- ఈయూతో కలిసుంటాం
 - బ్రెగ్జిట్‌ ఫలితాల నేపథ్యంలో స్కాట్లాండ్ అడుగులు
 - ఉత్తర ఐర్లాండ్‌లోనూ ఇవే డిమాండ్లు
  
  ఎడిన్‌బర్గ్: ప్రపంచ దేశాలు ఎంతో ఆసక్తిగా చూసిన బ్రెగ్జిట్ ఫలితాలు వచ్చేశాయి.. యురోపియన్ యూనియన్(ఈయూ) నుంచి బ్రిటన్ విడిపోవడం ఖాయమైంది.. మరి బ్రిటన్ అధీనంలో ఉన్న స్కాట్లాండ్ పరిస్థితి ఏంటి? మొదట్నుంచీ ఈయూలో ఉండేందుకే మొగ్గుచూసిన స్కాట్లాండ్ ఇప్పుడు ఏం చేస్తుంది? బ్రెగ్జిట్‌పై నిర్వహించిన ఎన్నికల్లో స్కాట్లాండ్‌లో మెజారిటీ ప్రజలు ఈయూలో కొనసాగేందుకే మొగ్గుచూపారు. ఏకంగా 62 శాతం మంది ఈయూకే జైకొట్టారు. 38 శాతం మంది మాత్రమే బ్రెగ్జిట్‌కు అనుకూలంగా ఓటేశారు. దేశంలో ఎక్కువ మంది ఈయూలో ఉండేందుకే మొగ్గుచూపారు కాబట్టి భవిష్యత్తులో తమ అడుగులు అటువైపే ఉంటాయని స్కాట్లాండ్ ఫస్ట్ మినిస్టర్, స్కాటిష్ నేషనల్ పార్టీ(ఎన్‌ఎన్‌పీ) అధినేత నికోలా స్టర్జియన్ ప్రకటించారు. ‘‘ఈయూలోనే కొనసాగుతామంటూ స్కాట్లాండ్ ప్రజలు విస్పష్ట తీర్పు ఇచ్చారు. నేను దాన్ని మనస్ఫూర్తిగా స్వాగతిస్తున్నా’’ అని ఆమె పేర్కొన్నారు.
 
 బ్రిటన్ నుంచి విడిపోవాలా వద్దా అన్న అంశంపై 2014లో స్కాట్లాండ్ కూడా ప్రజాభిప్రాయ సేకరణ జరిపింది. అయితే మెజారిటీ ప్రజలు బ్రిటన్‌లో ఉండేందుకే మొగ్గుచూపారు. అయితే ప్రస్తుతం ఈయూ నుంచి బయటకు వచ్చే బ్రిటన్‌తో కలిసి ఉండాల్సిన అవసరం లేదన్న డిమాండ్లు స్కాట్లాండ్‌లో వెల్లువెత్తుతున్నాయి. బ్రెగ్జిట్ తీర్పు నేపథ్యంలో స్కాట్లాండ్‌లో రెండోసారి ప్రజాభిప్రాయ సేకరణ జరపాలని మాజీ ఫస్ట్ మినిస్టర్ అలెక్స్ సాల్మాండ్ డిమాండ్ చేశారు. ఒకవేళ స్కాట్లాండ్ బ్రిటన్ నుంచి విడిపోతే మూడు శతాబ్దాల చారిత్రక బంధాన్ని తెంచుకున్నట్టు అవుతుంది. అయితే బ్రిటన్‌తో విడాకులు అంత సులువు కాదని, ఒకవేళ విడిపోతే నిలదొక్కుకోవడం కష్టమని మరికొందరు వాదిస్తున్నారు. బ్రిటన్‌లేని ఈయూతో ఉండడం స్కాట్లాండ్‌కు పెద్దగా లాభించదని వారు చెబుతున్నారు. అటు ఉత్తర ఐర్లాండ్‌లో కూడా మెజారిటీ ప్రజలు బ్రెగ్జిట్‌కు వ్యతిరేకంగా, ఈయూలో కొనసాగేందుకు అనుకూలంగా ఓటేశారు. దీంతో అక్కడ కూడా బ్రిటన్ నుంచి బయటకు వచ్చేసి, ఐర్లాండ్‌తో కలిసిపోవాలన్న డిమాండ్లు తెరపైకి వస్తున్నాయి.
 
