ఓ సగటు మధ్యతరగతి మనిషి.
 ఏదో కేబుల్ టీవీ వ్యాపారం చేసుకుంటూ కుటుంబాన్ని పోషిస్తుంటాడు.
 ఆయన పెద్దకూతురి నగ్నచిత్రాలు తీసి ఒక దుర్మార్గుడు
 బ్లాక్‌మెయిల్ చేయడానికి ఇంటికే వస్తాడు.
 కోపంతో ఊగిపోయిన భార్య వాడిపై దాడి చేస్తుంది.
 వాడు చచ్చిపోతాడు.
 ఇప్పుడీ కుటుంబాన్ని ఈ సగటు మనిషి కాపాడుకోవాలి.
 అదీ ‘దృశ్యం’ సినిమా.
 దీంట్లో మీకు ఎక్కడైనా హీరోయిజం కనబడిందా?
 మోహన్‌లాల్‌కి కనపడింది.
 ఇప్పుడు ఈ సినిమా దాదాపు అన్ని భాషల్లోకి వచ్చేస్తోంది.
 అందుకేనేమో మోహన్‌లాల్ యాభై ఐదేళ్లు వచ్చినా
 ఇంకా మోహనదృశ్యంగా అందర్నీ ఆకట్టుకుంటున్నాడు.
  
 హైదరాబాద్ ఆర్టీసీ క్రాస్‌రోడ్స్‌లో సినిమా హాలు. ‘జిల్లా’ సినిమా... ఇంటర్వెల్ ఘట్టం... తండ్రి పాత్రధారి మోహన్‌లాల్‌తో కొడుకు పాత్రధారి హీరో విజయ్ తెరపై తలపడుతున్నాడు. లాల్‌ను సవాలు చేస్తూ విజయ్ పెద్ద డైలాగేదో చెప్పాడు. మోహన్‌లాల్ మాత్రం ఒక చిన్న డైలాగ్... సీరియస్‌గా ఒక చిన్న చూపు విసిరాడు. మొత్తం సీన్‌ను తన వైపు తిప్పేశాడు. జనం ఒకటే ఈలలు. ఇంటర్వెల్‌లో ఆడియన్స్ మోహన్‌లాల్ గురించే మాట్లాడుకుంటున్నారు.
 
 ఈ మలయాళ స్టార్ గురించి మాట్లాడుకోవడం ఇదేమీ మొదటిసారి కాదు. మూడున్నర దశాబ్దాలుగా సినీప్రేమికులు ఈ ‘లాలేట్టన్’ (మలయాళంలో ‘లాల్ అన్నయ్య’ అనే ప్రేమపూర్వక పిలుపు) గురించి మాట్లాడుకుంటూనే ఉన్నారు. నిండైన విగ్రహం, నటనలో నిగ్రహం, హుందాతనం నిండిన బాడీ లాంగ్వేజ్ - ఇవన్నీ మోహన్‌లాల్‌కు దేవుడిచ్చిన వరాలు. అందుకే, గడ్డం, మీసంతో ఆయన గంభీరంగానూ ఉండగలరు. క్లీన్ షేవ్‌లో కళ్ళతోనే నవ్వుతూ ప్రేమ, వినోదం పండించగలరు. కమర్షియల్ సినిమాకు కేరాఫ్ అడ్రస్... అదే టైమ్‌లో సీరియస్ సబ్జెక్ట్‌లకూ సరితూగే సెన్సిబుల్ యాక్టింగ్. అభిమానుల మాటల్లో చెప్పాలంటే... ‘ది కంప్లీట్ యాక్టర్’.
 
