ముంబై: ప్రభుత్వ రంగ బ్యాంకుల ప్రైవేటీకరణ ప్రణాళికాబద్ధంగా అనుకున్న ప్రకారం ముందుకు సాగుతుందని ఆర్థిక మంత్రి నిర్మలా సీతారామన్‌ స్పష్టం చేశారు. ‘‘బ్యాంకు ప్రైవేటీకరణ షెడ్యూల్‌ ప్రకారం కొనసాగుతుంది. దానిలో ఎటువంటి మార్పు లేదు’’ అని ఆమె అన్నారు. నరేంద్ర మోదీ అధికారంలోకి వచ్చి తొమ్మిది సంవత్సరాలు పూర్తయిన సందర్భంగా ఆమె ఇక్కడ ఒక మీడియా సమావేశంలో మాట్లాడారు. ఐడీబీఐ బ్యాంక్ కాకుండా, 2021-22 సంవత్సరంలో రెండు ప్రభుత్వ రంగ బ్యాంకులు, ఒక జనరల్ ఇన్సూరెన్స్ కంపెనీని ప్రైవేటీకరించాలని ప్రతిపాదిస్తున్నట్లు ఆర్థిక మంత్రి నిర్మలా సీతారామన్ 2021 ఫిబ్రవరిలో చెప్పారు. ప్రస్తుతానికి, ఈ విషయంలో కొంచెం పురోగతి కనిపించింది. తాజా నివేదికల ప్రకారం, సెంట్రల్ బ్యాంక్ ఆఫ్ ఇండియా, ఇండియన్ ఓవర్సీస్ బ్యాంక్‌లను 2021 ఏప్రిల్ లో ప్రైవేటీకరించాలని నీతి ఆయోగ్ సిఫార్సు చేసినందున, ప్రైవేటీకరించనున్న ప్రభుత్వ యాజమాన్యంలోని బ్యాంకుల తాజా జాబితాను సిద్ధం చేయడానికి ప్రభుత్వం ఒక కమిటీని ఏర్పాటు చేసే అవకాశం ఉంది.

న్యూఢిల్లీ: బ్యాంకింగ్‌ సేవలకు 28, 29 తేదీల్లో పాక్షిక అంతరాయం కలిగే అవకాశాలు ఉన్నాయి. ప్రభుత్వం అనుసరిస్తున్న ప్రజా, కార్మిక, ఉద్యోగ ప్రతికూల ఆర్థిక విధానాలను నిరసనగా సోమ, మంగళవారాల్లో సమ్మె నిర్వహించాలని కార్మిక సంఘాలు ఇచ్చిన పిలుపునకు బ్యాంక్‌ ఉద్యోగ సంఘాల్లోని ఒక వర్గం మద్దతునివ్వడం దీనికి కారణం. ప్రభుత్వ విధానాలకు నిరసనగా దేశ వ్యాప్త సమ్మెకు కేంద్ర కార్మిక సంఘాలు, వివిధ రంగాల స్వతంత్ర కార్మిక సంఘాల సంయుక్త వేదిక పిలుపు నిచ్చిన సంగతి తెలిసిందే. కార్మిక చట్ట సంస్కరణలు, ప్రైవేటీకరణ, నేషనల్‌ మానిటైజేషన్‌ పైప్‌లైన్‌ (ఎన్‌ఎంపీ) విధానాలను కేంద్రం వెనక్కు తీసుకోవాలని కార్మిక సంఘాలు డిమాండ్‌ చేస్తున్నాయి. ఎంఎన్‌ఆర్‌ఈజీఏ కింద వేతనాల పెంపు, ఇతర కాంట్రాక్ట్‌ కార్మికుల క్రమబద్ధీకరణ వంటి అంశాలు కూడా ఇందులో ఉన్నాయి.   బ్యాంకింగ్‌ డిమాండ్లు ఇవీ..  