హైదరాబాద్‌, సాక్షి: నగరంలో మళ్లీ భారీ వాన దంచికొడుతోంది. సోమవారం మధ్యాహ్నాం పలు ప్రాంతాలు జలమయం కావడంతో ట్రాఫిక్‌కు అంతరాయం ఏర్పడుతోంది. నగరంతో పాటు రాష్ట్రంలో ఈ నాలుగురోజులపాటు వర్షాలు ఉంటాయని వాతావరణ శాఖ చెబుతోంది. ఇదిలా ఉంటే.. నైరుతి రుతుపవనాలు అండమాన్ నికోబార్ దీవులను తాకాయి. బంగాళాఖాతంలో చురుగ్గా కదులుతున్న నైరుతి రుతుపవనాలు.. మరిన్ని ప్రాంతాల్లోకి విస్తరించనున్నాయి. ఈనెల చివరి వరకు  కేరళను తాకి,  జూన్ 8 నుంచి 11 మధ్య తెలంగాణలోకి ప్రవేశించనున్నాయి. నేటి నుంచి మరో నాలుగు రోజుల పాటు తేలిక నుంచి ఓ మోస్తరు భారీ వర్షాలకు అవకాశం ఉందని వాతావరణ శాఖ చెబుతోంది. ఉరుములు మెరుపులు ఈదురు గాలులతో కూడిన వర్షాలు పడతాయని , దక్షిణ ఈశాన్య జిల్లాల్లో ఈ ప్రభావం ఎక్కువగా ఉంటుందని పేర్కొంది. భద్రాద్రి కొత్తగూడెం ఖమ్మం నల్గొండ సూర్యాపేట నాగర్ కర్నూల్, వనపర్తి నారాయణపేట జోగులాంబ గద్వాల జిల్లాలో అక్కడక్కడ కురిసే అవకాశం కనిపిస్తోంది.  ఈనెల 22 న పశ్చిమ మధ్య బంగాళాఖాతంలో ఒక అల్ప పీడన  ఏర్పడే అవకాశం. ఈ అల్ప పీడనం  ఈనెల 24 వ తారీఖు  నాటికీ మధ్య బంగాళాఖాతం ప్రాంతం లో వాయుగుండం గా బలపడే అవకాశం ఉంది.

ఒక్క క్లిక్‌తో ఈసెట్‌ రిజల్ట్స్‌హైదరాబాద్‌, సాక్షి: తెలంగాణ ఈసెట్‌ ఫలితాలు విడుదలయ్యాయి. పాలిటెక్నిక్‌ డిప్లొమా, బీఎస్సీ (గణితం) విద్యార్థులు లేటరల్‌ ఎంట్రీ ద్వారా బీటెక్‌, బీఫార్మసీ రెండో ఏడాదిలో ప్రవేశానికి నిర్వహించిన ఈ పరీక్ష ఫలితాల్ని ఉన్నత విద్యామండలి కార్యాలయంలో ఛైర్మన్‌ లింబాద్రి విడుదల చేశారు. సాక్షి ఎడ్యుకేషన్‌ ద్వారా ఫలితాల కోసం క్లిక్‌ చేయండిఅధికారిక వెబ్‌సైట్‌ నుంచి ర్యాంకు కార్డులను డౌన్‌లోడ్‌ చేసుకోవచ్చు. ర్యాంకుల్ని బట్టి పాలిటెక్నిక్‌ డిప్లొమా, బీఎస్సీ (మ్యాథ్స్) విద్యార్థులు లేటరల్‌ ఎంట్రీ ద్వారా బీటెక్‌ , బీఫార్మసీ రెండో ఏడాదిలో ప్రవేశాలు పొందుతారు. ఈ ఏడాది ఈసెట్ పరీక్షను ఉస్మానియా వర్శిటీ నిర్వహించింది. 

హైదరాబాద్‌, సాక్షి: ఫోన్‌ ట్యాపింగ్‌ కేసులో  కీలక పరిణామం చోటు చేసుకుంది. కేసు విచారణ జరుగుతున్న పోలీస్‌ స్టేషన్‌ పరిధి మారింది. బంజారాహిల్స్‌ నుంచి జూబ్లీహిల్స్‌ పోలీస్‌ స్టేషన్‌కు మార్చారు. ఈ కేసులో నిందితుడు రాధాకిషన్‌రావు నుంచి కీలక సమాచారాన్ని రాబట్టింది బంజారాహిల్స్‌ పోలీస్‌ స్టేషన్‌లోనే. అయితే ఈ మార్పునకు గల కారణాలపై దర్యాప్తు అధికారులు స్పష్టత ఇవ్వలేదు. ఇదిలా ఉంటే.. ఫోన్‌ ట్యాపింగ్‌ కేసులో కీలక ఆధారాలను దర్యాప్తు అధికారులు సేకరించినట్లు తెలుస్తోంది. ఈ క్రమంలో మరిన్ని అరెస్టులు జరగొచ్చని సమాచారం. కొందరు పోలీసు అధికారులతో పాటు ప్రైవేట్‌ వ్యక్తులను కూడా అరెస్ట్‌ చేయాలని పోలీసులు రంగం సిద్ధం చేసుకుంటున్నారు.

