సామాన్య భక్తులకే ప్రాధాన్యం

డయల్‌ యువర్‌ ఈఓలో మాట్లాడుతున్న టీటీడీ ఈఓ ధర్మారెడ్డి

తిరుమల : శ్రీవారి దర్శనార్థం విచ్చేసే సామాన్య భక్తులకే ప్రాధాన్యమిస్తున్నట్లు టీటీడీ ఈఓ ఏవీ ధర్మారెడ్డి తెలిపారు. ఆదివారం తిరుమల అన్నమ య్య భవన్‌లో నిర్వహించిన డయల్‌ యువర్‌ ఈఓ కార్యక్రమంలో ఆయన పాల్గొన్నారు. ఈఓ మాట్లాడుతూ నాదనీరాజనం వేదికపై ఈ నెల 3వ తేదీ నుంచి శ్రీమద్భాగవత ప్రవచనం సాగుతోందన్నా రు. రోజూ సాయంత్రం 6 నుంచి 7 గంటల వరకు కార్యక్రమాన్ని ఎస్వీబీసీ ప్రత్యక్ష ప్రసారం చేస్తోందని వెల్లడించారు. శ్రీ కుప్పా విశ్వనాథశర్మ చేపట్టిన ప్రవచనానికి విశేష స్పందన లభిస్తోందన్నారు. అనంతరం భక్తులతో ఫోన్‌లో మాట్లాడారు..

● ప్రవీణ్‌ కుమార్‌, మహారాష్ట్ర : అంగప్రదక్షిణ టోకెన్లను ఆఫ్‌లైన్‌లో కూడా ఇవ్వండి.

ఈఓ : భక్తుల సౌకర్యార్థమే ఆన్‌లైన్‌లో అంగప్రదక్షిణ టోకెన్లు జారీ చేస్తున్నాం.

● స్వామి, అనంతపురం : శ్రీవారి సేవకు వచ్చాం. ఫోన్‌ నంబర్‌ మార్చాలని విజ్ఞప్తి చేశాం. అయితే కొత్త నంబర్‌ నమోదు చేసుకోవడం వీలుకాలేదు.

ఈఓ : తప్పకుండా మారుస్తాం.

● శంకర్‌ గౌడ్‌, హైదరాబాద్‌ : 3 నెలల ముందుగా రూ.300 దర్శన టికెట్లు విడుదల చేస్తున్నారు. మహిళలకు ఇబ్బందిగా ఉంటుంది. ఒక నెల ముందు మాత్రమే విడుదల చేస్తే బావుంటుంది.

ఈఓ : ఎక్కువమంది భక్తుల కోరిక మేరకు 3 నెలల ముందుగా రూ.300 దర్శన టికెట్లు విడుదల చేస్తున్నాం. ఆగస్టు, సెప్టెంబర్‌ నెలలకు సంబంధించి 4 వేల టికెట్లను అదనంగా విడుదల చేస్తాం.

● దుర్గాప్రసాద్‌, అనకాపల్లి : లక్కీ డిప్‌లో ఆర్జిత సేవా టికెట్లు దొరకడం లేదు.

ఈఓ : లక్కీ డిప్‌లో ఆర్జిత సేవా టికెట్లు తక్కువగా ఉన్నాయి. స్వామివారిని ప్రార్థించి ప్రయత్నించండి.

● హరి, మంచిర్యాల : సీనియర్‌ సిటిజన్లకు కాటేజీల్లో గ్రౌండ్‌ ఫ్లోర్‌ వచ్చేలా చూడండి.

ఈఓ : రిసెప్షన్‌ అధికారులకు ఈ మేరకు ఆదేశాలిస్తాం.

● మనోహర్‌, జగిత్యాల : తలనీలాలు సమర్పించే ప్రాంతంలో క్షురకులు డబ్బులు అడగకుండా కంట్రోల్‌ చేయండి.

ఈఓ : భక్తులు ఎవరూ డబ్బులు ఇవ్వకపోతేనే సమస్య పరిష్కారం అవుతుంది. క్షురకులు డబ్బులు తీసుకుంటున్నట్లు మా దృష్టికి వస్తే కఠిన చర్యలు తీసుకుంటున్నాం. వారికి తరచూ కౌన్సెలింగ్‌ కూడా ఇస్తున్నాం.

● కర్నూలు, రతీదేవి : శ్రీవారి సేవకులకు సేవాసదన్‌లో అన్నప్రసాదాలు అందించండి.

ఈఓ : శ్రీవారి సేవకుల కోసం వెంగమాంబ అన్నప్రసాద భవనంలో ప్రత్యేకంగా హాలు కేటాయించాం. సేవాసదన్‌లో కూడా అన్న ప్రసాదాలు అందించే విషయాన్ని పరిశీలిస్తాం.

● రవికుమార్‌, బెంగళూరు, సుహాసిని, నంద్యాల : బంగారు వాకిలి వద్ద టీటీడీ సిబ్బంది భక్తులను లాగేస్తున్నారు. భక్తులకు ఇబ్బందిగా ఉంది.

ఈఓ : భక్తులందరికీ సంతృప్తికరంగా దర్శన భాగ్యం కల్పించేందుకు మహద్వారం నుంచి గర్భాలయం వరకు ఒకే వరుస విధానాన్ని అమలు చేస్తున్నాం.

● రెడ్డి, రాయచోటి : తిరుపతి రైల్వే స్టేషన్‌, విష్ణునివాసం వద్ద భిక్షకులు, అపరిచిత వ్యక్తుల సంచారం ఎక్కువగా ఉంది. విష్ణునివాసంలో ఎస్‌ఎస్‌డీ టోకెన్లకు సంబంధించి సూచిక బోర్డు లేదు.

