కోట/జైపూర్‌/లక్నో: సంజయ్‌లీలా భన్సాలీ దర్శకత్వం వహించిన పద్మావతి సినిమా వివాదం కొత్తరూపు తీసుకుంది. ఈ చిత్రంలో రాణి పద్మినిగా నటించిన దీపికా పదుకొనే ముక్కు కోస్తామని శ్రీ రాజ్‌పుత్‌ కర్ణిసేన పరోక్షంగా హెచ్చరించింది. దీపిక రెచ్చగొట్టే వ్యాఖ్యలు మానుకోకపోతే రామాయణంలో లక్ష్మణుడి చేతిలో శూర్పణకకు పట్టిన గతే ఆమెకు పడుతుందని చెప్పింది. పద్మావతి చిత్రం విడుదలను ఎవ్వరూ అడ్డుకోలేరనీ, ఒకదేశంగా భారత్‌ తిరోగమిస్తోందని ఇంతకుముందు దీపిక వ్యాఖ్యానించిన సంగతి తెలిసిందే. కర్ణిసేనకు చెందిన నేత మహిపాల్‌సింగ్‌ మక్రానా మీడియాతో మాట్లాడుతూ.. ‘క్షత్రియులు మహిళల్ని అమితంగా గౌరవిస్తారు. ఒకవేళ ఈ చిత్రాన్ని విడుదల చేసినా, దీపిక మా మనోభావాలు దెబ్బతినేలా, రెచ్చగొట్టే వ్యాఖ్యలు మానుకోకపోయినా రామాయణంలో లక్ష్మణుడిలా ప్రవర్తించేందుకు రాజపుత్రులు ఎంతమాత్రం వెనుకాడరు’ అని హెచ్చరించారు. అసలు డెన్మార్క్‌ పౌరసత్వం ఉన్న దీపిక రెచ్చగొట్టే వ్యాఖ్యలు ఎలా చేస్తారని సింగ్‌ ప్రశ్నించారు. క్షత్రియుల శౌర్యపరాక్రమాలను చూపిస్తూ బాహుబలి లాంటి సినిమాలు కోట్లు అర్జిస్తుంటే.. వక్రీకరణలతో ఇలాంటి సినిమా తీయాల్సిన అవసరం ఏముందని ప్రశ్నించారు. తాజా హెచ్చరికల నేపథ్యంలో దీపికకు భద్రతను పెంచినట్లు మహారాష్ట్ర హోంశాఖ సహాయమంత్రి రంజిత్‌ పాటిల్‌ తెలిపారు. ఈ సినిమా దర్శకుడు భన్సాలీకి ఇప్పటికే భద్రత కల్పించినట్లు వెల్లడించారు. ఈచిత్రంలో రాణి పద్మినిగా దీపిక, రాజా రతన్‌సింగ్‌గా షాహీద్‌ కపూర్, అల్లావుద్దీన్‌ ఖిల్జీగా రణ్‌వీర్‌సింగ్‌ నటించారు. ప్రజాగ్రహాన్ని దృష్టిలో ఉంచుకోండి: పద్మావతి చిత్రం డిసెంబర్‌ 1న విడుదలైతే రాష్ట్రంలో తీవ్రమైన శాంతిభద్రతల సమస్యలు తలెత్తుతాయని ఉత్తరప్రదేశ్‌ ప్రభుత్వం కేంద్రానికి తెలిపింది. డిసెంబర్‌ 2న జరిగే స్థానిక సంస్థల ఎన్నికల నిర్వహణకు ఉన్న వనరులను రాష్ట్ర ప్రభుత్వం కేంద్రానికి తెలియజేసింది. సినిమా విడుదలకు ముందు ప్రజాగ్రహాన్ని దృష్టిలో ఉంచుకోవాల్సిందిగా యూపీ ప్రభుత్వం సెన్సార్‌ బోర్డును కోరింది. ఈ సినిమాకు సర్టి ఫికెషన్‌ ఇచ్చేది తాను కాదనీ, రాష్ట్రంలో శాంతిభద్రతల పరిరక్షణకు విఘాతం కల్పించే ప్రతి చర్యను అడ్డుకుని తీరుతామని ఆ రాష్ట్ర సీఎం యోగి ఆదిత్యనాథ్‌ లేఖలో వెల్లడించారు. మరోవైపు పద్మావతి చిత్రం విడుదలయ్యే థియేటర్లకు రక్షణ కల్పిస్తామని మహారాష్ట్ర, కర్ణాటక ప్రభుత్వాలు ప్రకటించాయి. పద్మావతి విడుదలకు వ్యతిరేకంగా 10వేలమంది రక్తంతో కూడిన సంతకాల సేకరణ చేపడతామని, దీన్ని సెన్సార్‌ బోర్డుకు పంపిస్తామని ‘సర్వ బ్రాహ్మణ మహాసభ’ తెలిపింది. భన్సాలీ, దీపిక తలలు నరికి తెచ్చినవారికి రూ.5 కోట్ల బహుమానం ఇస్తానని మీరట్‌కు చెందిన ఠాకూర్‌ అభిషేక్‌ సోమ్‌ ప్రకటించారు.


