హీరోయిన్ వింధ్యపై ఈసీ కేసులు

హీరోయిన్ వింధ్యపై ఈసీ కేసులు

తమిళ హీరోయిన్ వింధ్య సహా పలువురు అన్నాడీఎంకే కార్యకర్తలపై కేసులు నమోదు చేసినట్లు పోలీసులు తెలిపారు. ముందస్తు అనుమతులు తీసుకోకుండా చెన్నై నగరంలో ప్రచారం చేసినందుకు ఈ కేసులు నమోదు చేశారు. తమిళనాడులో అధికార పార్టీ అయిన అన్నాడీఎంకే తరఫున పలువురు సినీ నటులు ప్రచారం చేస్తున్నారు. వారిలో వింధ్య కూడా ఒకరు. పార్టీ అభ్యర్థి మహేంద్రన్ తరఫున ఆమె ప్రచారానికి వెళ్లారు.

అయితే ముందుగా ఎన్నికల కమిషన్ నుంచి ఆమె అందుకు కావల్సిన అనుమతి తీసుకోలేదు. దీనిపై ఎన్నికల కమిషన్ నుంచి ఫిర్యాదులు రావడంతో తాము కేసులు నమోదు చేసినట్లు పోలీసులు తెలిపారు. వింధ్యతో పాటు అన్నాడీఎంకే కార్యకర్తలు, సభ నిర్వాహకులపై ఈ కేసులు నమోదయ్యాయి.