TV
పాతబస్తీలో గ్యాంగ్‌వార్.. ఉద్రిక్తత
హైదరాబాద్: నగరంలోని పాతబస్తీ పరిధిలో గల ఆసిఫ్‌నగర్ మురాద్‌నగర్‌లో అర్ధరాత్రి తర్వాత ఉద్రిక్త పరిస్థితులు నెలకొన్నాయి. ఏదో విషయమై ఒకే ప్రాంతానికి చెందిన రెండు వర్గాల మధ్య వివాదం చెలరేగింది. ఈ క్రమంలో ఇరువర్గాలు రాళ్ల దాడికి పాల్పడ్డాయి. రెండు గ్యాంగ్‌లు తలపడిన ఈ గొడవలో 5 షాపులతో పాటు ఆరు కార్లు పాక్షికంగా ధ్వంసమయ్యాయని పోలీసులు తెలిపారు. మాటా మాటా పెరిగిపోవడంతో రెండు గ్యాంగ్‌లు రాత్రి ఒంటిగంట ప్రాంతంలో విచక్షణారహితంగా పరస్పర దాడులకు దిగాయి.
ఈ వివాదంలో ఒక వర్గానికి చెందిన ఇద్దరు వ్యక్తులకు తీవ్ర గాయాలయ్యాయి. సమాచారం అందుకున్న అధికారులు మురాద్‌నగర్‌లో భద్రతను పెంచారు. ఆ ప్రాంతంలో పోలీసులను భారీగా మోహరించారు. ఘటనా స్థలాన్ని పరిశీలించారు. గొడవ తలెత్తడానికి గల కారణాలు, ఇతర వివరాలు తెలియాల్సి ఉంది.
