జాఫర్‌ బాబు.. బిగ్‌బాస్‌ షోలో ఉన్నది రెండువారాలైనా తనలోని మరో యాంగిల్‌ను చూపించాడు. బాబా భాస్కర్‌తో కలిసి ఆయన చేసే కామెడీకి అందరూ తెగ నవ్వుకునేవారు. షో నుంచి ఎలిమినేట్‌ అయ్యాక కూడా తన మిత్రుడు బాబాకు జాఫర్‌ మద్దతుగా నిలిచాడు. ఇదిలాఉండగా.. తాజాగా బిగ్‌బాస్‌ షోపై జాఫర్‌ చేసిన వ్యాఖ్యలపై నెటిజన్లు ఫైర్‌ అవుతున్నారు. జాఫర్‌ ఓ ఇంటర్య్యూలో.. బిగ్‌బాస్‌ తెలుగు సీజన్‌ 3 షో ఎలా జరిగిందనే ప్రశ్నకు... ‘కంటెస్టెంట్లు ఎలా ఆడారు..? బిగ్‌బాస్‌లో కంటెస్టెంట్ల అనుభవాలేమిటీ..? ఇలా వీటిపై ఇంతగా చర్చ జరగాల్సిన అవసరం ఉందా? అని ఎదరు ప్రశ్నించారు. దీనివల్ల సమాజానికి ఏమైనా ఉపయోగం ఉందా?’ అని వ్యాఖ్యానించారు. పక్కింట్లో ఏం జరుగుతుందో తెలుసుకోవాలనుకోవడమే మనిషి వీక్‌నెస్ అని.. ఆ బలహీనతే ఇలాంటి షోలు హిట్‌ అవడానికి కారణం అవుతాయని జాఫర్‌ అభిప్రాయపడ్డాడు. బిగ్‌బాస్‌ ప్రసారం అవుతున్న ఏడు రాష్ట్రాలతో పోలిస్తే బిగ్‌బాస్‌ తెలుగు సీజన్‌ 3కి విపరీతమైన రేటింగ్స్‌ వచ్చినట్టు నిర్వాహకులు ప్రకటించారని ఆయన గుర్తు చేశాడు. అయితే, ఇదేమీ గొప్ప షో కాదని, కేవలం బిజినెస్‌ గేమ్‌ అని తేలిగ్గా కొట్టిపారేశాడు. ‘బిగ్‌బాస్‌ షోకు ఆర్మీలు ఎందుకు’ అని జాఫర్‌ అసహనం వ్యక్తం చేశాడు. ఇంటిసభ్యులు ఆడే ఆట కన్నా.. కంటెస్టెంట్లకు మద్దతుగా చేసే ఆడేఆటలు ప్రమాదకరంగా పరిణమించాయని చెప్పుకొచ్చాడు. ‘ఇలాంటి టీఆర్పీ రేటింగ్‌ గేమ్‌ షోల వల్ల అటు నిర్వాహకులకు లాభం.. అందులో పాల్గొన్న నాలాంటి కంటెస్టెంట్లకు లాభం. ఎందుకంటే వారం వారం పారితోషికం ఇస్తారు. దానికి తోడు పాపులారిటీ కూడా పెరుగుతుంది. ఎంతబాగా పాపులర్‌ అయితే అంతగా తాను చేసే డిబేట్స్‌ ఎక్కువమందికి రీచ్‌ అవుతాయనే స్వార్థంతోనే బిగ్‌బాస్‌ షోకు వచ్చాను’అని జాఫర్‌ తెలిపాడు. బిగ్‌బాస్‌ షో కోసం చర్చలు అనవసరమని భావించాను కాబట్టే తాను ఏ డిబేట్‌లోనూ పాల్గొనలేదని చెప్పుకొచ్చాడు. అయితే, జాఫర్‌ తీరుపై వ్యతిరేకత వ్యక్తమవుతోంది. అందితే జుట్టు.. అందకపోతే కాళ్లు అన్నట్లుగా జాఫర్‌ ప్రవర్తిస్తున్నాడని పలువురు నెటిజన్లు విమర్శిస్తున్నారు. ‘బిగ్‌బాస్‌పై చర్చలు అనవసరమని చెప్పిన జాఫర్‌ బాబు.. షో ముగిసిన అనంతరం బాబా భాస్కర్‌ను ఇంటర్వ్యూ చేయడం ఎందుకని ట్రోల్‌ చేస్తున్నారు. ‘అతను చేస్తే ఒప్పు.. మిగతావాళ్లు చేస్తే తప్పా’ అంటూ మండిపడుతున్నారు. బిగ్‌బాస్‌ ప్రసారం అయినన్నాళ్లూ సైలెంట్‌గా ఉండి ఇప్పుడేమో షో వేస్ట్‌ అంటూ మాట్లాడటం సమంజసం కాదని హితవు పలుకుతున్నారు. షో పూర్తయ్యేదాకా నోరు మెదపని జాఫర్‌ ఇప్పుడేమో అది కేవలం బిజినెస్‌ గేమ్‌ అని చెప్పడంపై ఆగ్రహం వ్యక్తం చేస్తున్నారు. 

బాబా భాస్కర్‌.. ‘ఎంటర్‌టైన్‌మెంట్‌ కా బాప్‌, టాస్క్‌లో తోపు, వర్క్‌లో తోపు, డాన్స్ కా కింగ్, నో బ్యాక్ బిచ్చింగ్, లవ్స్ ఎవ్రీ వన్’ ఇది ఓ అభిమాని చెప్పిన మాట. అయితే ప్రేక్షకులు కూడా దీన్ని ఎంతో కొంత ఒప్పుకోక తప్పదు. ఎందుకంటే బాబా ఎప్పుడూ నవ్వుతూ, అందరినీ నవ్విస్తూ ఉంటాడు. గుండెలో ఎంత బాధ ఉన్నా పైకి మాత్రం చిరునవ్వుతో కనిపిస్తాడని స్వయంగా బిగ్‌బాసే పేర్కొన్నాడు. ఇక వచ్చీరాని తెలుగుతో ఆయన ఆపసోపాలు పడ్డా.. అవి కూడా నవ్వు తెప్పించేవి. బాబా భాస్కర్‌ అంటే ఇంటి సభ్యులందరికీ ఒక ప్రత్యేకమైన అభిమానం. కానీ, అదే సమయంలో బాబా ‘మాస్కర్‌’ అన్న పేరును సంపాదించుకున్నాడు. బాబా ఒంటరి పోరాటం సోషల్‌ మీడియాలో.. బాబా భాస్కర్‌ ‘ఎంటర్‌టైన్‌మెంట్ కింగ్‌’ అని ఆయన అభిమానులు చెప్పుకొస్తుంటే, బాబా ‘మాస్కర్‌’ అంటూ ఆయనంటే గిట్టనివాళ్లు ప్రచారం చేస్తున్నారు. దీనిపై బాబా స్నేహితుడు, రెండోవారంలోనే ఇంటి బాట పట్టిన హౌస్‌మేట్‌ జాఫర్‌ స్పందించాడు. సోషల్‌ మీడియా వేదికగా బాబాపై వచ్చిన విమర్శలను తిప్పికొట్టాడు. బిగ్‌బాస్‌ హౌస్‌ లోపల ఉన్న ప్రతీ ఒక్కరికీ బయట ఎవరో ఒకరి సపోర్ట్‌ ఉందని, కొంతమందికైతే ఏకంగా సోషల్‌ మీడియా మేనేజర్స్‌ మద్దతు కూడా ఉన్నట్టు కనిపిస్తోంది అని పేర్కొన్నాడు. కానీ ఎలాంటి అండదండలు లేని ఏకైక వ్యక్తి బాబా భాస్కర్‌ మాత్రమేనన్నాడు. బాబాను ‘మాస్కర్‌’ కాదు: పైర్‌ బాబా భాస్కర్‌ కుటుంబ సభ్యులకు సోషల్‌ మీడియా అంటేనే తెలియదని, దానిపై కనీస అవగాహన కూడా లేదని జాఫర్‌ చెప్పుకొచ్చాడు. ఆట కోసమో, టైటిల్‌ కోసమో మాస్కులు వేసుకునే తత్వం బాబాది కాదని ఘాటుగానే సమాధానమిచ్చాడు. ఇక ఇప్పటికే బిగ్‌బాస్‌ హౌస్‌లో టాప్‌-5కు చేరుకున్న ఇంటి సభ్యుల కోసం బయట గట్టిగానే ప్రచారం జరుగుతోంది. కానీ బాబాకు మాత్రం ప్రచారం చేసే ఆర్మీలు కానీ మద్దతుగా నిలిచే సెలబ్రిటీలు గానీ లేరు. అయితే.. ఓట్ల కోసం ఎలాంటి జిమ్మిక్కులు చేయకపోయినా బాబా గెలుపు కోసం చాలామందే పోరాడుతుండటం విశేషం.

