తెలంగాణకు కట్టుబడి ఉన్నా... ఏకపక్ష విభజన సరికాదు
 రాజధాని ఉన్న ప్రాంతం విడిపోవడం గతంలో లేదు
 రాజధానికి నాలుగైదు లక్షల కోట్లు కావాలంటే దిగ్విజయ్ అపహాస్యం చేశారు
 లబ్ధిదారులతో చర్చించనందువల్లే ఉద్యమం
  
  సాక్షి, హైదరాబాద్: ప్రత్యేక తెలంగాణ రాష్ర్ట ఏర్పాటుకు అనుకూలంగా కేంద్ర ప్రభుత్వానికి రాసిన లేఖకు కట్టుబడి ఉన్నానని తెలుగుదే శం అధ్యక్షుడు నారా చంద్రబాబు నాయుడు చెప్పారు. అందులో వెనకడుగు వేసేది లేదన్నారు. అయితే కాంగ్రెస్ పార్టీ రాజకీయ ప్రయోజనాలతో ఏకపక్షంగా రాష్ర్ట విభజన నిర్ణయం తీసుకోవటం సరికాదని విమర్శిస్తూనే.. మళ్లీ దేశ చరిత్రలో రాజధానిగా ఉన్న ప్రాంతం రాష్ర్టం నుంచి విడిపోతామని ఎపుడూ చెప్పలేదని గందరగోళం సృష్టించారు. ఆయన మంగళవారం తన నివాసంలో దాదాపు గంటకుపైగా విలేకరులను ఉద్దేశించి ప్రసంగించారు. గ త వారం ముఖ్యమంత్రి కిరణ్‌కుమార్‌రెడ్డి విలేకరుల సమావేశంలో మాట్లాడగా... ఆ మరుసటి రోజే చంద్రబాబు రాష్ర్ట విభజన అంశంపై ప్రధానికి లేఖ రాసిన విషయం తెలిసిందే.
  
 రాష్ట్రం అభివృద్ధి పథంలో నడుస్తోందని సోమవారం సీఎం విలేకరుల సమావేశంలో చెప్పగా, తమ హయాంలోనే రాష్ట్రం అభివృద్ధి సాధించిందని మంగళవారం చంద్రబాబు చెప్పారు. కాంగ్రెస్ రాష్ట్ర వ్యవహారాల ఇంచార్జీ దిగ్విజయ్‌సింగ్ రోజూ మీడియాతో మాట్లాడుతున్నారని, ఇకనుంచి తానూ రోజూ అంతకంటే ఎక్కువ మాట్లాడుతానని ప్రకటించారు. సమావేశంలో ప్రశ్నలకు సూటిగా సమాధానమివ్వకుండా దాటవేశారు. తాను రాజకీయం కోసం మాట్లాడటం లేదంటూ సుదీర్ఘ ఉపన్యాసాలిచ్చారు. ఆంధ్రప్రదేశ్ రాష్ర్టం నూతన రాజధాని ఏర్పాటు చేసుకోవటానికి నాలుగైదు లక్షల కోట్లు  అవసరమవుతాయని, ఆ మొత్తాన్ని కేంద్రమే భరించాలని తాను డిమాండ్ చేస్తే  దిగ్విజయ్ సింగ్ అపహాస్యం చేయటంతో పాటు అంత అవసరం లేదని చెప్పటం విడ్డూరంగా ఉందన్నారు. నూతన రాజధాని నిర్మాణం అంటే సచివాలయం, డెరైక్టరేట్లు ఏర్పాటు చేసుకుంటే సరిపోదన్నారు. వాన్‌పిక్ కోసం 30 వేల ఎకరాలు అవసరమైనప్పుడు రాష్ట్ర రాజధాని ఏర్పాటుకు 3 వేల ఎకరాలు సరిపోతుందా అని ప్రశ్నించారు.
  
  చర్చించకుండా రాష్ట్రం ప్రకటిస్తారా?: కాంగ్రెస్ పార్టీ లబ్ధిదారులతో చర్చించకుండా రాష్ర్టం ప్రకటించినందువల్లే సీమాంధ్ర ప్రాంతంలో ఉద్యమం జరుగుతోందని చంద్రబాబు చెప్పారు. అందుకోసం జాతీయ, ప్రాంతీయ పార్టీలతో కమిటీని వేయాలని డిమాండ్ చేశారు. ఏఐసీసీ నియమించిన రక్షణ మంత్రి ఏకే ఆంటోనీ నేతృత్వంలోని కమిటీ ముందు తాము వాదనలు వినిపించబోమన్నారు.
  
