సాక్షి, కడప : తెలుగుదేశం పార్టీ అధికారంలోకి రాకముందు ఒక మాట..వచ్చిన తర్వాత మరో మాట చెబుతూ ముందుకు వెళుతోంది. నిరుద్యోగ భృతి విషయంలోనూ  నాలుగున్నరేళ్లు  గడిచే వరకు మొద్దునిద్రలో ఉన్న టీడీపీ సర్కార్‌ ఎన్నికల నేపథ్యంలో మేలుకుంది. అదీ కూడా ఇంటింటికి ఉద్యోగం...లేకుంటే ప్రతి నిరుద్యోగికి రూ. 2 వేలు భృతి అంటూ దండోరా వేసిన టీడీపీ ప్రభుత్వం ప్రస్తుతం రూ. 1000కే పరిమితం చేసింది. అదీ కూడా ఆగస్టు నుంచి ఇచ్చేందుకు సన్నద్ధమని, తర్వాత అక్టోబరు 2కు కథ మారింది. ఎంత మారినా మళ్లీ సవాలక్ష ఆంక్షలతో నిరుద్యోగుల ఆశలపై నీళ్లు చల్లారు. అక్టోబరు నుంచి అమలు చేసిన ముఖ్యమంత్రి యువనేస్తం పథకంలో జిల్లాలో వేల మంది దరఖాస్తు చేస్తే  రకరకాల నిబంధనల పేరుతో అధికశాతం మందికి నిరాకరించి కొంతమందికే భృతి ఇస్తుండడం ఆందోళన కలిగించే పరిణామం. ఓట్లే లక్ష్యంగా...  జిల్లాలో నిరుద్యోగ భృతికి సంబంధించి పెద్ద ఎత్తున దరఖాస్తు చేసుకున్నారు. ఎన్నికల మేనిఫెస్టోలో ప్రకటించిన నాలుగున్నరేళ్ల తర్వాత చివరి అంకంలో ఓట్లే లక్ష్యంగా అడుగులు వేసింది.  ముఖ్యమంత్రి యువనేస్తం వెబ్‌సైట్‌లో దాదాపు 7.15 లక్షల పైచిలుకు నమోదైనా ఓటీపీ జనరేట్‌ చేసిన వారు 5.73 లక్షల మంది ఉన్నారు. పెద్ద ఎత్తున దరఖాస్తుకు ప్రయత్నించారు. అయితే నిబంధనల సాకుతో  కోత వేశారు. కొందరికి ఓటీపీ రిజెక్ట్‌ అయితే, మరికొందరికి సక్సెస్‌ అయినా కూడా సమస్యలు వేధించాయి. సర్టిఫికెట్లు సమర్పించలేదనో  లేదా వయస్సు దాటిపోయిందనో సాకులు చూపుతూ యువతకు భృతిని దూరం చేస్తున్నారు. జిల్లాలో 23 వేల మందికి భృతి ముఖ్యమంత్రి యువనేస్తం పథకం ప్రారంభాన్ని అట్టహాసం చేసినా పరిస్థితి చూస్తే మాత్రం ఆర్భాటం మాత్రమే కనిపిస్తోంది. ఊహకు అందని స్థాయిలో నిరుద్యోగులు దరఖాస్తు చేసుకోవడానికి ప్రయత్నించారు. వీరిని సమస్యలు వెంటాడాయి.  ప్రభుత్వ లెక్కల ప్రకారం   23 వేల మందిని మాత్రమే అర్హులుగా తేల్చి కేవలం ఒక్కొక్కరికి రూ. 1000 చొప్పున అందిస్తున్నారు. అదీ కూడా మే నెలలో కేబినెట్‌ సమావేశం జరిగినా.... జూన్‌ వరకు స్పష్టత ఇవ్వకపోవడం...తర్వాత మరికొన్ని రోజులకు జీఓ విడుదల చేసి....ఆగస్టు అనుకున్నా అప్పుడు కూడా అందించకుండా అక్టోబరు 2న అట్టహాసంగా ప్రారంభించారు. ఎన్నికలకు ముందు ఇంటింటికి ఉద్యోగం...లేకపోతే రూ. 2 వేలు నిరుద్యోగ భృతి అన్నా తీరా చివరలో రూ. 1000 పేరుతో అందిస్తుండడంపై విమర్శలు వ్యక్తమవుతున్నాయి. 