ఎప్పుడూ గొడవలు, మనస్పర్థలు, అలకలతో ఉండే బిగ్‌బాస్‌ హౌస్‌ వీకెండ్‌లో వాటికి స్వస్తి చెప్పి ఉల్లాసంగా గడిచింది. పైగా ఆదివారం స్నేహితుల దినోత్సవం కావటంతో రాగద్వేషాలు మర్చిపోయి ఫ్రెండ్‌షిప్‌ బ్యాండ్స్‌ కట్టుకుంటూ డాన్సులు చేశారు. ఇస్మార్ట్‌ శంకర్‌ యూనిట్‌ హౌస్‌లో అడుగుపెట్టడంతో సంతోషాల సరదాలు మరింత జోరయ్యాయి. తీరా జాఫర్‌ ఎలిమినేట్‌ కావటంతో వీటన్నింటికి కాస్త బ్రేక్‌ను ఇచ్చినట్టయింది. జాఫర్‌ ఎలిమినేషన్‌తో ఇంటి సభ్యులు అందరూ విచారం వ్యక్తం చేయగా శ్రీముఖి, బాబా భాస్కర్‌లు కన్నీళ్లు ఆపుకోలేకపోయారు. శనివారం​ ఇలా.. బిగ్‌బాస్‌ ఇంటి సభ్యులను నాలుగున్నర కోట్ల మంది గమనిస్తున్నారని హోస్ట్‌ నాగార్జున తెలిపారు. రెండు వారాలకే ఇంటిలో గ్రూపులు తయారయ్యాయంటూ ఆశ్చర్యం వ్యక్తం చేశారు. ఇంటి సభ్యులు చేసిన తప్పులను ప్రస్తావిస్తూ జాగ్రత్తగా ఉండాలని హెచ్చరించారు. వారిచేత నాగ్‌ హీరో-విలన్‌​ గేమ్‌ ఆడించడం ద్వారా ఒకరిపై ఒకరికి ఎలాంటి అభిప్రాయలు ఉన్నాయో బయట పడ్డాయి. ఈ ఆటలో వరుణ్‌ సందేశ్‌ను ఎక్కువ మంది విలన్‌గా అభిప్రాయపడగా, తర్వాతి స్థానంలో తమన్నా ఉంది. ఇక హీరోగా ఎక్కువ మంది ముక్త కంఠంతో బాబా భాస్కర్‌ను ఎంచుకున్నారు. చిన్న విషయానికి కూడా నోటికొచ్చినట్లు తిట్ల పురాణాన్ని ప్రారంభించే తమన్నాను నోటి దురుసును తగ్గించుకోవాలంటూ నాగ్‌ సూచించారు. రెండవవారం ఎలిమినేషన్‌లో 8మంది ఇంటి సభ్యులుండగా మహేష్‌, హిమజ, రాహుల్‌, శ్రీముఖిలు సేఫ్‌ జోన్‌లో ఉన్నట్లు నాగ్‌ ప్రకటించారు. ఫన్‌డేగా మారిన సండే వారం మొత్తం టాస్క్‌లు ఇచ్చిన బిగ్‌బాస్‌ వారాంతంలో వాటికి విరామాన్ని ఇచ్చాడు. ఆదివారం స్నేహితుల దినోత్సవం కావటంతో గిల్లికజ్జాలు పక్కనపెట్టి అందరూ ఉత్సాహంగా కనిపించారు. ఇంటి సభ్యుల్లో మీ జిగిరీ దోస్తులకు ఫ్రెండ్‌షిప్‌ బ్యాండ్‌ కట్టి దానికి కారణాలను నాగ్‌ చెప్పమన్నారు. ఇంటి సభ్యులందరూ ఒక్కొక్కరిగా వారి బెస్ట్‌ఫ్రెండ్‌కు ఫ్రెండ్‌షిప్‌ బ్యాండ్‌ కడుతూ ఎందుకు ఇష్టమో వివరించారు. తర్వాత వారితో కలిసి పాటలకు స్టెప్పులేశారు. వారందరికీ సర్‌ప్రైజ్‌ను ఇస్తూ బిగ్‌బాస్‌ ఇంటిలోకి ఇస్మార్ట్‌ శంకర్‌ టీమ్‌ ఎంట్రీ ఇచ్చింది. ఎనర్జిటిక్‌ హీరో రామ్‌, హీరోయిన్‌ నిధి అగర్వాల్‌లు సందడి చేస్తూ ఇంటి సభ్యులతోపాటు ప్రేక్షకులను అలరించారు. కన్నీటితో వీడ్కోలు.. హౌస్‌లోని కుటుంబ సభ్యుల్లో ఎక్కువమంది జాఫర్‌ను సేఫ్‌ చేయాలని భావించినప్పటికీ ప్రేక్షకుల ఓట్ల ప్రకారం జాఫర్‌ను ఇంటి నుంచి పంపించేశారు. దీంతో శ్రీముఖి, బాబా భాస్కర్‌, మహేశ్‌లు కన్నీరు పెట్టుకున్నారు. వెక్కివెక్కి ఏడ్చిన శ్రీముఖిని ఓదార్చటం హౌస్‌లో ఎవరివల్లా కాలేదు. కుటుంబ సభ్యుల దగ్గర సెలవు తీసుకున్న జాఫర్‌... నాగార్జునతో మాట్లాడుతూ బిగ్‌బాస్‌లో జరిగేదంతా స్క్రిప్టు ప్రకారం జరుగుతుందని పొరపడ్డానని, అందుకు క్షమించమని వేడుకున్నాడు. అనంతరం జాఫర్ బిగ్‌బాస్‌ ఇంట్లో గడిపిన రెండువారాల జర్నీని వీడియో చూపించారు. బయటికి వెళ్లేముందు ఇంటి సభ్యులతో జాఫర్‌ ముఖాముఖి జరిపారు. మీతోపాటు బయటికి ఎవరిని తీసుకెళ్లాలనుకుంటున్నారు అని నాగ్‌ ప్రశ్నించగా తనకెంతో ఇష్టమైన వరుణ్‌ను వెంటబెట్టుకుని వెళ్తానని చెప్పి బిగ్‌బాస్‌ నుంచి వీడ్కోలు తీసుకున్నాడు. సండే అయిపోయింది. ఇప్పటివరకు ఇంటి నుంచి ఇద్దరు సభ్యులు ఎలిమినేట్‌ అయ్యారు. గండం గట్టెక్కింది అనుకుంటున్న కుటుంబ సభ్యుల్లో సోమవారం ఎవరు నామినేట్‌ కానున్నారో చూడాలి..!