బ్యాంకింగ్‌ రంగంలోని డిమాండ్లపై కూడా దృష్టి సారించాలని డిమాండ్‌ చేస్తూ  సమ్మెకు మద్దతు ఇవ్వాలని, ఆందోళనలో పాల్గొనాలని నిర్ణయించినట్లు ఆల్‌ ఇండియా బ్యాంక్‌ ఎంప్లాయీస్‌ అసోసియేషన్‌ (ఏఐబీఈఏ) తెలిపింది. ప్రభుత్వ రంగ బ్యాంకుల ప్రైవేటీకరణను నిలిపివేసి వాటిని బలోపేతం చేయాలని, మొండిబకాయిల (ఎన్‌పీఏ) సత్వర రికవరీకి చర్యలు తీసుకోవాలని, ఖాతాదారులపై సర్వీస్‌ చార్జీల భారం తగ్గించాలని, పాత పెన్షన్‌ విధానాన్ని పునరుద్ధరించాలని బ్యాంకు యూనియన్‌ ఈ సందర్భంగా ప్రభుత్వాన్ని డిమాండ్‌ చేస్తున్నట్లు ఏఐబీఈఏ ప్రధాన కార్యదర్శి సీహెచ్‌ వెంకటాచలం స్పష్టం చేశారు. బ్యాంకింగ్‌ దిగ్గజం ఎస్‌బీఐసహా పలు ప్రభుత్వ రంగ బ్యాంకులు సమ్మె కారణంగా తమ సేవలకు పాక్షిక అంతరాయం కలగవచ్చని వేర్వేరు ప్రకటనల్లో పేర్కొన్నాయి.   బుధవారం కూడా...  కాగా, బుధవారం కూడా కస్టమర్లకు బ్యాంకింగ్‌ సేవల్లో అంతరాయం ఏర్పడే అవకాశం ఉంది. 2021–22కు సంబంధించి ప్రభుత్వ ఖాతా లావాదేవీల వార్షిక ముగింపు ప్రక్రియలో పాల్గొనాలని ఆర్‌బీఐ బ్యాంకులకు సూచించడం దీనికి నేపథ్యం. 2021–22 ఆర్థిక సంవత్సరానికి సంబంధించి ప్రభుత్వ లావాదేవీలు నిర్వహించే నిర్దిష్ట (ఏజెన్సీ) బ్యాంకు బ్రాంచీలు ఆయా లావాదేవీలను తప్పనిసరిగా అదే ఆర్థిక సంవత్సరంలో ముగించాల్సిన సంగతి తెలిసిందే. ప్రస్తుత ఆర్థిక సంవత్సరం మార్చి 31వ తేదీతో ముగుస్తున్న సంగతి తెలిసిందే. ఆర్‌బీఐ ప్రత్యేక ఆదేశాలతో ఆర్థిక సంవత్సరం చివరిరోజు గురువారం నిర్దిష్ట బ్యాంక్‌ బ్రాంచీలు ప్రభుత్వ చెక్కుల క్లియరెన్స్‌ను చేపడతాయి.    

న్యూఢిల్లీ: రెండు ప్రభుత్వరంగ బ్యాంకులను (పీఎస్‌బీలు) ప్రైవేటీకరించే విషయంలో కేబినెట్‌ ఎటువంటి నిర్ణయం తీసుకోలేదని కేంద్ర ఆర్థిక మంత్రి నిర్మలా సీతారామన్‌ స్పష్టం చేశారు. ఈ మేరకు రాజ్యసభకు వెల్లడించారు. ప్రస్తుత ఆర్థిక సంవత్సరంలో కనీసం రెండు పీఎస్‌బీలను ప్రైవేటీకరించే ఉద్దేశ్యంతో ఉన్నట్టు 2021–22 బడ్జెట్‌ సందర్భంగా మంత్రి సీతారామన్‌ చేసిన ప్రకటన గమనార్హం. పీఎస్‌బీల ప్రైవేటీకరణపై సభ్యుల నుంచి ఎదురైన ప్రశ్నకు మంత్రి స్పందించారు.  చదవండి: మీరు వినియోగించని బ్యాంక్‌ అకౌంట్లలో ఎంత సొమ్ము మగ్గుతుందో తెలుసా?

