సౌతాఫ్రికాతో వన్డే.. 353 పరుగుల లక్ష్యాన్ని ఊదేసిన పాక్‌.. ఆల్‌టైమ్‌ రికార్డు

కరాచీ: చాంపియన్స్‌ ట్రోఫీ ప్రారంభానికి ముందు సొంతగడ్డపై పాకిస్తాన్‌ జట్టు అదరగొట్టింది. వన్డే క్రికెట్‌ చరిత్రలో తమ అత్యధిక లక్ష్యాన్ని ఛేదించింది. ముక్కోణపు వన్డే సిరీస్‌లో భాగంగా బుధవారం జరిగిన మూడో మ్యాచ్‌లో ఆతిథ్య పాకిస్తాన్‌ 6 వికెట్ల తేడాతో దక్షిణాఫ్రికాను ఓడించింది. ఈ విజయంతో పాకిస్తాన్‌ జట్టు ముక్కోణపు టోర్నీ ఫైనల్‌కు దూసుకెళ్లింది. తొలి మ్యాచ్‌లో న్యూజిలాండ్‌ చేతిలో ఓడిన పాకిస్తాన్‌... కీలక పోరులో ఆల్‌రౌండ్‌ ప్రదర్శనతో ఆకట్టుకుంది. 

టాస్‌ గెలిచి మొదట బ్యాటింగ్‌ చేసిన దక్షిణాఫ్రికా నిర్ణీత 50 ఓవర్లలో 5 వికెట్ల నష్టానికి 352 పరుగులు చేసింది. కెప్టెన్‌ తెంబా బవుమా (96 బంతుల్లో 82; 13 ఫోర్లు), హెన్రిచ్‌ క్లాసెన్‌ (56 బంతుల్లో 87; 11 ఫోర్లు, 3 సిక్స్‌లు), మాథ్యూ బ్రిజ్‌కీ (83; 10 ఫోర్లు, 1 సిక్స్‌) అర్ధశతకాలతో ఆకట్టుకున్నారు. పాకిస్తాన్‌ బౌలర్లలో షాహీన్‌ షా అఫ్రిది 2 వికెట్లు పడగొట్టాడు. అనంతరం 353 పరుగుల లక్ష్యంతో బరిలోకి దిగిన పాకిస్తాన్‌ 49 ఓవర్లలో 4 వికెట్లు కోల్పోయి 355 పరుగులు చేసింది. 

కెప్టెన్ మొహమ్మద్‌ రిజ్వాన్‌ (128 బంతుల్లో 122 నాటౌట్‌; 9 ఫోర్లు, 3 సిక్స్‌లు), సల్మాన్‌ ఆఘా (103 బంతుల్లో 134; 16 ఫోర్లు, 2 సిక్స్‌లు) సెంచరీలతో విజృంభించారు. ఒక దశలో 91 పరుగులకే 3 వికెట్లు కోల్పోయిన పాక్‌ జట్టును సల్మాన్‌తో కలిసి రిజ్వాన్‌ ఆదుకున్నాడు. సఫారీ బౌలర్లను సమర్థవంతంగా ఎదుర్కొన్న ఈ జోడీ... నాలుగో వికెట్‌కు రికార్డు స్థాయిలో 229 బంతుల్లోనే 260 పరుగులు జోడించింది. 

ఓపెనర్‌ ఫఖర్‌ జమాన్‌ (28 బంతుల్లో 41; 6 ఫోర్లు, 1 సిక్స్‌) మెరుపు ఆరంభాన్నిచ్చాడు. దక్షిణాఫ్రికా బౌలర్లలో ముల్డర్‌ 2 వికెట్లు తీశాడు. సల్మాన్‌కు ‘ప్లేయర్‌ ఆఫ్‌ ద మ్యాచ్‌’ అవార్డు దక్కింది. ఆడిన రెండు మ్యాచ్‌ల్లోనూ గెలిచి ఫైనల్‌కు చేరిన న్యూజిలాండ్‌తో శుక్రవారం పాకిస్తాన్‌ తలపడుతుంది.

1 వన్డే క్రికెట్‌ చరిత్రలో పాకిస్తాన్‌ జట్టుకు ఇదే (353)  అత్యధిక పరుగుల ఛేదన. 2022లో ఆ్రస్టేలియాపై చేసిన 349 పరుగుల ఛేదన రెండో స్థానంలో ఉంది.