ఫ్రెండ్‌ షిప్‌డే సెలబ్రేషన్స్‌తో హౌస్‌ అంతా సందడిగా గడిచింది. కానీ జాఫర్‌ ఎలిమినేట్‌ అయినట్లు ప్రకటించిన తరువాత ఇంటి సభ్యులు భావోద్వేగానికి లోనయ్యారు. శ్రీముఖి మాత్రం వెక్కి వెక్కి ఏడ్వగా.. బాబా భాస్కర్‌ బాధను ఆపుకోలేక కన్నీరు కారుస్తుంటే మిగతా హౌస్‌మేట్స్‌ ఓదార్చారు. ఫ్రెండ్‌ షిప్‌ గేమ్‌ ఆడించడం, ఇస్మార్ట్‌ టీమ్‌ సినిమా పేర్లు చెబుతూ ఉంటే.. హౌస్‌మేట్స్‌కు ఆ బ్యాడ్జీలను తగిలించడం అంతా సరదాగా సాగిపోయింది. చివర్లో జాఫర్‌ చేసిన ముఖాముఖి కూడా బాగానే ఆకట్టుకుంది. (చదవండి: ఫ్రెండ్‌షిప్‌ రోజే.. ఫ్రెండ్స్‌ విడిపోయారు!) ఫ్రెండ్‌ షిప్‌ డే సందర్భంగా.. హౌస్‌మేట్స్‌ తమ బెస్ట్‌ ఫ్రెండ్‌కు ఫ్రెండ్‌షిప్‌ బ్యాండ్‌లను కట్టారు. మొదటగా శ్రీముఖి బాబా భాస్కర్‌కు కట్టగా.. అనంతరం హిమజ.. మహేష్‌కు, జాఫర్‌.. రోహిణికి, బాబా భాస్కర్‌.. జాఫర్‌కు, రవికృష్ణ.. అలిరెజాకు, మహేష్‌.. అషూరెడ్డికు, వరుణ్‌ సందేశ్‌..రాహుల్‌కు, వితికా.. పునర్నవికి, శివజ్యోతి.. హిమజకు, తమన్నా-శ్రీముఖికి, పునర్నవి.. వితికాకు, రోహిణి.. తమన్నాకు, అలీరెజా.. రవికృష్ణకు, అషూ.. జ్యోతి, రాహుల్‌.. వరుణ్‌లకు కట్టారు. అనంతరం ఆ ఫ్రెండ్‌ షిప్‌ బ్యాండ్‌ కట్టడానికి, ఆ కంటెస్టెంటే ఎందుకు బెస్ట్‌ ఫ్రెండ్‌ అయ్యారనే దానికి కారణాలను వివరించారు. ఇక ఫ్రెండ్‌షిప్‌ డే సెలబ్రేషన్స్‌ అయిన తరువాత.. ఇస్మార్ట్‌ శంకర్‌ టీమ్‌ అతిథులుగా విచ్చేశారు. రామ్‌, నిధి అగర్వాల్‌ ఎంట్రీ ఇచ్చి హౌస్‌మేట్స్‌తో కలిసి సందడి చేశారు. హౌస్‌మేట్స్‌, గెస్ట్‌లతో కలిపి నాగ్‌ ఓ ఆట ఆడించాడు. రామ్‌, నిధి.. సినిమా పేర్లు చెబుతూ ఉంటే.. అవి ఎవరికి సెట్‌ అవుతాయో చెప్పి బ్యాడ్జ్‌లను పెట్టాలని హౌస్‌మేట్స్‌కు తెలిపాడు. ఈ క్రమంలో అలీ రెజాకు ఇస్మార్ట్‌ శంకర్‌.. వితికా షెరుకు బ్లఫ్‌ మాస్టర్‌.. శ్రీముఖికి దేశముదురు, పోకిరి.. రాహుల్‌కు దొంగోడు, గోపి గోడ మీద పిల్లి.. రోహిణికి అర్జున్‌ రెడ్డి.. బాబా భాస్కర్‌కు సరైనోడు, రోబో.. తమన్నాకు ఊసరవెళ్లి, జులాయి, కంత్రి.. వరుణ్‌కు డిక్టేటర్‌.. పునర్నవికి మహానటి.. హిమజకు సుడిగాడు అనే ట్యాగ్‌లైన్లు ఇచ్చారు. అనంతరం ఇస్మార్ట్‌ శంకర్‌ సాంగ్‌కు రామ్‌, నిధితో కలిసి హౌస్‌మేట్స్‌ స్టెప్పులు వేశారు. అనంతరం పునర్నవి, వరుణ్‌ సందేశ్‌లు సేఫ్‌ అని ప్రకటించగా.. వితిక, జాఫర్‌ ఇద్దరు మిగిలారు. అయితే ఈ ఇద్దరిలో హౌస్‌మేట్స్‌ ఎవరికి ఓటు వేస్తారని నాగ్‌ అడగ్గా.. వితికాకు ఆరుగురు, జాఫర్‌కు ఏడుగురు సపోర్ట్‌ చేశారు. అయితే జాఫర్‌ ఎలిమినేట్‌ అయినట్లు నాగ్‌ ప్రకటించాడు. అనంతరం ఇంటి నుంచి బయటకు రావాల్సిందిగా బిగ్‌బాస్‌ ఆదేశించాడు. ఇక జాఫర్‌ ఎలిమినేట్‌ అయి వెళ్లే సమయంలో శ్రీముఖి వెక్కి వెక్కి ఏడ్చింది. బాబా భాస్కర్‌ సైతం కన్నీళ్లును ఆపుకోలేకపోయాడు. వెళ్తూ వెళ్తూ .. బాబా భాస్కర్‌ను అలా అనొద్దంటూ (మైండ్‌ గేమ్‌తో ఆడుతున్నాడు) వరుణ్‌ను హెచ్చరించాడు. బయటకు వచ్చిన జాఫర్‌.. బిగ్‌బాస్‌ గురించి తన అభిప్రాయాలను చెప్పుకొచ్చాడు. మొదట్లో ఇదంగా స్క్రిప్ట్‌ అని అనుకున్నట్లు, కానీ అందులో వచ్చినవి రియల్‌ ఎమోషన్స్‌ అని తెలిపాడు. ఇక హౌస్‌మేట్స్‌తో జాఫర్‌ ముఖాముఖి నిర్వహించాడు. జాఫర్‌ : మహేష్‌.. నిజంగా ముక్కోపా కాదా?  మహేష్‌.. కాదు జాఫర్‌ : బాబా భాస్కర్‌.. మైండ్‌ గేమ్‌ ఆడుతున్నారా? బాబా భాస్కర్‌.. ఎవరు ఎలా అనుకుంటే అలా జాఫర్‌ : శ్రీముఖికి హౌజ్‌లో వితికా ఫ్రెండా? శత్రువా? శ్రీముఖి.. ఫ్రెండ్‌ జాఫర్‌ : ఈ హౌస్‌లోకి ఎందుకు వచ్చావు? తమన్నా.. ట్రాన్స్‌జెండర్‌లో కూడా మంచోళ్లు ఉన్నారని చెప్పడానికి జాఫర్‌ : తమన్నా అభిప్రాయంతో ఏకిభవిస్తున్నారా? అలీ.. అవును జాఫర్‌ : మంచోళ్లు అని అనుకోవాలని ప్రయత్నిస్తున్నావా? రవి కృష్ణ.. నేను బయటెలా ఉన్నానో లోపల కూడా అలానే ఉన్నాను జాఫర్‌ : అందరితో కలిసి ఉండటమే స్ట్రాటజీనా? రోహిణి.. కాదు జాఫర్‌ : అందరితో మంచిగా ఉండటమే ప్లానా? అషూ రెడ్డి.. కాదు జాఫర్‌ : ఫీమేల్‌ కంటెస్టెంట్లు హోల్‌ హార్టెడ్‌గా యాక్సెప్ట్‌ చేశారా? హిమజ.. మేల్‌ కంటెస్టెంట్లు కూడా యాక్సెప్ట్‌ చేశారు.  