పోంగ్‌యాంగ్‌ : అమెరికాకు కొరకరాని కొయ్యగా మారిన కిమ్‌ జాంగ్‌ ఉన్‌ కొత్త ఏడాదిని తనదైన స్టైల్లో జరుపుకొన్నారు. ఏ శక్తీ ఛేధించలేని అణ్వస్త్రదేశంగా ఉత్తరకొరియా మారాలంటూ ప్రజలకు సందేశమిచ్చారు. అదే సమయంలో శత్రుదేశాల ఒళ్లుగగుర్పొడిచేరీతిలో హెచ్చరికలు చేశారు. ‘‘నా టేబుల్‌పై ఎప్పుడూ ఒక బటన్‌ ఉంటుంది. నొక్కితే అంతా బుగ్గిపాలే. అది.. న్యూక్లియర్‌ వెపన్‌ అన్న సంగతి ప్రత్యేకంగా చెప్పనక్కర్లేదనుకుంటా. ఇక ముఖ్యమైన విషయం.. అణ్వస్త్రాల తయారీని మనం ఇంకా వేగవంతం చేయాలి. ఖండాంతర క్షిపణులను పెద్ద ఎత్తున మోహరింపజేయాలి. ప్రపంచంలోని ఏ శక్తీ మన(ఉత్తరకొరియా) జోలికి రాకుండా చూసుకోవాలి’’ అని కింమ్‌ జాంగ్‌ నూతన సంవత్సర సందేశంలో చెప్పారు. ప్రపంచ దేశాల అభ్యర్థనను, ఐక్యరాజ్యసమితి ఆంక్షలను పెడచెవినపెడుతూ ఉత్తరకొరియా తన అణ్వస్త్రాలను పెంపొందించుకుంటున్న సంగతి తెలిసిందే. ఆ దేశం గత ఏడాది అణుబాంబులతోపాటు హైడ్రోన్‌ బాంబును కూడా పరీక్షించింది. దారికి రాకుంటే యుద్ధం తప్పదన్న అమెరికా హెచ్చరికల నేపథ్యంలో కొరియా ఇంకాస్త రెచ్చిపోయి ఆయుధసంపత్తిని కూడబెట్టుకుంటోంది. అమెరికా, దాని మిత్ర దేశాలు తమను భయపెడుతూ సైనిక విన్యాసాలు నిర్వహించినంత కాలం అణు కార్యక్రమాలను కొనసాగిస్తూనే ఉంటామని కిమ్‌ దేశం స్పష్టం చేసింది.


 న్యూయార్క్: భూమధ్య రేఖకు దక్షిణంలో ఉన్న దేశాల ప్రజలు అంతగా ఆందోళన పడాల్సిన అవసరం లేదు. అయితే అమెరికా, జర్మనీ, రష్యా, చైనా, భారత దేశాలు పక్కలోనే అణు బాంబులు పెట్టుకొని పడుకుంటున్నాయని చెప్పవచ్చు. ఈ దేశాల్లో ప్రజల ఆవాస ప్రాంతాలకు దగ్గరలోనే అణు బాంబులు ఉన్నాయి. ఈ విషయాన్ని ‘రియల్‌లైఫ్‌రోల్’ రూపొందించిన వీడియో తెలియజేస్తోంది.
 
 
  
 సియాటెల్, వాషింగ్టన్ నగరాలకు కేవలం 18 మైళ్ల దూరంలో, డెన్వర్, కోలరాడోకు 77 మైళ్ల దూరంలో అణు బాంబులు ఉన్నాయి. యూరప్ ప్రధాన నగరాలన్నింటి పరిధిలోనే అణు బాంబులు ఉన్నాయి. లండన్, వెనిస్, మిలన్, రాటర్డర్మ్ నగరాలన్నింటికీ 50 మైళ్ల రేంజ్లో ఈ అణు బాంబులు ఉన్నాయి. భారత్‌తోపాటు పాకిస్థాన్, ఉత్తర కొరియా వద్ద కూడా అణు బాంబులు ఉన్నాయి. అయితే ఏ దేశం ఈ బాంబులను ఎక్కడ దాచిందో మరో దేశానికి తెలియకపోవడం ఆందోళనకరం.
  
 కానీ అన్నింటికన్నా ఆందోళనకరమైన విషయం ఏమిటంటే అమెరికా, రష్యా దేశాల వద్ద కనుమరుగైన దాదాపు 50 అణు బాంబులు ఎక్కడ ఉన్నాయన్నదే. వీటిలో ఎక్కువగా సముద్రాల అడుగున ఉన్నట్లు భావిస్తుండగా, కొన్ని బాంబాలు మానవ ఆవాస ప్రాంతాలకు దగ్గరగానే ఉంటాయని అనుమానిస్తున్నారు.