TV
ICC Cricket World Cup 2023 - New Zealand vs Netherlands: వన్డే వరల్డ్‌కప్‌-2023లో నెదర్లాండ్స్‌తో మ్యాచ్లో న్యూజిలాండ్‌ బ్యాటర్లు అదరగొట్టారు. విల్‌ యంగ్‌, రచిన్‌ రవీంద్ర, టామ్‌ లాథమ్‌ అర్ధ శతకాలతో చెలరేగి జట్టును పటిష్ట స్థితిలో నిలిపారు. కాగా ఉప్పల్‌లో సోమవారం నాటి మ్యాచ్లో టాస్‌ గెలిచిన డచ్‌ జట్టు తొలుత బౌలింగ్‌ ఎంచుకుంది.
మూడు హాఫ్‌ సెంచరీలు
ఈ క్రమంలో స్కాట్‌ ఎడ్వర్డ్‌ బృందం ఆహ్వానం మేరకు బ్యాటింగ్‌కు దిగిన కివీస్‌కు ఓపెనర్లు డెవాన్‌ కాన్వే(32), విల్‌ యంగ్‌ శుభారంభం అందించారు. గత మ్యాచ్‌ సెంచరీ హీరో, వన్‌డౌన్‌ బ్యాటర్‌ రచిన్‌ రవీంద్ర ఈసారి 51 పరుగులతో రాణించగా.. ఆ తర్వాతి స్థానాల్లో బ్యాటింగ్‌ చేసిన డారిల్‌ మిచెల్‌ 48, కెప్టెన్‌ టామ్‌ లాథమ్‌ 53 పరుగులతో అదరగొట్టారు.
సాంట్నర్‌ మెరపులు
అయితే, ఈ మ్యాచ్లో గ్లెన్‌ ఫిలిప్స్‌(4) పూర్తిగా నిరాశపరచగా.. మార్క్‌ చాప్‌మన్‌ 5 పరుగులు మాత్రమే చేశాడు. ఎనిమిదో స్థానంలో వచ్చిన మిచెల్‌ సాంట్నర్‌ మెరుపు ఇన్నింగ్స్‌ ఆడాడు. 17 బంతులు ఎదుర్కొన్న ఈ లెఫ్టాండ్‌ బ్యాటర్‌ 3 ఫోర్లు, 2 సిక్స్‌ల సాయంతో 36 పరుగులతో అజేయంగా నిలిచాడు.
ఇక.. తొమ్మిదో నంబర్‌లో బ్యాటింగ్‌ చేసిన మ్యాట్‌ హెన్రీ 10 పరుగులతో నాటౌట్‌గా నిలిచాడు. ఈ క్రమంలో.. నిర్ణీత 50 ఓవర్లలో ఏడు వికెట్ల నష్టానికి న్యూజిలాండ్‌ 322 పరుగులు చేసింది.
నెదర్లాండ్స్‌కు కష్టమే!
నెదర్లాండ్స్‌ బౌలర్లలో వాన్‌ డెర్‌ మెర్వే, పాల్‌ వాన్‌ మెకెరెన్‌, ఆర్యన్‌ దత్‌ రెండేసి వికెట్లు తీయగా.. ఆల్‌రౌండర్‌ బాస్‌ డి లిడేకు ఒక వికెట్‌ దక్కింది. హైదరాబాద్‌లోని రాజీవ్‌ గాంధీ స్టేడియంలో జరుగుతున్న మ్యాచ్లో కివీస్‌ విధించిన 323 పరుగుల లక్ష్యాన్ని డచ్‌ టీమ్‌ ఛేదించడం కష్టంగానే కనిపిస్తోంది!
ఇదిలా ఉంటే.. ఆరంభ మ్యాచ్లో డిఫెండింగ్‌ చాంపియన్‌ ఇంగ్లండ్‌పై న్యూజిలాండ్‌ 9 వికెట్ల తేడాతో ఘన విజయం సాధించిన సంగతి తెలిసిందే. మరోవైపు.. నెదర్లాండ్స్‌.. ఉప్పల్‌లో పాకిస్తాన్‌తో మ్యాచ్లో 81 పరుగుల భారీ తేడాతో ఓటమిపాలైంది. మరి ఇదే వేదికపై మరోసారి పటిష్ట కివీస్‌తో తలపడుతున్న డచ్‌ జట్టు పరిస్థితి ఎలా ఉండబోతుందో!?
చదవండి: CWC 2023: ఓవరాక్షన్‌కు తప్పదు భారీ మూల్యం.. షాకిచ్చిన ఐసీసీ
Comments
Please login to add a commentAdd a comment