జాఫర్‌ : ఎమోషన్‌ డామినేషన్‌ చేస్తోందా? శివజ్యోతి.. ఫిజికల్లీ స్ట్రాంగ్‌గానే ఉంటాను.. జాఫర్‌ : అందరితో కలవడం లేదు.. గ్రూప్‌తోనే ఉంటున్నావు? పునర్నవి.. నేను ఎప్పుడూ అలా అనుకోలేదు జాఫర్‌ : ఓ గ్రూప్‌కు వరుణ్‌ నాయకత్వం వహిస్తున్నాడా? వితికా.. కాదు జాఫర్‌ : నీకు కొంచెం ఫ్రస్ట్రేషన్‌ ఉందన్నావు.. నీపై హౌస్‌మేట్స్‌కు దురభిప్రాయం ఉందా? వరుణ్‌ సందేశ్‌.. లేదు జాఫర్‌ : వరుణ్‌ గ్రూప్‌లో వైస్‌ కెప్టెన్‌? రాహుల్‌.. ఎవరికి ఎలా అనిపిస్తే అలా అనంతరం జాఫర్‌ బిగ్‌బాస్‌ను వదిలి వెళ్లిపోయాడు. అనుకున్నట్లే.. ప్రచారం జరిగినట్టే.. జాఫర్‌ ఎలిమినేట్‌ అయ్యాడు. శనివారం సాయంత్రం నుంచే జాఫర్‌ ఎలిమినేట్‌ అయినట్లు ప్రచారం జరగ్గా.. ఆదివారం ఉదయానికి ఆ వార్త మరింత ఊపందుకుంది. సోషల్‌ మీడియాలో లీకులకు బిగ్‌బాస్‌ అడ్డుకట్ట వేయలేకపోతున్నాడు. అయితే మొదట్నుంచీ వితికా ఎలిమినేట్‌ అవుతుందని అందరూ అనుకున్నారు. అనూహ్యంగా జాఫర్‌ తెరపైకి వచ్చి.. రెండో వారంలో ఇంటి బాట పట్టాడు. బిగ్‌బాస్‌ హౌస్‌లో గ్రూపులు బాగానే పెరిగిపోయాయన్న విషయం అందరికీ తెలిసిందే. మరి ఈ గ్రూపుల గొడవలు ఎంత వరకు దారి తీస్తాయో చూడాలి. మరిన్ని బిగ్‌బాస్‌ వార్తల కోసం క్లిక్‌ చేయండి

ఒక బంధం ఎందుకు ఎలా ఏర్పడుతుందో చెప్పలేము. ప్రస్తుతం సాంకేతికత పెరగడంతో మనుషులు నేరుగా మాట్లాడుకోవటమే తగ్గిపోయింది. అలాంటిది ఓ పదిహేను మందిని ఒకే ఇంట్లో పడేసి.. వారికి టీవీ,ఫోన్‌, నెట్‌ ఇలా అన్నింటిని దూరం చేస్తే ఎలా ఉంటుందో మనం రోజూ చూస్తూనే ఉన్నాం. బిగ్‌బాస్‌ హౌస్‌లో కోపాలు, తాపాలు, బాధలతో పాటు బంధాలు కూడా ఏర్పడతాయి. గత సీజన్‌లో పాల్గొన్నవారిలో దాదాపు అందరూ ఎప్పుడోకప్పుడు కలుసుకుంటూనే ఉంటారు. ఇక ఈ మూడో సీజన్‌లో ఇప్పటి వరకు బాబా భాస్కర్‌, జాఫర్‌లు మాత్రమే చాలా దగ్గరయ్యారు. వీరిద్దరు కలిసి చేసే కామెడీని వీక్షకులు ఇష్టపడుతుంటారు. బాబా భాస్కర్‌ డైరెక్షన్‌ జాఫర్‌ చేసే డ్యాన్సులు, పాడే పాటలు ఆడియెన్స్‌ను ఆకట్టుకుంటాయి. అప్పుడప్పుడు కెమెరాలతో చేసే కామెడీ టైమింగ్‌కు ఫ్యాన్స్‌ అయ్యారు. ఇక ఈ రోజు ఎలిమినేట్‌ కానుంది జాఫర్‌ అని విశ్వసనీయ వర్గాల సమాచారం. ఈ మేరకు సోషల్‌ మీడియాలో కూడా జాఫర్‌ ఎలిమినేట్‌ అయినట్లు చెబుతున్నారు. ఫ్రెండ్‌ షిప్‌ రోజే బాబా భాస్కర్‌, జాఫర్‌లు విడిపోయారని నెటిజన్లు కామెంట్స్‌ చేస్తున్నారు. ఈ రోజు ఎపిసోడ్‌లో నాగ్‌ దర్శనమివ్వడమే కాకుండా రామ్‌, నిధి అగర్వాల్‌ అతిథులుగా రానున్నారు. హౌస్‌మేట్స్‌ కూడా ఫ్రెండ్‌షిప్‌ డేను సెలబ్రేట్‌ చేసుకోనున్నారు. మరి నిజంగానే జాఫర్‌ ఎలిమినేట్‌ అయితే.. బాబా భాస్కర్‌ హౌస్‌లో మళ్లీ యాథావిథిగా ఎంటర్‌టైన్‌ చేస్తాడా?లేదా అన్నది చూడాలి.

బిగ్‌బాస్‌ హౌస్‌లో వీకెండ్‌ వచ్చిందంటే సందడి నెలకొంటుంది. ఇంటి సభ్యులకు ఆ రెండు రోజులు కొత్త మొహం కనపడుతుంది. హోస్ట్‌ రూపంలో నాగార్జున వచ్చి సందడి చేస్తాడు. వారు చేసిన తప్పులను సరిచేస్తాడు. ఇక హౌస్‌లో అప్పుడప్పుడు కొత్త అతిథులు కూడా వస్తారు. అలా ఈ రోజు జరిగే ఎపిసోడ్‌లో ఇస్మార్ట్‌ శంకర్‌ సందడి చేయనున్నాడు. రామ్‌, నిధి అగర్వాల్‌ ఇద్దరూ నేటి ఎపిసోడ్‌లో నాగ్‌తో పాటు హల్‌చల్‌ చేయనున్నట్లు తాజాగా రిలీజ్‌ చేసిన ప్రోమో ద్వారా తెలుస్తోంది. ఇక ఆదివారం వస్తే బిగ్‌బాస్‌ ఇంటిసభ్యుల్లోంచి ఎవరో ఒకరు బయటకు వెళ్లాల్సి వస్తుంది.. ఇక ఎలిమినేషన్‌ విషయమై లోపల ఉన్న వారికి గుండె దడ మొదలవుతుంది. అయితే బయట ఉన్న ప్రేక్షకులకు కూడా అంతే ఉత్కంఠ ఉన్నా కూడా ఎవరు ఎలిమినేట్‌ కానున్నారో ముందో లీకవ్వడంతో సస్పెన్స్‌లో ఉన్న మజా పోతోంది. ఇక ఆదివారం ఎపిసోడ్‌లో మరింత సందడి వాతావరణాన్ని తీసుకోచ్చేందుకు రామ్‌, నిధి వచ్చేశారు. వీరితో నాగ్‌, ఇంటి సభ్యులు కలిసి బాగానే ఎంజాయ్‌ చేసినట్టు కనిపిస్తోంది. ఇక నేడు జాఫర్‌ ఎలిమినేట్‌ అయినట్లు సోషల్‌ మీడియాలో ఇప్పటికే ప్రచారం ఊపందుకుంది. మరి నిజంగానే జాఫర్‌ ఇంటి నుంచి బయటకు వచ్చేశాడా? అన్నది తెలియాలంటే ఇంకొన్ని గంటలు ఆగాల్సిందే.

