సాక్షి, హైదరాబాద్‌: తెలంగాణ ఎంసెట్‌ ఫలితాలు విడుదల అయ్యాయి. గురువారం ఉదయం రాష్ట్ర విద్యాశాఖ మంత్రి సబితా ఇంద్రారెడ్డి ఫలితాలను విడుదల చేశారు.  ఇంజినీరింగ్‌, అగ్రికల్చర్‌, వైద్య విభాగాలకు సంబంధించిన ఫలితాల వివరాలను వెల్లడించారు. ఈ కార్యక్రమంలో ప్రభుత్వ కార్యదర్శి(ఉన్నత విద్య) కరుణ, కళాశాల, సాంకేతిక విద్యాశాఖ కమిషనర్ నవీన్ మిట్టల్, తెలంగాణ ఉన్నత విద్యామండలి ఛైర్మన్ ప్రొఫెసర్ ఆర్ లింబాద్రి సైతం పాల్గొన్నారు. పరీక్షరాసినవారిలో ఇంజినీరింగ్‌లో 80 శాతం, అగ్రికల్చర్‌లో 86 శాతం మంది ఉత్తీర్ణత సాధించినట్టు మంత్రి తెలిపారు. అలాగే.. రెండు కేటగిరీల్లో ఏపీకి చెందిన విద్యార్థులే టాప్‌ ఫైవ్‌ ర్యాంకుల్లో సత్తా చాటడం గమనార్హం.  సాక్షి ఎడ్యుకేషన్‌ ద్వారా ఫలితాలను  చెక్‌ చేసుకోవచ్చు. ఇంజినీరింగ్‌ పరీక్షలో 79 శాతం అబ్బాయిలు, 85 శాతం అమ్మాయిలు క్వాలిఫై అయినట్లు తెలిపారామె. అనిరుధ్‌ అనే విద్యార్థికి ఫస్ట్‌ ర్యాంక్‌ దక్కినట్లు ప్రకటించారు. అగ్రికల్చర్‌ పరీక్షలో 84 శాతం అబ్బాయిలు, 87 శాతం అమ్మాయిలు అర్హత సాధించారని తెలిపారు మంత్రి సబిత. అగ్రికల్చర్‌ & మెడిసిన్‌(AM) కేటగిరీ టాప్‌ 5 ర్యాంకుల్లో నలుగురు ఏపీకి చెందిన వాళ్లే కావడం గమనార్హం. తూర్పు గోదావరి జిల్లాకు చెందిన బూరుగుపల్లి సత్య రాజ జశ్వంత్‌ ఇందులో టాపర్‌గా నిలిచాడు.  ఇక.. ఇంజినీరింగ్‌ స్ట్రీమ్‌లో విశాఖపట్నంకు చెందిన సానపాల అనిరుధ్‌ టాపర్‌గా నిలిచాడు. ఇందులోనూ టాప్‌ 5లో నలుగురు ఏపీవాళ్లే కావడం గమనార్హం. ఎంసెట్ అగ్రిక‌ల్చర్, మెడిక‌ల్, ఇంజినీరింగ్ కోర్సుల‌కు సంబంధించిన ఫ‌లితాల ర్యాంకుల‌ను, మార్కుల‌ను విడుద‌ల చేశారు. ఎంసెట్‌ పరీక్షకు 94.11 శాతం విద్యార్థులు హాజరయ్యారు. మే 10, 11వ తేదీల్లో ఎంసెట్‌ అగ్రికల్చర్‌ అండ్‌ మెడికల్‌ స్ట్రీమ్‌ పరీక్షను, మే 12 నుంచి 15వరకు ఆరు విడతల్లో ఎంసెట్‌ ఇంజినీరింగ్‌ పరీక్షలు నిర్వహించారు. ఈ పరీక్షలన్నీ ఆన్ లైన్ లోనే జరిగాయి.  ఇంజినీరింగ్ పరీక్షలకు 1,95,275 మంది, అగ్రికల్చర్‌ విభాగంలో 1,06,514 మంది విద్యార్థులు హాజరయ్యారు. జూన్‌లో ఇంజినీరింగ్‌ ప్రవేశాలకు కౌన్సెలింగ్‌ ఉండే అవకాశం ఉంది. ఇక, స్థానిక విద్యార్థుల కోసం రాష్ట్ర కోటా కింద 85శాతం రిజర్వ్‌ చేయగా, 15 శాతం సీట్లు ఇతర రాష్ట్రాల విద్యార్థులకు కేటాయించారు. 

