అక్టోబర్‌ నెలలో పండుగలే...పండగలు

రాయచోటి రూరల్‌: అక్టోబర్‌ నెల పండుగల వాతావరణంతో నిండిపోనుంది. 1153వ సంవత్సరం తరువాత అంత అరుదైన నెల అక్టోబర్‌ మళ్లీ ఇప్పుడు వచ్చినట్లు పలువురు వేదపండితులు పేర్కొంటున్నారు. సుమారు 8 శతాబ్దాల తరువాత వచ్చిన అరుదైన నెలగా అక్టోబర్‌ నిలిచిపోనుంది.  నెల ప్రారంభం నుంచే , అంటే 1వ తేదీ నుంచి పండుగలు ప్రారంభం కానున్నాయి. 1వ తేది దేవీశరన్నవరాత్రులు ప్రారంభంతో 9వ తేదీన దుర్గాష్టమి, 11వ తేదీ విజయదశమితో వరుసగా 11రోజులు పండుగలే ఉంటాయి. కొన్ని ప్రాంతాల్లో మరో రోజు అధికంగా 12రోజుల పాటు నిర్వహించుకోనున్నారు. ఆ తరువాత 3వ తేదీ ప్రారంభమై, 10రోజుల పాటు 12వ తేదీ వరకు పీర్లపండగ(మొహర్రం) ఉంటుంది. 2వ తేదీ గాంధీ జయంతి, 30వ తేదీ దీపావళి పండుగ నిర్వహించుకోనున్నారు. విచిత్రంగా ఈ నెలలోనే పౌర్ణమి, అమావాస్య రెండూ వచ్చాయి. విద్యార్థులకు దసరా సెలవులు రావడంతో స్వగ్రామాల్లో సందడి వాతావరణం నెలకొననుంది.