అలమండలో హత్య?

అలమండ(జామి), న్యూస్‌లైన్ : మండలంలోని అలమండలో వ్యక్తి అనుమానాస్పద స్థితిలో మృతి చెందాడు. ఇది హత్యేనని సర్వత్రా అనుమానాలు వ్యక్తమవుతున్నాయి. స్థానికులు, మృతుని కుటుంబ సభ్యులు తెలిపిన వివరాల ప్రకారం... అలమండ గ్రామానికి చెందిన బూసర్ల రాధ అప్పలనాయుడు(40) మంగళవారం రాత్రి అదే గ్రామంలోని గేదెల సన్నిబాబు అనే రైతు పొలానికి అప్పలరాజు చెరువు పెద్ద మదుము ద్వారా వచ్చే కాలువ నీటిని ఆయిల్ ఇంజన్ ద్వారా తోడడానికి వెళ్లాడు. రాత్రి  తొమ్మిది గంటలైనా ఇంటికి రాకపోవడంతో కుటుంబ సభ్యులు అతని సెల్‌ఫోన్‌కు రింగ్ చేశారు. స్పందన లేకపోవడంతో రాత్రంతా వెతికారు. బుధవారం ఉదయం అప్పలరాజు చెరువు సమీపంలో ఉన్న లగుడు అయ్యప్ప కల్లాల వద్ద దిమ్మపై అప్పలనాయుడు విగతజీవై పడి ఉండడాన్ని కొంతమంది గమనించి గ్రామస్తులకు సమాచారం అందించారు. మృతుని కుటుంబ సభ్యులు, గ్రామస్తులు సంఘటన స్థలానికి చేరుకున్నారు. మృతుడి తల, వీపు వెనుక, చెవి వద్ద చిన్నచిన్న గాయాలున్నాయి. శరీరంపై రక్తపు మరకలు ఉన్నాయి. పెద్ద దెబ్బలు లేకపోవడం, ఒంటిపై ఎక్కువగా రక్తం ఉండడం అనుమానాలకు తావిస్తోంది.