ఖమ్మం: అనుమానంతో భార్య గొంతుకోసి హతమార్చేందుకు భర్త ప్రయత్నించిన సంఘటన ఖమ్మం జిల్లా కల్లూరులో ఆదివారం ఉదయం జరిగింది. విజయలక్ష్మి (38) అనే వివాహిత ఐసీడీఎస్ ప్రాజెక్టులో సూపర్వైజర్‌గా పనిచేస్తూ కలూరులో నివాసం ఉంటోంది. భార్యపై అనుమానం పెంచుకున్న ఆమె భర్త రామూ ఆదివారం ఉదయం హత్యాయత్నం చేశాడు.
  
 కత్తితో గొంతు కోసి హతమార్చేందుకు ప్రయత్నించగా ఆమె గట్టిగా కేకలు వేసింది. ఇరుగుపొరుగువారు పరుగున వచ్చి రామూను అడ్డగించి తీవ్రంగా గాయపడిన విజయలక్ష్మిని స్థానిక ప్రభుత్వ ఆస్పత్రికి తరలించారు. ప్రస్తుతం ఆమె పరిస్థితి నిలకడగా ఉందని వైద్యులు చెప్పారు. హత్యాయత్నం చేసిన రామును పోలీసులకు అప్పగించారు. ఈ దంపతులకు ముగ్గురు పిల్లలు ఉన్నారు. పోలీసులు కేసు నమోదు చేసి దర్యాప్తు చేస్తున్నారు.
  


 అనంతపురం: అనంతపురం నగరంలోని శ్రీకంఠం సర్కిల్లో శుక్రవారం దారుణం చోటు చేసుకుంది. నడిరోడ్డు వెళ్తున్న భార్యపై ఆమె భర్త దాడి చేశాడు. ఆ క్రమంలో ఆమె భర్తకు ఎదురు తిరిగింది. దాంతో ఆగ్రహించి భర్త తన వెంట తెచ్చుకున్న కత్తి తీసి... ఆమె గొంతుకోశాడు. దాంతో ఆమె రక్తపు మడుగులో కుప్పకూలిపోయింది. భర్త అక్కడి నుంచి పరారయ్యాడు. దీంతో స్థానికులు వెంటనే స్పందించి పోలీసులకు సమాచారం అందించారు.
 పోలీసులు హుటాహుటిన సంఘటన స్థలానికి చేరుకుని బాధితురాలిని ఆసుపత్రికి తరలించారు. ఆమె పరిస్థితి విషమంగా ఉందని వైద్యులు వెల్లడించారు. పోలీసులు కేసు నమోదు చేసి దర్యాప్తు చేస్తున్నారు. ఆమె భర్త కోసం గాలింపు చర్యలు చేపట్టినట్లు పోలీసులు తెలిపారు.