ఈఓ : రైల్వే స్టేషన్‌, విష్ణు నివాసం ప్రాంతాల్లో భిక్షకులు, అపరిచిత వ్యక్తుల సంచారంపై జిల్లా యంత్రాంగానికి తెలియజేస్తాం. విష్ణు నివాసంలో ఎస్‌ఎస్‌డీ టోకెన్లకు సంబంధించి సూచిక బోర్డులు ఏర్పాటు చేయిస్తాం.

● మణికంఠ, పలమనేరు : లడ్డూ కౌంటర్‌ వద్దకు కుటుంబ సభ్యులందరూ వెళితేనే లడ్డూలు ఇస్తున్నారు. లేకపోతే ఇవ్వడం లేదు.

ఈఓ : దళారులను అరికట్టేందుకు ఈ నిర్ణయం తీసుకున్నాం. భక్తులు సహకరించగలరు.

● మునిలక్ష్మి, నెల్లూరు : ఆర్జిత సేవలు, వర్చువల్‌ సేవలు ఒకేరోజు ఆన్‌లైన్‌లో విడుదల చేస్తున్నారు. దీంతో భక్తులు ఇబ్బంది పడుతున్నారు. వేర్వేరు రోజుల్లో విడుదల చేస్తే సౌకర్యంగా ఉంటుంది.

ఈవో: పరిశీలించి తగు చర్యలు తీసుకుంటాం.

● శ్రీరామ్‌, విశాఖ : వికలాంగులు, వృద్ధులను ఒకేసారి కాకుండా వేర్వేరుగా దర్శనానికి పంపితే బావుంటుంది.

ఈవో : అలాగే పంపుతాం.

● హనుమంతరావు, గుంటూరు : తిరుమలలో గది తీసుకున్నాం. డిపాజిట్‌ రీఫండ్‌ రాలేదు.

ఈఓ : మీకు ఫోన్‌ చేసి రీఫండ్‌ వివరాలు తెలియజేస్తాం.

● వేణుగోపాల్‌, హైదరాబాద్‌ : ఎస్వీబీసీ తెలుగు ఛానల్‌లో ఇతర భాషల కార్యక్రమాలను నిలుపుదల చేయండి.

ఈఓ : భక్తులకు సౌకర్యంగా ఉండేలా కార్యక్రమాలు ప్రసారం చేస్తాం.

● రాజు, వనపర్తి : శ్రీవారి మెట్టు మార్గంలో లగేజ్‌ డిపాజిట్‌ చేసి నడిచి వచ్చాం. తిరుమలలో తిరిగి తీసుకోవడం ఇబ్బందిగా మారింది.

ఈఓ : లగేజ్‌ కలెక్షన్‌, డెలివరీ సిస్టం పేరుతో నూతన వ్యవస్థను ఏర్పాటు చేస్తున్నాం. ఈ వ్యవస్థలో క్యూఆర్‌ కోడ్‌ స్లిప్‌ జారీ చేసి భక్తులకు ఎలాంటి ఇబ్బంది లేకుండా లగేజీ అందజేస్తాం.

● ఈశ్వర్‌ ప్రసాద్‌, ఐరాల : శ్రీవారి మెట్టు మార్గంలో అల్పాహారం కోసం దుకాణాల వద్ద అధిక ధరలు వసూలు చేస్తున్నారు.

ఈఓ : అధిక ధరలు వసూలు చేస్తున్న దుకాణాలపై చర్యలు తీసుకుంటాం. శ్రీవారి మెట్టు మార్గం మొదట్లోనే అన్నప్రసాదాలు అందించేందుకు చర్యలు తీసుకుంటాం.

● మధు కులకర్ణి, కర్ణాటక : తిరుమలలో గదులు పొందిన భక్తులు మరో రెండు రోజులు పొడిగించుకునే అవకాశం కల్పించండి.

ఈఓ : తిరుమలలో గదుల లభ్యత పరిమితంగా ఉంది. ఎక్కువమంది భక్తులకు అవకాశం కల్పించాలి కాబట్టి 2 రోజులు పొడిగించుకునే అవకాశం లేదు.

● వెంకటరమణమూర్తి, హైదరాబాద్‌ : ఎన్నారై భక్తురాలు దర్శన టికెట్‌ కోసం ప్రయత్నిస్తే ఇవ్వలేదు.

ఈఓ : ఎన్నారైలు తమ అర్హతను చూపితే రూ.300 టికెట్‌ జారీచేసి స్వామివారి దర్శనం కల్పిస్తున్నాం.

● రామిరెడ్డి, కర్నూలు : కర్నూలులో శ్రీవారి లడ్డూలు పొందే అవకాశం కల్పించండి.

ఈఓ : హైదరాబాదుకు లడ్డూలు తీసుకువెళ్లే వాహనం ద్వారా కర్నూలులో ప్రయోగాత్మకంగా వెయ్యి లడ్డూలతో ఈ సౌకర్యం కల్పిస్తాం.

కార్యక్రమంలో టీటీడీ జేఈఓలు సదాభార్గవి, వీరబ్రహ్మం, చీఫ్‌ ఇంజినీర్‌ నాగేశ్వరరావు, ఎస్‌ఈ–2 జగదీశ్వర్‌ రెడ్డి, ఆరోగ్యశాఖ అధికారి డాక్టర్‌ శ్రీదేవి, అన్న ప్రసాదం ప్రత్యేకాధికారి శాస్త్రి, వీజీఓ బాలిరెడ్డి పాల్గొన్నారు.