మట్టితో తయారు చేసిన కేకును కట్ చేస్తున్నకాంగ్రెస్‌ నేతలు

వారణాసి : భారత ప్రధాని నరేంద్ర మోదీ 68వ పుట్టినరోజు సందర్భంగా రాష్ట్రపతితో సహా పలువురు కేంద్ర మంత్రులు, ప్రతిపక్ష నాయకులు ట్విటర్‌ ద్వారా ఆయనకు జన్మదిన శుభాకాంక్షలు తెలిపారు.  కాంగ్రెస్‌ పార్టీ అధ్యక్షుడు రాహుల్‌ గాంధీ సైతం విషెస్‌ తెలియజేశారు. ‘మన ప్రధాని నరేంద్ర మోదీజీకి పుట్టినరోజు శుభాకాంక్షలు. మీరు ఆయురారోగ్యాలతో సంతోషంగా ఉండాలని కోరుకుంటున్నా’ అని ట్వీట్‌ చేశారు. దీనికి మోదీ సైతం ధన్యవాదాలు తెలిపారు.

ఇక వారణాసి కాంగ్రెస్‌ కార్యకర్తలు మోదీ పుట్టిన రోజు వేడుకలను వినూత్నంగా జరిపారు. వారాణాసిలోని రోడ్ల దుస్థితిని తెలియజేస్తూ.. మట్టితో తయారు చేసిన ప్రత్యేక కేకును మోదీ ఫొటో ముందు ఉంచి కట్‌ చేశారు. ‘వారణాసిలోని గుంతల రోడ్ల దుస్థితిని తెలియజేసేలా మట్టితో తయారు చేసిన కేకును కట్‌ చేశాం. ఆ రోడ్లపై బైక్‌ నడపాలన్నా.. వాహనాల్లో ప్రయాణించాలన్నా చాలా కష్టంగా ఉంది. గత నాలుగున్నరేళ్లుగా ఆయన చేసిన దానికి బహుమతిగా ఈ పని చేశాం’ అని జిల్లా కాంగ్రెస్‌ నేత హరీష్‌ మిశ్రా తెలిపారు. ఇక మోదీ మద్దతుదారులు భారీ ఎత్తున ఆయన జన్మదిన వేడుకలను నిర్వహించారు. ప్రత్యేక పూజలు సైతం నిర్వహిస్తున్నారు.