 ఏ విలన్ నుంచి హీరో... ఆ పైన సూపర్‌స్టార్
  అది ముప్ఫై ఏడేళ్ళ క్రితం సంగతి. అప్పటికి మోహన్‌లాల్ విశ్వనాథన్ నాయర్ వయసు 18 ఏళ్ళే! ఆ వయసులోనే తొలి అవకాశం ‘తిరనోట్టమ్’ (1978). కానీ సెన్సార్ చిక్కులు. మలి చిత్రం ‘మంజిల్ విరింజ పూక్కళ్’ (’80) ముందుగా విడుదలైంది. అదీ విలన్ వేషం. దాదాపు 30 సినిమాల దాకా హీరో అన్నవాళ్ళు లేరు. అలాంటి వ్యక్తి తరువాత హీరో, ఆ పైన సూపర్‌స్టారవడం ఆశ్చర్యమే.
  1980లలో ఒకపక్కన తమిళంలో రజనీకాంత్, కమలహాసన్, తెలుగులో చిరంజీవి, కన్నడంలో విష్ణువర్ధన్ లాంటి హీరోలు ఎదిగి వస్తున్న సమయంలోనే మలయాళ సీమలో పొడిచిన పొద్దుపొడుపు - మోహన్‌లాల్. ఆరో తరగతిలోనే స్టేజ్‌పై తొమ్మిది పదుల వయసున్న ముసలివాడి పాత్ర వేసిన బెస్ట్ యాక్టర్. ఆ రోజున లాల్ ఎవరో తెలియదు. కానీ, ఇవాళ ఆయనను తెలియనివారు లేరు.
 
  ఏ కెమెరాను మరచి... సహజ నటన
  కమర్షియల్, కామికల్, సీరియస్, సెన్సిబుల్ - ఇలా ఏ తరహా పాత్ర అయినా అందులో చిన్న చిన్న అంశాలు కూడా కొట్టొచ్చినట్లు కనపడేలా చేయడం మోహన్‌లాల్ గొప్పదనం. కాన్స్ ఫెస్టివల్‌కెళ్లిన ‘వానప్రస్థమ్’ (99)లో కథకళి డ్యాన్సర్ కున్హికుట్టన్... ‘తన్మాత్ర’ (2005)లో కుటుంబ జీవితం కష్టాలపాలైన అల్జీమర్స్ వ్యాధిగ్రస్థుడు రమేశ్ నాయర్... ‘కిరీడమ్’ (’89. హిందీలో జాకీష్రాఫ్‌తో ‘గర్దిష్’గా రీమేకైంది)లో సమాజం చేసిన రౌడీ సేతుమాధవన్... ‘దేవాసురమ్’(93)లో గ్రామపెద్ద మంగళసేరి నీలకంఠన్... సెటైరికల్ కామెడీ ‘నాడోడికట్టు’(’87)లో ఏజెంట్ చేతిలో మోసపోయిన యువకుడు... లాంటి పాత్రల్ని పరిశీలించండి. అక్కడ లాల్ కనపడడు, పాత్ర కనపడుతుంది. నటన ఉండదు, జీవించడం ఉంటుంది.
 
  అందుకే, చాలామంది ఆయనను కమలహాసన్‌తో పోలుస్తుంటారు. కమల్‌కు గురువైన ప్రముఖ దర్శకుడు కె. బాలచందరే - ‘కమల్ మెథడ్ యాక్టర్. కెమెరా ముందు నటిస్తున్నానన్న సంగతి తనకు బాగా తెలుసు. కానీ, లాల్ అలా కాదు. నటిస్తున్నప్పుడు కెమెరా ముందున్నానన్న సంగతి మర్చిపోయి మరీ నటిస్తాడు’ అన్నారు.     
 
