సాక్షి, బెంగళూరు: మైసూరులో ఎమ్మెల్యేపై హత్యాయత్నం జరిగింది. మాజీ మంత్రి, మైసూరు నగరంలోని నరసింహరాజ నియోజకవర్గం కాంగ్రెస్‌ ఎమ్మెల్యే తన్వీర్‌ శేఠ్‌ని ఆదివారం అర్ధరాత్రి ఫర్హాన్‌పాషా అనే వ్యక్తి కత్తితో పొడిచాడు. మైసూరులోని పంజినా మైదానంలో బంధువుల నిశ్చితార్థానికి ఎమ్మెల్యే హాజరైన సమయంలో గౌసియానగరకు చెందిన ఫర్హాన్‌పాషా ఆయన మెడపై కత్తితో దాడి చేశాడు. ఎమ్మెల్యే మెడ నుంచి ధారగా రక్తం కారింది. భద్రతా సిబ్బంది దుండగుడిని అడ్డుకున్నారు. గాయపడిన ఎమ్మెల్యేని సమీపంలోని ఓ కార్పొరేట్‌ ఆస్పత్రికి తరలించారు. ఆయనకు ప్రాణాపాయం లేదని వైద్యులు తెలిపారు.   ఉద్యోగం ఇప్పించలేదనే దాడి.. ఎమ్మెల్యేపై దాడి అనంతరం నిందితుడు పరారయ్యాడు. పోలీసులు గాలించి నిందితుడిని అదుపులోకి తీసుకున్నారు. ఎమ్మెల్యే తనకు ఉద్యోగం ఇప్పిస్తామని హామీ ఇచ్చి విస్మరించడంతో దాడి చేసినట్లు నిందితుడు చెప్పినట్లు సమాచారం. గత ఎన్నికల్లో ఫర్హాన్‌పాషా ఎస్‌డీపీఐ అనే పార్టీ తరఫున ప్రచారం చేశాడు. ఎమ్మెల్యేపై దాడి నేపథ్యంలో నగరంలో పోలీసులు బందోబస్తు పెంచారు. అల్లర్లు జరగకుండా పహారా కాస్తున్నారు. ఆస్పత్రిలో చికిత్స పొందుతున్న ఎమ్మెల్యేను పలువురు నాయకులు పరామర్శించారు. ఈ ఘటనపై సీఎం యడియూరప్ప దిగ్భ్రాంతి వ్యక్తంచేశారు.

సాక్షి, బెంగళూరు: అండర్‌ వరల్డ్‌ డాన్‌గా పేరు పొందిన రవి పూజారి నుంచి తనకు బెదిరింపు ఫోన్‌ కాల్‌ వచ్చిన మాట వాస్తవమేనని, అయితే ఇలాంటి బెదిరింపులకు తాను భయపడేది లేదని మంత్రి తన్వీర్‌ సేఠ్‌ అన్నారు. బుధవారం ఆయన మైసూరులోని తన నివాసంలో విలేకరులతో మాట్లాడారు. రవి పూజారి అనే వ్యక్తి ఫోన్‌ చేసి రూ. 10 కోట్లు ఇవ్వాలని డిమాండ్‌ చేశాడని, ఈ మేరకు ఒక మెసేజ్‌ కూడా వచ్చిందన్నారు. ఇప్పటికే ఈ విషయం హోం మంత్రికి, పోలీసు అధికారులకు ఫిర్యాదు చేశానని, సీఎం సిద్ధరామయ్య దృష్టికి కూడా తీసుకువెళ్తానన్నారు.


 బెంగళూరు: తలంపులు తెచ్చే పనిచేసి అడ్డంగా దొరికిపోయిన కర్ణాటక పాథమిక, మాధ్యమిక విద్యాశాఖ మంత్రి  తన్వీర్‌ సేఠ్‌ వ్యవహారంలో మరో విషయం వెలుగులోకి వచ్చింది. అధికారిక కార్యక్రమంలో ఉండగా మొబైల్‌ ఫోన్‌ లో బూతుబొమ్మలు చూస్తూ మంత్రి మీడియాకు చిక్కారు.
 
 అయితే ఆయన అంత ఆసక్తిగా వీక్షించిన ఫొటోలు అమెరికా నూతన అధ్యక్షుడిగా ఎన్నికైన డొనాల్డ్‌ ట్రంప్‌ సతీమణి మెలానియాకు చెందినవని వెల్లడైంది. మెలానియా మోడలింగ్‌ చేసినప్పటి ఫొటోలను చూస్తూ తన్వీర్‌ సేఠ్‌ కెమెరా కంటపడడంతో ఆయనపై విమర్శలు చెలరేగాయి. ట్రంప్‌ విజయం సాధించడంతో మెలానియా పాత ఫొటోలు సామాజిక మాధ్యమాల్లో విరివిరిగా పోస్ట్‌ అవుతున్నాయి. ట్రంప్‌ ను​ పెళ్లాడకముందు మెలానియా మోడలింగ్‌ చేశారు.
 
 తన్వీర్‌ సేఠ్‌ తన మొబైల్‌ ఫోన్‌ లో మెలానియా ఫొటోలు ఉన్నట్టు పోలీసులు వెల్లడించారని ’టైమ్స్‌ ఆఫ్ ఇండియా’  తెలిపింది. ఈ తతంగాన్ని చిత్రీకరించిన జర్నలిస్ట్తో పాటు కెమెరామెన్పై మంత్రి తన్వీర్‌ సేఠ్‌ పోలీసులకు ఫిర్యాదు చేశారు. మరోవైపు తన్వీర్‌ సేఠ్‌ ను కర్ణాటక సీఎం సిద్దరామయ్య, పీసీసీ అధ్యక్షుడు పరమేశ్వర వివరణ అడిగారు.


