TV
జగిత్యాల: ప్లాస్టిక్‌ గోడౌన్‌లో ప్రమాదవశాత్తు మంటలు చెలరేగడంతో భారీ అగ్నిప్రమాదం సంభవించింది. జగిత్యాల శ్రీరాంనగర్‌లోని ఓ ప్లాస్టిక్‌ గోడౌన్‌లో శనివారం తెల్లవారుజామున అగ్నిప్రమాదం సంభవించింది. మంటలు ఎగిసిపడటాన్ని గుర్తించిన స్థానికులు అగ్నిమాపక సిబ్బందికి సమాచారం అందించారు.
విషయం తెలుసుకున్న ఫైర్‌ సిబ్బంది సంఘటనా స్థలానికి చేరుకొని మంటలను అదుపులోకి తీసుకొచ్చారు. ఈ ప్రమాదంలో రూ. 5 లక్షల వరకు ఆస్తినష్టం వాటిల్లినట్లు సమాచారం. షార్ట్‌సర్క్యూట్‌ వల్లే ఈ ప్రమాదం జరిగి ఉంటుందని స్థానికులు భావిస్తున్నారు.