ఆర్థిక అసమానతలు పెరగకుండా రాజ్యాంగంలోని ఆదేశిక సూత్రాల్లో పలు సూచనలు చేశారు. కానీ కేంద్ర ప్రభుత్వం అనుసరిస్తున్న చర్యలు వీటికి పూర్తి విరుద్ధంగా ఉన్నాయి. ముఖ్యంగా జాతీయ బ్యాంకుల ప్రైవేటీకరణ దిశగా వేస్తున్న అడుగులు సహజ న్యాయ సూత్రాలకు వ్యతిరేకమైనవి. బ్యాంకుల జాతీయీకరణ వల్ల సమాజంలోని పేద వర్గాలు లబ్ధి పొందాయి. కానీ వ్యాపారమే ప్రధాన లక్ష్యంగా పనిచేసే ప్రైవేటులోకి బ్యాంకులు వెళ్తే ఈ పేద వర్గాలు వాటి సేవలకు దూరమైపోతాయి. పైగా ప్రైవేటీకరణకు కారణం అని చెబుతున్న జాతీయ బ్యాంకుల నష్టాలు... వాటి అసమర్థత వల్ల కాకుండా, కార్పొరేట్ల రుణాల ఎగవేత వల్ల వచ్చినవే. కాబట్టి వాటి ప్రైవేటీకరణకు చెబుతున్న వాదనే అర్థం లేనిదని దీనితో తేలిపోతోంది. దేశ ఆర్థికాభివృద్ధి కోసం భారీ పరిశ్రమలు, బ్యాంకింగ్, ఇన్సూరెన్స్‌ లాంటి ఆర్థిక సంస్థలు ప్రభుత్వ ఆధీనంలోనే ఉండాలనీ, దానివల్ల ఆర్థిక వనరులు అందరికీ అందుబాటులోకి వస్తాయనీ బాబాసాహెబ్‌ అంబేడ్కర్‌ తన రచన ‘స్టేట్స్‌ అండ్‌ మైనారిటీస్‌’లో పేర్కొన్నారు. రాజ్యాంగ సభకు తాను వ్యక్తిగతంగా, అదేవిధంగా ఆల్‌ ఇండియా షెడ్యూల్డ్‌ కాస్ట్స్‌ ఫెడరేషన్‌ ద్వారా సమర్పించిన నివేదిక ఇది. ఒక రకంగా ఇది అంబేడ్కర్‌ రూపొందించిన రాజ్యాంగ నమూనా. ఇందులోని చాలా అంశాలు రాజ్యాంగంలోకి రాలేదు. ఆర్థిక రంగంలో సమానత్వం కాకపోయినా కనీసం ప్రజాస్వామ్య విధానాలు అమలు జరగాలని అంబేడ్కర్‌ ఆశిం చారు. పరిశ్రమలు మాత్రమే కాదు, భూమిని కూడా జాతీయం చేయా లనీ, ఎవరైతే వ్యవసాయం చేస్తారో, వారికే లీజుకి ఇవ్వాలనీ ప్రతిపా దించారు. కానీ, అంబేడ్కర్‌ ఆలోచనలు ఆరోజు చెల్లుబాటు కాలేదు.  అందువల్లనే, ఇవే విషయాలను పరోక్షంగా రాజ్యాంగంలోని నాలుగవ భాగంలోని ఆదేశిక సూత్రాలలో ఆర్టికల్‌ 38లో పొందు పరిచారు. ఇందులో రెండు అంశాలున్నాయి. మొదటిది, దేశంలోని అన్ని రంగాల్లో–  సామాజిక, ఆర్థిక, రాజకీయ రంగాల్లో సామాజిక న్యాయం అందించాలనీ, దానికిగానూ ప్రజల సంక్షేమం కోసం ప్రభు త్వాలు తీవ్రంగా ప్రయత్నించాలనీ తెలియజేస్తున్నది. రెండవది, దేశం లోని వ్యక్తుల మధ్య మాత్రమే కాకుండా ప్రాంతాల, సమూహాల మధ్య అసమానతలు సాధ్యమైనంత వరకు తగ్గించడానికి ప్రభు త్వాలు కృషి చేయాలనీ, అవకాశాలు, సౌకర్యాల విషయంలో అసమా నతలు లేకుండా చూడాలనీ పేర్కొంటున్నది. అయితే ఇటీవల కేంద్ర ప్రభుత్వం అనుసరిస్తున్న ప్రైవేటీకరణ చర్యలు పూర్తిగా రాజ్యాంగ వ్యతిరేకం మాత్రమే కాకుండా, సహజ న్యాయానికి కూడా విరుద్ధమైనవి. పబ్లిక్‌ రంగంలో ఉన్న పరిశ్రమ లను, విమానయాన సంస్థలను, రైల్వేలను, ఇంకా అనేకానేక ప్రభుత్వ రంగ వ్యవస్థలను ప్రైవేటీకరణ చేయాలని కేంద్రం చాలా తొందర పడుతున్నది. అందులో భాగంగానే ప్రభుత్వ బ్యాంకులను ప్రైవేట్‌కు కట్టబెట్టే చర్యలను ముమ్మరం చేస్తోంది. అయితే భారత రాజకీయ చరిత్ర తెలిసిన వారెవ్వరికీ ప్రస్తుతం కేంద్రంలో అధికారంలో ఉన్న బీజేపీ వైఖరి ఆశ్చర్యం కలిగించదు.   భారత దేశంలో ఆధునిక బ్యాంకింగ్‌ వ్యవస్థ 1770లో ప్రారం భమైంది. దానిపేరు బ్యాంక్‌ ఆఫ్‌ హిందూస్థాన్‌. 1829–32 మధ్య కాలంలో దీన్ని మూసివేశారు. జనరల్‌ బ్యాంక్‌ ఆఫ్‌ ఇండియా 1786లో ప్రారంభమయ్యింది. కానీ 1791లోనే ఆగిపోయింది. దానినే 1809లో బ్యాంక్‌ ఆఫ్‌ బెంగాల్‌గా మార్చారు. ఆ తర్వాత 1840లో బ్యాంక్‌ ఆఫ్‌ బాంబేను, 1843లో బ్యాంక్‌ ఆఫ్‌ మద్రాస్‌ను నెల కొల్పారు. ఈ మూడింటినీ 1921లో విలీనం చేసి, ఇంపీరియల్‌ బ్యాంక్‌ ఆఫ్‌ ఇండియాగా మార్చారు. ఈ క్రమంలోనే మొత్తం బ్యాంకింగ్‌ వ్యవస్థకు ఒక మూల స్తంభం ఉండాలని అంబేడ్కర్‌ 1930 ప్రాంతంలో బ్రిటిష్‌ ప్రభుత్వాన్ని కోరారు. అందుకుగానూ రిజర్వు బ్యాంక్‌ ఉండాలని ప్రతిపాదించారు. అట్లా 1934లో రిజర్వు బ్యాంక్‌ ఆఫ్‌ ఇండియా చట్టం ద్వారా 1935లో రిజర్వు బ్యాంకుని ఏర్పాటు చేశారు. ఇంపీరియల్‌ బ్యాంక్‌ ఆఫ్‌ ఇండియాను 1955లో స్టేట్‌ బ్యాంక్‌ ఆఫ్‌ ఇండియాగా మార్చారు.   స్వదేశీ ఉద్యమాన్ని ప్రేరణగా తీసుకొని 1906 నుంచి 1911 వరకు కొన్ని ప్రైవేట్‌ బ్యాంకులు ఏర్పాటయ్యాయి. అందులో కాథలిక్‌ సిరియన్‌ బ్యాంక్, ది సౌత్‌ ఇండియన్‌ బ్యాంక్, బ్యాంక్‌ ఆఫ్‌ ఇండియా, కార్పొరేషన్‌ బ్యాంక్, ఇండియన్‌ బ్యాంక్, బ్యాంక్‌ ఆఫ్‌ బరోడా, కెనరా బ్యాంక్, సెంట్రల్‌ బ్యాంక్‌ ఇండియా ఇందులో ముఖ్యమైనవి. అయితే స్వాతంత్య్రానంతరం మరికొన్ని బ్యాంకులు ప్రైవేట్‌ రంగంలో ఏర్పా టయ్యాయి. 1969 వచ్చేటప్పటికి ఒక్క స్టేట్‌ బ్యాంక్‌ ఆఫ్‌ ఇండియా తప్ప చాలా బ్యాంకులు ప్రైవేట్‌ రంగంలోనే ఉన్నాయి. అవి వ్యాపారం ప్రధాన లక్ష్యంగా పనిచేయడం వల్ల పేదలకు అందుబాటులోకి రాలేదు. 1969కి ముందు బ్యాంకు బ్రాంచీల సంఖ్య 8 వేలు ఉంటే, ప్రస్తుతం 2021 లెక్కల ప్రకారం లక్షా 18 వేల బ్రాంచీలు ఉన్నాయి.  1969 జూలైలో పార్లమెంటులో బ్యాంకుల జాతీయీకరణపై జరిగిన చర్చలో అప్పుడు జనసంఘ్‌ పేరుతో ఉన్న ఇప్పటి భారతీయ జనతా పార్టీ సంపూర్ణంగా బ్యాంకుల జాతీయీకరణ బిల్లును వ్యతి రేకించింది. అప్పటి జనసంఘ్‌ పార్టీ నాయకులు అటల్‌ బిహారీ వాజ్‌ పేయి, బల్‌రాజ్‌ మదోక్‌ తమ వ్యతిరేకతను తెలియజేశారు. ‘ఇది ప్రజా వ్యతిరేక, డిపాజిటర్ల వ్యతిరక, దేశ వ్యతిరేక బిల్లు’ అని అభి వర్ణించారు. అయితే అప్పటి ప్రధాని ఇందిరాగాంధీ సంకల్పంతో, కాంగ్రెస్‌ పార్టీకి ఉన్న మెజారిటీతో ఆ బిల్లు ఆమోదం పొందింది.   బ్యాంకుల జాతీయీకరణ వల్ల ఎంతోమంది పేదలు, రైతులు, చేతివృత్తుల వాళ్ళు లబ్ధి పొందారు. పేద, మధ్య తరగతి వర్గ ప్రజల పిల్లల చదువులకు, చిన్న వ్యాపారులకు రుణాలు లభ్యమయ్యాయి.  