సాక్షి, హైదరాబాద్‌ : ఇంజనీరింగ్‌ ప్రవేశాల కోసం నిర్వహించిన తెలంగాణ ఎంసెట్‌ 2020 ఫలితాలు విడుదలయ్యాయి. కూక‌ట్‌ప‌ల్లిలోని జేఎన్టీయూ క్యాంప‌స్‌లో విద్యాశాఖ మండలి సబితా ఇంద్రారెడ్డి, ఉన్నత విద్యామండలి చైర్మన్‌ పాపిరెడ్డి, ఎంసెట్‌ కన్వీనర్‌ గోవర్ధన్‌ రెడ్డి ఈ ఫలితాలను విడుదల చేశారు.  ఎంసెట్‌ పరీక్ష రాసిన వారిలో 89,734 మంది(75%) ఉత్తీర్ణత సాధించారు. కాగా ఈసారి మొదటి పది ర్యాంకులు అబ్బాయిలే సాధించారు. వారణాసి సాయితేజకు మొదటిఫస్ట్‌ ర్యాంక్‌ రాగా, యశ్వంత్‌ సాయి-రెండో ర్యాంక్‌, వెంకటకృష్ణ-మూడో ర్యాంక్‌ సాధించారు. తెలంగాణ ఎంసెట్‌ ఫలితాల కోసం ఇక్కడ క్లిక్ ‌చేయండి ఈ సందర్భంగా మంత్రి సబితా ఇంద్రారెడ్డి మాట్లాడుతూ.. కరోనా సమయంలో అత్యంత క్లిష్టమైన పరిస్థితుల్లో పరీక్షల నిర్వహణ జరిగిందన్నారు. విద్యార్థుల పట్ల తగిన జాగ్రత్తలు తీసుకోవాలని సీఎం ముందుగా చెప్పినట్లు, అందుకు అనుగుణంగా అన్ని ఏర్పాట్లతో పరీక్ష నిర్వహించినట్లు వెల్లడించారు. ఇలాంటి విపత్కర పరిస్థితుల్లో కూడా విద్యార్థులు వచ్చి పరీక్షలు రాశారని తెలిపిన మంత్రి ఈ మేరకు విద్యార్థులకు, తల్లిదండ్రులకు కృతజ్ఞతలు తెలిపారు. అలాగే కరోనా కారణంగా కోవిడ్ వచ్చినా విద్యార్థులకు ఈనెల 8న మళ్ళీ పరీక్ష నిర్వహిస్తామని పేర్కొన్నారు. ఇదిలా ఉంటే కరోనా వైరస్, లాక్‌డౌన్ కారణంగా ఈ ఏడాది ఎంసెట్ ఆలస్యమైన సంగతి తెలిసిందే. సెప్టెంబర్‌లో నాలుగు రోజుల పాటు రెండు సెషన్లలో అధికారులు ఎంసెట్ పరీక్షను నిర్వహించారు. రెండు తెలుగు రాష్ట్రాల్లో 102 కేంద్రాలను ఏర్పాటు చేశారు. ఎంసెట్‌ పరీక్షలకు 1,43,326 మంది దరఖాస్తు చేసుకోగా అందులో 1,19,183 మంది హాజరు అయ్యారు.


 అమరావతి:  ఏపీ ఎంసెట్‌ ఫలితాలు శుక్రవారం విడుదల అయ్యాయి. ఇంజనీరింగ్, అగ్రికల్చర్, ఫార్మా కోర్సుల్లో ప్రవేశాలకు గాను ఏపీ ఎంసెట్‌–2017 ఫలితాలను మంత్రులు గంటా శ్రీనివాస రావు, కామినేని శ్రీనివాస్, సోమిరెడ్డి చంద్రమోహన్‌రెడ్డి విజయవాడలో ఈరోజు మధ్యాహ్నం 3 గంటలకు ఈ ఫలితాలను విడుదల చేశారు. ఎంసెట్‌ ప్రవేశపరీక్షలో లక్షా 23వేల 974మం‍ది విద్యార్థులు ఉత్తీర్ణత సాధించారు.
 
