సమగ్రాభివృద్ధికి కంకణం

సమగ్రాభివృద్ధికి కంకణం

హొసపేటె: విజయనగర జిల్లా హరపనహళ్లి తాలూకాను కళ్యాణ కర్ణాటక పరిధిలోకి చేర్చడంతో ఆర్టికల్‌–371(జె) గ్రాంట్‌తో నియోజకవర్గ సమగ్ర అభివృద్ధికి దోహదపడిందని హరపనహళ్లి ఎమ్మెల్యే ఎంపీ లతా మల్లికార్జున తెలిపారు. హరపనహళ్లి పట్టణంలో ఎమ్మెల్యే ఆధ్వర్యంలో వివిధ అభివృద్ధి కార్యక్రమాలను ఆమె ప్రారంభించి మాట్లాడారు. ఈ రంగం సమగ్ర అభివృద్ధికి న్యాయమైన నిధులు అందించడానికి ప్రభుత్వం నిరంతరం ప్రయత్నిస్తోందన్నారు. తన సోదరుడు ఎంపీ రవి దూరదృష్టి వల్ల దావణగెరె జిల్లాలోని హరపనహళ్లిని కళ్యాణ కర్ణాటక పరిధిలోకి చేర్చారన్నారు. కేకేఆర్‌డీబీ ప్రత్యేక గ్రాంట్‌ ఆర్టికల్‌–371(జే) నుంచి రూ.5 కోట్ల వ్యయంతో హరపనహళ్లి డిపోకు 11 కొత్త బస్సులను అందించామన్నారు. ఈ ప్రాంతంలో విద్యార్థుల రవాణా సమస్యను పరిష్కరించడమే బస్సుల కొనుగోలుకు ప్రేరణ అన్నారు. నియోజకవర్గంలోని గ్రామాలకు బస్సు రవాణా సౌకర్యం కల్పిస్తామన్నారు.

త్వరలో 6 సిటీ బస్సుల అందజేతకు చర్చలు

హరపనహళ్లి పట్టణానికి త్వరలో 6 సిటీ బస్సులను అందించడానికి ఆర్టీసీ అధికారులతో చర్చలు జరిగాయన్నారు. గ్రామీణ రోడ్ల అభివృద్ధి, పాఠశాల భవనాల నిర్మాణంతో సహా రోడ్ల మరమ్మతు పనులను త్వరలో చేపడతామన్నారు. సామాన్య ప్రజల సమస్యలను సున్నితంగా అర్థం చేసుకొని పరిష్కరించే సామర్థ్యం తనకు ఉందన్నారు. హరపనహళ్లి ఎమ్మెల్యే లతా వల్ల రాష్ట్రంలో తొలిసారిగా రూ.5 కోట్లతో 11 కొత్త బస్సులను తాలూకాకు అందించడం అభినందనీయమని కేఎస్‌ఆర్‌టీసీ మేనేజింగ్‌ డైరెక్టర్‌ ఎం.రాచప్ప తెలిపారు. గ్రాంట్‌ మంజూరు చేసిన మూడు నెలల్లోనే డిపోకు బస్సులు అందించడంలో ఎమ్మెల్యే ఎంతో కృషి చేశారని తెలిపారు. నగరసభ అధ్యక్షురాలు ఫాతిమా, గ్యారంటీ పథకం జిల్లా అధ్యక్షులు కురి శివమూర్తి, తహసీల్దార్‌ గిరీష్‌, ఆర్‌టీసీ అధికారి తిమ్మారెడ్డి తదితరులు పాల్గొన్నారు.

11 కొత్త బస్సులను అందించాం

ఎమ్మెల్యే ఎంపీ లతా మల్లికార్జున