దుర్గా మాత ఆశీర్వాదంతో...

ప్రారంభోత్సవంలో భూమి

‘దుర్గావతి’ ప్రయాణం మొదలైంది. భూమి ఫడ్నేకర్‌ ప్రధాన పాత్రలో నటిస్తున్న చిత్రం ‘దుర్గావతి’. తెలుగులో హిట్‌ సాధించిన అనుష్క ‘భాగమతి’ (2018) చిత్రానికి ఇది హిందీ రీమేక్‌. అక్షయ్‌ కుమార్, భూషణ్‌ కుమార్‌ సమర్పణలో విక్రమ్‌ మల్హోత్రా ఈ చిత్రాన్ని నిర్మిస్తున్నారు. ‘భాగమతి’ చిత్రానికి దర్శకత్వం వహించిన జి. అశోకే ‘దుర్గావతి’ని తెరకెక్కిస్తుండటం విశేషం. దర్శకుడిగా హిందీలో అశోక్‌కి ఇది తొలి చిత్రం. ఐపీఎస్‌ ఆఫీసర్‌గా భూమి ఫడ్నేకర్‌ నటిస్తోన్న ఈ చిత్రంలో మహీ గిల్‌ పోలీస్‌ పాత్రలో నటిస్తున్నారు. ‘‘దుర్గా మాత ఆశీర్వాదంతో ‘దుర్గావతి’ చిత్రీకరణ మొదలైంది. నా కెరీర్‌లో ఓ ప్రత్యేకమైన సినిమా షూటింగ్‌ను స్టార్ట్‌ చేశాను. టాల్‌ అండ్‌ స్ట్రాంగ్‌గా నిలబడటానికి నేను రెడీ అక్షయ్‌ సార్‌’’ అన్నారు భూమి. ‘దుర్గావతి’ చిత్రాన్ని ఈ ఏడాదిలోనే విడుదల చేయాలనుకుంటున్నారు.