 బెంగళూరు: మొబైల్‌లో అశ్లీల చిత్రాలను చూస్తూ అడ్డంగా మీడియాకు దొరికిపోయిన కర్ణాటక ప్రాథమిక శాఖమంత్రి తన్వీర్ సేఠ్‌ వ్యవహారంలో మరో ట్విస్ట్ చోటుచేసుకుంది. ఈ తతంగాన్ని చిత్రీకరించిన జర్నలిస్ట్తో పాటు కెమెరామెన్పై మంత్రి పోలీసులకు ఫిర్యాదు చేశారు. కాగా ఈ ఫిర్యాదుపై ఓ సీనియర్ పోలీస్ అధికారి మాట్లాడుతూ ఐపీసీ సెక్షన్ 504 కింద టీవీ రిపోర్టర్, కెమెరామెన్ పై కేసు నమోదు చేసినట్లు తెలిపారు.
 
 మరోవైపు ఈ వ్యవహారానికి సంబంధించి కర్ణాటక ముఖ్యమంత్రి సిద్ధరామయ్య మాట్లాడుతూ... మొదట నివేదికను పరిశీలించాక దీనిపై విచారణ జరిపించి అనంతరం చర్య తీసుకుంటామన్నారు. అశ్లీల దృశ్యాల వీక్షణపై మంత్రితో మాట్లాడానని, తాను ఏ తప్పు చేయలేదని తన్వీర్ సేఠ్‌ తనతో చెప్పారని ఆయన తెలిపారు. ఒకవేళ తప్పు జరిగితే అది ఎవరు చేసినా తప్పు తప్పేనని సిద్ధరామయ్య అన్నారు. కాగా రాయ్‌చూర్ జిల్లాలో నిర్వహించిన టిప్పుసుల్తాన్ జయంతి సందర్భంగా  గురువారం మంత్రి తన్వీర్ సేఠ్ సెల్‌ఫోన్‌లో అశ్లీల దృశ్యాలు వీక్షిస్తూ మీడియాకు దొరికిపోయిన విషయం తెలిసిందే.
 దీంతో తన్వీర్ మంత్రిపదవికి రాజీనామా చేయాలని డిమాండ్ చేస్తూ.... బీజేపీతో పాటు జేడీఎస్ నాయకులు ఆందోళన చేపట్టారు.  అయితే తాను ఏ తప్పు చేయలేదని, తాను అమాయకుడినని చెప్పుకొచ్చారు. ఏ తప్పు చేయనప్పుడు రాజీనామా చేయవలసిన అవసరం ఏముంటుందని, మంత్రి పదవికి రాజీనామా చేసే ప్రసక్తే లేదని తన్వీర్ తేల్చిచెప్పారు.
 అలాగే ఈ ఘటనపై మాజీ ప్రధాని దేవగౌడ స్పందిస్తూ... తన్వీర్ వ్యవహారంలో ముఖ్యమంత్రి జాగ్రత్తగా వ్యవహరించాలన్నారు. మొబైల్ లో అభ్యంతరకర ఫోటోలు చూస్తు దొరికిపోయిన మంత్రికి క్లీన్ చిట్ ఇవ్వడం సరికాదని, దీనిపై విచారణకు ఆదేశించాలని ఆయన డిమాండ్ చేశారు.


 బెంగళూరు: కర్ణాటక పాథమిక, మాధ్యమిక విద్యాశాఖ మంత్రి మంత్రి తన్వీర్‌ సేఠ్‌ తలంపులు తెచ్చే పనిచేసి అడ్డంగా దొరికిపోయారు. మొబైల్‌ ఫోన్‌ లో నీలిచిత్రాలు చూస్తూ మీడియా కంటపడ్డారు. టిప్పు జయంతి సందర్భంగా గురువారం రాయచూరలో నిర్వహించిన కార్యక్రమంలో ఆయన ఈ ఘనకార్యం చేశారు. ఈ విషయం అన్ని వార్తా చానళ్లలో ప్రసారం కావడంతో సిద్ధరామయ్య సర్కారు ఇరకాటంలో పడింది.
 
 తన చర్యను తన్వీర్‌ సేఠ్‌ సమర్థించుకున్నారు. ‘తను ఇల్లు విడిచి మూడు నెలలు అయింద’ని నిసిగ్గుగా సమాధానం ఇచ్చారు. తర్వాత మాట మార్చారు. మైసూరుకు చెందిన తాను అక్కడ జరిగిన టిప్పు కార్యక్రమాలకు సంబంధించిన వీడియో చూసినట్టు బుకాయించారు. ఈ విషయంపై సీఎం సిద్ధరామయ్య, హోంమంత్రి పరమేశ్వర్‌ మీడియాతో మాట్లాడుతూ పూర్తి సమాచారం తెలుసుకుని నిర్ణయం తీసుకుంటామన్నారు. తన్వీర్‌ సేఠ్‌ వ్యవహారంపై సిద్ధరామయ్యను రాష్ట్ర కాంగ్రెస్‌ వ్యవహారాల ఇంచార్జి దిగ్విజయ్ సింగ్ నివేదిక అడినట్టు సమాచారం.
 
 కాగా, రాయచూర నుంచి కలబుర్గి జిల్లా చించోళి వద్ద జరగనున్న ఆధ్యాత్మిక కార్యక్రమానికి వెళుతున్న తన్వీర్ సేఠ్‌ ను బీజేపీ కార్యకర్తలు ఘోరావ్‌ చేశారు. వెంటనే మంత్రి పదవికి రాజీనామా చేయాలని డిమాండ్‌ చేశారు.