  ఏ పొరుగింటి పెద్ద హీరోలకు... లైఫ్!    
  ప్రేమ్‌నజీర్, మధు లాంటి టాప్‌స్టార్స్ వచ్చిన మలయాళ సీమలో మోహన్‌లాల్ ఎన్నో ఏళ్ళుగా బాక్సాఫీస్ వేగుచుక్క. కానీ, 2000 ప్రాంతం నుంచి మలయాళ సినిమాను పూర్తిగా కమర్షియల్ చట్రంలోకి నెట్టేశారని విమర్శ మోహన్‌లాల్‌పై బలంగానే వినిపిస్తుంది. ఆయన మాత్రం ఇప్పటికీ హీరోగా చేస్తూనే ఏ కొత్త తరహా కథలు, పాత్రలు వచ్చినా, సై అంటున్నారు. మలయాళంలో మున్ముందుగా వచ్చిన ‘దృశ్యమ్’ (2013) అందుకో ఉదాహరణ. నిజానికి, ఆ సినిమాలో హీరోయిజమేమీ ఉండదు. కానీ, రచయిత, దర్శకుడు జీతూ జోసెఫ్ చెప్పిన కథ వినీ వినగానే, పాత్రలు బలమైనవని లాల్‌కు అనిపించింది. అంతే! హీరోయిజమ్ గురించి చింత పడకుండా, ఓ.కె. చెప్పేశాడు. సినిమా పూర్తయి రిలీజయ్యాక, ఆయన అంచనా నిజమైంది. సినిమా పెద్ద హిట్. కెరీర్‌కు ఒక కొత్త కోణమూ వచ్చి చేరింది. అన్ని భాషల్లోకీ ఆ కథ వెళ్ళింది.
 
  ఇలా మోహన్‌లాల్ నటించిన సినిమా, పోషించిన పాత్ర రీమేక్‌ల రూపంలో ఎక్కడెక్కడి పెద్ద హీరోలకో కొత్త ఊపిరి పోయడం కొత్త ఏమీ కాదు. మలయాళ సైకలాజికల్ థ్రిల్లర్ ‘మణిచిత్ర తాళు’ (1993)లో ఆయన చేసిన సైకియాట్రిస్ట్ పాత్ర ఇతర భారతీయ భాషల్లో కనీసం ఇద్దరు పెద్ద హీరోలకు (కన్నడంలో విష్ణువర్ధన్‌కు ‘ఆప్తమిత్ర’-2004గా, తమిళ - తెలుగుల్లో రజనీకాంత్‌కు ‘చంద్రముఖి’-2005గా) కొత్త లైఫ్ ఇచ్చింది.
 
  ఏ ఎల్లలు దాటి... ప్రతిభను చాటి...
  దేశమంతటా సుపరిచితుడైనా మోహన్‌లాల్ పక్కా మలయాళీగానే తెరపై మిగిలారు. ఇరవై ఒక్క ఏళ్ళ క్రితం ఒకే ఒక్క స్ట్రెయిట్ తెలుగు సినిమాలో ఆయన నటించారు. ఆప్తమిత్రుడైన ప్రియదర్శన్ దర్శకత్వంలో ‘గాండీవం’లో ‘గోరువంక వాలగానే గోపురానికి’ పాటలో అక్కినేని, బాలకృష్ణ, రోజాలతో కలసి హుషారుగా నర్తించారు. ఇక, మణిరత్నం ‘ఇరువర్’ (తెలుగులో ‘ఇద్దరు’)లో స్వర్గీయ ఎమ్జీయార్‌ను తలపించే పాత్ర లాల్‌కు తమిళంలో తెరంగేట్రం. ఆ తరువాత అప్పుడప్పుడూ తమిళ తెరపైకి వస్తున్నారు. కన్నడ సినిమాల్లోనూ అంతే. వర్మ ‘కంపెనీ’ (2002)లో పోలీసాఫీసర్‌గా హిందీకి పరిచయమైన లాల్ బాలీవుడ్ కెరీర్‌ను సీరియస్‌గా తీసుకోలేదు.
 