మోర్తాడ్‌: పంటరుణాలు తీసుకున్న రైతుల ఆధార్‌ నంబర్లను సహకార సంఘాలు, బ్యాంకు ఉద్యోగులు సేకరిస్తున్నారు. రూ.రెండు లక్షల వరకు పంట రుణాలను ఆగస్టు 15 నాటికి మాఫీ చేస్తామని సీఎం రేవంత్‌రెడ్డి ప్రకటించిన నేపథ్యంలో ఒక్కో రై తు కుటుంబానికి ఒక యూనిట్‌గా మాఫీ అమలు చేసేలా చర్యలు చేపట్టారని తెలుస్తోంది. ఇందులో భాగంగానే ఆధార్‌ నంబర్లను సేకరించే పనిలో ఉద్యోగులు నిమగ్నం అయ్యారు. ఒక్కో రైతుకు ఒక బ్యాంకులో కాకుండా వేర్వేరు బ్యాంకుల్లో పంట రుణాలు ఉన్నాయని గుర్తించిన సర్కార్‌ ఒక కుటుంబానికి రూ.రెండు లక్షల మాఫీని వర్తింపజేయాలని నిర్ణయించింది. రైతులు వారి కుటుంబ సభ్యుల ఆధార్‌ నంబర్లను సేకరించి అనుసంధానం చేస్తే ప్రభుత్వం ఆశించిన విధంగా రుణమాఫీ ప్రక్రియను వేగంగా పూర్తి చేయవచ్చు అని బ్యాంకర్లు భావిస్తున్నారు. బీఆర్‌ఎస్‌ హయాంలో జిల్లాలో 97,418 మంది రైతులకు రూ.490.72 కోట్ల రుణాలు మాఫీ అయ్యాయి. అంతలోనే అసెంబ్లీ ఎన్నికల కోడ్‌ అమలులోకి రావడంతో రుణమా ఫీకి అర్హత ఉన్నా అనేక మందికి లబ్ధి జరుగలేదు. కాంగ్రెస్‌ ప్రభుత్వం మాత్రం రూ.రెండు లక్షల వరకు రుణమాఫీ చేస్తామని ప్రకటించడంతో పక్కాగా వర్తింపజేయడానికి అధికారులు సన్నాహాలు చేస్తున్నారు. ఎక్కడైనా రైతుల ఆధార్‌ నంబర్‌లు మిస్సింగ్‌ అయి ఉంటే రుణమాఫీకి అంతరాయం కలుగుతుందనే ఉద్దేశంతో మరోసారి సేకరిస్తున్నారు. రుణమాఫీకి ప్రభుత్వం సానుకూలత తెలపడంతో.. రైతుల ఆధార్‌ నంబర్లను సేకరిస్తున్న బ్యాంకులు

తెయూ(డిచ్‌పల్లి): డిగ్రీ కోర్సుల్లో ప్రవేశాలకు సంబంధించి డిగ్రీ ఆన్‌లైన్‌ సర్వీసెస్‌ తెలంగాణ (దోస్త్‌) తొలివిడత రిజిస్ట్రేషన్ల ప్రక్రియ ఈ నెల 29న ముగియనుంది. రాష్ట్రవ్యాప్తంగా ఆరు యూనివర్సిటీల (ఉస్మానియా, కాకతీయ, తెలంగాణ, పాలమూరు, మహాత్మాగాంధీ, శాతవాహన)తో పాటు మహిళా యూనివర్సిటీ, జేఎన్‌టీయూ, సాంకేతిక విద్య, శిక్షణ బోర్డు పరిధిలోని కళాశాలల్లో బీఏ, బీఎస్సీ, బీకాం, బీసీఏ, బీబీఏ, బీబీఎం, బీఎస్‌డబ్ల్యూ, డీఫార్మసీ కోర్సుల్లో ఫస్టియర్‌ ప్రవేశాలను దోస్త్‌ ద్వారా నిర్వహిస్తారు. ఇంటర్‌ ఉత్తీర్ణులైన విద్యార్థులు డిగ్రీ ప్రథమ సంవత్సరంలో ప్రవేశాల కోసం దోస్త్‌ వెబ్‌సైట్‌ https://dost.cgg.gov.in లో రూ.200 ఫీజు చెల్లించి రిజిస్ట్రేషన్‌ చేసుకోవాలి. ఇంటర్‌ మార్కుల ఆధారంగా ఆయా కాలేజీల్లో డిగ్రీ ఫస్టియర్‌లో ప్రవేశాలు కల్పిస్తారు. తెయూ పరిధిలో.. తెలంగాణ యూనివర్సిటీ పరిధిలో 74 డిగ్రీ కళాశాలల్లో సుమారు 33,630 సీట్లు అందుబాటులో ఉన్నాయి. తెయూ పరిధిలోని 13 ప్రభుత్వ డిగ్రీ కళాశాలల్లో 7,500 సీట్లు, 54 ప్రైవేటు డిగ్రీ కళాశాలల్లో 24,290 సీట్లు, ఏడు సాంఘిక, గిరిజన సంక్షేమ డిగ్రీ కళాశాలల్లో 1,840 సీట్లు అందుబాటులో ఉన్నట్లు వర్సిటీ అధికారులు తెలిపారు. ఈ సారి వర్సిటీ పరిధిలో కొన్ని అదనపు డిగ్రీ కోర్సులు ప్రవేశపెట్టనున్నారు. ఉపాధి అవకాశాలు కల్పించే విధంగా బీకాం ఫైనాన్స్‌, బీఎస్సీ బయోమెడికల్‌ సైన్స్‌, బీఏ హానర్స్‌, బీఏ పబ్లిక్‌ పాలసీ లాంటి కోర్సులు అందుబాటులోకి రానున్నాయి. మొదటి విడత ఈ నెల 6 నుంచి తొలివిడత రిజిస్ట్రేషన్‌ ప్రక్రియ ప్రారంభమైంది. ఈ నెల 29 వరకు రిజిస్ట్రేషన్‌ చేసుకోవాలి. 20వ తేది నుంచి 30 వరకు వెబ్‌ ఆప్షన్లు ఇవ్వాలి. దివ్యాంగులు, ఇతర ప్రత్యేక రిజర్వేషన్లు ఉన్న వారికి ఈ నెల 28, 29 వ తేదీల్లో ధ్రువపత్రాల పరిశీలన ఉంటుంది. తొలివిడత సీటు అలాట్‌మెంట్‌ జూన్‌ 6న ఉంటుంది. సీట్లు పొందిన విద్యార్థులు జూన్‌ 7 నుంచి 12 లోగా ఆన్‌లైన్‌లో సెల్ఫ్‌ రిపోర్టింగ్‌ పూర్తి చేయాలి. రెండో విడత జూన్‌ 6 నుంచి రెండో విడత రిజిస్ట్రేషన్‌ ప్రారంభ మవుతుంది. విద్యార్థులు రూ.400 రిజిస్ట్రేషన్‌ ఫీజు చెల్లించి జూన్‌ 13 వరకు రిజిస్ట్రేషన్‌ చేసుకోవచ్చు. జూన్‌ 6 నుంచి 14 వరకు వెబ్‌ఆప్షన్స్‌ ఇవ్వాలి. దివ్యాంగులు, ఇతర ప్రత్యేక రిజర్వేషన్లు ఉన్న వారికి జూన్‌ 13న ధ్రువపత్రాల పరిశీలన ఉంటుంది. రెండో విడత సీట్ల కేటాయింపు జూన్‌ 18న ఉంటుంది. సీట్లు పొందిన వారు జూన్‌ 19నుంచి 24లోగా ఆన్‌లైన్‌లో రిపోర్టింగ్‌ చేయాలి. ఈ నెల 29 వరకు ఆన్‌లైన్‌లో రిజిస్ట్రేషన్స్‌ 30 వరకు వెబ్‌ ఆప్షన్స్‌ జూన్‌ 6న తొలి విడత సీట్ల కేటాయింపుమూడో విడత జూన్‌ 19 నుంచి మూడో విడత రిజిస్ట్రేషన్‌ ప్రక్రియ ప్రారంభమవుతుంది. విద్యార్థులు రూ.400 ఫీజు చెల్లించి జూన్‌ 25 వరకు రిజిస్ట్రేషన్‌ చేసుకోవచ్చు. అలాగే జూన్‌ 19 నుంచి 26 వరకు కాలేజీల వెబ్‌ఆప్షన్స్‌ ఇవ్వాలి. దివ్యాంగులు, ఇతర ప్రత్యేక రిజర్వేషన్లు ఉన్న వారికి జూన్‌ 25న ధ్రువపత్రాల పరిశీలన ఉంటుంది. మూడో విడత సీట్ల కేటాయింపు జూన్‌ 29న ఉంటుంది. సీట్లు పొందిన విద్యార్థులు జూన్‌ 29 నుంచి జూలై 3 లోగా రిపోర్టింగ్‌ చేయాలి. విద్యార్థులకు జూలై 1 నుంచి 6వరకు ఓరియెంటేషన్‌ తరగతులుంటాయి. ఫస్టియర్‌ సెమిస్టర్‌ తరగతులు జూలై 8 నుంచి ప్రారంభమవుతాయి.