ్డారు.

యాదగిరిగుట్ట: యాదాద్రి భువనగిరి జిల్లా యాదగిరిగుట్ట మండలం బాహుపేట సమీపంలోని విఖ్యాత్‌ వెంచర్‌లో బుధవారం ఓ ఫైటర్‌ శిక్షణ విమానం సాంకేతిక లోపంతో నేలకూలింది. అధికారుల కథనం ప్రకారం.. హైదరాబాద్‌ హకీంపేటలో గల భారత వాయుసేనకు చెందిన స్థావరంలో ఉత్తరప్రదేశ్‌కు చెందిన యోగేశ్‌ యాదవ్‌ పైలట్‌గా శిక్షణ తీసుకుంటున్నాడు. బుధవారం ఉదయం యోగేశ్‌ హకీంపేట నుంచి ఫైటర్‌ శిక్షణ విమానంలో బయల్దేరాడు. సరిగ్గా 11.40 గంటల సమయంలో విమానం బాహుపేట సమీపంలోకి రాగానే సాంకేతిక లోపం తలెత్తింది. దీంతో విమానాన్ని కంట్రోల్‌ చేయడానికి యోగేశ్‌ ఎంత ప్రయత్నించినా సాధ్యం కాకపోవడంతో గ్రామ శివారులో ఉన్న విఖ్యాత్‌ వెంచర్‌ వద్దకు రాగానే ప్యారాచూట్‌ సాయంతో కిందకి దూకాడు. విమానం సుమారు అర కిలోమీటర్‌ దూరంలో కుప్పకూలిపోయి, పూర్తిగా దగ్ధమైంది. ఈ సంఘటనలో పైలట్‌ యోగేశ్‌ కాళ్లకు తీవ్ర గాయాలై చచ్చుబడి పోయాయి. ప్రమాదం జరిగిన అరగంటకు ఇండియన్‌ ఎయిర్‌ ఫోర్స్‌కు చెందిన మరో హెలికాప్టర్‌లో ఆర్మీ వైద్యులు అక్కడికి చేరుకున్నారు. యోగేశ్‌కు ప్రాథమిక చికిత్స చేసి మెరుగైన వైద్యం కోసం హైదరాబాద్‌ తరలించారు. ప్రమాదం జరిగిన ప్రాంతాన్ని ఆర్మీ నిపుణులు పరిశీలించారు. భువనగిరి ఏసీపీ జితేందర్‌రెడ్డి, యాదగిరిగుట్ట ఎస్‌ఐ రమేశ్‌లు సంఘటన స్థలాన్ని పరిశీలించి వివరాలను ఉన్నతాధికారులకు నివేదించారు.

సాక్షి, హైదరాబాద్‌: కాటెనరీ ఓహెచ్‌ఈ పార్టింగ్‌ కారణంగా శనివారం మూసాపేట్‌–మియాపూర్‌ మధ్య మెట్రో సేవలకు అంతరాయం కలిగినట్లు మెట్రోరైలు ఎండీ ఎన్వీఎస్‌రెడ్డి తెలిపారు. ఉదయం 9.57 నుంచి 11.40 గంటల వరకు మెట్రో రైళ్లు నిలిచిపోయినట్లు పేర్కొన్నా రు. ఉదయం 11.40కి సింగిల్‌ లైన్‌ పనిచేసేలా చర్యలు తీసుకోవడంతో పాటు, సర్వీసులను మూసాపేట్‌ నుంచి మియాపూర్‌ మార్గంలో డీగ్రేడెడ్‌ పద్ధతిలో పునరుద్ధరించారు. సాంకేతిక లోపాలను సరిదిద్దేందుకు కాటెనరీ మెయింటెనెన్స్‌ వెహికల్‌ (సీఎంవీ)తో పాటు, మెయింటెనెన్స్‌ బృందం సత్వరమే స్పందించి చర్యలు చేపట్టింది. దీంతో మధ్యాహ్నం 1.20కి మెట్రో రైలు సర్వీసులను యధావిధిగా పునరుద్ధరించారు. మెట్రో రైళ్ల రాకపోకల అంతరాయం వల్ల ప్రయాణికులకు కలిగిన అసౌకర్యానికి చింతిస్తున్నామని, సాంకేతికంగా తలెత్తిన సమస్యలపై అధ్యయనం చేస్తున్నామని ఎన్వీఎస్‌ రెడ్డి ఓ ప్రకటనలో తెలియజేశారు. 

