TV
జాన్‌ సీన షేర్‌ చేసిన కోహ్లి ఫొటో
సౌతాంప్టన్‌: వరల్డ్‌ టెస్టు చాంపియన్‌షిప్‌ ఫైనల్ ఎప్పుడెప్పుడు ఆరంభమవుతుందా అని టీమిండియా అభిమానులు ఎదురుచూస్తున్నారు. జూన్‌ 18న ప్రారంభమయ్యే ఈ మెగా టోర్నీ గురించి ఇప్పటికే సోషల్ మీడియా వేదికగా తమ అభిప్రాయాలు పంచుకుంటూ సందడి చేస్తున్నారు. అన్ని విధాలుగా పటిష్టంగా ఉన్న విరాట్‌ కోహ్లి నేతృత్వంలోని భారత జట్టే విజయకేతనం ఎగురవేస్తుందంటూ జోస్యం చెబుతున్నారు. రకరకాల మీమ్స్‌, ఫొటోలతో హల్‌చల్‌ చేస్తున్నారు. ఈ క్రమంలో డబ్ల్యూడబ్ల్యూఈ వరల్డ్‌ స్టార్‌ జాన్‌ సీన ఇన్‌స్టాలో షేర్‌ చేసిన ఓ పోస్టు ఫ్యాన్స్‌ను ఆకర్షిస్తోంది. బ్యాట్‌ చేతబట్టి సీరియస్‌ లుక్‌తో ఉన్న కోహ్లి ఫొటోను పంచుకున్న జాన్‌ సీన.. క్యాప్షన్‌ మాత్రం జతచేయలేదు.
ఇక ఈ పోస్టుకు స్పందనగా.. ‘‘ ‘‘కింగ్‌ కోహ్లి క్రేజ్‌ అలాంటిది మరి. తను ఎక్కడైనా ఉంటాడు. డబ్ల్యూటీసీ ఫైనల్‌కు ముందు జాన్‌ సీన టీమిండియాకు ఇలా మద్దతు తెలిపాడు’’ అంటూ భారత అభిమానులు కామెంట్లు చేస్తున్నారు. ప్రస్తుతం ఈ ఫొటో సోషల్ మీడియాలో వైరల్‌ అవుతోంది. కాగా ఈ నెల 18 నుంచి భారత్‌, న్యూజిలాండ్‌ల మధ్య డబ్యూటీసీ ఫైనల్ ప్రారంభం కానుంది. ఈ నేపథ్యంలో జూన్‌ 3న సౌతాంప్టన్‌కి చేరుకున్న టీమిండియా.. ప్రాక్టీస్ సెషన్స్‌లో బిజీగా గడుపుతోంది. ఆదివారం రెండు జట్లుగా విడిపోయిన భారత ఆటగాళ్లు ప్రాక్టీసు మ్యాచ్‌ ఆడారు.
ఈ సందర్భంగా రిషబ్ పంత్ అద్భుత శతకంతో (94 బంతుల్లోనే 121 పరుగులు) అజేయంగా నిలువగా, ఓపెనర్ శుభమన్ గిల్ హాఫ్‌ సెంచరీతో (135 బంతుల్లో 85 పరుగులు) ఆకట్టుకున్నాడు. ఇక బౌలర్లలో ఇషాంత్ శర్మ(3/36) ఒక్కడే మెరుగ్గా రాణించాడు. కాగా కోహ్లి సేన వరుస విజయాలతో జోరు మీద ఉండటం.. మరోవైపు ఇంగ్లండ్‌పై టెస్టు సిరీస్‌ విజయంతో విలియమ్సన్‌ బృందం ఆత్మవిశ్వాసంతో ముందుకు సాగనుండటంతో డబ్ల్యూటీసీ పోరు మరింత రసవత్తరంగా మారడం ఖాయంగా కనిపిస్తోంది.
Comments
Please login to add a commentAdd a comment