సాక్షి, మెదక్‌: జిల్లాలో బీసీ రుణాల పంపిణీ అటకెక్కింది.  వేలాది మంది బీసీ యువకులు రుణాల కోసం దరఖాస్తు చేసుకున్నారు. దరఖాస్తులు సమర్పించి నెలలు గడుస్తున్నా లబ్ధిదారుల ఎంపిక   పూర్తి కావడం లేదు. దీనికితోడు ప్రభుత్వం నిధులు సైతం మంజూరు చేయకపోవడం గమనార్హం. దీంతో బీసీ రుణాల పంపిణీ ఎక్కడ వేసిన గొంగడి అక్కడనే అన్న చందంగా మారింది.  యువతకు స్వయం ఉపాధి కల్పించేందుకు బీసీ కార్పొరేషన్‌ ద్వారా ఈ సబ్సిడీ రుణాలు అందజేస్తోంది. ఈ సబ్సిడీని 50 నుంచి 80 శాతానికి పెంచింది. లక్ష నుంచి రూ.12 లక్షల వరకు రుణాలు అందజేస్తోంది. రూ.లక్షకు 80 శాతం సబ్సిడీ,  రూ.2 లక్షలకు 70 శాతం సబ్సిడీ,  రూ.2 లక్షల నుంచి రూ.12 లక్షల వరకు 60 శాతం సబ్సిడీ ఉంటుంది. అలాగే బ్యాంకు కాన్సెంట్‌ను కూడా రద్దు చేసింది. దీంతో జిల్లాలోని యువకులు పెద్ద సంఖ్యలో రుణాల కోసం దరఖాస్తు చేసుకున్నారు. 13 వేలకుపైగా దరఖాస్తులు వచ్చాయి. వీటిలో 9వేల దరఖాస్తులు నిబంధనల మేరకు ఉన్నట్లు అధికారులు   గుర్తించారు. దరఖాస్తులను స్వీకరించి మూడు నెలలు దాటుతున్నా ఇంకా లబ్ధిదారుల ఎంపిక ప్రక్రియ పూర్తి కాలేదు.  ఎంపిక కోసం గ్రామాల వారీగా గ్రామ సభలు నిర్వహిస్తున్నారు.   రుణాల లక్ష్యం నిర్ణయించలేదు.. జిల్లాలో బీసీ రుణాల కోసం 20 మండలాల నుంచి 9వేల మందికిపైగా ఎదురుచూస్తున్నారు. వీరితో పాటు కులవృత్తులు చేసుకునేవారు సైతం తమ సంఘాల ద్వారా రుణాల కోసం దరఖాస్తు చేసుకున్నారు.  కుల సంఘాల ద్వారా 9,044 మంది రుణాల కోసం దరఖాస్తు చేసుకున్నారు.  వీరందరికీ లక్ష నుంచి రూ.12 లక్షల వరకు సబ్సిడీపై రుణాలు ఇవ్వాల్సి ఉంది. అయితే ఇప్పటి వరకు బీసీ కార్పొరేషన్‌ రుణాల మంజూరు ఊసెత్తడం లేదు. రుణాల మంజూరీ కోసం ప్రభుత్వం బ్యాంకులకు మండలాలు, పట్టణాల వారీగా లక్ష్యం నిర్ధేశిస్తుంది. కానీ ఇప్పటివరకు బ్యాంకుల వారీగా రుణాల పంపిణీ లక్ష్యం నిర్ణయించలేదు. ఈ కారణంగానే రుణాల పంపిణీలో జాప్యం జరుగుతున్నట్లు సమాచారం. లక్ష నుంచి రెండు లక్షల వరకు రుణాల కోసం దరఖాస్తు చేసుకున్న వారికి వచ్చే నెల నుంచి  మంజూరు చేసే అవకాశాలు ఉన్నాయి. రూ.2 నుంచి 12 లక్షల వరకు రుణాల కోసం దరఖాస్తు చేసుకున్న వారికి రుణాల మంజూరీలో జాప్యం జరిగే అవకాశం కనిపిస్తోంది. కులవృత్తుల వారికి సైతం వచ్చేనెల నుంచి రుణాలు మంజూరు అయ్యే అవకాశాలున్నాయి. ఎంపిక ప్రక్రియ జరుగుతోంది  జిల్లాలో బీసీ రుణాల అందజేసేందుకు లబ్ధిదారుల ఎంపిక పక్రియ జరుగుతోంది.  