సాక్షి, కామారెడ్డి : అత్యుత్తమ విద్యాసంస్థల్లో ఒకటైన పాఠశాల నవోదయ పాఠశాల. ఈ విద్యాసంస్థలో ప్రవేశం కొరకు ప్రతి ఏటా నిర్వహించే ప్రవేశ పరీక్షను ఈ ఏడాది నిజాంసాగర్ మండలంలోని నవోదయ పాఠశాలలో నిర్వహించాలనుకున్నారు. అయితే 9వ తరగతి ప్రవేశ పరీక్ష శనివారం ఉదయం 10 గంటలకు ప్రారంభం కావాల్సి ఉండగా, మధ్నాహ్నం అయినా పరీక్ష ప్రారంభం కాకపోవడంతో పరీక్షపత్రం లీకేజ్ అయ్యిందంటూ వదంతులు వ్యాపించాయి. ఆగ్రహించిన తల్లిదండ్రులు పాఠశాల ముందు ఆందోళన నిర్వహించారు. ఈ సందర్భంగా నవోదయ పరీక్ష చీఫ్‌ఎక్సామినర్‌ మాట్లాడుతూ..కేవలం కొన్నిసాంకేతిక సమస్యల వల్ల మాత్రమే పరీక్ష ఆలస్యం అయిందని, కొందరు ఆకతాయిలు సృస్టిస్తున్న వదంతులను నమ్మవద్దని తల్లిదండ్రులను, విద్యార్థులను కోరారు. ఆందోళనల నడుమ ఎట్టకేలకు 1గంటకు పరీక్ష ప్రారంభమైంది.  స్థానిక ఉపాధ్యాయులను ఇన్విజిలేటర్లుగా నియమించడంతో వారికి అవగాహన లోపంతోనే ఇలా జరిగిందని తల్లిదండ్రులు ఆరోపించారు.