   హైదరాబాద్ విషయంలో స్పష్టత ఇవ్వకపోవటం దారుణమని విమర్శించారు.  నిజాం రాజులు హైదరాబాద్‌లో  ప్యాలెస్‌లు నిర్మిస్తే, తన హయాంలో ఆర్థిక, వ్యాపార పరమైన సంస్థలు వచ్చాయన్నారు. బీజేపీతో పొత్తు అంశంపై మాట్లాడేందుకు ఇది సమయం కాదన్నారు. రాజ్యసభలో చర్చ సందర్భంగా కేంద్ర ఆర్థిక మంత్రి చిదంబరం వ్యవహరించిన తీరును తప్పుపట్టారు. రాష్ట్ర విభజన విషయంలో ఏమైనా కసరత్తు చేశారా అంటే శ్రీకృష్ణ కమిటీని నియమించామని చెప్పటం సరికాదన్నారు. గతంలో ఆంధ్రప్రదేశ్‌ను ఏర్పాటు చేసేటపుడు, ఆ తరువాత తెలంగాణ ఉద్యమం వచ్చినపుడు అప్పటి ప్రధానులు  నెహ్రూ, ఇందిరాగాంధీ రాష్ట్రానికి వచ్చి మాట్లాడి వెళ్లారని, ప్రస్తుత ప్రధాని ఆ పని ఎందుకు చేయటం లేదని ప్రశ్నించారు. గంటకుపైగా ఆయన విలేకరులతో మాట్లాడినా ఏ విషయం స్పష్టంగా చెప్పకుండా అంతా గందరగోళం చేశారని ఆ తర్వాత పార్టీ నేతలు వ్యాఖ్యానించారు.


 సాక్షి, హైదరాబాద్/ ఢిల్లీ: తెలంగాణ రాష్ట్ర ఏర్పాటు ప్రక్రియ తెలంగాణ రాష్ట్ర సమితి మెడమీద కత్తిలా మారింది. పార్టీ నుంచి నాయకులు ఒక్కొక్కరుగా బయటకు వెళ్లిపోతుండటం, అలాంటి నేతలతో కాంగ్రెస్ రాష్ట్ర వ్యవహారాల ఇన్‌చార్జి దిగ్విజయ్‌సింగ్ నేరుగా సంప్రదింపులు జరుపుతుండటం వంటి పరిణామాలు టీఆర్‌ఎస్ నాయకత్వానికి అంతుచిక్కడం లేదు. విభజించు-పాలించు అన్న రాజకీయ వ్యూహంతో కాంగ్రెస్ పనిచేస్తోందని టీఆర్‌ఎస్ నేతలు అంచనాకొచ్చారు. మొన్న మెదక్ ఎంపీ విజయశాంతి, నేడు మాజీ మంత్రులు డాక్టర్ జి.విజయ రామారావు, డాక్టర్ ఎ.చంద్రశేఖర్ టీఆర్‌ఎస్‌ను వీడి కాంగ్రెస్‌లో చేరడానికి రంగం సిద్ధమైంది.
  
  తెలంగాణ విభజన ప్రక్రియ లేదా టీఆర్‌ఎస్ విలీనం గురించి టీఆర్‌ఎస్ అధినేత కె.చంద్రశేఖర్‌రావుతో ఇప్పటివరకు కాంగ్రెస్ అధిష్టానం వైపునుంచి అధికారికంగా ఎవరూ చర్చలు జరపడం లేదు. దీంతో టీఆర్‌ఎస్ శ్రేణుల్లో అయోమయం మొదలైంది. టీఆర్‌ఎస్ విలీనం ఉంటుందా? ప్రత్యేక రాష్ట్రంలోనూ టీఆర్‌ఎస్ రాజకీయ పార్టీగా మనుగడ సాగిస్తుందా? విలీనం చేయకుంటే ఎన్ని స్థానాల్లో టీఆర్‌ఎస్ గెలుస్తుంది? ఇప్పటిదాకా తెలంగాణవాదంతోనే పలు విజయాలు సాధించిన టీఆర్‌ఎస్ ఫక్తు రాజకీయ పార్టీగా ఎలాంటి ఫలితాలు సాధిస్తుంది? విలీనం కాకుండా జరిగే పరిణామాల్లో కాంగ్రెస్ పరిస్థితి ఏంటి? వంటి అనేక అంశాలపై టీఆర్‌ఎస్ శ్రేణుల్లో చర్చోపచర్చలు జరుగుతున్నాయి.
  