  ఏ వ్యాపారంలోనూ స్టారే!
  అక్షరాస్యతతో పాటు రాజకీయ చైతన్యం కూడా ఎక్కువైన మలయాళ సీమలో ఉన్నప్పటికీ, విచిత్రంగా మోహన్‌లాల్ రాజకీయాల వైపు దృష్టి పెట్టలేదు. మరో సూపర్‌స్టార్ మమ్మూటి సి.పి.ఐ (ఎం)కూ, సురేశ్‌గోపి బి.జె.పి.కీ దగ్గరైనప్పటికీ, తన మీద ‘రాజకీయ బ్రాండింగ్’ పడకుండా చూసుకున్నారు. రాజకీయ వ్యాపారంలోకి దిగలేదన్న మాటే కానీ, వ్యాపారసూత్రాలు ఆయనకు బానే తెలుసు. చిత్ర నిర్మాణం, పోస్ట్ ప్రొడక్షన్, పంపిణీలతో పాటు తనకున్న తిండిపుష్టికి దీటుగా దుబాయ్‌తో సహా చాలాచోట్ల మోహన్‌లాల్ పసందైన రెస్టారెంట్లు నడుపుతున్నారు. పచ్చళ్ళు, మసాలా పొడుల వ్యాపారం చేస్తున్నారు.
 
  ఏ ఇటు భౌతికవాదం... అటు ఆధ్యాత్మికత
  కొత్త రుచుల పట్ల కోరికకు తగ్గట్లే జీవితాన్ని ఆస్వాదించడంలోనూ మోహన్‌లాల్ తరువాతే ఎవరైనా! ఎవరి వెంటా పడడు. కానీ, వలచి వచ్చామంటూ వెంటపడేవాళ్ళను విదిల్చికొట్టడు. ఈ నిత్యయౌవనుడికి ఇవాళ్టికీ పెద్ద ఫిమేల్ ఫ్యాన్ ఫాలోయింగ్. వైరుద్ధ్యం ఏమిటంటే, మోహన్‌లాల్‌లో ఎంత భౌతికవాదో, అంత ఆధ్యాత్మిక భావావేశపరుడు. ఆయన రజనీశ్ బాటను అనుసరిస్తాడు. జిడ్డు కృష్ణమూర్తి, రమణ మహర్షి బోధల్ని అభిమానిస్తాడు. ప్రముఖ తమిళ నిర్మాత స్వర్గీయ కె. బాలాజీ కుమార్తె సుచిత్రను ఇరవై ఏడేళ్ళ క్రితం ప్రేమ వివాహం చేసుకున్న లాల్‌కు ఇద్దరు పిల్లలు. కొడుకు ప్రణవ్, కూతురు విస్మయ. కొడుకు కూడా తండ్రి లానే సినీ రంగంలోకొచ్చాడు.
 
 కెరీర్ తొలినాళ్ళలో ఏ ప్రశ్న అడిగినా, ‘యస్’, ‘నో’ లాంటి పొడి మాటలకే పరిమితమైన సిగ్గరి... ఇవాళ ఏ అంశం పైన అయినా అనర్గళంగా మాట్లాడగల దిట్ట. అప్పటి మామూలు నటుడు... ఇవాళ 4 నేషనల్ అవార్డ్స్ (మూడు నటుడిగా, ఒకటి నిర్మాతగా) అందుకున్న ఆలిండియా స్టార్. ఆయన ఎదిగారు. కాలంతో పాటు చాలా మారారు. ఫేస్‌బుక్ అకౌంట్ తెరిచారు. బ్లాగ్ నడుపుతున్నారు. అఫిషియల్ వెబ్‌సైట్, ‘యు’ ట్యూబ్ చానల్, ట్విట్టర్ - అన్నీ ఉన్నాయి. ఇంత మోడరన్ స్టారైనా, తలకెక్కించుకోలేదు. ఇప్పటికీ ఫోన్ చేస్తే లైన్‌లోకొచ్చి, జవాబిచ్చే పాతతరం పెద్ద నటుల ఒరవడిని వదులుకోలేదు.
 