శ్రీహరికోట (సూళ్లూరుపేట) /బెంగళూరు: దేశ సమాచార వ్యవస్థను మరింత పటిష్టపరిచేందుకు చేపట్టిన జీశాట్‌–6ఏ ప్రయోగం భారత అంతరిక్ష పరిశోధనా సంస్థ (ఇస్రో)కు చేదు అనుభవాన్ని మిగిల్చింది. జీశాట్‌–6ఏ ఉపగ్రహానికి బెంగళూరు సమీపంలోని హసన్‌లో ఉన్న ఉపగ్రహాల నియంత్రణ కేంద్రం(మాస్టర్‌ కంట్రోల్‌ ఫెసిలిటీ)తో సంబంధాలు తెగిపోయాయి. ఉపగ్రహ కక్ష్య దూరాన్ని పెంచే క్రమంలో తలెత్తిన సాంకేతిక లోపం కారణంగా నియంత్రణ కోల్పోయినట్లు తెలుస్తోంది. శుక్ర, శనివారాల్లో మొదటి, రెండో విడత ఉపగ్రహ కక్ష్య దూరాన్ని ఉపగ్రహంలో ఇంధనాన్ని మండించి విజయవంతంగా పొడిగించారు. మూడో విడతగా ఆదివారం తెల్లవారుజామున ఉపగ్రహాన్ని భూమికి 36 వేల కిలోమీటర్ల ఎత్తులోని భూస్థిర కక్ష్యలోకి ప్రవేశపెట్టేందుకు ప్రయత్నిస్తున్న సమయంలో ఉపగ్రహంలో విద్యుత్‌ షార్ట్‌సర్క్యూట్‌ జరిగి సిగ్నల్స్‌ ఆగిపోయాయి. ఈ విషయాన్ని ఇస్రో ఆదివారం అధికారికంగా ప్రకటించింది. ఉపగ్రహంతో సంబంధాలు కోల్పోవడం ఆందోళనకరమే అయినా, సంబంధాలను పునరుద్ధరించేందుకు తీవ్రంగా ప్రయత్నిస్తున్నట్లు ఇస్రో తన వెబ్‌సైట్‌లో పేర్కొంది.   విదేశీ అంతరిక్ష సంస్థలతో సంప్రదింపులు   జీశాట్‌–6ఏ నుంచి సంబంధాలు తెగిపోవడంతో విదేశీ అంతరిక్ష సంస్థలతో ఇస్రో సంప్రదింపులు జరుపుతోంది. మన ఉపగ్రహ నియంత్రణ కేంద్రానికి సిగ్నల్స్‌ అందకపోయినప్పటికీ మరికొన్ని విదేశీ అంతరిక్ష సంస్థలకు సిగ్నల్స్‌ అందే అవకాశం ఉండటంతో అంతరిక్ష ప్రయోగాలు చేసే దేశాలను ఇస్రో సంప్రదిస్తోంది. ఎలాగైనా ఈ ఉపగ్రహాన్ని రికవరీ చేసి అందుబాటులోకి తెచ్చేందుకు ఇస్రో శాస్త్రవేత్తలు అన్ని రకాలుగా ప్రయత్నాలు చేస్తున్నారు. కాగా, ఇస్రో చైర్మన్‌గా డాక్టర్‌ కె.శివన్‌ బాధ్యతలు చేపట్టిన తర్వాత జరిగిన మొదటి ప్రయోగంలోనే విషమ పరీక్ష ఎదురైంది.   అనుసంధానమయ్యే అవకాశం: శివన్‌ ప్రస్తుతానికి తమకున్న ప్రాథమిక సమాచారం ప్రకారం ఉపగ్రహంతో తిరిగి సంబంధాలను పునరుద్ధరించే అవకాశం ఉందని ఇస్రో చైర్మన్‌ కె.శివన్‌ వెల్లడించారు. అయితే ముందుగా శాటిలైట్‌తో లింక్‌ ఏర్పరుకోవడమే దీనిలో ప్రధానమైందని ఆయన పేర్కొన్నారు. ఉపగ్రహాల్లో సాంకేతిక లోపాలు ఒకప్పుడు రాకెట్లు సక్సెస్‌ కాక ఉపగ్రహాలను సముద్రం పాలు చేసేవారు. ఇటీవల కాలంలో రాకెట్‌ను విజయవంతంగా ప్రయోగించినా.. ఉపగ్రహాల విషయంలో సాంకేతిక లోపం ఏర్పడి పనికి రాకుండా పోతున్నాయి. గతంలో కూడా ఇన్‌శాట్‌ 4సీ ఆర్‌ ఉపగ్రహం కూడా కక్ష్యలోకి ప్రవేశించడంలో సాంకేతిక పరమైన ఇబ్బందులను ఎదుర్కోవడంతో ఆ ఉపగ్రహాన్ని అలాగే వదిలేశారు. గతేడాది ఆగస్టు 30న పీఎస్‌ఎల్‌వీ సీ39 ద్వారా పంపిన ఐఆర్‌ఎన్‌ఎస్‌ఎస్‌–1హెచ్‌ ఉపగ్రహం హీట్‌షీల్డ్‌ విడిపోకపోవడంతో పనికి రాకుండా పోయింది.


 ► పల్లెల్లో కొనసాగుతున్న పనులు
 ► సాంకేతిక లోపాలతో సిబ్బందికి ఇబ్బంది
 
 గంభీరావుపేట :
 మహాత్మాగాంధీ జాతీయ గ్రామీణ ఉపాధిహామీ పథకంలో చేపట్టిన పనుల్లో పారదర్శకత కోసం ప్రభుత్వం జియోట్యాగింగ్‌ను ప్రవేశపెట్టింది. 2006 నుంచి పనులు పూర్తయి లబ్ధిదారులకు బిల్లులు అందిన అంశాలనే ట్యాగ్‌ చేస్తున్నారు. ప్రగతిలో ఉన్న పనులను ట్యాగ్‌ చేయరు. ఇంకుడుగుంతలు, వ్యక్తిగత మరుగుదొడ్లు, కుంటలు, కాలువలు, పూడికతీత, అడ్డుకట్టలు తదితర పనుల్లో పూర్తయిన పనులను సిబ్బంది ట్యాగింగ్‌ చేస్తున్నారు.
 
 ట్యాగింగ్‌ చేయడం ఇలా..
 ఎన్ ఆర్‌ఈజీఎస్‌ ద్వారా రూపొందించిన ప్రత్యేకమైన ‘భువన్  యాప్‌’ను ఓపెన్  చేసుకొని పూర్తయిన పనుల రెండు ఫోటోలు తీసుకోవాలి. వాటిని ఆన్ లైన్ లో పొందుపర్చాలి. జియోట్యాగింగ్‌ వల్ల ఎక్కడి పనులనైనా ఆన్ లైన్ లో చూసుకోవచ్చు.
 
