మందిర్‌-మసీదులపై ఇప్పట్లో కొత్త పిటిషన్లు వద్దు: ‘సుప్రీం’ సంచలన ఆదేశాలు

సాక్షి, ఢిల్లీ: దేశంలోని పలు ఆలయాలకు, మసీదులు, ఇతరతత్రా ప్రార్థన స్థలాలకు సంబంధించిన ఇప్పట్లో కొత్త పిటిషన్లను దాఖలు చేయొద్దని సుప్రీంకోర్టు స్పష్టం చేసింది. మధుర, కాశీ క్షేత్రాల కేసులు ఇప్పటికే తమ దృష్టిలో ఉన్నాయని.. ఈ తరుణంలో మరిన్ని పిటిషన్లు వేయొద్దని సీజేఐ సంజీవ్‌ఖన్నా గురువారం ఆదేశాలు జారీ చేశారు.

1991 నాటి ప్రార్థనా స్థలాల చట్టం పిటిషన్లపై సుప్రీం కోర్టు విచారణ జరుపుతోంది. ఈ పిటిషన్లపై నాలుగు వారాల్లోగా సమాధానాలు తెలియజేయాలని కేంద్రాన్ని సీజేఐ ధర్మాసనం ఆదేశించింది. అఫిడవిట్‌ దాఖలుకు కేంద్రానికి నాలుగు వారాల టైం ఇచ్చింది.  ఈ నేపథ్యంలో ప్రార్థన స్థలాల్లో సర్వేలనూ నిలిపివేయాలని ఆదేశించింది కోర్టు.

అంతేకాదు.. తదుపరి ఉత్తర్వులు జారీ చేసే వరకు ఏ కోర్టులోనూ(హైకోర్టులు సహా) సర్వే సంబంధిత పిటిషన్లు తీసుకోకూడదని, ఈ వ్యవహారానికి సంబంధించిన పెండింగ్‌ కేసుల్లో మధ్యంతర, తుది ఉత్తర్వులు జారీ చేయకూడదని కింది కోర్టులకు ఆదేశాలు జారీ చేసింది.