అండర్‌–19 వన్డే వరల్డ్‌కప్‌లో సంచలనం నమోదైంది. అఫ్గానిస్తాన్‌ అనూహ్య విజయంతో సెమీఫైనల్లోకి దూసుకెళ్లింది. క్వార్టర్‌ ఫైనల్లో న్యూజిలాండ్‌ను చిత్తుగా ఓడించింది. ముందుగా బ్యాటింగ్‌ చేసిన అఫ్గాన్‌ టీమ్‌ నిర్ణీత 50 ఓవర్లలో 6 వికెట్లు నష్టపోయి 309 పరుగులు చేసింది. రహ్మతుల్లా గర్బాజ్‌(69), ఇబ్రహీం జాడ్రాన్‌(68), బాహీర్‌ షా(67) అజ్మతుల్లా ఒమర్‌జాయ్‌ (66) అర్ధసెంచరీలతో రాణించారు. చివర్లో అజ్మతుల్లా చెలరేగి ఆడటంతో అఫ్గాన్‌ స్కోరు 300 పరుగులు దాటింది. అజ్మతుల్లా 23 బంతుల్లో 3 ఫోర్లు, 7 సిక్సర్లతో 66 పరుగులు బాదాడు.