  ‘మాకు స్వాతంత్య్రం కావాలి’: యూకే రాజధాని లండన్‌ను యురోపియన్ యూనియన్లో ఉంచాలనే కొత్త ఉద్యమం మొదలైంది. మేయర్ సాదిక్ ఖాన్ నేతృత్వంలో దాదాపు 40వేల మంది లండన్ ప్రజలు తమ నగరాన్ని యూకే నుంచి స్వతంత్య్రం చేసి యురోపియన్ యూనియన్లో కలపాలంటూ సంతకాలు సేకరించారు. గురువారం నాటి రెఫరెండంలో 60 శాతం మంది లండన్ ప్రజలు బ్రెగ్జిట్‌కు వ్యతిరేకంగా ఓటేశారు.
  
  1958 నుంచి 58 ఏళ్లు...
  ప్రస్తుతం మనం చూస్తున్న యూరోపియన్ యూనియన్ మాస్ట్రిచ్ ఒప్పందం ద్వారా 1993 నవంబర్ 1న ఏర్పడింది.  క్లుప్తంగా చెప్పాలంటే ఇది ఒక రాజకీయ, ఆర్థిక కూటమి. రెండవ ప్రపంచ యుద్ధం తరువాత యూరోప్... సోవియట్, పశ్చిమ దేశాల ప్రభావిత ప్రాంతాలుగా చీలిపోయింది.  యూరోప్ దేశాల మధ్య యుద్ధాల నివారణ, ఆర్థికాభివృద్ధి ఉద్దేశంతో 1945లో ప్రారంభమైన ‘ఏకీకరణ’ ఆలోచన... ఎన్నో పరిణామ దశలు దాటుకుంటూ ప్రస్తుతం 28 దేశాల స్థాయికి విస్తరించింది. 28 ఈయూ దేశాల్లో 19 ఉమ్మడి కరెన్సీ ‘యూరో’ను అనుసరిస్తున్నాయి.
 
  1958: యూరోపియన్ ఎకనమిక్ కమ్యూనిటీ (ఈఈసీ) ఏర్పాటు.
  1963: కామన్ మార్కెట్‌లో చేరడానికి బ్రిటన్ దరఖాస్తు. ఫ్రాన్స్ వీటో. 1967లోనూ ఇదే పరిస్థితి.
  1973: ఎట్టకేలకు కామన్ మార్కెట్‌లోకి బ్రిటన్ ప్రవేశం.
  1975: జూన్ 5న ఈఈసీలో కొనసాగాలా? వద్దా? అన్న అంశంపై బ్రిటన్‌లో రెఫరెండమ్. కొనసాగడానికే 67 శాతంమంది అనుకూలం.
  1992: ఎక్స్ఛేంజ్ రేట్ వ్యవస్థ నుంచి తప్పుకున్న బ్రిటన్. దీనితో బ్రిటన్ పౌండ్ భారీ పతనం. యూనియన్‌లో కొన్ని దేశాల మధ్య ఏకైక కరెన్సీ ‘యూరో’ ఏర్పాటుకు దారితీసిన పరిణామం.
  1996: మ్యాడ్ కౌ వ్యాధి నేపథ్యంలో... బ్రిటన్ బీఫ్‌ను నిషేధించిన ఈయూ
  2002:  12 ఈయూ దేశాలు యూరోలోకి ప్రవేశం. బ్రిటన్ దూరం.
  2008: ప్రపంచ ఆర్థిక సంక్షోభం. గ్లోబల్ బెయిల్ అవులవుట్ ఫండ్ ఏర్పాటు. బ్రిటన్ భాగస్వామ్యం.
  2011: రెండవ బ్యాంకింగ్ సంక్షోభం. బ్రిటన్‌సహా మరొక యూరోప్ ఇంటర్నేషనల్ బెయిలవుట్.
  2016: ఈయూ నుంచి విడిపోవాలని బ్రిటన్ ప్రజల నిర్ణయం.