గతంలో రుణాలు పొందిన వారు సైతం తిరిగి దరఖాస్తులు సమర్పించటంతో అధికారులు దరఖాస్తులను సమగ్రంగా పరిశీలిస్తున్నారు. ప్రభుత్వం త్వరలోనే నిధులు మంజూరు చేసే అవకాశం ఉంది. నిధులు మంజూరు అయిన వెంటనే బీసీ రుణాల పంపిణీ ప్రారంభం అవుతుంది. –సుధాకర్, బీసీ సంక్షేమశాఖ అధికారి ఎప్పుడిస్తారో  తెలియడం లేదు బీసీ కార్పొరేషన్‌ రుణాలు ఇస్తామని ప్రభుత్వం ప్రకటించింది. ఇందు కోసం దరఖాస్తు చేసుకున్నాం. వార్డు సభలు కూడా నిర్వహించారు. కానీ ఇప్పటి వరకు ప్రభుత్వం నుంచి ఎలాంటి సమాచారం లేదు. అసలు ఇస్తారో?.. ఇవ్వరో? తెలియడం లేదు. అధికారులను అడిగితే సరైన సమాధానం చెప్పడం లేదు.     –నరేష్, మెదక్‌ వస్తాయో?.. రావో?  స్వయం ఉపాధి పొందుదామని బీసీ కార్పొరేషన్‌ సబ్సిడీ లోన్‌ కోసం దరఖాస్తు చేసుకొని నెల్లాళ్లు గడుస్తోంది. ఇప్పటికీ ఎలాంటి సమాచారం లేదు. వార్డు సభలన్నారు. ఎంక్వరీలన్నారు. అన్నీ అయిపోయాయి. కానీ ఇంకా లోన్‌ల గురించి ఎవరూ ఏం చెప్పడం లేదు.   –కృష్ణ, మెదక్‌   

కాజీపేట అర్బన్‌ : రైల్వేలో ఉద్యోగాలు ఇప్పిస్తానని మోసం చేసి ఓ వ్యక్తి రూ.40 లక్షలతో ఫరారీ అయిన ఘటనలో శుక్రవారం సుబేదారి పోలీస్‌ స్టేషన్‌ పరిధిలో చోటుచేసుకుంది. ఈ ఘటనపై గురువారం ‘సాక్షి’ ప్రచురితమైన కథనం అక్షర సత్యమైంది.  సుబేదారి ఎస్సై సిరిపురం నవీన్‌కుమార్‌ కథనం ప్రకారం.. హన్మకొండ పోలీస్‌ హెడ్‌క్వార్టర్స్‌ ఎదుట హన్మకొండకు చెందిన ఎండీ.రఫీక్‌ టీస్టాల్‌ నిర్వహిస్తూ జీవనం కొనసాగిస్తున్నాడు. హన్మకొండ భవానీనగర్‌కు చెందిన తిరుపతిరెడ్డి తరచూ రఫిక్‌ టీస్టాల్‌ వద్ద వస్తుండే వాడు. ఈ క్రమంలో తిరుపతిరెడ్డి కుమారుడు వినిత్‌రెడ్డి తన స్నేహితులు వాసుదేవరెడ్డి, రాజు తదితురలు రఫీక్‌ టీస్టాల్‌ వద్ద కలుసుకునేవారు. టీ తాగుతున్న తరుణంలో బిటెక్‌ పూర్తి చేసిన తమను నిరుద్యోగం వేదిస్తుందని, రైల్వే లాంటి శాఖలో ఉద్యోగం లభిస్తే బాగుండు అనే అభిరుచులను పంచుకునేవారు. దీనిని గమనించి టీస్టాల్‌ యజమాని రఫీక్‌ తనకు రైల్వే శాఖలో ఉన్నతాధికారులు చాలా మంది పరిచయం ఉన్నారంటూ తమ బంధువులు సైతం ఉన్నతాధికారులుగా కొనసాగుతున్నారని నమ్మించాడు. అలా 2015 ఆ యువకుల నుంచి దశల వారీగా సుమారు రూ.40 లక్షలను వసూలు చేసి చాయ్‌వాలా చేతివాటాన్ని చూపాడు. రోజులు గడుస్తున్నా.. ఉద్యోగాలు రాకపోవడంతో మోసపోయామని గమనించిన నిరుద్యోగులు రఫీక్‌ను నిలదీశారు. దీంతో రఫీక్‌ రాత్రికిరాత్రే మకాం మార్చేశాడు. శుక్రవారం బాధితుడు తిరుపతిరెడ్డి ఫిర్యాదు మేరకు కేసు నమోదు చేసుకుని దర్యాప్తు కొనసాగిస్తున్నట్లు ఎస్సై తెలిపారు.   

