‘‘కొందరు ‘వైశాఖం’ ట్రైలర్‌ చూసి ఈ కుర్రాడు రవితేజలా ఉన్నాడన్నారు. నాకొచ్చిన బిగ్గెస్ట్‌ కాంప్లిమెంట్‌ అది. అయితే దాన్ని తలకు ఎక్కించుకోను. చిన్నప్పట్నుంచి పవన్‌కల్యాణ్‌గారంటే ఇష్టం. ఇండస్ట్రీకి వచ్చిన తర్వాత స్టార్స్, హీరోలు పడే స్ట్రగుల్స్‌ తెలిశాయి. హీరోలందరిపై గౌరవం పెరిగింది. వాళ్లందరూ నాకు స్ఫూర్తి’’ అన్నారు హరీశ్‌. జయ. బి దర్శకత్వంలో హరీశ్‌ హీరోగా ఆర్‌.జె. సినిమాస్‌ పతాకంపై బీఏ రాజు నిర్మించిన ‘వైశాఖం’ ఈ శుక్రవారం విడుదలవుతోంది. హరీశ్‌ చెప్పిన సంగతులు...
 
 ► కొత్తవాళ్లు ఛాన్సుల కోసం ఎలా కష్టపడతారో నేనూ అలాగే కష్టపడ్డా. ‘ప్రేమ ఇష్క్‌ కాదల్‌’లో ఓ హీరోగా నటించా. ఆ తర్వాత పలు ఛాన్సులొచ్చాయి. అయితే.. మళ్లీ మంచి సినిమా చేయాలనే ఉద్దేశంతో కొంచెం గ్యాప్‌ తీసుకున్నా. ఓ పర్‌ఫెక్ట్‌ ఫ్లాట్‌ఫామ్‌ కోసం ప్రయత్నిస్తున్న టైమ్‌లో జయగారిని కలిశా. చాలా ఆఫీసులకు వెళ్లి ఆడిషన్‌ ఇచ్చినట్టే ఇచ్చా. నాకు ఛాన్స్‌ ఇస్తారో? లేదో? అనే డౌట్‌ ఉండేది. తర్వాత ఓ నెలకు ఫోన్‌ చేశారు. సోలో హీరోగా నా మొదటి చిత్రమిది.
 
 ► కథ కంటే ముందు జయ మేడమ్‌ టైటిల్‌ చెప్పారు. ‘వైశాఖం’ అనగానే పాజిటివ్‌ వైబ్స్‌ కలిగాయి. కథ చెబుతున్నప్పుడు... నాకు నేనుగా హీరో పాత్రలోకి వెళ్లాను. కథలో అంత డెప్త్‌ ఉంది. ప్రతి ఒక్కరి లైఫ్‌లోనో, స్నేహితులు, చుట్టాల లైఫ్‌లోనో జరిగిన సంఘటనలు సినిమాలో ఉంటాయి. ఓ క్లాస్‌ సిన్మాను మాసీగా చూపించడం జయ మేడమ్‌ స్ట్రెంగ్త్‌. ఈ సిన్మాలో నాది కాస్త పొగరు, ఆటిట్యూడ్‌ ఉన్న పక్కింటి కుర్రాడి పాత్ర.
 
 ► కొత్తవాళ్లతో సినిమాకు రాజుగారు ఎందుకింత ఎక్కువ ఖర్చు పెడుతున్నారనే డౌట్‌ వచ్చింది. కానీ, ఆయన కథపై నమ్మకంతో ఖర్చు పెట్టారు. బహుశా... కొత్తవాళ్లతో కజికిస్థాన్‌ వెళ్లి అంత ఖర్చుపెట్టి ఎవరూ మూడు పాటలు తీయాలనుకోరు. ఐయామ్‌ లక్కీ టు వర్క్‌ విత్‌ దెమ్‌.
 
 ► ఆర్‌.జె. సినిమాస్‌ సంస్థలో బీఏ రాజుగారు నిర్మాతగా మరో సినిమా చేస్తున్నా. సెప్టెంబర్‌లో ఆరంభ మవుతుంది. తమిళంలో హీరోగా నటించిన ‘మున్నోడి’ గత నెలలో విడుదలైంది. అక్కడ్నుంచి ఛాన్సులొస్తున్నాయి. స్టార్స్‌ సిన్మాల్లో విలన్‌ రోల్స్‌ చేయడానికి కూడా నేను రెడీ.