 జిల్లాలో ట్యాగింగ్‌ వివరాలు
 జిల్లా వ్యాప్తంగా 32,453 పూర్తయిన పనులను జియోట్యాగింగ్‌కు టార్గెట్‌ చేశారు. ఇందులో ఇప్పటికీ 17,189 పనుల వివరాలను అధికారులు ట్యాగ్‌ చేశారు.
 
 సాంకేతిక లోపాలు
 జియోట్యాగింగ్‌ చేసే సమయంలో నెట్‌కనెక్ట్‌ కాకుండా క్షేత్రస్థాయిలో ఈజీఎస్‌ సిబ్బంది ఇబ్బందులకు గురవుతున్నారు. పనులు జరిగిన గ్రామీణ ప్రాంతాలకు వెళ్లినప్పుడు ఈసమస్య మరింత ఎక్కువవుతోంది. ఆన్ లైన్ లో వివరాలను పంపించడానికి కూడా కష్టంగా మారుతోంది.
 
 నెట్‌వర్క్‌ సమస్యలున్నాయి
 ఈజీఎస్‌ పనుల ట్యాగింగ్‌ విషయంలో తీవ్ర ఇబ్బందులు పడుతున్నం. పల్లెల్లో నెట్‌వర్క్‌ లేక ట్యాగింగ్‌ చేయడంలో కాస్త జాప్యం జరుగుతోంది. ఉన్నతాధికారుల ఆదేశాల మేరకు మండలంలో వందశాతం ట్యాగింగ్‌ కోసం కృషి చేస్తున్నం.
 –సాయిక్రిష్ణ, టెక్నికల్‌ అసిస్టెంట్, గంభీరావుపేట
 
 రాష్ట్రంలో 8వ స్థానం
 ఈజీఎస్‌ జియోట్యాగింగ్‌ విషయంలో జిల్లా రాష్ట్రంలో 8వ స్థానంలో ఉంది. ఇప్పటికీ 53శాతం ట్యాగింగ్‌ పూర్తయ్యిం ది. పనులు వేగవంతం చేయాలని సిబ్బందిని ఆదేశించాం. సాంకేతిక లోపా లు తలెత్తడంతో రాత్రింబవళ్లు సిబ్బంది కృషి చేస్తున్నారు.        
 –హన్మంతరావు,డీఆర్‌డీవో, రాజన్న సిరిసిల్ల జిల్లా


 
  వెబ్‌సైట్‌ నుంచి డౌన్‌లోడ్‌ చేస్తున్న సిబ్బంది
 
 అన్ని అభ్యంతరాలను పరిశీలించనున్న కలెక్టర్‌
 
 ఆ తర్వాత కలెక్టర్‌ సంతకంతో అప్‌లోడ్‌
 
 జిల్లాలో 1,047కు చేరిన అభ్యంతరాలు
 
 హన్మకొండ అర్బన్‌ : కొత్త జిల్లాల ఏర్పాటుపై ప్రజల నుంచి వచ్చిన ప్రతీ అభ్యంతరాన్ని జిల్లా కలెక్టర్‌ స్వయంగా పరిశీలించనున్నారు. ఇందుకు సంబంధించి శుక్రవారం ప్రభుత్వం నుంచి జిల్లా అధికారులకు స్పష్టమైన ఆదేశాలు అందాయి. దీంతో రంగంలోకి దిగిన అధికారులు జిల్లాల ఏర్పాటు అప్పీళ్ల కోసం ఏర్పాటు చేసిన వెబ్‌సైట్‌లో నమోదైన దరఖాస్తులను డౌన్‌లోడ్‌ చేస్తున్నారు. ఈ ప్రక్రియ పూర్తికాగానే వచ్చిన మెుత్తం అప్పీళ్లను కలెక్టర్‌ పరిశీలించి రిమార్క్‌ రాయాల్సి ఉంటుంది. ఆ తర్వాత రాష్ట్ర స్థాయికి అవసరమైన వాటిని కలెక్టర్‌ సంతకంతో మళ్లీ వెబ్‌సైట్‌లో అప్‌లోడ్‌ చేస్తారు. అదేవిధంగా కలెక్టరేట్‌లో ఏర్పాటుచేసిన కేంద్రంలో నేరుగా అందజేసిన అప్పీళ్ల కాపీలను కూడా అధికారులు కలెక్టర్‌ పరిశీలనకు ఉంచి అనంతరం వెబ్‌సైట్‌లో అప్‌లోడ్‌ చేయాల్సి ఉంటుంది.
  