ఉద్యోగాల్లో ఎస్సీ, ఎస్టీ, బీసీలు తమ వాటాను పొందగలిగారు. అయితే అప్పటి జనసంఘ్‌ పెరిగి పెద్దదై భారతీయ జనతా పార్టీగా మారింది. ప్రభుత్వ బ్యాంకులను ప్రైవేట్‌ పరం చేయాలని పట్టుద లతో ఉన్నది. ప్రభుత్వ బ్యాంకులు సమర్థవంతంగా పనిచేయటం లేదనీ, అందువల్ల ప్రైవేట్‌ వ్యక్తులకు అప్పగించాలన్న ప్రతిపాదన ముందుకు తెచ్చామనీ నమ్మబలుకుతోంది. నిజానికి ఈ వాదన పూర్తిగా వాస్తవ విరుద్ధమైనదని రఘురామ రాజన్‌ లాంటి ఆర్థిక వేత్తలు, ఉద్యోగ, అధికారుల సంఘాల వారు ఎన్నో వివరాలతో దాన్ని కొట్టివేస్తున్నారు. నిజానికి ప్రైవేట్‌ బ్యాంకులే దివాళా తీస్తున్నాయన్న విషయాన్ని వాళ్ళు లెక్కలతో సహా చూపిస్తున్నారు. 1968కి ముందు వరకు దాదాపు 2,132 బ్యాంకులు దివాళా తీశాయి. ఇప్పటి వరకు 25 ప్రైవేట్‌ బ్యాంకులు దివాళా తీసినట్టు సాక్ష్యాలున్నాయి. దానివల్ల కొన్ని వేల మంది డిపాజిట్‌దారులు, ఖాతాదారులు నష్టపోయారు. ఇంకొక విషయాన్ని గుర్తు పెట్టుకోవాలి. ఈ 25 బ్యాంకులను జాతీయ బ్యాంకుల్లో విలీనం చేసి, ప్రజలను ఆదుకోవడం జరిగింది.  జాతీయ బ్యాంకులు కూడా కొన్నిసార్లు నష్టాలకు గురైన మాట వాస్తవం. దానికి కారణం, మన సర్కారు ముద్దుబిడ్డలైన కార్పొరేట్‌ సంస్థలే కారణం. బ్యాంకు ఉద్యోగ సంఘాలు తెలిపిన వివరాల ప్రకారం– 68 వేల కోట్ల రూపాయలను కేవలం 50 కార్పొరేట్‌ సంస్థలు ఎగవేసినట్టు తెలుస్తున్నది. అంతేకాకుండా దేశంలోని అతి పెద్ద కంపెనీలు 13 బ్యాంకులకు 4 లక్షల 46 వేల కోట్ల రూపాయలు అప్పుగా చెల్లిం చాల్సి ఉండగా, వారికి 2 లక్షల 80 వేల కోట్లు మాఫీ చేశారు. కేవలం 1 లక్షా 61 వేల కోట్లు మాత్రమే బ్యాంకుల్లో జమచేశారు. అంటే రెండు లక్షల 84 వేల కోట్లు బ్యాంకులకు నష్టం వాటిల్లినట్టే కదా? ఇది రాజకీయ తప్పిదమేనా లేక బ్యాంకుల నేరమా అన్న విషయం సుస్పష్టంగానే ఉంది. ముమ్మాటికీ బ్యాంకుల నేర మేమీ ఇందులో లేదు. రాజకీయ నాయకులు, కార్పొరేట్‌ కంపెనీలు కుమ్మక్కై ప్రజలను మోసం చేస్తున్నారు. భవిష్యత్తులో జాతీయ బ్యాంకులు ప్రైవేట్‌ పరం అయితే ప్రజల డబ్బుతో కార్పొరేట్‌ కంపెనీలు ఇంకా విచ్చలవిడిగా పెట్టుబడులు పెట్టి, ఒక వేళ ఆ కంపెనీలు నష్టపోతే అడిగే దిక్కుకూడా ఉండదు. భారతీయ జనతా పార్టీ ప్రభుత్వం కార్పొరేట్‌ కంపెనీల కోసం అన్ని రంగాల్లో చేస్తున్నట్టే బ్యాంకులను కూడా కార్పొరేట్‌ కంపెనీలకు అప్ప జెప్పి సంపదను ఇంకా, ఇంకా కొద్ది మంది ఖజానాలు నింపడానికి ప్రయత్నిస్తున్నది. దీనికి వ్యతిరేకంగా బ్యాంకు ఉద్యోగులు చేస్తున్న పోరాటం, కేవలం వారికి సంబంధించింది మాత్రమే కాదు. అన్ని వర్గాల ప్రజలు ముఖ్యంగా పేదలు, మధ్యతరగతి ప్రజలు, బలహీన వర్గాల ప్రజలు తమదిగా భావించి, రాజకీయంగా ప్రతిఘటించకపోతే దేశం మరింత అధ్వాన్న స్థితిలోకి వెళ్ళక తప్పదు.   మల్లెపల్లి లక్ష్మయ్య   వ్యాసకర్త సామాజిక విశ్లేషకులు ‘ మొబైల్‌ : 81063 22077