 ‘‘నా గత చిత్రాలకూ, ‘వైశాఖం’కీ చాలా డిఫరెన్స్‌ ఉంది. కథ–కథనాలు ఎలానూ డిఫరెంట్‌గా ఉంటాయి. అయితే టేకింగ్‌ వైజ్‌గా ఎక్కువ టైమ్‌ తీసుకున్న సినిమా ఇది. ఇంతకుముందు సినిమాలప్పుడు త్వరగా తీసేయాలని ఒక టైమ్‌ ఫిక్స్‌ చేసుకునేదాన్ని. ఈ సినిమాని చాలా కూల్‌గా తీశాను. అవుట్‌పుట్‌ చూస్తే అది అర్థమవుతుంది’’ అన్నారు జయ. బి. హరీష్, అవంతిక జంటగా ఆమె దర్శకత్వంలో ఆర్‌. జె సినిమాస్‌ బ్యానర్‌పై బీఏ రాజు నిర్మించిన ‘వైశాఖం’ ఈ నెల 21న విడుదల కానుంది. ఈ సందర్భంగా దర్శకురాలు జయ. బి చెప్పిన విశేషాలు
 
 ♦ ఇప్పుడు అపార్ట్‌మెంట్‌ కల్చర్‌ పెరిగిపోతోంది. అందులో నివసించే వ్యక్తుల మధ్య వచ్చే చిన్న చిన్న క్లాషెస్, రిలేషన్‌షిప్స్‌ ఎలా ఉంటాయన్నదే ‘వైశాఖం’ కథ. ఓ వాస్తవ సంఘటనను ఈ సినిమాలో చూపించాం. స్రీన్‌–ప్లే డిఫరెంట్‌గా ఉంటుంది. సినిమాలోని క్యారెక్టర్స్‌తో ఇన్వాల్వ్‌ అయి ప్రేక్షకులు సినిమాను చూస్తారు. ఒకానొక దశలో సినిమా చూస్తున్న విషయాన్ని మరచిపోయి రియల్‌ లైఫ్‌లో ట్రావెల్‌ అవుతున్నట్లుగా ప్రేక్షకులు ఫీలవుతారు.
 
 ♦ వైశాఖం’ టఫ్‌ జర్నీ. ఏడాది జర్నీలో ఎన్నో అప్‌ అండ్‌ డౌన్స్‌ చూశా. అనుకున్నది అనుకున్నట్లుగా రావాలని రాజీ పడకుండా నిర్మించాం. 23 మంది యూనిట్‌తో 400 కేజీల లగేజ్‌తో 15 రోజులపాటు ట్రావెల్‌ చేసి, కజికిస్తాన్‌లో సాంగ్స్‌ షూట్‌ చేశాం. అక్కడ మూడు రోజులకొకసారి పాస్‌పోర్ట్‌ స్టాంపింగ్‌ చేయించుకోకపోతే మూడు నెలల జైలు తప్పదు. బడ్జెట్, శ్రమ ఎక్కువైనప్పటికీ లొకేషన్స్‌ బాగుండటంతో రిస్క్‌ చేశాం.
      
 
 ♦ నా గత చిత్రాలతో పోలిస్తే ఈ సినిమా బడ్జెట్‌ ఎక్కువే. కజికిస్తాన్‌లో సాంగ్స్‌ తీస్తే బాగుంటుందనుకున్నప్పుడు బడ్జెట్‌ ఎక్కువ అని నేను వెనకాడాను. కానీ, రాజుగారు ప్రోత్సహించడంతో అక్కడ చేశాం. అదే వేరే నిర్మాత అయితే వైజాగ్‌లో కానిచ్చేయమనేవారేమో (నవ్వుతూ).
      
 ♦ హరీశ్‌ నిర్మాతల హీరో. ఈ సినిమాతో తనకూ, హీరోయిన్‌ అవంతికకూ మంచి పేరొస్తుందన్న నమ్మకం ఉంది. ఇక సాయికుమార్‌ రోల్‌ కథను కీలక మలుపు తిప్పుతుంది. సరస్వతమ్మ పాత్రలో యాక్ట్‌ చేసిన రమాప్రభగారి నటన సినిమాకు హైలైట్‌గా ఉంటుంది. వసంత్‌ మంచి పాటలు ఇచ్చారు. పాటలు చూసి, నాగచైతన్య బాగా ఇంప్రెస్‌ అయ్యారు. సినిమాలో ‘చిలకా... చిలకా’ సాంగ్‌ విజువల్‌ ఫీస్ట్‌లా ఉంటుంది.
 
