శ్రీవారి ఆర్జిత సేవల లక్కీడిప్‌ కోటా విడుదల

తిరుమల: తిరుమలలో లక్కీడిప్‌ కింద శ్రీవారి ఆర్జిత సేవా టికెట్ల జూలై కోటా గురువారం టీటీడీ ప్రజా సంబంధాల విభాగం విడుదల చేసింది. ఆర్జిత సేవలకు ముందు రోజు సాయంత్రం 5 గంటల్లోగా కేంద్రీయ విచారణ కార్యాలయం (సీఆర్‌వో)లోని విజయాబ్యాంక్‌  కౌంటర్‌లో లక్కీడిప్‌ ద్వారా టికెట్లు కేటాయిస్తారు. ఉదయం 11 నుంచి సాయంత్రం 5గంటల వరకు భక్తులు తమ వ్యక్తిగత వివరాలు, వేలిముద్రలు, సెల్‌ నంబర్‌ కంప్యూటర్‌లో నమోదు చేసుకుని టోకెన్‌ పొందాలి.

నమోదు చేసుకున్నవారిలో కంప్యూటర్‌ ర్యాండమ్‌ పద్ధతిలో అందుబాటులో ఉన్న  ఆర్జిత సేవా టికెట్లు కేటాయిస్తారు. తర్వాత ఎంపికైన భక్తుడి సెల్‌ నంబరుకు ఎస్‌ఎంఎస్‌ల రూపంలో సమాచారం అందజేస్తారు. రాత్రి 8 గంటల్లోపు ఆ టికెట్టు కొనుగోలు చేయాలి. శుక్రవారం నిర్వహించే పురాభిషేకం, మేల్‌చాట్‌ వస్త్రం టికెట్లను రెండో విడత లక్కీడిప్‌లో కేటాయిస్తారు. వీటిని రాత్రి 10 గంటల్లోపు భక్తులు పొందవచ్చు.