 అందరూ భయపడిందే నిజమైంది. బ్రెగ్జిట్ బాంబు పేలింది. యూరోపియన్ యూనియన్ (ఈయూ) నుంచి నిష్ర్కమణే తమ అభీష్టమని 51.9 శాతంమంది బ్రిటన్ పౌరులు తేల్చిచెప్పారు. ఈయూలోనే కొనసాగాలని భావించినవారు 48.1 శాతం మాత్రమే ఉన్నారని శుక్రవారం వెల్లడైన రెఫరెండం ఫలితాలు తేల్చి చెప్పాయి. రెఫరెండం హడావుడి మొదలైన నాలుగు నెలలనాడు బ్రెగ్జిట్ అనుకూల వాదుల కంటే ఎంతో ముందున్న యధాతథవాదులు రోజులు గడుస్తున్నకొద్దీ బలహీనపడుతున్న వైనాన్ని వరస సర్వేలు వెల్లడిస్తూనే ఉన్నాయి. చిట్టచివరి దశలో సేకరించిన సర్వేల్లో యధాతథవాదులు 51 శాతంగా ఉన్నారు. ప్రత్యర్థుల బలం 49 శాతం మాత్రమే. అయితే ఇది పోలింగ్ రోజున తిరగబడవచ్చునని కూడా సర్వేలు జోస్యం చెప్పాయి.
 ముఖ్యంగా ఓటింగ్ శాతం తగ్గిన పక్షంలో విడిపోదామనేవారి గెలుపే ఖాయమన్నాయి. అయితే ఓటింగ్ ముమ్మరంగా జరిగినా అంతిమ విజయం బ్రెగ్జిట్‌వాదులకే దక్కింది. ఫలితాలు వెలువడ్డ కాసేపటికే ప్రధాని డేవిడ్ కామెరాన్ రాజీనామా నిర్ణయాన్ని ప్రకటించారు. బ్రిటన్... ఆ దేశంతోపాటు పాశ్చాత్య దేశాలూ, అటుపై మొత్తం ప్రపంచ దేశాలూ ఎదుర్కొనబోయే అనేకానేక ఉత్పాతాలతో పోలిస్తే కామెరాన్ రాజీనామా ఓ చిన్న కుదుపు మాత్రమే. చూడటానికిది ఈయూలో ఉండటమా, బయటికి రావడమా అన్న అంశంపై జరిగిన హోరాహోరీ పోరుగా మాత్రమే కనబడుతున్నా... సారాంశంలో అంతకు మించిన వైరుధ్యాలు ఎన్నో ఇందులో దాగున్నాయి. అవి రాగలకాలంలో బ్రిటన్‌లో ఎలాంటి విపత్తులను సృష్టించగలవో ఎవరూ నిర్దిష్టంగా చెప్పలేరు. ఆ వైరు ద్యాలతో పాలకులు వ్యవహరించే తీరుతెన్నులు వాటిని నిర్ణయిస్తాయి.
 
 రెండో ప్రపంచ యుద్ధానంతరం యూరప్ ఖండ దేశాలను ఏకం చేయడానికి సుదీర్ఘకాలం సాగిన చర్చోపచర్చలు 1958లో యూరోపియన్ ఎకనామిక్ కమ్యూనిటీ (ఈఈసీ)కి జన్మనిస్తే ఆ తర్వాత అది ఈయూగా రూపుదిద్దుకోవడం 1973లో సాధ్యపడింది. ఉచ్ఛస్థితిలో ఉన్న 60వ దశకంలో ఈఈసీ సభ్యత్వ విస్తరణను ఫ్రాన్స్ గట్టిగా వ్యతిరేకిస్తే అనంతరకాలంలో అందుకు భిన్నమైన వాదనలకు బలం చేకూరింది. యూరప్ ఖండంలోని చిన్నా చితకా దేశాలను కూడా కలుపుకుంటేనే తిరుగులేని శక్తిగా ఎదగగలమన్న అభిప్రాయానిది పైచేయి అయింది. 90వ దశకం మొదట్లో తూర్పు యూరప్ దేశాల్లో సోషలిస్టు రాజ్యాల పతనం దీనికి తోడైంది. పర్యవసానంగా ఈయూలో కొత్త దేశాలు చేరుతూ వచ్చాయి.
 
