దక్షిణాఫ్రికాలో భారత మహిళల  హాకీ జట్టు పర్యటన
 
  స్టెలెన్‌బోష్:  దక్షిణాఫ్రికా పర్యటనను భారత మహిళల హాకీ జట్టు విజయంతో ముగించింది. స్కాట్లాండ్ జట్టుతో జరిగిన చివరి మ్యాచ్‌లో భారత్ 3-0 గోల్స్ తేడాతో గెలిచింది. భారత్ తరఫున పూనమ్ రాణి రెండు గోల్స్ చేయగా... వందన కటారియా ఒక గోల్ సాధించింది. ఈ పర్యటనలో జర్మనీ, దక్షిణాఫ్రికా, స్కాట్లాండ్ జట్లతో భారత్ మ్యాచ్‌లు ఆడింది. జర్మనీతో జరిగిన రెండు మ్యాచ్‌ల్లో మాత్రమే భారత్ ఓడిపోయింది.


 మహిళల హాకీ వరల్డ్ లీగ్
  న్యూఢిల్లీ: నిలకడగా రాణించిన భారత మహిళల జట్టు హాకీ వరల్డ్ లీగ్ రౌండ్-2లో వరుసగా రెండో విజయాన్ని నమోదు చేసింది. పోలండ్‌తో ఆదివారం జరిగిన గ్రూప్ ‘ఎ’ మ్యాచ్‌లో టీమిండియా 2-0 గోల్స్ తేడాతో గెలిచింది. ఆరంభం నుంచే దూకుడుగా ఆడిన భారత్ తొలి అర్ధభాగం ముగిసే సమయానికి 2-0తో ఆధిక్యంలోకి వెళ్లింది.
  
  ఆట 13వ నిమిషంలో వందన కటారియా, 26వ నిమిషంలో పూనమ్ రాణి ఒక్కో గోల్ చేసి భారత్‌ను ఆధిక్యంలో నిలిపారు. ఈ గెలుపుతో భారత్ ఆరు పాయింట్లతో గ్రూప్ ‘ఎ’లో అగ్రస్థానంలో ఉంది. సోమవారం విశ్రాంతి దినం తర్వాత మంగళవారం జరిగే చివరిదైన మూడో లీగ్ మ్యాచ్‌లో థాయ్‌లాండ్‌తో భారత్ తలపడుతుంది.