 లేదంటే లేదంతే... రాణీ పద్మావతి, అల్లావుద్దీన్‌ ఖిల్జీ మధ్య ఒక్కటంటే ఒక్క సీన్‌ కూడా లేదు. సీనేంటి? పాటేసుకునే ప్లేస్‌ గానీ, డ్రీమ్స్‌లో రొమాన్స్‌ చేసే స్కోప్‌గానీ మా సినిమాలో లేవంటే లేవని ‘పద్మావతి’ చిత్రబృందం స్పష్టం చేసింది. ప్రముఖ దర్శకుడు సంజయ్‌లీలా భన్సాలీ తెరకెక్కిస్తున్న ‘పద్మావతి’ సినిమాలో చరిత్రను వక్రీకరిస్తున్నాంటూ ఆయనపై దాడి చేసిన సంగతి తెలిసిందే. ‘స్వాభిమానాన్ని కాపాడుకోవడానికి ఖిల్జీకి దక్కకుండా పద్మావతి ఆత్మహత్య చేసుకున్నారు’ అని మాలిక్‌ మహ్మద్‌ జయసీ అనే కవి చరిత్రలో పేర్కొంటే... ఖిల్జీతో పద్మావతి ప్రేమలో పడినట్టు భన్సాలీ చూపించబోతున్నారని ఆయనపై దాడి చేసిన రాజస్థాన్‌ హిందూసేనలు ఆరోపించాయి.
 ఈ దాడి తర్వాత ‘పద్మావతి’ షూటింగ్‌కి బ్రేక్‌ పడింది. త్వరలో మొదలు పెట్టాలనుకుంటున్నారు. మళ్లీ ఎవరైనా దాడి చేస్తే? భన్సాలీ చిత్ర బృందానికి ఇదే సందేహం వచ్చినట్టుంది. అందుకే  ‘‘చాలామంది ఊహిస్తున్నట్లు పద్మావతి, అల్లావుద్దీన్‌ ఖిల్జీ మధ్య ముద్దు సీన్లు లేవు. అసలు వాళ్ల మధ్య సీన్సే ఉండవు. రాజ్‌పుత్‌ల మనోభావాల్ని కించపరిచేలా భన్సాలీ ఎప్పుడూ ప్రవర్తించరు’’ అని యూనిట్‌ సభ్యులు స్పష్టం చేశారు. పద్మావతిగా దీపికా పదుకొనె, ఆమె భర్త రావల్‌రతన్‌ సింగ్‌గా షాహిద్‌ కపూర్, అల్లావుద్దీన్‌ ఖిల్జీగా రణవీర్‌ సింగ్‌ నటిస్తున్నారు.


 రాణీ పద్మావతి! అపురూప సౌందర్యవతి. రావల్‌ రతన్‌ సింగ్‌ భార్య. రతన్‌సింగ్‌ రాజపుత్రుడు. 1302–03లో మేవార్‌ చక్రవర్తి. అదే టైమ్‌లో ఢిల్లీ చక్రవర్తి అల్లా ఉద్దీన్‌ ఖిల్జీ. రాణీ పద్మావతి అందం గురించి విని ఉన్నాడు ఖిల్జీ. ఎలాగైనా ఆమెను తన సొంతం చేసుకోవాలనుకున్నాడు. మేవార్‌.. చిత్తోర్‌గఢ్‌ (ఇప్పటì  రాజస్థాన్‌) పరిధిలోకి వస్తుంది. చిత్తోర్‌గఢ్‌ను సొంత చేసుకుంటే మేవార్‌తో పాటు, పద్మావతీ తన సొంతం అవుతుంది. ఇదీ ఖిల్జీ ప్లాన్‌.
 