 ప్రపంచవ్యాప్తంగా మితవాదులు, ఛాందసవాదులు ఇటీవలి సంవత్సరాల్లో బలపడుతున్న జాడలు కనబడుతూనే ఉన్నాయి. అమెరికాలో రిపబ్లికన్ అధ్యక్ష అభ్యర్థి డోనాల్డ్ ట్రంప్, ఫ్రాన్స్‌లో నేషనల్ ఫ్రంట్ నాయకురాలు లీ పెన్, నెదర్లాండ్స్‌లో పార్టీ ఫర్ ఫ్రీడం నాయకుడు గిర్ట్ వైల్డర్స్, ఇటలీలో నార్తర్న్ లీగ్ నేత  మేటియో సాల్విని వంటి మితవాదులు జాతీయవాదాన్ని నూరిపోస్తున్నారు. మన దేశం, మన ఉద్యోగాలు, మన జాతి అనే నినాదాలిస్తున్నారు. ఇప్పుడు యూరప్‌కు గుదిబండగా మారిన శరణార్థుల సమస్య, అక్కడక్కడ చోటుచేసుకుంటున్న ఉగ్రవాద ఘటనలు ఇందుకు మూల కారణాలని వస్తున్న విశ్లేషణల్లో అర్ధ సత్యం మాత్రమే ఉంది. అవి తక్షణ కారణం అయితే కావొచ్చుగానీ అంతకుమించి దశాబ్దాలుగా అమలవుతున్న ప్రపంచీకరణ విధానాల్లో ఇందుకు సంబంధించిన బీజాలున్నాయి. ప్రపంచీకరణ తళుకుబెళుకులు చూసి మూర్ఛిల్లి దాన్ని పెట్టుబడి దారీ విధాన విజయంగా అభివర్ణించినవారు ఆ విధానాలు పెంచుతూ పోతున్న అసమానతలను విస్మరించారు.
 
 అన్ని దేశాల్లోనూ స్వల్ప సంఖ్యాకులైన కార్పొరేట్ దిగ్గజాల చేతుల్లో సంపదంతా కేంద్రీకృతమవుతున్నదన్న వాస్తవాన్ని దాచడానికి ప్రయత్నించారు.  కింది వర్గాల బాగోగుల్ని, సంక్షేమాన్ని పట్టించుకోని విధానాలు అసంతృప్తికీ... చివరకు తిరుగుబాటుకు దారితీస్తాయని గ్రహించలేకపోయారు. పాశ్చాత్య దేశాల్లో చాలాచోట్ల కార్మికుల వేతనాలు 2008 తర్వాత స్తంభించి పోయాయని, ఉపాధి కల్పన అంతంతమాత్రమేనని గుర్తిస్తే ప్రపంచీకరణ సామాన్య పౌరుల జీవితాలను ఎంతగా దిగజార్చిందో అర్ధమవుతుంది. అమె రికాలో బెర్నీ శాండర్స్ వంటివారు సంక్షేమ పథకాలను ప్రతిపాదించి, సహజ వనరులపై కార్పొరేట్ దిగ్గజాల ఆధిపత్యాన్ని తొలగించడమే సమాజం ప్రస్తుతం ఎదుర్కొంటున్న సమస్యలకు పరిష్కారమని సూచించారు. ఇందుకు భిన్నంగా మితవాదులు దేశ సరిహద్దుల్ని మూసేయడం, ముస్లింలను వెళ్లగొట్టడం, జాతి ఔన్నత్యాన్ని పునరుద్ధరించడం అన్ని సమస్యలకూ పరిష్కారమార్గాలుగా చెబుతు న్నారు. ఉగ్రవాద భూతాన్ని చూపి విద్వేషాలను రెచ్చగొడుతున్నారు.
 