  ఏ హి ఈజ్ స్టిల్ స్ట్రాంగ్!
  మోహన్‌లాల్‌కు ఈ మధ్యే యాభై అయిదు నిండి, యాభై ఆరు వచ్చాయి. మూడున్నర దశాబ్దాలు దాటిన కెరీర్‌లో 325 మలయాళ సినిమాల్లో నటన... అయినా, లాల్ కళాతృష్ణ తీరలేదు. ఆడియన్స్‌కు ఆయన పట్ల ఆకర్షణా తగ్గలేదు. ‘స్టిల్... హి ఈజ్ గోయింగ్ స్ట్రాంగ్’. ఎంత స్ట్రాంగ్ అంటే... ఆయన నటించిన ‘జిల్లా’ తమిళంలో వంద కోట్ల వసూల్ సినిమా. మలయాళ సీమలో మెగాహిట్. ఇప్పుడు తెలుగులోనూ ఓపెనింగ్స్ అదరగొట్టిన సినిమా. లాల్ క్రేజ్ ఎంతటిదంటే... రాజమౌళి సైతం అవకాశమొస్తే ఆయనతో సినిమా చేయాలనుంది అనేటంత!
 
 ఎస్... హి ఈజ్ స్ట్రాంగ్. మనిషి, మనసే కాదు... స్వాతిశయంలోనూ స్ట్రాంగే. అందుకే, అభిమానులిచ్చిన బిరుదే ఆయన అఫిషియల్ వెబ్‌సైట్ పేరు... ‘ది కంప్లీట్ యాక్టర్’. అవును. స్నేహశీలతతో పాటు స్వాతిశయాన్ని కూడా నిర్మొహమాటంగా చూపించగల మోహన్‌లాల్ నటనలోనూ, జీవితంలోనూ కూడా కంప్లీటే! ఆయన లేని సమకాలీన దక్షిణ భారత సినీ చరిత్ర పూర్తిగా ఇన్‌కంప్లీట్!
  
 భాష ఏదైనా... బిగ్ కమర్షియల్ హిట్
  ఏడాదిన్నర క్రితం వచ్చిన మలయాళ ఫ్యామిలీ సెంటిమెంట్ థ్రిల్లర్ ‘దృశ్యమ్’ పెద్ద హిట్టు. ఎంత పెద్ద హిట్టంటే, మలయాళ సినీ చరిత్రలో రూ. 50 కోట్ల పైగా వసూలు చేసిన తొలి చిత్రం. కేబుల్ టీవీ బిజినెస్‌మ్యాన్‌గా మోహన్‌లాల్ ప్రపంచవ్యాప్తంగా మలయాళ సినీలవర్స్‌ని కట్టిపడేశారు. యునెటైడ్ అరబ్ ఎమిరేట్స్‌లో శతదినోత్సవం జరుపుకొన్న రెండో సినిమా కూడా ఇదే. (మొదటిది ‘టైటానిక్’). తరువాత ఇదే కథ తెలుగు, కన్నడ, తమిళాల్లోకి వెళ్ళింది. ఈ 31న హిందీలోనూ వస్తోంది. ప్రతి భాషలోనూ అదే కథ... హీరోలు వేరు. కానీ రిజల్ట్ ఒకటే! కెరీర్‌లో సరైన హిట్ కోసం తపిస్తున్న ప్రతి సీనియర్ హీరోకూ, నిర్మాతకూ ఆ కథ కల్పవృక్షమైంది. విత్తు దశలోనే ఆ కథలోని సత్తువను గుర్తించి, ఇమేజ్ మార్పుకు ఆసరాగా అందిపుచ్చుకున్న ఘనత మోహన్‌లాల్‌దే!
  
