ఐదు భాషల్లో డబుల్‌ ఇస్మార్ట్‌

హీరో రామ్‌ పోతినేని, డైరెక్టర్‌ పూరి జగన్నాథ్‌ కాంబినేషన్‌లో వచ్చిన ‘ఇస్మార్ట్‌ శంకర్‌’ సినిమా బ్లాక్‌ బస్టర్‌గా నిలిచిన విషయం తెలిసిందే. వీరిద్దరి కాంబినేషన్‌లో ‘డబుల్‌ ఇస్మార్ట్‌’ సినిమా షురూ అయింది. పూరి కనెక్ట్స్‌పై పూరి జగన్నాథ్, చార్మి నిర్మిస్తున్న ఈ చిత్రం సోమవారంప్రారంభమైంది.

‘ఇస్మార్ట్‌ శంకర్‌ అలియాస్‌ డబుల్‌ ఇస్మార్ట్‌’ అంటూ రామ్‌ డైలాగ్‌ చెప్పిన తొలి సీన్‌కి చార్మి క్లాప్‌ ఇవ్వగా, పూరి జగన్నాథ్‌ దర్శకత్వం వహించారు. ‘‘ఇస్మార్ట్‌ శంకర్‌’కి సీక్వెల్‌గా ‘డబుల్‌ ఇస్మార్ట్‌’ రూ΄పొందుతోంది. పూరి జగన్నాథ్‌ చాలా పెద్ద స్పాన్‌ ఉన్న కథ రాశారు. అత్యున్నత సాంకేతిక ప్రమాణాలతో భారీ బడ్జెట్‌తో ఈ సినిమా రూపొందనుంది.

‘ఇస్మార్ట్‌ శంకర్‌’ కంటే ఈ సినిమాలో రామ్‌ని మాసియర్‌ క్యారెక్టర్‌లో చూపించబోతున్నారు పూరి. తెలుగు, తమిళ, కన్నడ, మలయాళం, హిందీ భాషల్లో 2024 మార్చి 8న ‘డబుల్‌ ఇస్మార్ట్‌’ని రిలీజ్‌ చేస్తాం’’ అని చిత్ర యూనిట్‌ పేర్కొంది. ఈ చిత్రానికి సీఈఓ: విషు రెడ్డి.