 ప్రస్తుత రెఫరెండంలో ఇంగ్లండ్, వేల్స్‌లు రెండూ బ్రెగ్జిట్ వైపు బలంగా నిల బడ్డాయి. ఈయూ నుంచి వైదొలగాలన్న వాదనకు ఇంగ్లండ్‌లో 53.2 శాతంమంది అంగీకరిస్తే...వేల్స్‌లో 51.7 శాతంమంది మద్దతుగా నిలిచారు. అందుకు భిన్నంగా స్కాట్లాండ్‌లో 62శాతంమంది, నార్తర్న్ ఐర్లాండ్‌లో 55.7 శాతంమంది ఈయూలో ఉండటానికే మొగ్గు చూపారు. నిరాదరణకు గురైన వర్గాలు, శ్వేతజాతీయులు అధికంగా ఉండే ఇంగ్లండ్ ప్రాంతంలో బ్రెగ్జిట్‌కు అనుకూలత వ్యక్తం కావడంలో వింతేమీ లేదు. వేల్స్‌లోనూ అదే స్థితి. ఈయూలో కొనసాగడానికి మొగ్గుచూపిన స్కాట్లాండ్, నార్తర్న్ ఐర్లాండ్‌లలో సైతం కార్మికవర్గ ప్రాబల్యం ఉన్న చోట్ల బ్రెగ్జిట్‌కు అనుకూలత రావడం కింది వర్గాల్లో వర్తమాన స్థితిపై ఉన్న అసంతృప్తిని వెల్లడిస్తుంది. ఈయూలో కొనసాగడమే సురక్షితమని లేబర్ పార్టీ అగ్రనేతలంతా కలిసికట్టుగా ప్రకటించినా ఈ వర్గాలు ఏమాత్రం ఖాతరు చేయలేదు.
 
 సమస్యలపట్ల సూత్రబద్ధ వైఖరిని ప్రదర్శించడం కాక అధికారమే పరమావధిగా స్వరం మార్చడం వల్ల అంతిమంగా నష్టపోక తప్పదని ప్రధాని కామెరాన్ ఈపాటికి గ్రహించి ఉంటారు. నిరుడు జరిగిన బ్రిటన్ ఎన్నికల్లో రెఫరెండం ప్రతిపాదన తెచ్చిందీ, ఈయూనుంచి వైదొలగడానికి అనుకూలమని చెప్పిందీ ఆయనే. ఇది ఎలాగూ అయ్యేది కాదనుకుని ఆయన ఈ హామీ ఇచ్చారు. తీరా ఆ పరిస్థితి ఎదురయ్యేసరికి స్వరం మార్చారు. మొత్తానికి రెఫరెండం ఉదారవాద పక్షాలకు ఒక హెచ్చరిక. పౌరుల్లో ఇప్పుడు నెలకొన్న అసంతృప్తిని చల్లార్చే చర్యలు చేపట్టకపోతే అది అంతి మంగా బ్రిటన్ విచ్ఛిన్నానికి దారితీయొచ్చునని ఫలితాలు చాటిచెబుతున్నాయి.


