వరుణదేవుడి కరుణ కోసం పల్లెజనం పరితపిస్తున్నారు. తడారిన భూముల్లో నీటి చుక్క కోసం నిరీక్షిస్తున్నారు. వానలు కురిపించండమ్మా అంటూ గ్రామదేవతలకు మొక్కుకుంటున్నారు. ఈ నేపథ్యంలో ఆకాశగంగ ఆదరణ కోసం కలసపాడు గ్రామస్తులంతా శనివారం ఒక చేత్తో కాయా కర్పూరం.. మరో చేత్తో నిండు బిందె తీసుకుని సమైక్యంగా కదిలారు. కులాలు, మతాలు, వర్ణాలు, వర్గాలు అనే భేదభావాలు  విస్మరించి అంకాలమ్మ..పోలేరమ్మ.. సత్తెమ్మ.. గంగమ్మలకు ఒక్కొక్కరిక్కి 180 బిందెలతో జలాభిషేకం చేశారు. బోనాలు సమర్పించారు. వానలు కురిపించి కరువు బారి నుంచి కాపాడమని వేడుకున్నారు.
  - కలసపాడు
  


 నీటిచుక్క కూడా అవసరం లేకుండా సూర్యరశ్మితో పనిచేసే కొత్త రకం టాయిలెట్లు త్వరలో అందుబాటులోకి రానున్నాయి. ప్రపంచంలోనే ఇలాంటి పర్యావరణహిత టాయిలెట్లను రూపొందించడం ఇదే మొదటిసారి. వచ్చేనెలలో మన  దేశంలోనే వీటిని ప్రారంభించనున్నారు. ఈ  ప్రాజెక్టుకు బిల్ అండ్ మిలిండా గేట్స్ ఫౌండేషన్ ఆర్థికసహాయం అందించింది. దీనికి కొలెరెడొ యూనివర్సిటీ ప్రొఫెసర్ కార్ల్‌లిండన్ నేతృత్వం వహించారు. ఈ టాయిలెట్‌ను రోజుకు ఆరుగురు ఉపయోగించుకోవచ్చు. సూర్యరశ్మి ఆధారంగా పనిచేసే ఇది మానవవ్యర్థాలను అత్యధిక ఉష్ణోగ్రత వద్ద వేడిచేసి బొగ్గుగా మారుస్తుంది. ఈ బొగ్గును కార్బన్‌డయాక్సైడ్ ఉద్గారాల తగ్గింపునకు, పంట దిగుబడి పెరుగుదలకు ఉపయోగించుకోవచ్చని ప్రొఫెసర్ కార్ల్‌లిండన్ తెలిపారు.