 ♦  డైరెక్షన్‌ నా హాబీ. అన్ని విషయాలు నా గ్రిప్‌లో ఉన్నాయనుకుంటేనే సినిమా తీస్తా. కథ విషయంలో పర్టిక్యులర్‌గా ఉంటాను. పది, పదిహేను కథలు విన్నాకే ‘వైశాఖం’ కథను ఫైనల్‌ చేశా. ఈ సినిమా తర్వాత మరో సినిమా చేయడానికి మరికొంత సమయం పట్టవచ్చు.


 - నిర్మాత బీఏ రాజు
 తెలుగు ఇండస్ట్రీలో ఉన్న కొద్ది మంది డైనమిక్ లేడీ డెరైక్టర్స్‌లో జయ. బి ఒకరు. ‘చంటిగాడు’, ‘గుండమ్మగారి మనవడు’, ‘లవ్‌లీ’ చిత్రాల ద్వారా మంచి గుర్తింపు తెచ్చుకున్నఆమె తాజాగా ‘వైశాఖం’ చిత్రాన్ని తెరకెక్కిస్తున్నారు. హరీష్, అవంతిక జంటగా ఆర్.జె సినిమాస్ పతాకంపై సూపర్‌హిట్ అధినేత బీఏ రాజు నిర్మిస్తున్న ఈ చిత్రం ఫస్ట్ లుక్‌ను హైదరాబాద్‌లో విడుదల చేశారు.
  ఈ సందర్భంగా బీఏ రాజు మాట్లాడుతూ -‘‘ ‘లవ్‌లీ’ చిత్రం ఎంత విజయం సాధించిందో అందరికీ తెలిసిందే.
 
 అంతకంటే పెద్ద హిట్ సినిమా తీయాలనే తపనతో మంచి కథ కోసం గ్యాప్ తీసుకున్నాం. గతంలో మా బ్యానర్లో వచ్చిన సినిమాలన్నీ మంచి మ్యూజికల్ హిట్స్‌గా నిలిచాయి. ‘వైశాఖం’లో పాటలు కూడా అందరికీ నచ్చుతాయి. రష్యా నుంచి విడిపోయి ప్రత్యేక దేశంగా ఏర్పడ్డ కజికిస్థాన్‌లో ఈ చిత్రం కోసం మూడు పాటలను పదిహేను రోజుల్లో చిత్రీకరించాం. ఇప్పటివరకూ అక్కడ ఎవరూ షూటింగ్ జరపలేదు. సాయికుమార్, ఆమని, పృధ్వీ, కాశీ విశ్వనాథ్‌ల పాత్రలు ఆకట్టుకుంటాయి’’ అని చెప్పారు. దర్శకురాలు జయ మాట్లాడుతూ- ‘‘కజికిస్థాన్‌లో మైనస్ 4 డిగ్రీల టెంపరేచర్‌లో పాటలను చిత్రీకరించాం.
 
 కుటుంబ విలువల నేపథ్యంలో సాగే ప్రేమకథ ఇది. అపార్ట్‌మెంట్‌లోని వాళ్లు ఉమ్మడి కుటుంబంలా కలిసి ఉంటే ఎంత హాయిగా ఉంటుందో సెంటిమెంట్ గా కాకుండా ఎంటర్‌టైనింగ్‌గా చూపిస్తున్నాం. కంట్రోల్ బడ్జెట్‌లో ఈ చిత్రం చేయాలనుకుంటే పెద్ద చిత్రంగా తయారవుతోంది. కథను నమ్మి రాజుగారు బడ్జెట్ విషయంలో రాజీపడటం లేదు. షూటింగ్ అరవై శాతం పూర్తయింది. అందరికీ నచ్చే చిత్రం అవుతుంది’’ అని చెప్పారు. హీరో హరీష్, కెమేరామ్యాన్ వాలిశెట్టి వెంకట సుబ్బారావు, సంగీత దర్శకుడు డీజే వసంత్ తదితరులు మాట్లాడారు. ఈ చిత్రానికి లైన్ ప్రొడ్యూసర్ బి.శివకుమార్.