సాక్షి, హైదరాబాద్‌ : తెలుగు బుల్లితెరపై ఆసక్తికరంగా సాగుతున్న బిగ్‌బాస్‌ 3 షోలో రెండో ఎలిమినేషన్‌కు రంగం సిద్ధమైంది. వారాంతం ఎలిమినేషన్‌కు కింగ్‌ నాగార్జున సిద్ధం కాగా, ఎవరు ఎలిమినేట్‌ అవుతారనే విషయంపై ప్రేక్షకులు ఆసక్తిగా ఎదురు చూస్తున్నారు. ఈ వారం ఎనిమిది మందిపై (మహేష్‌, హిమజ, రాహుల్‌, శ్రీముఖి, వరుణ్‌ సందేశ్‌, వితికా షెరు, జాఫర్‌, పునర్నవి) ఎలిమినేషన్‌ కత్తి వేలాడగా.. దాంట్లో నుంచి శనివారం మహేష్‌, హిమజ, రాహుల్‌, శ్రీముఖి సేఫ్‌ జోన్‌లో పడ్డారు. ఇక మిగిలిన నలుగురిలో వరుణ్‌ సందేశ్‌, వితికా షేరు, జాఫర్‌, పునర్నవి ఉన్నారు. దీంతో ఈ వారం ఇంటి నుంచి ఎవరు వెళ్లిపోతారనే అంశం మరింత ఆసక్తిగా మారింది. అయితే ఇప్పటికే లీకైన సమాచారం మేరకు జాఫర్‌ ఎలిమినేట్‌ అయినట్లు తెలుస్తోంది. వితికా షెరు బయటకు వెళ్తుందనే ప్రచారం జరిగినా.. శనివారం సాయంత్రం నుంచి జాఫర్‌ ఎలిమినేట్‌ అయినట్లు వార్తలు వినిపిస్తున్నాయి. బిగ్‌బాస్‌ ఇంట్లో జాఫర్‌ ఫెర్ఫామెన్స్‌ పెద్దగా లేదని, అందుకే ఆయన ఈ వారం ఎలిమినేట్‌ అవుతారనే వార్త బలంగా వినిపిస్తోంది. సోషల్‌ మీడియాలో సైతం జాఫర్‌ ఎలిమినేట్‌ అయ్యారన్న వార్త హల్‌చల్‌ చేస్తోంది.  (చదవండి : బిగ్‌బాస్‌ హౌస్‌లో హీరో, విలన్లు ఎవరంటే..?) బిగ్‌బాస్‌ హౌజ్‌లోకి వెళ్లినప్పటి నుంచి జాఫర్‌ అందరితో కలిసి సరదాగా ఉండడం లేదనే అభిప్రాయం ప్రేక్షకులను నుంచి వ్యక్తమవుతుంది. అంతేకాకుండా బిగ్‌బాస్‌ ఇచ్చిన టాస్క్‌లను కూడా సరిగా పూర్తి చేయలేదు. కేవలం బాబా భాస్కర్‌తోనే సరదాగా ఉంటున్నారు. జాఫర్‌ను అందరూ గౌరవిస్తున్నా సరే అతను అక్కడ ఇముడలేకపోతున్నారు. ఎప్పుడేప్పుడు హౌజ్‌ నుంచి బయటపడదామా అని ఎదురు చూస్తున్నారు. తనకు ఈ షో అంతగా సెట్‌ కాదని మొదటి వారం నుంచి చెప్పుకొస్తున్నారు. అవకాశం ఉంటే తననే ఎలిమినేషన్‌కు నామినేట్‌ చేయమని హౌజ్‌మేట్స్‌ను వేడుకున్నారు. అయితే రెండో వారం ఆయన కాస్త అందరితో కలిసి సరదాగా ఉన్నా.. బిగ్‌బాస్‌ ఇచ్చిన టాస్క్‌ను మాత్రం చేయలేకపోతున్నారు. అలాంటి టాస్క్‌ చేస్తే తన స్టేటస్‌ తగ్గిపోతుందన్నట్లుగా వ్యవహరిస్తున్నారు. ప్రతిసారి బాబా భాస్కర్‌తోనే ఎక్కువగా మూవ్‌ అవుతున్నారు. మిగతావారితో ఎలాంటి గొడవలు పెట్టుకోనప్పటికీ వారితో అంత క్లోజ్‌గా ఉండలేక పోతున్నారు.  వీటి కారణంగానే ఈ వారం జాఫర్‌ ఎలిమినేట్‌ అవుతారని తెలుస్తోంది. హౌజ్‌లో ఉన్నవారు జాఫర్‌కు మద్దతు పలికినా సరే ఈ వారం జాఫర్‌కు ఇంటి నుంచి బయటపడడం దాదాపు ఖాయమైపోయిందని సమాచారం. ఓట్ల పరంగా వితిక ఎలిమినేట్‌ అయినప్పటీకీ, టీఆర్పీ ప్రకారం జాఫర్‌ను ఎలిమినేట్‌  చేస్తారని నెటిజన్లు కామెంట్లు పెడుతున్నారు. మరి సోషల్‌ మీడియా విశ్లేషణ ప్రకారం జాఫర్‌ ఎలిమినేట్‌ అయ్యాడా? లేక వితికా ఎలిమినేట్‌ అయ్యిందా తెలుసుకోవాలంటే ఇంకొన్ని గంటలు ఆగాల్సిందే.