జమ్మికుంటరూరల్‌(హుజూరాబాద్‌): యువత సంక్షేమం కోసం ప్రభుత్వం జాబ్‌మేళా కార్యక్రమాలు ఏర్పాటు చేసి వారిలో చైతన్యం నింపుతోందని, మేళాల్లో లభించే ఉద్యోగ అవకాశాలను అందిపుచ్చుకోవాలని డీఆర్‌డీవో వెంకటేశ్వర్‌రావు అన్నారు. స్థానిక మండల పరిషత్‌ కార్యాలయ ఆవరణలో జిల్లా గ్రామీణాభివృద్ధి సంస్థ(టీ సెర్ప్‌) ఆధ్వర్యంలో గురువారం జాబ్‌మేళా కార్యక్రమాన్ని ఏర్పాటు చేశారు. ప్రస్తుత పోటీ ప్రపంచంలో యువత పలు రకాల శిక్షణలు పొంది వారి కాళ్లపై వారు నిలబడేలా ప్రణాళికలు తయారు చేసుకోవాలని సూచించారు. తల్లిదండ్రులకు భారం కావద్దని, ఎంచుకున్న రంగంలో ఉన్నత శిఖరాలకు చేరుకోవాలని పేర్కొన్నారు. హెటోరో డ్రగ్స్, జీ4ఎస్, అపోలో ఫార్మసీ, ఇంటలెనెట్‌ గ్లోబల్‌ సర్వీస్, రిలయన్స్‌ ఫౌండేషన్, సుభగృహ ప్రాజెక్టు, బిగ్‌ బాస్కెట్, వరుణ్‌ మోటార్స్, నవత రోడ్‌ ట్రాన్స్‌పోర్టు, టాటా సర్వీస్‌ ప్రైవేటు సంస్థలకు ఇంటర్వ్యూ లు నిర్వహించారు. జమ్మికుంట, హుజూరాబాద్, వీణవంక, ఇల్లందకుంట మండలాల నుంచి 550 మంది యువతీయువకులు హాజరయ్యారు. 240 మంది ప్రైవేటు సంస్థల్లో ఉద్యోగం, 250 మంది వివిధ రంగాల్లో శిక్షణకు ఎంపికయ్యారు. ఎంపీపీ గంగారపు లత, నగర పంచాయతీ చైర్మన్‌ పోడేటి రామస్వామి, ఆర్థిక మంత్రి ఓఎస్‌డీ ప్రసాద్, ఐకేపీ ఏరియా కోఆర్డినేటర్‌ నిర్మల, ఎంపీడీవో రమేశ్, సర్పంచుల ఫోరం మండల అధ్యక్షుడు యుగేందర్‌రెడ్డి, రైతు సమన్వయ సమితి జిల్లా సభ్యుడు లింగారావు, కౌన్సిలర్‌ శీలం శ్రీనివాస్, ఏపీఎంలు రమాదేవి, శ్రీనివాస్, తిరుపతి, ఐకేపీ సిబ్బంది పాల్గొన్నారు.