  - రెంటాల జయదేవ
  
  


 ‘‘ ‘జిల్లా’ సినిమాలను తెలుగులో రీమేక్ చేద్దామనుకున్నాం. తమిళంలో విజయ్, మోహన్‌లాల్ చేసిన పాత్రలకు సరైన కాంబినేషన్ సెట్ కాలేదు. దాంతో అనువదించి, విడుదల చేశాం’’ అని నిర్మాత ఆర్.బి చౌదరి అన్నారు. విజయ్, కాజల్ అగర్వాల్ జంటగా మోహన్‌లాల్ ముఖ్యపాత్రలో ఆర్.టి. నేసన్ దర్శకత్వంలో సూపర్‌గుడ్ ఫిలిం సమర్పణలో ప్రసాద్ సన్నితి, తమటం కుమార్‌రెడ్డి తెలుగు ప్రేక్షకులకు అందించిన చిత్రం ‘జిల్లా’. హైదరాబాద్‌లో జరిగిన ఈ చిత్రం సక్సెస్ మీట్‌లో ఆర్.బి.చౌదరి మాట్లాడుతూ -‘‘మంచి యాక్షన్ ఓరియెంటెడ్ కథ కావడంతో సినిమాను ప్రేక్షకులు బాగా ఆదరిస్తున్నారు. విజయ్, మోహన్‌లాల్ కాంబినేషన్ ఈ చిత్రానికి హైలైట్’’ అని అన్నారు. ‘‘తమిళంలోలా తెలుగులో కూడా విజయం సాధించినందుకు చాలా ఆనందంగా ఉంది’’ అని దర్శకుడు అన్నారు. ఈ వేడుకలో తమటం కుమార్ రెడ్డి, ప్రసాద్ సన్నితి తదితర చిత్ర బృందం పాల్గొన్నారు.
  


  ‘టెంపర్’ సినిమాలో జంతు ప్రేమికురాలి పాత్రలో నటించి, మెప్పించిన కాజల్ అగర్వాల్ ఇప్పుడు పోలీస్ ఆఫీసర్‌గా కనిపించనున్నారు. టి.నీసన్ దర్శకత్వంలో తమిళంలో విజయ్ సరసన ఆమె నటి ంచిన సూపర్ హిట్ చిత్రం ‘జిల్లా’. మోహన్‌లాల్ కీలక పాత్ర పోషించిన ఈ చిత్రాన్ని సూపర్‌గుడ్ ఫిలింస్ సమర్పణలో శ్రీ ఓబులేశ్వర ప్రొడక్షన్స్ పతాకంపై తమటం కుమార్‌రెడ్డి, ప్రసాద్ సన్నితి అదే పేరుతో తెలుగు వారికి అందిస్తున్నారు. ఈ నెల 24న ఈ చిత్రం విడుదల కానుంది.
 నిర్మాతలు మాట్లాడుతూ -‘‘ఓ స్ట్రయిట్ తెలుగు చిత్రం అనిపించేలా ఈ సినిమాలో కొన్ని సన్నివేశాలను బ్రహ్మానందం, ఎల్.బి.శ్రీరాం, సురేఖావాణిలతో చిత్రీకరించాం. ప్రేక్షకులు అచ్చమైన తెలుగు చిత్రం చూస్తున్న అనుభూతికి లోనవుతారు. విజయ్-కాజల్ కెమిస్ట్రీ ఈ చిత్రానికి హైలైట్’’ అని తెలిపారు. ఈ చిత్రానికి సంగీతం: డి.ఇమాన్, మాటలు: శశాంక్ వెన్నెలకంటి, సహనిర్మాత: నామన శంకర్రావు.
  


 నేనొక అందమైన శిల్పాన్ని అని అంటోంది నటి కాజల్ అగర్వాల్. తెలుగులో ఓ చందమామ, ఓ మగధీర, ఓ బిజినెస్ మ్యాన్ చిత్రాల్లో కాజల్ అగర్వాల్ అందమైన నగుమోము ప్రేక్షకుల గుండెల్లో పదిలంగా గూడుకట్టుకుంది. ఇక కోలీవుడ్‌లో తొలి రోజుల్లో సరైన ఆదరణ లభించకపోయినా నాన్‌అవన్ అల్ల, తుపాకీ, జిల్లా చిత్రాలు ఈమెకు చక్కని విజయాలను కట్టబెట్టాయి. ఇక్కడి ప్రేక్షకులు కాజల్ అందానికి సమ్మోహనం అయ్యారు.
  