బిగ్‌బాస్‌ను నాలుగున్నర కోట్ల మంది వీక్షిస్తున్నారంటూ.. బిగ్గర్‌దెన్‌ బిగ్గెస్ట్‌ అంటూ బిగ్‌బాస్‌ షో గురించి కింగ్‌ నాగార్జున చెప్పుకొచ్చారు. తమను నాలుగున్నర కోట్ల మంది గమనిస్తున్నారని, జాగ్రత్తగా ఉండమని  హౌస్‌మేట్స్‌కు సూచించాడు. హీరో-విలన్‌ గేమ్‌ అంటూ ఇంటిసభ్యులను ఆట ఆడించిన నాగ్‌.. ఇంటి సభ్యులందరి వ్యవహారాలను చక్కబెట్టాడు. మొదటి వారంలో వదిలేసిన వరుణ్‌ సందేశ్‌-మహేష్‌ గొడవను ప్రస్తావించాడు. బిగ్‌బాస్‌ ఇంట్లో ఎక్కడికక్కడ గ్రూపులు ఏర్పడ్డాయని నాగ్‌ తెలిపాడు. శ్రీముఖి, జాఫర్‌, తమన్నాలు.. వరుణ్‌ సందేశ్‌, వితికాల గురించి మాట్లాడుకుంటూ ఉంటే.. బయట ఉన్న వరుణ్‌ రవికృష్ణతో శ్రీముఖి గురించి చర్చిస్తూ ఉన్నాడు. జాఫర్‌, బాబా భాస్కర్‌లతో వరుణ్‌ సందేశ్‌ గురించి మహేష్‌ కామెంట్‌ చేస్తూ ఉన్నాడు. సెకండ్‌సీజన్‌లో పాల్గొన్న కంటెస్టెంట్లందర్నీ వరుణ్‌ కలిశాడని, గేమ్‌ ఎలా ఆడాలని తెలుసుకున్నాడంటూ జాఫర్‌, బాబా భాస్కర్‌లతో మహేష్‌ చెప్పుకొచ్చాడు. జైల్లో ఉన్న కారణంగా తమన్నాతో ఒక ఓటు వేయించుకుంటున్నాడంటూ కామెంట్‌ చేశాడు. ఇక వీటన్నంటిని గమనిస్తున్న నాగ్‌.. ఇంట్లో కొత్త కొత్త ట్రాకులు, గ్రూపులు పెరిగాయంటూ సరదాగా వ్యాఖ్యానించాడు. ఇక ఒక్కొక్కరి లెక్క తేలుస్తూ.. ఇంటి సభ్యులందరి వ్యవహారాలను టచ్‌ చేశాడు. మొదటగా శివజ్యోతి నుంచి మొదలుపెట్టగా.. పవర్‌ గేమ్‌లో కింద పడినా.. స్పోర్టివ్‌గా తీసుకోవడం అలీ రెజాకు కిరీటాన్ని పెట్టడాన్ని అభినందించాడు. ఇంట్లో బాగా ఏడుస్తుందని.. బయట వర్షాలు బాగా పడుతున్నాయని, చెరువులు నిండుతున్నాయని ఏడ్వొద్దని సరదాగా కామెంట్‌ చేశాడు. ఇక పవర్‌ గేమ్‌ వ్యవహారంలో, తమన్నా గొడవపెట్టుకోవాలని చూసినా.. సామరస్యపూర్వకంగా చక్కదిద్దడంపై అలీ రెజాను పొగిడాడు. అలీ రెజా విషయంలో తమన్నాను మందలిస్తూ.. అందరితో మంచిగా ఉండేందుకు ప్రయత్నించమని ఆమెకు సలహా ఇచ్చాడు. తమన్నా ఆటపట్టించినా సరదగా తీసుకోవడం.. వితికాను ఓదార్చే విషయంలో రవికృష్ణను పొగిడాడు. వితికా-వరుణ్‌ సందేశ్‌ గొడవ గురించి మాట్లాడుతూ.. తన భర్తే తనకు సపోర్ట్‌ చేయలేదని ఎమోషనల్‌ అయిందని.. భర్త భార్యను సపోర్టు చేయాలని వరుణ్‌తో చెప్పుకొచ్చాడు. మొదటివారంలో జరిగిన మహేష్‌-వరుణ్‌ గొడవ గురించి మాట్లాడుతూ.. మహేష్‌తో వరుణ్‌ ప్రవర్తించిన తీరు నచ్చలేదని తెలిపాడు. సీమ నుంచి వచ్చినోళ్లు నాటు కాదు.. సిటీ నుంచి వచ్చినోళ్లు నీటు కాదంటూ తెలిపాడు. బాబా భాస్కర్ హీరో.. వరుణ్‌ సందేశ్‌, తమన్నాలు విలన్లు ఇంటిసభ్యులందరితో హీరో-విలన్‌ గేమ ఆడించాడు నాగ్‌. బంగారు వర్ణంలో ఉన్న కిరీటాన్ని హీరో అని భావించే ఇంటి సభ్యుడికి, నలుపు వర్ణంలో ఉన్న కిరీటాన్ని విలన్‌ అని భావించే హౌస్‌మేట్స్‌కు పెట్టాలని ఓ ఆటను ఆడించాడు. ఈ ఆటలో ఎక్కువ బంగారు కిరీటాలు బాబా భాస్కర్‌కు రాగా.. వరుణ్‌ సందేశ్‌, తమన్నాలకు విలన్‌కు సంబంధించిన కిరిటం తొడిగారు. శివజ్యోతి, అషూ, రోహిణిలు బాబా బాస్కర్‌కు బంగారు కిరీటం తొడగ్గా.. వరుణ్‌, రాహుల్‌, తమన్నాలకు నలుపు వర్ణం కిరీటం పెట్టారు. అలీ రెజాకు విలన్‌ కిరీటం.. రవికృష్ణకు హీరో కిరీటాన్ని తమన్నా తొడిగింది. జాఫర్‌.. వరుణ్‌కు విలన్‌, శ్రీముఖికి హీరో కిరీటాన్ని తొడిగాడు. శ్రీముఖి.. జాఫర్‌కు హీరో, వరుణ్‌కు విలన్‌ కిరీటాన్ని పెట్టారు. రాహుల్‌.. రోహిణికి హీరో, శ్రీముఖికి విలన్‌ కిరీటాన్ని పెట్టారు. అలీ రెజాకు హీరో, తమన్నాకు విలన్‌ కిరీటాన్ని హిమజ తొడిగింది. రవికృష్ణకు హీరో, శివజ్యోతికి విలన్‌ కిరీటాన్ని వరుణ్‌ సందేశ్‌ పెట్టాడు. పునర్నవి.. తమన్నాకు హీరో, మహేష్‌కు విలన్‌ కిరీటాన్ని తొడిగింది. శివజ్యోతిని బిగ్‌బాస్‌ ఇచ్చిన సోదరిగా చెప్పుకొచి​.. ఆమెకు హీరోకు సంబంధించిన కిరీటాన్ని, తమన్నాకు విలన్‌ కిరీటాన్ని అలీ రెజా తొడిగాడు. వరుణ్‌కు హీరో, రాహుల్‌కు విలన్‌ కిరీటాన్ని వితిక పెట్టారు. వితికాకు విలన్‌, రోహిణికి హీరో కిరీటాన్ని బాబా భాస్కర్‌ తొడిగాడు. తమన్నాకు హీరో, వరుణ్‌కు విలన్‌ కిరీటాన్ని మహేష్‌ పెట్టాడు. ఈ ఆటలో బాబా భాస్కర్‌ హీరో.. తమన్నా, వరుణ్‌ సందేశ్‌లు విలన్స్‌ అని ఇంటిసభ్యులు తేల్చేశారు.  ఇక ఎలిమినేషన్‌లో ఉన్న ఇంటిసభ్యులందరిలో మహేష్‌, హిమజ, రాహుల్‌, శ్రీముఖి సేఫ్‌.. అయినట్లు నాగ్‌ ప్రకటించాడు. ఇక మిగిలిన ఇంటిసభ్యులు వరుణ్‌ సందేశ్‌, వితికా షెరు, జాఫర్‌, పునర్నవిల్లోంచి ఎవరు ఎలిమినేట్‌ కానున్నారో చూడాలి. ఇప్పటికే లీకైన సమాచారం మేరకు జాఫర్‌ ఎలిమినేట్‌ అయినట్లు తెలుస్తోంది. వితికా షెరు బయటకు వెళ్తుందనే ప్రచారం జరిగినా.. శనివారం సాయంత్రం నుంచి జాఫర్‌ ఎలిమినేట్‌ అయినట్లు వార్తలు వినిపించాయి. ఇక బిగ్‌బాస్‌ హౌస్‌లోంచి జాఫర్‌ ఎలిమినేట్‌ అయినట్లు సోషల్‌ మీడియాలో నెటిజన్లు కామెంట్లు చేస్తున్నారు. సోషల్‌ మీడియా విశ్లేషణ ప్రకారం జాఫర్‌ ఎలిమినేట్‌ అయ్యాడా? లేక వితికా ఎలిమినేట్‌ అయ్యిందా తెలుసుకోవాలంటే ఆదివారం నాటి ఎపిసోడ్‌ ప్రసారమయ్యే వరకు ఆగాల్సిందే.