సాక్షి, సిటీబ్యూరో: సైబర్‌ నేరగాళ్లు నిరుద్యోగులను కొత్త పంథాలో మోసం చేస్తున్నారు. ఆన్‌లైన్‌ జాబ్‌ పోర్టల్స్‌లో నుంచి సేకరించిన నిరుద్యోగుల బయోడేటాలో ఉన్న ఫోన్‌ నంబర్లకు కాల్‌ చేసి మల్టీ నేషనల్‌ కంపెనీల్లో  ఉద్యోగం ఇప్పిస్తామంటూ నమ్మిస్తున్నారు. ఇలా రూ.100 ఫీజుతో తాము క్రియేట్‌ చేసిన ఫిషింగ్‌ వెబ్‌సైట్‌లలో బ్యాంక్‌ ఖాతా, డెబిట్‌ కార్డుతో పాటు, సెల్‌ఫోన్‌కు వచ్చిన వన్‌టైమ్‌ పాస్‌వర్డ్‌ కూడా నింపాలన్న నిబంధన విధించి,  లక్షల్లో డబ్బులు దండుకుంటున్నారు. ఇలా ఢిల్లీ కేంద్రంగా ఇంటర్‌ మధ్యలోనే చదువు ఆపేసిన  ఎంతో మందిని మోసగిస్తున్న తుషార్‌ ఆరోరాను సైబరాబాద్‌ సైబర్‌ క్రైమ్‌ పోలీసులు అరెస్టు చేసిన పోలీసులు  బుధవారం నగరానికి తీసుకొచ్చారు. గ్రాడ్యుయేషన్‌ చేసిన తన కుమారుడు అబ్దుల్‌ ముజామిల్‌ ఇర్ఫాన్‌ సైబర్‌ నేరగాళ్ల చేతిలో రూ.1,24,999లకు మోసపోయాడంటూ  అతడి తండ్రి అబ్దుల్‌ నబీ  సైబరాబాద్‌ సైబర్‌ క్రైమ్‌ పోలీసులను ఆశ్రయించారు. కేసు నమోదు చేసిన ఇన్‌స్పెక్టర్‌ వి.శివకుమార్‌ టెక్నికల్‌ డేటా ఆధారంగా ఢిల్లీలో నిందితుడిని పట్టుకున్నారు. క్రైమ్స్‌ డీసీపీ జానకి షర్మిలా కథనం ప్రకారం వివరాలు ఇలా ఉన్నాయి. ఐడీఏ బొల్లారంకు చెందిన అబ్దుల్‌ నబీ కుమారుడు, అబ్దుల్‌ ముజామిల్‌ ఇర్ఫాన్‌ ఉద్యోగన్వేషణలో భాగంగా ఆన్‌లైన్‌ జాబ్‌ పోర్టల్స్‌లో రెస్యూమ్‌ అప్‌లోడ్‌ చేశాడు. జనవరి 17న ఫ్లిప్‌కార్ట్‌ కంపెనీ ఉద్యోగినంటూ ముజామిల్‌కు ఫోన్‌ చేసిన ఓ వ్యక్తి ఉద్యోగం కావాలంటే ఆన్‌లైన్‌ఫామ్‌.కామ్‌.ఇన్‌లో రిజిష్టర్‌ చేసుకోవాలంటూ సూచించాడు. ఆ వెబ్‌సైట్‌లో ఉన్న అన్ని వివరాలు నమోదు చేస్తూనే అందులో పేర్కొన్నట్టుగా బ్యాంక్‌ వివరాలు, డెబిట్‌ కార్డుతో తన సెల్‌ఫోన్‌కు వచ్చిన వన్‌టైమ్‌ పాస్‌వర్డ్‌ కూడా పూర్తిచేశాడు. ఆ తర్వాత మూడు దఫాలుగా రూ. 1,24,999 వివిధ వ్యాలెట్లకు డబ్బులు బదిలీ, డ్రా చేసినట్టుగా ఎస్‌ఎంఎస్‌లు వచ్చాయి. దీంతో అతను తనకు ఫోన్‌ చేసినా వ్యక్తికి ఫోన్‌ చేయగా అందుబాటులోకి రాలేదు. దీంతో మోసపోయానని తెలుసుకొని తండ్రితో కలిసి సైబరాబాద్‌ సైబర్‌ పోలీసులను ఆశ్రయించాడు. టెక్నికల్‌ డేటా ఆధారంగా  నిందితుడు  తుషార్‌ ఆరోరాను ఢిల్లీలోని మహవీర్‌ ఎంక్లేవ్‌లో అరెస్టు చేశారు.   ఇంటర్‌ మధ్యలోనే ఆపేసి...  