 ఈలోపు దేవ్‌పాల్‌ అనే సామంతరాజు సేమ్‌ ప్లాన్‌ వేశాడు. రాణీ పద్మావతికి కోసం రతన్‌సింగ్‌ని చంపేశాడు. ఆ గ్యాప్‌లో ఖిల్జీ కూడా తనను అపహరించేందుకు వచ్చేస్తున్నాడని తెలిసి రాణీ పద్మావతి, ఆమె చెలికత్తెలు మంటల్లో దూకి ఆత్మహత్య చేసుకున్నారు. నిజానికి.. పద్మావతిని పెళ్లి చేసుకోడానికి ముందు రతన్‌సింగ్‌ కూడా ఒక ఖిల్జీనే, ఒక దేవ్‌పాలే! ఆ అమ్మాయి సింహళదేశపు రాజపుత్రిక. సూపర్‌గా ఉంటుందని పెంపుడు చిలక ద్వారా తెలుసుకుని, ఆమె కోసం అన్వేషించి మరీ పట్టి తెచ్చుకున్నాడు! పట్టుపట్టి పెళ్లి చేసుకున్నాడు.
 
 ఈ స్టోరీ చరిత్రకారులెవ్వరికీ తెలీదు. చరిత్ర అయితే తెలిసి ఉండేది. ఇదొక ఫిక్షన్‌. మన బాలీవుడ్‌ డైరెక్టర్‌ సంజయ్‌లీలా బన్సాలీలాగే మాలిక్‌ మహ్మద్‌ జయసీ అనే కవి ఒకాయన ఉండేవాడు. 1540లో ఆయన దేవనాగరి భాషలో కొంచెం రియాల్టీని మిక్స్‌ చేసి ‘పద్మావతి’ అనే కావ్యఖండాన్ని సృష్టించాడు. ఆ సృష్టించడం కూడా డైరెక్టుగా ఖిల్జీ అని, పద్మావతి అని పేర్లు పెట్టకుండా సంకేతార్థాల్లో రాశాడు. ఎలాగంటే.. ‘మానవ దేహం’ అన్నాడు. అంటే చిత్తోర్‌గఢ్‌. ‘ఆత్మ’ అన్నాడు. అంటే రతన్‌సింగ్‌. ‘చిలక’ అన్నాడు. అంటే ఆధ్యాత్మిక గురువు. ‘వివేకం’ అన్నాడు. అంటే పద్మావతి. ‘భ్రాంతి’ అన్నాడు. అంటే అల్లావుద్దీన్‌ ఖిల్జీ. ఇలా అల్లిన కథంతా చాలా పొయెటిక్‌గా ఉంది. మహ్మద్‌ జయసీ తనకు రెండొందల ఏళ్లు ముందునాటి సంగతిని ఇలా ఊహించి రాస్తే, ఇప్పుడు బన్సాలీ తనకు ఐదొందల ఏళ్ల ముందునాటి మహ్మద్‌ జయసీ కావ్యాన్ని ‘కాస్త’ మార్చి సినిమాగా తీస్తున్నాడు.
 
 అయితే అది ‘కాస్త’ కాదు. ‘ఎక్స్‌ట్రా’ అని రాజస్థాన్‌లోని హిందూసేనల ఆరోపణ. ‘ఎక్స్‌ట్రా’లు చేస్తే ఊరుకునేది లేదని బన్సాలీకి ఆ సేనలు వార్నింగ్‌ కూడా ఇచ్చాయి. లాగిపెట్టి రెండు చెంపదెబ్బలు కూడా! జయసీ కావ్యంలో రాణీ పద్మావతి తన స్వాభిమానాన్ని కాపాడుకోడానికి ఖిల్జీకి దక్కకుండా ఆత్మాహుతి చేసుకుంటే.. ఇక్కడ బన్సాలీ సినిమాలో పద్మావతి ఖిల్జీతో ప్రేమలో పడుతుంది. అదీ మన వాళ్ల కోపం. సహజమే కదా.
 
 ఇదంతా ఇలా ఉంటే.. పద్మావతి కల్పిత పాత్ర అయినప్పుడు.. ఎలా తీస్తే ఏముందని ప్రొఫెసర్లు కొందరు వాదిస్తున్నారు. ఏళ్లుగా ఉన్న నమ్మకం.. అది కల్పితంలోంచి పుట్టినదే అయినా.. వాస్తవంగా స్థిరపడిపోయినప్పుడు వాదనలు పనిచేయవు. ప్రస్తుతానికైతే బన్సాలీ రాజస్థాన్‌ నుంచి బిచాణా ఎత్తేశాడు.