సాక్షి, హైదరాబాద్‌: కేంద్రం తలపెట్టిన ప్రభుత్వరంగ బ్యాంకు(పీఎస్‌బీ)ల ప్రైవేటీకరణపై ఉద్యోగ సంఘాలు భగ్గుమంటున్నాయి. ఇప్పటికే బ్యాంకుల విలీనంతో తీవ్ర నష్టం జరిగిందంటున్న ఉద్యోగ సంఘాలు... ఇప్పుడు పీఎస్‌బీల ప్రైవేటీకరణతో బ్యాంకింగ్‌ రంగం ప్రమాదంలో పడుతుందంటూ ఆగ్రహం వ్యక్తం చేస్తున్నాయి. తాజాగా కొనసాగుతున్న పార్లమెంటు సమావేశాల్లో బ్యాంకు సంస్కరణ బిల్లు, బ్యాంకులు మరియు బ్యాంకింగ్‌ చట్టాల సవరణ బిల్లులను ఆమోదించేందుకు కసరత్తు చేస్తోందని యునైటెడ్‌ ఫోరమ్‌ ఆఫ్‌ బ్యాంక్‌ యూనియన్స్‌(యూఎఫ్‌బీయూ) ఆందోళన వ్యక్తం చేస్తోంది. బ్యాంకుల ప్రైవేటీకరణకు వ్యతిరేకంగా ఈనెల 3వ తేదీ నుంచే పలు ఉద్యోగ సంఘాలు నిరసన కార్యక్రమాలు చేపడుతున్నాయి. తాజాగా ఈనెల 16, 17 తేదీల్లో విధులు బహిష్కరించి సమ్మె చేపట్టేందుకు యునైటెడ్‌ ఫోరమ్‌ ఆఫ్‌ బ్యాంక్‌ యూనియన్స్‌ పిలుపు ఇచ్చింది. దీంతో రెండ్రోజుల పాటు బ్యాంకులు మూతబడనున్నాయి.  నేడు ఉద్యమ కార్యాచరణ...  దేశంలోని తొమ్మిది ప్రధాన బ్యాంకింగ్‌ ఉద్యోగ సంఘాలతో కూడిన ఐక్య సంఘం యునైటెడ్‌ ఫోరమ్‌ ఆఫ్‌ బ్యాంక్‌ యూనియన్స్‌(యూఎఫ్‌బీయూ). ఈ నెల 16, 17 తేదీల్లో బ్యాంకు ఉద్యోగుల సమ్మెకు యూఎఫ్‌బీయూ పిలుపు ఇచ్చిన నేపథ్యంలో.. అన్ని రాష్ట్రాల్లో ప్రత్యేక సమావేశాలు ఏర్పాటు చేసి ఉద్యమాన్ని విస్తృతం చేస్తున్నారు. ఇందులో భాగంగా సోమవారం సోమాజిగూడ ప్రెస్‌ క్లబ్‌లో యూఎఫ్‌బీయూ మీడియా సమావేశం నిర్వహిస్తున్నట్లు రాష్ట్ర కన్వీనర్‌ బీఎస్‌ రాంబాబు తెలిపారు. ఈ సమావేశంలో ఉద్యోగుల డిమాండ్లతో పాటు ఉద్యమ కార్యాచరణ ప్రకటించే అవకాశం ఉంది.   

న్యూఢిల్లీ: డిజిన్వెస్ట్‌మెంట్‌ ప్రక్రియలో భాగంగా ఈ ఆర్థిక సంవత్సరంలో ప్రైవేటీకరించే ప్రభుత్వ రంగ బ్యాంకుల పేర్లను నీతి ఆయోగ్‌ ఖరారు చేసింది. ఈ జాబితాను డిజిన్వెస్ట్‌మెంట్‌పై కార్యదర్శులతో ఏర్పాటైన కీలక గ్రూప్‌ (సీజీఎస్‌డీ)కి సమర్పించినట్లు సీనియర్‌ అధికారి ఒకరు తెలిపారు. క్యాబినెట్‌ కార్యదర్శి సారథ్యంలోని సీజీఎస్‌ నుంచి క్లియరెన్స్‌ లభించాక.. ఖరారైన పేర్లను ప్రత్యామ్నాయ యంత్రాంగం (ఏఎం)కు పంపుతారు. అటుపైన తుది ఆమోదం కోసం ప్రధాని సారథ్యంలోని క్యాబినెట్‌కు పంపుతారు. క్యాబినెట్‌ ఆమోదం లభించిన తర్వాత ప్రైవేటీకరణకు వెసులుబాటు కల్పించేలా నియంత్రణపరమైన నిబంధనల్లో సవరణలు చేస్తారు. ఈ ఆర్థిక సంవత్సరంలో రెండు బ్యాంకులు, ఒక సాధారణ బీమా సంస్థను ప్రైవేటీకరించాలని 2021–22 కేంద్రం బడ్జెట్‌లో ప్రతిపాదించింది. వాటిని ఎంపిక చేసే బాధ్యతను నీతి ఆయోగ్‌కి అప్పగించింది.