  అంతేకాదు ప్రస్తుతం కోలీవుడ్‌నే కాజల్‌ను అక్కున చేర్చుకుంది. ఇప్పుడీ బ్యూటీ ధనుష్ సరసన మారి, విశాల్‌కు జంటగా పాయుంపులి చిత్రాల్లో నటిస్తున్నారు. త్వరలో విక్రమ్‌తోనూ జోడి కట్టబోతున్నారు. ఇలా తమిళ చిత్రాల అవకాశాలు వరుసగా తలుపుతడుతుండడంతో సంబరపడి పోతున్నారు. కాజల్ తనొక అందమైన శిల్పంతో పోల్చుకుంటున్నారు.
  
  అదేమిటో ఆమె మాటల్లోనే చూద్దాం. గొప్ప శిల్పులు లాంటి వారు రూపొందించిన చిత్రాలతో నేను ఒక అందమైన శిల్పం అయ్యాను. నేను సినీ రంగ ప్రవేశం చేసినప్పుడు ఎలాంటి అంచనాలు లేకుండానే వచ్చాను.  నేనూహించని విధంగా ఇన్నేళ్లుగా ప్రముఖ హీరోయిన్‌గా రాణిస్తున్నాను. నేను ఒక ప్రముఖ నటినని చెప్పుకోవడానికి గర్వ పడుతున్నాను. అంతేకాదు నటిగా కాకుండా ఒక విద్యార్థినిగా పలు విషయాలు తెలుసుకుంటున్నానని భవిష్యత్తులో ఏదో ఒక విధంగా ఉపయోగపడతాయి.


  పోలీసులంటేనే ఇష్టపడని ఓ యువకుడు అనుకోని పరిస్థితుల్లో ఖాకీ చొక్కా ధరిస్తే..! అతని జీవితం ఎలాంటి మలుపు తిరిగిందనే కథాంశంతో వస్తున్న చిత్రం ‘జిల్లా’. విజయ్, కాజల్ అగర్వాల్ జంటగా ఆర్‌టీ నీసన్ దర్శకత్వంలో రూపొంది తమిళనాట ఘనవిజయం సాధించిన ‘జిల్లా’ చిత్రాన్ని అదే పేరుతో శ్రీ ఓబులేశ్వర ప్రొడక్షన్స్ పతాకంపై తమటం కుమార్‌రెడ్డి తెలుగు ప్రేక్షకులకు అందిస్తున్నారు. ఇందులో మలయాళ సూపర్‌స్టార్ మోహన్‌లాల్ ప్రధాన పాత్ర పోషించారు.
 
  కుమార్‌రెడ్డి మాట్లాడుతూ -‘‘తెలుగులో ఈ సినిమాకు చాలా పేర్లు అనుకున్నాం. కానీ ఈ సినిమాకు ‘జిల్లా’ టె టిల్ బాగా సరైందనిపించి, దీనినే ఖరారు చేశాం. ఈ తెలుగు వెర్షన్ కోసం బ్రహ్మానందం, సురేఖావాణి, ఎల్బీ శ్రీరాం తదితరులపై హాస్య సన్నివేశాలు చిత్రీకరించాం. హీరో జీవా ఓ సన్నివేశంలో తళుక్కున మెరవనున్నారు’’ అని తెలిపారు. ఈ చిత్రానికి సహనిర్మాత: నామన శంకర్‌రావు, సమర్పణ: ఆర్.బి.చౌదరి.
  


