రాజ్యసభ చైర్మన్‌ ధన్‌ఖడ్‌పై అవిశ్వాసం తిరస్కరణ

న్యూఢిల్లీ:  రాజ్యసభ చైర్మన్‌ జగ్దీప్‌ ధన్‌ఖడ్‌పై విపక్షాలు ఇచ్చిన అవిశ్వాస తీర్మానం తిరస్కరణకు గురైంది. ఈ విషయాన్ని డిప్యూటి చైర్మన్‌ హరివంశ్ నారాయణ్‌ సింగ్‌ గురువారం వెల్లడించారు. అది వాస్తవ ప్రతిపాదికన లేదని పేర్కొంటూ తిరస్కరించినట్లు తెలిపారాయన.  

దేశంలో రెండో రాజ్యాంగబద్ధమైన స్థానంలో(ఉపరాష్ట్రపతి) ఉన్న వ్యక్తిపై అవిశ్వాస తీర్మాన నోటీసు ఇచ్చారు. కానీ,  అది వాస్తవ ప్రాతిపదికన లేదు. చట్టబద్ధమైన ఆందోళన కంటే.. ప్రచారం పొందడమే లక్ష్యంగా అందులో కనిపించింది. జాయింట్‌ ప్రెస్‌ కాన్ఫరెన్స్‌ ఉద్దేశం కూడా అలానే అనిపించింది అని డిప్యూటి చైర్మన్‌ హరివంశ్ తెలిపారు.

అలాగే.. ఇలాంటి నోటీసు విషయంలో 14 రోజుల నోటీసు తప్పనిసరి అనే నియమాన్ని పాటించలేదని.. పైగా ధన్‌ఖడ్‌ పేరు స్పెల్లింగ్‌ కూడా తప్పు రాశారని తెలిపారు. అయితే.. 60 మంది ఎంపీల సంతకం తప్పనిసరి అనే ఒకేఒక్క ప్రొటోకాల్‌ను మాత్రమే సరిగ్గా పాటించారని డిప్యూటీ చైర్మన్‌ వెల్లడించారు.

ధన్‌ఖడ్ పక్షపాతంగా వ్యవహరిస్తున్నారని, ప్రతిపక్ష నేతలను ఆయన లక్ష్యంగా చేసుకుంటున్నారని ఆరోపిస్తూ కాంగ్రెస్ నేతృత్వంలోని ఇండియా కూటమి ఈ నోటీసు ఇచ్చిన సంగతి తెలిసిందే. ఆమ్‌ఆద్మీతో సహా పలువురు ఇండియా కూటమి నేతలు దీనికి మద్దతిచ్చారు.

రాజ్యసభ.. వాయిదా ఇలా..!
పార్లమెంట్ ప్రవేశ ద్వారం వద్ద మహిళా ఎంపీలని కూడా చూడకుండా రాహుల్ గాంధీ నెట్టేశారంటూ కేంద్రమంత్రులు జేపీనడ్డా, కిరణ్ రిజిజు చేసిన ఆరోపణలపై పెద్దల సభలో తీవ్ర గందరగోళం నెలకొంది. మధ్యాహ్నం రెండు గంటలకు తిరిగి సభ ప్రారంభంకాగానే రాహుల్‌ గురించి మంత్రులు ఆరోపణలు చేశారు. అలాగే క్షమాపణ చెప్పాలని డిమాండ్ చేశారు. ఈ క్రమంలో అధికార, విపక్ష ఎంపీల నిరసనలతో సభా కార్యకలాపాలకు అంతరాయం ఏర్పడింది. దీంతో సభ రేపు ఉదయానికి వాయిదా పడింది.