సాక్షి, అమరావతి: జాతీయ బ్యాంకుల ప్రైవేటీకరణ, విలీనాన్ని వ్యతిరేకిస్తూ చేపట్టిన రెండు రోజుల దేశవ్యాప్త సమ్మెలో తొలిరోజు విజయవంతమైందని, దేశ వ్యాప్తంగా పది లక్షల మందికి పైగా బ్యాంకు ఉద్యోగులు సమ్మెలో పాల్గొని తమ నిరసనను తెలియజేశారని బ్యాంకు ఉద్యోగ సంఘాలు ప్రకటించాయి. బంద్‌లో భాగంగా రాష్ట్రంలో కూడా సోమవారం బ్యాంకు కార్యకలాపాలు పూర్తిగా నిలిచిపోయాయి. యునైటెడ్‌ ఫోరమ్‌ ఆఫ్‌ బ్యాంక్‌ యూనియన్స్‌ ఆధ్వర్యంలో విజయవాడ ఎస్‌బీఐ జోనల్‌ కార్యక్రమం వద్ద బ్యాంకు ఉద్యోగులు విధులను బహిష్కరించి తమ నిరసనను తెలియజేశారు. ఈ సందర్భంగా ఆల్‌ ఇండియా బ్యాంక్‌ ఆఫీసర్స్‌ కాన్ఫెడరేషన్‌ (ఐబాక్‌) రాష్ట్ర కార్యదర్శి వైవీ సత్యనారాయణ మాట్లాడుతూ.. కేంద్ర ప్రభుత్వం బ్యాంకుల ప్రైవేటీకరణపై చేసిన ప్రకటనను వెనక్కి తీసుకోవాలని, లేని పక్షంలో నిరవధిక సమ్మెకు వెనుకాడమని కేంద్రానికి హెచ్చరికలు జారీ చేశారు. రాష్ట్ర వ్యాప్తంగా లక్ష మందికి పైగా బ్యాంకు ఉద్యోగులు ఈ సమ్మెలో పాల్గొన్నారని, రూ.వేల కోట్ల విలువైన లావాదేవీలు స్తంభించాయని యూనియన్‌ నాయకులు పేర్కొన్నారు. ఇదే స్ఫూర్తితో మంగళవారం సమ్మెను కూడా విజయవంతం చేయనున్నట్లు తెలిపారు.  

ముంబై: బడ్జెట్‌లో ప్రకటించినట్టు ప్రభుత్వరంగ బ్యాంకుల ప్రైవేటీకరణ ప్రణాళిక అమలు విషయంలో ఆర్‌బీఐతో కలసి పనిచేస్తామని కేంద్ర ఆర్థిక మంత్రి నిర్మలా సీతారామన్‌ తెలిపారు. ముంబై వచ్చిన సందర్భంగా ఆమె మీడియాతో మాట్లాడుతూ.. బ్యాంకుల్లో ప్రభుత్వ వాటాల నిర్వహణ చూసేందుకు బ్యాంకు ఇన్వెస్ట్‌మెంట్‌ కంపెనీ ఏర్పాటు చేసే ఆలోచన ప్రభుత్వానికి లేదని స్పష్టం చేశారు. ఐడీబీఐ బ్యాంకులో ప్రభుత్వ వాటాల ఉపసంహరణతోపాటు, మరో రెండు ప్రభుత్వరంగ బ్యాంకుల్లోనూ వాటాల ఉపసంహరణ ప్రతిపాదనలను మంత్రి బడ్జెలో భాగంగా ప్రకటించడం గమనార్హం. తాను కేవలం ప్రకటన మాత్రమే చేశానని, అంశాలపై కసరత్తు కొనసాగుతోందంటూ.. ఈ విషయంలో ఆర్‌బీఐతో కలసి ముందుకు వెళతా మని మంత్రి చెప్పారు. బ్యాడ్‌ బ్యాంకు ఏర్పాటు విషయమై స్పందిస్తూ.. నేషనల్‌ అస్సెట్‌ రీకన్‌స్ట్రక్షన్‌ కంపెనీకి ప్రభుత్వం కొంత మేర హామీనిస్తుందంటూ.. ఇటువంటిది బ్యాంకుల నుంచి రావాలని, వాటి నిర్వహణలోనే ఉండాలన్న అభిప్రాయాన్ని వ్యక్తం చేశారు. బ్యాంకుల ఎన్‌పీఏలు అంతా గతంలో చేసిన దుర్వినియోగం కారణంగా వచ్చిన వారసత్వ సమస్యగా పేర్కొన్నారు. బడ్జెట్‌లో చేసిన ప్రైవేటీకరణ ప్రతిపాదనలపై ప్రతిపక్షాల విమర్శలను సోమరి ఆరోపణలుగా ఆర్థిక మంత్రి సీతారామన్‌ అభివర్ణించారు.