నామినేషన్స్‌ ప్రక్రియతో ఇంట్లో అంతా ఒక రకమైన వాతావరణం నెలకొంది. బాబా భాస్కర్‌ నామినేషన్స్‌ ప్రక్రియలో పాల్గొనను అని అనడం.. అనంతరం బిగ్‌బాస్‌ ఆదేశాల మేరకు తప్పనిసరై ఇద్దరి సభ్యులను నామినేట్‌ చేయడం.. ఇంట్లో సభ్యులెవరైనా నామినేషన్‌ ప్రక్రియ గురించి మాట్లాడితే నామినేట్‌ అవుతారని తెలపడం.. వరుణ్‌ సందేశ్‌-వితికాలు తమన్నా సింహాద్రి గురించి మాట్లాడుకుంటూ ఉంటే బిగ్‌బాస్‌ నామినేషన్‌ ప్రక్రియ అనుకుని వితికాను ఈ వారం నామినేషన్‌ ప్రక్రియ నుంచి మినహాయించడం.. తనకంటూ ఓ గ్రూప్‌ను క్రియేట్‌ చేసుకుందామని ప్రయత్నిస్తున్నట్లు తమన్నా కనపడటం.. సోమవారం ఎపిసోడ్‌లో  హైలెట్‌గా నిలిచాయి. వైల్డ్‌ కార్డ్‌ ఎంట్రీతో వచ్చిన తమన్నా ఇంట్లో కొందర్ని టార్గెట్‌ చేసినట్లు కనిపిస్తోంది. వచ్చీ రావడంతోనే తమన్నా.. న్యాయనిర్ణేతగా మారినట్టు అనిపిస్తోంది. మహేష్‌-వరుణ్‌ సందేశ్‌ వ్యవహారం గురించి హౌస్‌లో ముచ్చటించింది. మహేష్‌ అలా సారీ చెప్పడం తనకు నచ్చలేదని.. ఆ సమయంలో ఇంట్లో ఉండి ఉంటే.. మహేష్‌కు సపోర్ట్‌ ఇచ్చేదాన్ని, మహేష్‌ను అలా చీప్‌ మెంటాల్టీ అనడం తనకు నచ్చలేదని బాబా భాస్కర్‌, జాఫర్‌, మహేష్‌, అలీ రెజా, శ్రీముఖిలతో చెప్పుకొచ్చింది. ఇక నామినేషన్‌ ప్రక్రియలో కూడా తమన్నా వరుణ్‌-వితికాల పేర్లు చెప్పడం చూస్తే ముందుగానే ఓ ప్లాన్‌తో వచ్చినట్లు తెలుస్తోంది. వాళ్లిద్దరూ కలిసి ఒకే గేమ్‌ ఆడుతున్నారని, వారిద్దరిలో ఒకర్ని ఎలిమినేట్‌ చేసేందుకే ఇద్దర్నీ నామినేట్‌ చేస్తున్నానని తెలిపింది. అయితే తనకు, మహేష్‌కు గొడవ పెట్టాలని తమన్నా చూస్తోందని రాహుల్‌తో వరుణ్‌ సందేశ్‌ చెప్పుకొచ్చాడు. ఇక హౌస్‌లో రెండో వారానికి గానూ నామినేషన్‌ ప్రక్రియ మొదలైంది. ఇక హిమజ- పునర్నవి, రాహుల్‌ సిప్లిగంజ్‌.. వరుణ్‌ సందేశ్‌- జాఫర్‌, శ్రీముఖి.. అషూ-శ్రీముఖి, రాహుల్‌.. రాహుల్‌-హిమజ,శ్రీముఖి.. సావిత్రి- శ్రీముఖి,జాఫర్‌.. అలీ-హిమజ,వరుణ్‌ సందేశ్‌.. రవికృష్ణ-హిమజ, జాఫర్‌.. జాఫర్‌-వితికా, మహేష్‌.. రోహిణి-పునర్నవి, మహేష్‌.. మహేష్‌- వితికా, వరుణ్‌.. శ్రీముఖి-హిమజ, మహేష్‌.. పునర్నవి-హిమజ, శ్రీముఖి.. తమన్నా-వరుణ్‌ సందేశ్‌, వితికాలను నామినేట్‌ చేశారు. ఇక వీరిలో శ్రీముఖి,హిమజ ఐదు ఓట్లతో.. జాఫర్‌, మహేష్‌ విట్టా, వితికా, వరుణ్‌సందేశ్‌ మూడు ఓట్లతో..  పునర్నవి, రాహుల్‌ రెండు ఓట్లతో నామినేట్‌ అయ్యారు. రెండో వారంలో ఇంటి నుంచి బయటకు వెళ్లేందుకు ఇప్పటివరకు ఎనిమిది మంది నామినేట్‌ అయినట్లు బిగ్‌బాస్‌ తెలిపాడు. ఈ నామినేషన్‌ ప్రక్రియలో బాబా భాస్కర్‌ ఎవర్నీ నామినేట్‌ చేయలేనని.. కావాలంటే తనను నామినేట్‌ చేసుకోండని బిగ్‌బాస్‌కు తెలిపాడు. అయితే నియమాల ప్రకారం ప్రతీ ఇంటి సభ్యుడు ఓ ఇద్దరి పేర్లను నామినేట్‌ చేయాల్సిందేనని బిగ్‌బాస్‌ సూచించాడు. అయినా సరే బాబా భాస్కర్‌ వినకపోవడంతో ఆలోచించుకోవడానికి కొంత సమయాన్ని ఇచ్చారు. మళ్లీ చివర్లో కన్ఫెషన్‌ రూమ్‌కు రావాలని కోరాడు. ఇక అందరూ నామినేషన్‌ ప్రక్రియలో పాల్గొని తమకు నచ్చని ఇద్దరు కంటెస్టెంట్ల పేర్లను బిగ్‌బాస్‌కు తెలిపారు. అయితే రెండో సారి కూడా బాబా భాస్కర్‌ ఎవర్నీ కూడా నామినేట్‌ చేయలేదు. ఈసారి బిగ్‌బాస్‌ రెండు అవకాశాలు ఇచ్చారు. ఇద్దరు పేర్లు చెప్పి నామినేషన్‌ ప్రక్రియను ముగించడం.. లేదా.. ఇంటిసభ్యులందరితో చర్చించడం ఇంకొకటి. బాబా భాస్కర్‌ నామినేషన్స్‌లో ఎవరి పేరు చెప్పనందుకు.. ఇంటి సభ్యులందరూ నామినేషన్స్‌లో ఉండటం ఒక దారి లేదంటే అందరూ కలిసి బాబా భాస్కర్‌ను నామినేట్‌ చేయడం ఇంకోదారి అని బిగ్‌బాస్‌ సెలవిచ్చాడు. అయితే బాబా భాస్కర్‌ను తామెవ్వరమూ నామినేట్‌ చేయలేమని ముక్తకంఠంతో తెలిపారు. కావాలంటే.. అందరం నామినేషన్స్‌లో ఉంటామని ఏకతాటిపైకి వచ్చారు. అలా వద్దని.. కావాలంటే తానే ఓ ఇద్దరిని నామినేట్‌ చేస్తానని బాబా భాస్కర్‌ ముందుకు వచ్చాడు. అనంతరం కన్ఫెషన్‌ రూమ్‌కు వెళ్లిన బాబా భాస్కర్‌.. వితికా, రాహుల్‌ను నామినేట్‌ చేశాడు. ఇక అంతటితో నామినేషన్‌ ప్రక్రియ ముగిసిందని ప్రకటించి.. శ్రీముఖి, హిమజ, జాఫర్‌, మహేష్ విట్టా‌, వరుణ్ సందేశ్‌‌, వితికా షెరు, పునర్నవి భూపాలం, రాహుల్‌ సిప్లిగంజ్‌లు ఎలిమినేషన్‌కు నామినేట్‌ అయ్యారని తెలిపాడు. ఈ వారం ఇంటి సభ్యులు ఎవరు ఎలా ఆడతారు? వారికి ఎలాంటి పరిస్థితులు ఎదురవుతాయి? ఈ ఎనిమిది మంది సభ్యుల్లోంచి ఎవరు నిష్క్రమిస్తారో తెలియాలంటే బిగ్‌బాస్‌ చూస్తూ ఉండాల్సిందే.

