‘బిగ్‌బాస్‌’ ఒక అనైతిక షో: సీపీఐ నారాయణ 

అనంతపురం అర్బన్‌: రియాలిటీ షోగా చెబుతున్న ‘బిగ్‌బాస్‌’ లైసెన్స్‌ పొందిన అనైతిక షో అంటూ సీపీఐ జాతీయ కార్యదర్శి కె.నారాయణ విమర్శించారు. అన్నమయ్య వంటి సినిమాల్లో నటించిన హీరో నాగార్జున ఇలాంటి షోకు యాంకరింగ్‌ చేయడం అవమానకరమన్నారు. ఈ షో ద్వారా ప్రజలకు ఏమి సందేశం ఇవ్వదల్చుకున్నారని ప్రశ్నించారు.

చదవండి: Kachidi Fish: తగ్గేదేలే.. కచ్చిడి కచ్చిడే!.. ధర ఎంతంటే?

సీపీఐ రాష్ట్ర సమితి సమావేశాలకు అనంతపురం వచ్చిన ఆయన శనివారం నగరంలోని ఓ హోటల్‌లో విలేకరులతో మాట్లాడారు. బిగ్‌బాస్‌ అనే లైసెన్స్‌ పొందిన షోలో 100 మందిని 100 రోజుల పాటు ఒకచోట ఉంచి అనైతిక చర్యలకు పాల్పడేందుకు వీలు కల్పిస్తున్నారని ఆరోపించారు. మహిళలను అవమానపరిచే విధంగా ఈ షో ఉంటోందన్నారు. దీన్ని ప్రభుత్వం నిషేధించాలని డిమాండ్‌ చేశారు. షో నిలిపేయాలంటూ తాము డిజిటల్‌ క్యాంపెయిన్‌ చేపడుతున్నామన్నారు. సినిమా టికెట్లు బ్లాక్‌లో అమ్మడం నేరమని స్పష్టం చేశారు. అఖండ, భీమ్లా నాయక్‌ కేవలం వినోదాత్మక సినిమాలే తప్ప.. వాటిలో సందేశం ఏమీ లేదన్నారు.