సాక్షి, అమరావతి: ముఖ్యమంత్రి వైఎస్‌ జగన్‌మోహన్‌రెడ్డిని తాడేపల్లి సీఎం క్యాంపు కార్యాలయంలో భారత స్టార్‌ షట్లర్‌ కిడాంబి శ్రీకాంత్‌, డెఫిలింపియన్‌ టెన్నిస్‌ ప్లేయర్‌ షేక్‌ జాఫ్రిన్‌ కలిశారు. కాగా ఇటీవల బ్యాంకాక్‌లో జరిగిన థామస్‌ కప్‌ను భారత్‌ సాధించడంలో కిడాంబి శ్రీకాంత్‌ కీలక పాత్ర పోషించాడు. బధిరుల ఒలంపిక్‌ క్రీడల్లో కర్నూలుకు చెందిన టెన్నిస్‌ ప్లేయర్‌ షేక్‌ జాఫ్రిన్‌ కాంస్య పతకం సాధించారు. ఈ సందర్భంగా అంతర్జాతీయ వేదికలపై ఆంధ్రప్రదేశ్‌ ప్రతిష్టను వెలుగెత్తి చాటుతున్న వారివురిని సీఎం జగన్‌ అభినందించారు. జాఫ్రిన్‌ అర్హతలను బట్టి ప్రభుత్వ ఉద్యోగం ఇవ్వాలని సీఎం జగన్‌ అధికారులను ఆదేశించారు. ఈ కార్యక్రమంలో పర్యాటకశాఖ మంత్రి ఆర్కే రోజా, శాప్‌ ఛైర్మన్‌ బైరెడ్డి సిద్ధార్థరెడ్డి పాల్గొన్నారు.  చదవండి: (CM Jagan: సీఎం వైఎస్ జ‌గ‌న్‌తో 'ఏటీసీ టైర్స్' ప్ర‌తినిధుల భేటీ)


 సాక్షి, హైదరాబాద్: రాష్ట్రానికి చెందిన బధిర క్రీడాకారిణి షేక్ జాఫ్రిన్ జర్మనీలో జరిగిన బధిర యూత్ టెన్నిస్ చాంపియన్‌షిప్‌లో సత్తాచాటింది. సింగిల్స్, డబుల్స్ రెండు విభాగాల్లోనూ రజత పతకాలు సాధించింది. జర్మనీలోని హంబర్గ్‌లో ఇటీవల ముగిసిన ఈ టోర్నీలో మొత్తం 9 దేశాలకు చెందిన బధిర క్రీడాకారులు పాల్గొన్నారు. ఇందులో జాఫ్రిన్ సింగిల్స్, డబుల్స్‌లో రన్నరప్‌గా నిలిచింది. టోర్నీ ఆసాంతం రాణించిన జాఫ్రిన్ తుదిమెట్టుపై చతికిలబడింది. సింగిల్స్ టైటిల్ పోరులో ఆమె 1-6, 2-6తో రష్యా అమ్మాయి స్మిర్నొవా పొలినా చేతిలో ఓడింది.
  
  అంతకుముందు జరిగిన సెమీఫైనల్లో జాఫ్రిన్ 6-1, 6-1తో గ్రిన్ అనన్‌స్తాసియా(రష్యా)పై అలవోక విజయం సాధించి ఫైనల్స్‌కు అర్హత సంపాదించింది. డబుల్స్ ఫైనల్లో షేక్ జాఫ్రిన్-పారుల్ గుప్తా జోడి 1-6, 6-4 (2/10)తో స్మిర్నొవా పొలినా- గ్రిన్ అనన్‌స్తాసియా (రష్యా) జంట చేతిలో పరాజయం చవిచూసింది. అంతకుముందు జరిగిన సెమీస్‌లో జాఫ్రిన్-పారుల్ గుప్తా జంట 7-6, 6-4తో జెనోసికోవా-జురయ్ జెనోసిక్ (స్లోవేకియా) ద్వయంపై గెలుపొందింది.