Shah Rukh Khan: షారుక్‌ కోసం ముంబైలో పంజాబ్‌ సెట్‌!

హీరో షారుక్‌ ఖాన్‌ స్పీడ్‌ పెంచారు. ఇప్పటికే సిద్ధార్థ్‌ ఆనంద్‌ దర్శకత్వంలో షారుక్‌ హీరోగా నటిస్తున్న ‘పటాన్‌’ చిత్రం షూటింగ్‌ తుదిదశకు చేరుకుంది. అదేవిధంగా అట్లీ దర్శకత్వంలో షారుక్‌ చేస్తున్న సినిమా కూడా ప్యాచ్‌వర్క్‌ మినహా పూర్తయింది. ఈ రెండు సినిమాల పోస్ట్‌ ప్రొడక్షన్‌ వర్క్స్‌ జరుగుతున్నాయి. అయితే తాజాగా దర్శకుడు రాజ్‌కుమార్‌ హిరాణి(‘మున్నాభాయ్‌ ఎమ్‌బీబీఎస్, 3 ఇడియట్స్, పీకే’ ఫేమ్‌) దర్శకత్వంలో షారుక్‌ఖాన్‌ హీరోగా ఓ సినిమా రూపొందుతోంది.

లేటెస్ట్‌గా ఈ సినిమా షూటింగ్‌ కూడా స్టార్ట్‌ అయ్యిందన్నది బాలీవుడ్‌ టాక్‌. ఈ చిత్రంలో తాప్సీ హీరోయిన్‌. ఈ సినిమా షూటింగ్‌ కోసం ముంబైలోని ఓ ప్రముఖ స్టూడియోలో పంజాబ్‌ లొకేషన్‌ సెట్స్‌ వేశారు చిత్ర యూనిట్‌. దాదాపు ఇరవై రోజులు ఇక్కడే షూటింగ్‌ జరుగుతుందట. ఆ తర్వాత విదేశీ లొకేషన్స్‌లో చిత్రీకరణ ప్లాన్‌ చేశారు షారుక్‌ అండ్‌ కో. అక్రమంగా పాస్‌పోర్టులు పొంది విదేశాల్లో చదువుకోవాలనుకునే వారి నేపథ్యంలో ఈ సినిమా కథనం ఉంటుందని బీ టౌన్‌ టాక్‌.