 లండన్: యూరోపియన్  యూనియన్ ఏర్పడాలనే ఆకాంక్ష సాకారమైంది 1993, నవంబర్ ఒకటవ తేదీనే కావచ్చు. ఆకాంక్షకు అంకురార్పణ జరిగింది మాత్రం 1948లోనే. నెదర్లాండ్స్‌లోని ఫ్రాగ్ సిటీలో జరిగిన యూరప్ కాంగ్రెస్‌లో బ్రిటిన్ మాజీ ప్రధాన మంత్రి విన్‌స్టన్ చర్చిల్ ప్రసంగిస్తూ యూరప్ దేశాలన్నీ ఒకటి కావాలని, ‘యూనెటైడ్ యూరప్’ అంటూ తొలిసారిగా పిలుపునిచ్చారు. అందుకు యూరప్ దేశాల నుంచి కాంగ్రెస్‌కు హాజరైన 20 మంది దేశాధినేతల్లో ఎక్కువ మంది అందుకు అంగీకరించారు.  ‘యూరప్ దేశాలన్నీ ఒకటికావాలంటే అందుకు బలమైన ఆకాంక్ష ఉండాలి. స్వేచ్ఛను ప్రేమించే అన్ని దేశాల ప్రజలు, రాజకీయ పార్టీల్లో మెజారిటీ సభ్యులు మనస్ఫూర్తిగా ఐక్యతకు కోరుకోవాలి. ఓటు ఎటు వేస్తారన్నది అప్రస్తుతం.
  
 యూరప్ అంతా ఒక్కటి కావాలనే లక్ష్యం విషయంలో ఎలాంటి రాజీ ఉండకూడదు. అప్పుడే ఏదోరోజు మనమంతా ఒక్కటవుతాం. ఆ రోజు కోసం నిరీక్షిద్దాం’ అని చర్చిల్ సభా ముఖంగా మాట్లాడారు. యూరప్ ఒకటికావాలనే ఆకాంక్ష వ్యక్తం కావడమే కాకుండా కార్యరూపం దాల్చింది కూడా నెదర్లాండ్స్‌లోనే అవడం ఓ విశేషం.
 
  వాస్తవానికి ఆ నాటి యూరప్ సభను ప్రత్యేకంగా ఏ ప్రభుత్వం ఏర్పాటు చేయలేదు. దానికి అధికారిక గుర్తింపు కూడా లేదు. కొన్ని యూరప్ దేశాలు అప్పటికప్పుడు అనుకొని సమావేశమయ్యాయి. భారత్ నుంచి 1948లో బ్రిటీష్ సైన్యాన్ని ఉపసంహరించుకున్న నేపథ్యంలోనే ఈ సమావేశం జరిగింది. భారత్ నుంచి ఈ సైనిక ఉపసంహరణ యూరప్ కాంగ్రెస్‌పై ఎలాంటి ప్రభావం చూపిస్తుందో తెలుసుకునేందుకే ‘బ్రిటీష్ పాతే’ అనే బ్రాడ్‌క్యాస్టింగ్ సంస్థ చర్చిల్ ప్రసంగాన్ని రికార్డు చేసింది. భారత్ నుంచి బ్రిటీష్ సైన్యాన్ని ఉపసంహరించుకున్న చారిత్రక నేపథ్యం లేకపోయినట్లయితే చర్చిల్ ప్రసంగాన్ని వీడియో తీసేవారే కాదు. అప్పుడు చర్చిల్ యూరోపియన్ యూనియన్ గురించి ఏమన్నారో కూడా మనకు తెలిసేకాదు. ఇప్పుడు బ్రిటన్ పౌరులు బ్రెక్జిట్‌కు ఓటేసిన సందర్భంలో చర్చిల్ బతికి ఉంటే ఆయన ఎలా స్పందించేవారో!
  


 - యూరోపియన్ కమ్యూనిటీస్ చట్ట సవరణ బిల్లుపై 'రాజకీయ' మేఘాలు
 - ఆమోదం పొందకుండా ఎంపీల వ్యూహాలు.. అదే జరిగితే ప్రభుత్వ పతనం ఖాయం
 లండన్: బ్రెగ్జిట్ కథ ఇంకా ముగియలేదు. మరో మలుపు తీసుకుని పూర్తిగా బ్లాక్ అయ్యే అవకాశమూ లేకపోలేదు! అవును. శుక్రవారం వెల్లడైన బ్రెగ్జిట్ రెఫరెండంకు సంబందించిన బిల్లును పార్లమెంట్ లో అడ్డుకుని, వీగిపోయేలా అన్ని పార్టీల ఎంపీలు వ్యూహరచనలు చేస్తున్నట్లు హౌస్ ఆఫ్ కామన్స్ వర్గాల సమాచారం.
 
