రాజ్నాథ్ కు దన్నుగా నిలిచిన విపక్షాలు

న్యూఢిల్లీ: సార్క్ సమావేశానికి హాజరైన కేంద్ర హోం మంత్రి రాజ్ నాథ్ సింగ్ పట్ల పాకిస్థాన్ వ్యవహరించిన తీరును రాజ్యసభలో ప్రతిపక్షాలు ముక్తకంఠంతో ఖండించాయి. ప్రొటోకాల్ పాటించ కుండా రాజ్నాథ్ సింగ్ ను అవమానించిందని, దీన్ని అన్ని పార్టీలు ఖండించాలని జేడీ(యూ) నాయకుడు శరద్ యాదవ్ అన్నారు. పాకిస్థాన్ వ్యవహార శైలిని తీవ్రంగా ఖండిస్తున్నట్టు ప్రకటించారు. ఈ విషయంలో జాతి యావత్తు ఐకమత్యంగా ఉండాలని ఆయన పిలుపునిచ్చారు.

యాదాది దేశం ప్రవర్తనపై ఇటీవల మీడియాలో వార్తలు వచ్చిన నేపథ్యంలో పాకిస్థాన్ తో సంబంధాలపై పునరాలోచన చేయాలని ప్రధాన మంత్రిని కోరాలని హోంమంత్రికి మాయావతి సూచించారు. రాజ్నాథ్ పర్యటన సందర్భంగా పాకిస్థాన్ లో నిరసన ప్రదర్శనలు నిర్వహించడాన్ని ఖండిస్తున్నట్టు ఎన్సీపీ ఎంపీ మజీద్ తెలిపారు.

ఈ నేపథ్యంలో రాబోయే రోజుల్లో పాకిస్థాన్ తో ఎలా వ్యవహరించబోతున్నారని సీపీఐ నేత డి. రాజా ప్రశ్నించారు. రాజ్నాథ్ పట్ల ప్రొటోకాల్ పాటించని పాక్ తీరును ఖండిస్తున్నట్టు కాంగ్రెస్ సీనియర్ నేత ఆనంద్ శర్మ తెలిపారు. పాకిస్థాన్ కు బుద్ధి వచ్చేలా గట్టి ప్రకటన చేయాలని రాజ్నాథ్ కు సూచించారు.