 రాజకీయాల్లో ఆశించినంతగా తన ముద్రను వేసుకోలేకపోయిన చిరంజీవి మళ్లీ టాలీవుడ్ పై కన్నేసినట్టు కనిపిస్తోంది. ఎన్నాళ్లుగానో ప్రేక్షకులను ఊరిస్తున్న తన 150 చిత్రంపై ఒకప్పుటి వెండితెర మెగాస్టార్ తీవ్రంగా ఆలోచిస్తున్నట్టు తెలుస్తోంది. అడపాదడపా 150 చిత్రం చేయాలంటూ తన కోరికను బయటకు చెపుతూ వస్తున్న ఆయనను తాజాగా ఓ తమిళ చిత్రం విశేషంగా ఆకర్షించినట్టు తెలుస్తోంది. సంక్రాంతి రేసులో తమిళంలో విడుదలైన 'జిల్లా' చిత్రం అమితంగా ఆకట్టుకుందని.. ఆ చిత్రాన్ని తెలుగులో రీమేక్ చేయాలనుకుంటున్నట్టు ఫిలింనగర్ సమాచారం. 
  
 మలయాళ నటుడు మోహన్ లాల్, విజయ్ నటించిన 'జిల్లా'పై మిశ్రమ స్పందన వెలువడుతోంది. తమిళ చిత్రంలో మోహన్ లాల్ పోషించిన పాత్రను చిరంజీవి, విజయ్ పాత్రను తనయుడు రామ్ చరణ్ తో చేయించాలని చిరంజీవి ఆలోచిస్తున్నట్టు వార్తలు వెలువడుతున్నాయి. ఒకవేళ ఈ వార్త కార్యరూపం దాల్చితే మెగా అభిమానులకు డబుల్ ధమాకానే అని చెప్పవచ్చు. తన 150 చిత్రం కోసం టాలీవుడ్ కు చెందిన ఓ మాస్ డైరెక్టర్ గ్రీన్ సిగ్నల్ ఇచ్చినట్టు విశ్వసనీయ సమాచారం. అంతేకాక ఎన్నాళ్లుగానో 150 చిత్రం కోసం వేచి చూస్తున్న మెగా అభిమానులకు కూడా ఓ పండగనే అనుకోవచ్చు. 'జిల్లా' మెగా చిత్రంగా రూపొందుతుందో లేదో వేచి చూడాల్సిందే.


 టాలీవుడ్‌లో కాస్త పద్దతిగా కనిపించడం, కోలీవుడ్‌కి వెళ్లగానే.... అందాలను వెండితెరపై విస్తారంగా ఆరేయడం కథానాయికలకు పరిపాటే. ఆ విషయంలో తాను మినహాయింపేమీ కాదు అంటున్నారు కాజల్ అగర్వాల్. ఈ ముద్దుగుమ్మ ప్రస్తుతం అక్కడ విజయ్‌తో ‘జిల్లా’ చిత్రంలో నటిస్తున్న విషయం తెలిసిందే. ఈ సినిమాలో కాజల్ గ్లామర్ పరిధుల్ని దాటిందని యూనిట్ సభ్యుల సమాచారం.విజయ్, కాజల్ కలిసి నటించిన ‘తుపాకీ’ చిత్రం తమిళంతో పాటు తెలుగులోనూ విజయం సాధించడంతో అదే ఫీట్ మళ్లీ రిపీట్ అవుతుందనే ఆశతో... తన తదుపరి చిత్రంలో కూడా కాజల్‌నే కథానాయికగా ఎంచుకున్నారు విజయ్. 
  
 ఆయన ఆకాంక్షను నిజం చేయాలని కాజల్ కూడా గట్టిగానే ప్రయత్నిస్తున్నారని తెలుస్తోంది. ఇందులో భాగంగా బికినీ వేయడానికి కూడా కాజల్ వెనుకాడటం లేదని సమాచారం. కథ రీత్యా ఈ సినిమాలో స్విమ్మింగ్‌పూల్ సన్నివేశం ఉందట. రెండు నిమిషాల నిడివి గల ఈ సన్నివేశంలో కాజల్ టూ పీస్ బికినీ వేయడానికి పచ్చజెండా ఊపేశారని తెలిసింది. సంక్రాంతికి విడుదల కానున్న ఈ సినిమాతో యువతరాన్ని కాజల్ కిర్రెక్కించడం ఖాయం అని వేరే చెప్పాలా!