ఐదు రోజుల పాటు బిగ్‌బాస్‌ హౌస్‌లో ఇంటిసభ్యులు చేసిన గొడవలు, అల్లరిని అందరూ చూశారు. నాగార్జున వస్తాడు అందరి లెక్కతేలుస్తాడు అని ఇంటి సభ్యులు ఎదురుచూసిన శనివారం వచ్చేసింది. అయితే నాగ్‌ ఎవరికి ఏ రేంజ్‌లో క్లాస్‌ పీకుతాడో తెలీదు.. ఎందుకంటే ఆయనకు ఇదే మొదటి వారం. మరి ఇంటిసభ్యులను నాగ్‌ ఎలా దారిలో పెడతాడో చూడాలి. నామినేషన్స్‌ల్లోంచి ఎలిమినేట్‌ అయిన వారిని తనీష్‌ స్పెషల్‌ ఇంటర్వ్యూ చేయనున్నాడని తెలుస్తోంది. ఇంట్లోంచి బయటకు వచ్చిన కంటెస్టెంట్లు మొదట వారి చానెల్‌కే ఇంటర్వ్యూ ఇవ్వాలన్న నిబంధనను చేర్చారని.. తనీష్‌తో ఈ ఇంటర్వ్యూలు చేయించనున్నట్లు తెలుస్తోంది. మరి మొదటి వారానికి ఎలిమినేషన్‌ జోన్‌లో ఉన్న రాహుల్‌ సిప్లిగంజ్‌, జాఫర్‌, వితికా షెరు, హిమజ, హేమ, పునర్నవిల్లోంచి ఎవరు బయటకు వెళ్తారో తెలియాలంటే రేపటి వరకు ఆగాల్సిందే. అయితే సోషల్‌ మీడియాలో ట్రెండ్‌ అవుతున్న దాన్ని బట్టి చూస్తే.. జాఫర్‌, పునర్నవిలు సేఫ్‌ అని తెలుస్తోంది. ఇక మొదటివారం ఇంట్లోంచి హేమ బయటకు వెళ్లనుందని ప్రచారం జరుగుతోంది. మరి ఇది నిజమో కాదో తెలియాలంటే.. రేపటి వరకు ఆగాల్సిందే.

బిగ్‌బాస్‌ హౌస్‌లో ఎంటర్‌టైన్‌మెంట్‌ చేస్తున్నది ఎవరైనా ఉన్నారు అంటే అది బాబా భాస్కర్‌,జాఫర్‌లు మాత్రమే. వీరిద్దరి ద్వయం చేసే చేష్టలు, మాటలు వీక్షకులకు కాస్త రిలీఫ్‌ దొరికినట్టు అనిపిస్తోంది. జాఫర్‌కు వ్యాయామం ఎలా చేయాలో డైరెక్షన్‌ ఇవ్వడం, డ్యాన్సులు నేర్పించడం, ఇద్దరూ కలిసి మాట్లాడుకోవడం ఇలా ప్రతీ దాంట్లో ఫన్‌ ఉంటోంది. నిన్నటి ఎపిసోడ్‌ మొత్తం గొడవలతో నిండినా.. వీరిద్దరు కలిసి చేసిన బాహుబలి స్పూఫ్‌ కాస్త ఫన్‌ క్రియేట్‌ చేసింది అయితే తాజాగా విడుదల చేసిన ప్రోమో కాస్త వైరల్‌ అయ్యేలా కనిపిస్తోంది. ఈ ప్రోమోలో బాబా భాస్కర్‌, జాఫర్‌లు ఇద్దరూ కలిసి డ్యాన్సులు, పాటలు పాడుకుంటూ ఉన్నారు. డ్యాన్స్‌ మూమెంట్స్‌ చేస్తూ ఉండగా తననే చూడాలని అక్కడ చూడకూడదు, హేమ వైపు చూడకూడదు అనడం, పాట పాడటంలో తప్పు దొర్లితే సరిచేయటం,  గొడవలు లేకుండా ఇలా ఉంటేనే బాగుంది, లేదంటే గొడవలు పెట్టుకోవడం మళ్లీ కొద్దిసేపటికే నవ్వుకోవడం అంటూ జాఫర్‌ కామెంట్‌ చేయడం, చివరగా.. జాఫర్‌ను అమర్యాదగా (రా) సంభోదించడంతో ఆయన సీరియస్‌ కావడం హైలెట్‌గా నిలిచాయి. మరి నిజంగానే వారిద్దరికి గొడవ జరిగిందా? లేదా అన్నది తెలియాలంటే ఇంకొన్ని గంటలు ఎదురుచూడాల్సిందే. చదవండి : నా భార్యకు రెస్పెక్ట్‌ ఇచ్చి మాట్లాడు 

నాల్గో కంటెస్టెంట్‌గా ప్రముఖ యాంకర్‌ జాఫర్‌ ఎంట్రీ ఇచ్చాడు. ప్రముఖ వార్తా చానెల్‌ యాంకర్‌, హోస్ట్‌గా ప్రఖ్యాతి గాంచిన జాఫర్‌.. బిగ్‌బాస్‌ ఇంట్లోకి వచ్చాడు. ఈయన సెలబ్రెటీలను అడిగే ప్రశ్నలు, ఇంటర్వ్యూ చేసే విధానం లాంటివి సోషల్‌ మీడియాలో వైరల్‌ అవుతుంటాయి. వివాదాలతో కూడిన ప్రశ్నలను సంధిస్తూ.. అవతల వ్యక్తులను ఇరుకున పెట్టేందుకు ప్రయత్నిస్తుంటారు. ఈయన గొంతును, యాంకరింగ్‌ను చాలామంది అనుకరిస్తుంటారు. సోషల్‌ మీడియాలో భారీ ఫాలోయింగ్‌ ఉన్న అతికొద్దిమంది పాత్రికేయుల్లో జాఫర్‌ ఒకరు. మరి ఈయన బిగ్‌బాస్‌ హౌస్‌లో కూడా ఎంటర్‌టైన్‌ చేస్తూ చివరి వరకు పోరాడతారా? అన్నది చూడాలి.