ఇంటర్మీడియట్‌ మధ్యలోనే చదువుకు స్వస్తి పలికిన తుషార్‌ ఆరోరా దావన్‌ సేల్స్‌ కార్పొరేషన్‌లో సేల్స్‌మెన్‌గా పనిచేశాడు. ఆ తర్వాత ఓ ట్రావెల్స్‌ కంపెనీలో డ్రైవర్‌గా పనిచేశాడు. అదే సమయంలో ఓ ప్రైవేట్‌ కంపెనీలో టెలీకాలర్‌గా పనిచేస్తున్న తన సోదరుడు హిమాన్షు ఆరోరా నుంచి టెలీకాలర్‌ నైపుణ్యాలు తెలుసుకొని ఈజీగా డబ్బులు సంపాదించాలనే ఆలోచనతో అతడితో కలిసి 2015లో ఐటీ టెక్నాలజీ కంపెనీ ప్రారంభించాడు.  నిరుద్యోగులకు ఉద్యోగాలు కల్పిస్తామనే ఆశతో లక్షల్లో డబ్బులు వసూలు చేసి మోసం చేస్తున్నాడు. దాదాపు 25 నుంచి 30 మంది టెలీకాలర్లను నియమించుకొని ఆన్‌లైన్‌ జాబ్‌పొర్టల్స్‌ నుంచి నిరుద్యోగుల రెస్యూమ్‌లు సేకరించి మల్టీ నేషనల్‌ కంపెనీలు ఫ్లిప్‌కార్ట్, క్వికర్, హెచ్‌డీఎఫ్‌సీలలో ఉద్యోగం ఇప్పిస్తామంటూ నమ్మించేవారు. రూ.100  ఫీజు చెల్లించి తాము క్రియేట్‌ చేసిన ఫిషింగ్‌ వెబ్‌సైట్‌లకు వెళ్లి అందులో ఉన్న వివరాలను పొందుపరచాలని సూచించేవారు. ఈ క్రమంలోనే అందులో పేర్కొన్నట్టుగా  బ్యాంక్‌ వివరాలు, డెబిట్‌ కార్డుతో వారి సెల్‌ఫోన్‌లకు వచ్చిన వన్‌టైమ్‌ పాస్‌వర్డ్‌ నిక్షిప్తం చేయడంతో ఖాతాల్లో ఉన్న నగదును తమ వ్యాలెట్‌లకు మళ్లించుకునేవారు. కమీషన్‌ ఎరగా వేసి నిరుపేదల పేర్లపై బ్యాంక్‌ ఖాతాలు తెరిచి ఈ నేరాలకు ఉపయోగించినట్లు పోలీసుల విచారణలో తేలింది. 2017లో తుషార్‌ ఆరోరా సోదరుడు, హిమాన్షు ఆరోరాను ముంబై పోలీసులు అరెస్టు చేశారు. అప్పటి నుంచి పోలీసు నిఘా ఉండటంతో తుషార్‌ ఆరోరా కొంతమంది టెలీకాలర్లు రాంబాబ్‌ ఆరోరా, ప్రిన్స్, శోభా యాదవ్, మమతలతో అదే పంథాను అనుసరించాడు. టెక్నికల్‌ డాటా ఆధారంగా ఢిల్లీలోని మహవీర్‌ ఎంక్లేవ్‌లో నిందితుడిని అదుపులోకి తీసుకున్న పోలీసులు మూడు సెల్‌ఫోన్లు, ట్యాబ్, ఐ–10 హ్యుందాయ్‌ కారు, 24 సిమ్‌కార్డులు స్వాధీనం చేసుకొని బుధవారం నగరానికి తీసుకొచ్చారు.


 కర్నూలు(హాస్పిటల్‌): జిల్లాలోని నిరుద్యోగ యువతీ యువకులకు గ్రూప్‌–2లో ప్రత్యక్ష ప్రసార మాధ్యం ద్వారా ఉచిత శిక్షణ అందించనున్నట్లు డీఆర్‌డీఏ పీడీ రామకృష్ణ సోమవారం ఒక ప్రకటనలో తెలిపారు. ఆంధ్రప్రదేశ్‌ రాష్ట్ర నైపుణ్యాభివృద్ధి సంస్థ–డీఆర్‌డీఏ ఆధ్వర్యంలో హైదరాబాద్‌ నుంచి ప్రముఖ అధ్యాపకులచే ప్రత్యక్ష ప్రసార మాధ్యం ద్వారా ఈ శిక్షణ కార్యక్రమం చేపడుతున్నామన్నారు. ఆసక్తి, అర్హత గల ఏదైనా డిగ్రీ పూర్తి చేసిన నిరుద్యోగ యువతీయువకులు 21, 22వ తేదీల్లో ఉదయం 10 గంటలకు నంద్యాలలోని రామకృష్ణ డిగ్రీ కళాశాలలో తమ ఒరిజినల్‌ సర్టిఫికెట్లు, ఆధార్‌కార్డులతో ఎంపిక ప్రక్రియకు హాజరుకావాలన్నారు. వివరాలకు కలెక్టరేట్‌లోని డీఆర్‌డీఏ కార్యాలయం,  08518–277499, 8522083879, 8341581022, 91770016174ను సంప్రదించాలన్నారు.