 సాంకేతిక సమస్యలు
 జిల్లాలకు సంబంధించి వెబ్‌సైట్‌లో నమోదైన అప్పీళ్లను డౌన్‌లోడ్‌ చేయడం.. వాటిని కలెక్టర్‌ పరిశీలించాక మళ్లీ అప్‌లోడ్‌ చేయడం అధికారులకు తలకు మించిన భారంలా మారనుంది. ముఖ్యంగా సర్వర్‌లో సాంకేతిక సమస్య కారణంగా తొందరగా డౌన్‌లోడ్‌ కావడం లేదు. ఈక్రమంలో శుక్రవారం సుమారు 2గంటల పాటు ఈ పనిలో ఉన్న అధికారులు మొత్తంగా 50 అప్పీళ్లు కూడా డౌన్‌లోడ్‌ చేయలేకపోయారు. ఈ లెక్కన ఇప్పటివరకు నమోదైన 1,047 అప్పీళ్లను డౌన్‌లోడ్‌ చేసి పరిశీలించి అప్‌లోడ్‌ చేయడం ఎలాగో తెలియక అధికారులు తలలు పట్టుకుంటున్నారు. దీంతో ప్రత్యామ్నాయంగా ఏం చేయాలన్న దానిపై అధికారులతో జేసీ ప్రశాంత్‌ జీవన్‌పాటిల్‌ మాట్లాడారు. అలాగే, డీఆర్వో కార్యాలయంలో డీఆర్వో కె.శోభ, జిల్లా సమాచార అధికారి విజయ్‌కుమార్‌ సమావేశమై అప్పీళ్ల పరిశీలనపై చర్చించారు. 
  


 - తరచూ విద్యుత్ ఉత్పత్తికి అంతరాయం
 - దిక్కుతోచని స్థితిలో కేటీపీపీ అధికారులు
 గణపురం : చెల్పూరు సమీపాన ఉన్న కాకతీయ థర్మల్ విద్యుత్ కేంద్రంలో తరచూ సాంకేతిక లోపాలు ఏర్పడుతున్నాయి. ఫలితంగా విద్యుత్ ఉత్పత్తికి అంతరాయం ఏర్పడుతోంది. అసలు ఇలా ఎందుకు జరుగుతుం దో అధికారులకు అంతుపట్టడం లేదు. కారణాలు కనుక్కోలేక పోతున్నారు. 500 మెగావాట్ల థర్మల్ విద్యుత్ ప్లాంట్‌లో తరచూ టర్బైన్ జనరేటర్‌కు ఆవిరి అందించే బాయిల ర్ ట్యూబ్స్ పలిగిపోవడం విద్యుత్ ఉత్పత్తికి అంతరాయం ఏర్పడుతోంది.
 
 శనివారం మళ్లీ అదే జరిగింది. ప్లాంట్‌లో మరో నాలుగైదు చిన్న చిన్న లోపాలు కూడా వెలుగుచూస్తుండడంతో సరి చేయడానికి తప్పని పరిస్థితుల్లో అధికారులు ప్రతీసారి యూనిట్‌ను షట్‌డౌన్ చేస్తున్నారు. గడిచిన మూడేళ్లలో సుమారు 80 సార్లు ప్లాంట్‌లో విద్యుత్ ఉత్పత్తికి అంతరా యం ఏర్పడింది. అందులో సగం సార్లు బాయిలర్ పైపులు పలిగిపోవడం, ఆవిరి లీకు కావడం తదితర సమస్యలే కారణమయ్యాయి.
 
 ఇలా ప్రతీ 24 గంటలకు 12 మిలియన్ యూనిట్ల విద్యుత్ ఉత్పత్తి నిలిచిపోతోంది. అంటే రోజుకు మూడు రూ.కోట్ల చొప్పున నష్టం కేటీపీపీ ఖాతాలో జమఅవుతోంది. శనివారం విద్యుత్ ఉత్పత్తికి అంతరాయం కలిగిన వెంటనే ప్లాంట్‌లో మరమ్మతులు ప్రారంభించారు. పూర్తయ్యే సరికి రెండు రోజుల సమయం పట్టవచ్చని అధికారులు చెబుతున్నారు. రాష్ట్రంలోని థర్మల్ విద్యుత్ ప్లాంట్లల్లో ఎక్కడా తలేత్తని సమస్యలు కేటీపీపీలోనే ఎందుకు ఉత్పన్నమవుతున్నాయో అంతుపట్టకుండా ఉంది.