హైదరాబాద్, బిజినెస్‌ బ్యూరో: వాహన తయారీ సంస్థ అశోక్‌ లేలాండ్‌ పాత వాణిజ్య వాహనాల విక్రయంలోకి ప్రవేశించింది. ఈ మేరకు మహీంద్రా ఫస్ట్‌ చాయిస్‌ వీల్స్‌తో చేతులు కలిపింది. అశోక్‌ లేలాండ్‌ తయారీ పాత వాహనం ఇచ్చి కొత్తది కొనుగోలు, పాత వాహన విక్రయానికి మహీంద్రాకు చెందిన 700లకుపైగా పార్కింగ్‌ కేంద్రాలు వేదికగా మారనున్నాయి. పాత వాహనాల మార్కెట్‌ను క్రమబద్ధీకరించేందుకు ఈ ఒప్పందం దోహదం చేస్తుందని అశోక్‌ లేలాండ్‌ తెలిపింది.


 హైదరాబాద్: వ్యక్తిగత రవాణాకు సంబంధించిన మొబైల్ యాప్ ఓలా, మహీంద్రా గ్రూప్‌కు చెందిన మహీంద్రా ఫస్ట్ చాయిస్‌తో భాగస్వామ్య ఒప్పందం కుదుర్చుకుంది. ఈ ఒప్పందంలో భాగంగా ఓలా బ్యాడ్జ్ కింద కార్లను నిర్వహించే డ్రైవర్లకు కారు సర్వీసింగ్ సేవలపై మహీంద్రా ఫస్ట్ చాయిస్ 50 శాతం వరకూ రాయితీ ఇస్తుందని ఓలా ఒక ప్రకటనలో తెలిపింది. మహీంద్రా ఫస్ట్ చాయిస్ సంస్థ కార్ల సర్వీసింగ్‌కు సంబంధించి ఓలా డ్రైవర్లకు రెండు రకాల ప్యాకేజీలను ఆఫర్ చేస్తోందని  ఓలా సీఓఓ ప్రణయ్ జివ్‌రాజ్‌కా పేర్కొన్నారు.
 
 మహీంద్రా ఫస్ట్ చాయిస్ సర్వీసెస్ వర్క్ షాపుల్లో కారు సర్వీసింగ్ చేయించుకున్నవారికి కార్ ఫ్రెషనర్స్, డాష్‌బోర్డ్ మెమెంటోల వంటివి ఉచితంగా కూడా లభిస్తాయని వివరించారు. ఓలాతో ఒప్పందం కారణంగా  వేలాదిమంది ఓలా డ్రైవర్లకు సేవలందించే అవకాశం లభించిందని మహీంద్రా ఫస్ట్ చాయిస్ సర్వీసెస్ సీఈఓ వైవిఎస్ విజయ్ కుమార్ పేర్కొన్నారు. చెల్లింపుల టెక్నాలజీ సంస్థ జిప్‌క్యాష్‌లో కొంత వాటాను కొనుగోలు చేశామని ఓలా పేర్కొంది. సొంత డిజిటల్ చెల్లింపుల ప్లాట్‌ఫారమ్‌ను ఏర్పాటులో భాగంగా  జిప్‌క్యాష్‌లో  ఓలా వ్యవస్థాపకుడు భవిష్ అగర్వాల్ మైనారిటీ వాటాను కొనుగోలు చేశారు.