యాక్షన్‌ స్టార్ట్‌

నాగశౌర్య హీరోగా నటిస్తున్న కొత్త సినిమా రెగ్యులర్‌ షూటింగ్‌ ప్రారంభమైంది. దర్శకులు గౌతమ్‌ వాసుదేవ్‌ మీనన్, వైవీఎస్‌ చౌదరి, శ్రీను వైట్ల వద్ద దర్శకత్వం విభాగంలో పని చేసిన రామ్‌ దేశిన (రమేశ్‌) ఈ చిత్రం ద్వారా దర్శకునిగా పరిచయమవుతున్నారు. శ్రీ వైష్ణవి ఫిల్మ్స్‌పై శ్రీనివాసరావు చింతలపూడి ఈ సినిమా నిర్మిస్తున్నారు.

‘‘యాక్షన్‌ ఎంటర్‌టైనర్‌గా రూపొందుతోన్న చిత్రమిది. పలు విజయవంతమైన చిత్రాలకు సహ రచయితగా చేసిన రామ్‌ దేశిన అద్భుతమైన కథను సిద్ధం చేశారు. శనివారమే ఈ సినిమా రెగ్యులర్‌ షూటింగ్‌ ప్రారంభించాం’’ అని చిత్రవర్గాలు పేర్కొన్నాయి. రాజేంద్ర ప్రసాద్, సాయికుమార్, సముద్ర ఖని, మైమ్‌ గోపి తదితరులు నటిస్తున్న ఈ సినిమాకి కెమెరా: రసూల్‌ ఎల్లోర్, సంగీతం: హారిస్‌ జైరాజ్‌.