అమెరికాలో ఓరి దేవుడోయ్

అమెరికాలో సంగీత దర్శకుడు కోటి ఆధ్వర్యంలో ఓ తెలుగు చిత్రానికి పాటల కంపోజింగ్ జరిగింది. ఆ సినిమా పేరు ‘ఓరిదేవుడోయ్’. ప్రవాసాంధ్రుడు శ్రీరామ్ వేగిరాజు దర్శకత్వంలో రాజీవ్ సాలూరి హీరోగా, ఛేజింగ్ డ్రీమ్ ప్రొడక్షన్స్ పతాకంపై వి.రవిశంకర్ ఈ చిత్రాన్ని నిర్మిస్తున్నారు. ఈ సందర్భంగా దర్శకుడు శ్రీరామ్ మాట్లాడుతూ -‘‘ఇది సోషియో ఫాంటసీ ఎంటర్‌టైనర్. తెలుగు ప్రేక్షకులకు చాలా కొత్తగా అనిపిస్తుంది. అమెరికాకు చెందిన మ్యుజీషియన్స్‌తో 6 పాటలను, థీమ్ స్కోర్‌ను కోటి కంపోజ్ చేశారు. ఈ పాటలు ఫ్రెష్ ఫీల్‌తో శ్రోతలను ఆకట్టుకుంటాయి’’ అని చెప్పారు. నిర్మాత వి.రవిశంకర్ మాట్లాడుతూ -‘‘మా దర్శకుడు శ్రీరామ్ గతంలో ‘డిస్టాంట్ బీట్స్’ అనే సినిమా చేసి విమర్శకుల ప్రశంసలతో పాటు, లాస్‌ఏంజిల్స్ ఫిలిమ్ ఫెస్టివల్‌లో పురస్కారం కూడా సాధించారు. ‘ఓరి దేవుడోయ్’ షూటింగ్ ఈ నెలాఖరున మొదలుపెడతాం. సింగిల్ షెడ్యూల్‌లో సినిమా పూర్తి చేస్తాం’’ అని తెలిపారు.