 ♦ అందుకు భారత్ సిద్ధం కాలేదన్న జైట్లీ
 ♦ వాటి ఆర్థిక పరిపుష్టే ధ్యేయమని ఉద్ఘాటన
 న్యూఢిల్లీ: ప్రభుత్వ రంగ (పీఎస్‌యూ) బ్యాంకుల ప్రైవేటీకరణకు భారత్ సిద్ధం కాలేదని ఆర్థికమంత్రి అరుణ్‌జైట్లీ పేర్కొన్నారు. వాటికి మరింత మూల దనం కేటాయించి, ఆర్థికంగా పటిష్టం చేయడం ప్రభుత్వ ధ్యేయమని స్పష్టం చేశారు. ప్రస్తుత ఆర్థిక సంవత్సరం బడ్జెట్‌లో కేటాయించిన రూ.25,000 కోట్ల నిధులు కాకుండా, అవసరమైతే మరిన్ని నిధులు సమకూర్చడానికి సిద్ధమని కూడా ఆర్థికమంత్రి అన్నారు.  ఇక ఐడీబీఐ బ్యాంక్ మినహా పీఎస్‌యూ బ్యాంకుల ప్రస్తుత పాత్ర, లక్షణాలు యథాతథంగా కొనసాగుతాయని అన్నారు. ‘‘కొన్ని బ్యాంకుల విలీనానికి ప్రయత్నం జరుగుతోంది. పోటీ పూర్వక పరిస్థితుల్లో ఇది తప్పదు. ఐడీబీఐ బ్యాంక్ విషయంలో మాత్రం వాటాను 49 శాతానికి తగ్గించుకోవడంపై మదింపు జరుగుతోంది’’ అని ఇక్కడ జరిగిన భారత్ ఎకనమిస్ట్ సదస్సులో జైట్లీ అన్నారు.
 ఫైనాన్షియల్ విభాగంలో ప్రైవేటీకరణ ప్రక్రియ ఎందుకు జరగడం లేదన్న ప్రశ్నకు ఆర్థికమంత్రి సమాధానం చెబుతూ, ‘‘సంస్కరణలను ఒక స్థాయికి తీసుకువెళ్లే దశలో ప్రజాభిప్రాయాన్ని తగిన విధంగా మలచాల్సి ఉంటుంది. సామాజిక రంగం అభివృద్ధికి నిధుల కల్పనాంశాలపై దృష్టి సారించాలి. ఈ విభాగంలో ప్రభుత్వ రంగ బ్యాంకుల పాత్ర గణనీయమైనది. ఒకవేళ ప్రభుత్వ బ్యాంకులను ప్రైవేటీకరణ చేస్తే, ఆయా సామాజిక రంగానికి నిధుల కల్పన ఎలా అన్న అంశంపై ఏకాభిప్రాయ సాధన అవసరం. అయితే కొన్ని నిర్దిష్ట సంస్కరణలకు మాత్రం ప్రణాళిక రూపొందించాం. ఉదాహరణకు బ్యాంకుల్లో ప్రభుత్వ హోల్డింగ్‌ను 52 శాతానికి తీసుకురావడం’’ అని జైట్లీ పేర్కొన్నారు. ఇక మొండిబకాయిల సమస్య పరిష్కారానికి ప్రభుత్వం తగిన విస్తృత స్థాయి చర్యలను తీసుకుంటోందని జైట్లీ అన్నారు.
 జీఎస్‌టీ అమలు తక్షణ లక్ష్యం...
 వస్తు సేవల పన్ను (జీఎస్‌టీ) అమలు కేంద్రం ప్రధాన లక్ష్యంగా పేర్కొన్న జైట్లీ, దీనివల్ల పన్ను రేట్లు దిగివస్తాయని పేర్కొన్నారు. ఏప్రిల్ 1 నుంచి జీఎస్‌టీ అమలుకు తగిన చర్యలు తీసుకుం టున్నట్లు వెల్లడించారు.