 ఈ సందర్భంగా గంటా శ్రీనివాసరావు మాట్లాడుతూ... తొలిసారిగా ఎంసెట్‌ పరీక్షలను ఆన్‌లైన్‌లో నిర్వహించామని, దీని వల్ల పారదర్శకత ఉంటుందన్నారు. ఎక్కడా కూడా లీకేజీకి ఆస్కారం లేకుండా పరీక్షను నిర్వహించడం జరిగిందన్నారు. ఏపీలో 124 పరీక్షా కేంద్రాలు, హైదరాబాద్‌లో నాలుగు పరీక్షా కేంద్రాల్లో ఎంసెట్‌ నిర్వహించినట్లు మంత్రి గంటా తెలిపారు. వచ్చే ఏడాది కూడా ఎంసెట్‌ ప్రవేశ పరీక్ష ఉంటుందని ఆయన వెల్లడించారు.  ఆ తర్వాత ఏడాది నుంచి ఎంసెట్‌ నిర్వహణ కేంద్రం నిర్ణయంపై ఆధారపడి ఉంటుందన్నారు.
 ఏపీ ఎంసెట్‌ ఫలితాలు కోసం ఇక్కడ క్లిక్ చేయండి
 
 ఇంజినీరింగ్‌లో టాప్‌ టెన్‌ ర్యాంక్‌ సాధించిన విద్యార్థులు
 
 మొదటి ర్యాంక్‌:  వబిలివెట్టి మోహన్‌ అభ్యాస్‌(153.95 మార్కులు)
 రెండో ర్యాంక్‌ : సాయి భరద్వాజ్‌
 మూడో ర్యాంక్‌: ఆర్‌.సత్యం
 నాలుగో ర్యాంక్‌ : జయంత్‌ హర్ష
 అయిదో ర్యాంక్‌ : వెంకట షణ్ముఖ్‌ సాయి మౌనిక్‌
 ఆరో ర్యాంక్‌ :  వెంకట నిఖిల్‌
 ఏడో ర్యాంక్‌ :శశినాథన్‌
 ఎనిమిదో ర్యాంక్‌ :వెంకట సాయి
 తొమ్మిదో ర్యాంక్‌ : డి.వరుణ్‌ తేజ్‌
 పదో ర్యాంక్‌ : కె.చిన్మయి సాయినాగేంద్ర
 
 ఇక అగ్రికల్చరల్‌, మెడికల్‌ విభాగానికి సంబంధించి మొత్తం 55,288 మంది విద్యార్థులు అర్హత సాధించినట్లు మంత్రి సోమిరెడ్డి చంద్రశేఖర్‌ రెడ్డి తెలిపారు.
 
 మెడికల్‌, అగ్రికల్చరల్‌ విభాగంలో టాప్‌ టెన్‌ ర్యాంకర్స్‌  వివరాలు
 మొదటి ర్యాంక్‌ : ఊటుకూరి వెంకట అనిరుధ్‌
 రెండో ర్యాంక్‌ : దుర్గా సందీప్‌
 మూడో ర్యాంక్‌ :  నున్న హిమజ
 నాలుగో ర్యాంక్‌ : సాదినేని నిఖిల్‌ చౌదరి
 అయిదో ర్యాంక్‌ : ఫణి శ్రీలాస్య
 ఆరో ర్యాంక్‌ : మనోజ్‌ పవన్‌
 ఏడో ర్యాంక్‌ : స్వాతికారెడ్డి
 ఎనిమిదో ర్యాంక్‌ : కల్యాణ్‌
 తొమ్మిదో ర‍్యాంక్‌ : సాయి శ్వేత
 పదో ర్యాంక్‌ : అఖిల
 ర్యాంకుల సమాచారాన్ని ఆయా అభ్యర్థుల ఫోన్‌ నంబర్లకు పంపించనున్నారు.  కాగా ప్రశ్నపత్రాల్లో వచ్చాన అభ్యంతరాలపై నిపుణుల కమిటీ వేసిన  సంగతి విదితమే. దీనిపై ఆ కమిటీ అభిప్రాయం వ్యక్తపరుస్తూ పలు సూచనలు చేశారు. ఈ మేరకు ఒక మార్కు కలిపే అవకాశముందని అధికారవర్గాలు తెలిపాయి. ఇతర ప్రశ్నలకు గాను థర్డ్‌ పార్టీ పరిశీలన అనంతరం తుది నిర్ణయం  ఆధారంగా ర్యాంకులు ప్రకటిస్తారు. ఫలితాలను www.sakshi.comలో చూడవచ్చు.