రిజిస్ట్రేషన్లపై మళ్లీ ‘సమ్మె’ట

సాక్షి, కాకినాడ :స్థిరాస్తి రిజిస్ట్రేషన్లను ‘మీ సేవ’కు బదిలీ చేయబోమంటూ ప్రభుత్వం ఇచ్చిన హామీ అమలుకు నోచుకోకపోవడాన్ని నిరసిస్తూ దస్తావేజు లేఖర్లు, స్టాంప్ వెండర్లు శనివారం నుంచి మళ్లీ సమ్మె బాటపట్టారు. వారు నిరవధిక సమ్మెకు దిగడంతో జిల్లావ్యాప్తంగా రిజిస్ట్రేషన్లు నిలిచిపోయాయి. గతనెల 26, 27, 28 తేదీల్లో 72 గంటల సమ్మె చేసిన లేఖర్లు, వెండర్లు స్థిరాస్తి రిజిస్ట్రేషన్ల బదిలీని విరమించుకుంటామని స్టాంపులు, రిజిస్ట్రేషన్ల శాఖ మంత్రి తోట నరసింహం హామీనివ్వడంతో ఆందోళనను విరమించారు. దస్తావేజు నకళ్లు (సీసీలు), ఎంకంబరెన్స్ సర్టిఫికెట్లు(ఈసీ) జారీ బాధ్యతలను మీ సేవ నుంచి గతంలో మాదిరి సబ్‌రిజిస్ట్రార్ కార్యాలయాలకు అప్పగించాలని కూడా దస్తావేజు లేఖర్ల సంఘం డిమాండ్ చేసిం ది. దాంతో ప్రభుత్వం మీ సేవతో పాటు రిజిస్ట్రేషన్ కార్యాలయాల్లో కూడా సీసీలు, ఈసీలు తీసుకునే వెసులుబాటు కల్పిస్తూ ఈ నెల 9న ఉత్తర్వులు జారీ చేసింది. అయితే తర్వాత ఆ ఉత్తర్వును రద్దు చేస్తూ, మీ సేవ ద్వారానే సీసీలు, ఈసీలు జారీ చేయాలన్న గత ఉత్తర్వులనే కొనసాగిస్తూ ఈ నెల 16న  సర్క్యులర్ జారీ చేసింది.