 బ్రిటన్ లో అధికార కంజర్వేటివ్ పార్టీ సహా ప్రతిపక్ష లేబర్ పార్టీ, స్కాటిష్ నేషనల్ పార్టీ, లిబరల్ డెమోక్రటిక్ పార్టీలకు చెందిన ఎంపీల్లో అత్యధికులు మొదటి నుంచి బ్రెగ్జిట్ ను వ్యతిరేకిస్తున్నారు. అంతేకాదు.. వీరిలో కొందరు బ్రిటన్ ఈయూలోనే కొనసాగేలా 'రిమెయిన్' కు ఓటు వేయాల్సిందిగా పెద్ద ఎ్తతున ప్రచారం చేశారు. లేబర్ పార్టీ ఎంపీ జో కాక్స్ బ్రెగ్జిట్ కు వ్యతిరేకంగా ప్రచారం చేస్తున్న సమయంలోనే హత్యకు గురయ్యారు. గత వారం బిర్ స్టల్ లో ఆమెను హత్యచేసిన దుండగుడు.. బ్రెగ్జిట్ పై కాక్స్ అభిప్రాయం నచ్చకే హత్యచేశానని పేర్కొనడం గమనార్హం. 'బ్రెగ్జిట్ ను అడ్డుకునే క్రమంలో సహచర ఎంపీ ప్రాణాలు పణంగా పెట్టినప్పుడు మనం పదవులను పణంగా పెట్టలేమా?' అనే వాదన ప్రస్తుతం ఎపీల మధ్య నడుస్తున్నట్లు సమాచారం.
 
 ప్రజాతీర్పు (రెఫరెండం)నకు వ్యతిరేకంగా వెళ్లాలనుకోవడం అన్ని పార్టీలకూ రాజకీయ ఆత్మహత్య వంటిదే. ఎంపీలుగానీ బ్రెగ్జిట్ బిల్లును ఆమోదించకుంటే దేశంలో అలజడి మొదలవుతుంది. తద్వారా ప్రభుత్వం కుప్పకూలుతుంది. ఎంపీలు తిరిగి ప్రజా తీర్పు కోరాల్సి ఉంటుంది. అప్పుడు జనం చేత చీత్కారం ఎదుర్కోవాల్సిఉంటుంది. ఇదంతా ఓ ప్రహాసనం. అయితే ఎంపీలు రెఫరెండంను కాదనే దుస్సాహసం చేయబోరని, బిల్లు తప్పక ఆమోదం పొందుతుందని బ్రిగ్జిట్ ను బలంగా సమర్థిస్తోన్న యూకే ఇండిపెండెంట్ పార్టీ నేతలు అంటున్నారు.
 
 బ్రిగ్జిట్ రిఫరెండం ఫలితాలపై చర్చించేందుకు అతి త్వరలోనే సమావేశం కానున్న బ్రిటన్ పార్లమెంట్.. 1972నాటి యూరోపియన్ కమ్యూనిటీస్ చట్టానికి సవరణలు చేయనుంది. ఈ చట్టానికి సవరణలు చేస్తేనేగానీ 28 దేశాల కూటమి(ఈయూ) నుంచి బ్రిటన్ వైదొలిగే మార్గం సుగమంకాదు. వైదొలిగే ప్రక్రియ పూర్తయ్యేందుకు దాదాపు రెండేళ్ల కాలం పడుతుంది. అయితే ఆదిలోనే ఎంపీలు బ్రెగ్జిట్ కు వ్యతిరేకంగా ఓటువేస్తే ప్రభుత్వం కూలిపోయి 2020లో జరగాల్సిన సార్వత్రిక ఎన్నికలు ఈ ఏడాదే జరిగే అవకాశం ఉంది.