   టీఆర్‌ఎస్‌ను రాజకీయంగా బలహీనం చేసే ఎత్తుగడలో కాంగ్రెస్ పార్టీ పనిచేస్తోందన్న అభిప్రాయం బలంగా వినిపిస్తోంది. టీఆర్‌ఎస్‌ను విలీనం చేసుకుంటామని చెప్తూనే మరోవైపు ఆ పార్టీ ముఖ్యనేతలతోనూ, ఎమ్మెల్యేలతోనూ అధిష్టాన ముఖ్యులే నేరుగా చర్చలు జరుపుతుండటం టీఆర్‌ఎస్ నేతలకు మింగుడుపడటం లేదు. కాంగ్రెస్‌లో విలీనం చేయడానికి ముందు టీఆర్‌ఎస్‌కు, కేసీఆర్‌కు స్వంతంగా బేరం చేసుకునే శక్తిని తగ్గించడానికి కాంగ్రెస్ ఈ రకమైన వ్యూహంతో వెళుతోందని టీఆర్‌ఎస్ నేతలు భావిస్తున్నారు. మరింత మంది ఎమ్మెల్యేలు, ముఖ్య నాయకులు కూడా కాంగ్రెస్‌లోని వివిధ స్థాయి నాయకులతో మంతనాలు జరుపుతున్నట్టుగా వస్తున్న వార్తలు కేసీఆర్‌ను కూడా కలవరపరుస్తున్నట్టుగా సమాచారం.
  
  దిగ్విజయ్‌తో టీఆర్‌ఎస్ నేతల భేటీ
  కాంగ్రెస్ వ్యవహారాల ఇన్‌చార్జి దిగ్విజయ్‌సింగ్‌తో సోమవారం రాత్రి పలువురు టీఆర్‌ఎస్ నేతలు భేటీ అయ్యారు. గతంలో అసెంబ్లీలో టీఆర్‌ఎస్ ఫ్లోర్ లీడర్‌గా పనిచేసిన జి.విజయరామారావుతో పాటు ఆ పార్టీ మాజీ ఎమ్మెల్యేలు ఎ.చంద్రశేఖర్, సోయం బాబూరావులు దిగ్విజయ్‌ను ఆయన నివాసంలో కలుసుకున్నారు. వీరితో పాటు మరో ఇద్దరు నేతలు సైతం దిగ్విజయ్‌ను కలిశారని తెలుస్తున్నా వారెవరనేది తె లియరాలేదు. సుమారు అరగంట పాటు భేటీ అయిన నేతలు కాంగ్రెస్‌లో చేరే విషయమై ఆయనతో మంతనాలు జరిపినట్లు తెలుస్తోంది. తెలంగాణ ఏర్పాటు ప్రక్రియను పూర్తిచేస్తే మరికొందరు టీఆర్‌ఎస్ ఎమ్మెల్యేలు కాంగ్రెస్‌లో చేరేందుకు సిద్ధంగా ఉన్నారని టీఆర్‌ఎస్ నేతలు దిగ్విజయ్‌కు స్పష్టం చేసినట్లుగా చెబుతున్నారు. అయితే ఈ భేటీ అనంతరం నేతలెవరూ మీడియాకు అందుబాటులోకి రాలేదు. టీఆర్‌ఎల్‌డీ నేత కపిలవాయి దిలీప్‌కుమార్ నేతృత్వంలో ఈ భేటీ జరిగినట్లు తెలుస్తోంది.
  
  కేటీఆర్, హరీష్‌రావు కూడా మిగలరు: ఎమ్మెల్సీ దిలీప్‌కుమార్
  తెలంగాణ ఏర్పాటైన తర్వాత కూడా కాంగ్రెస్‌లో టీఆర్‌ఎస్‌ను ఎందుకు విలీనం చేయడం లేదని ఎమ్మెల్సీ కె.దిలీప్‌కుమార్ ప్రశ్నించారు. ఢిల్లీలో ఉన్న దిలీప్‌కుమార్ ‘సాక్షి ప్రతినిధి’తో ఫోనులో మాట్లాడుతూ టీఆర్‌ఎస్‌ను విలీనం చేయడానికి ఇంకా ఆలస్యం చేస్తే పార్టీ ఉనికికే ప్రమాదమని హెచ్చరించారు. ‘‘టీఆర్‌ఎస్‌ను విలీనం చేయకుండా ఉంటే కేసీఆర్‌తో ఎవరూ ఉండరు. కేసీఆర్ కుమారుడు కేటీఆర్, మేనల్లుడు హరీష్‌రావు కూడా టీఆర్‌ఎస్‌లో ఉండరు. ఢిల్లీ స్థాయిలో నాకున్న సంబంధాలు తెలిసిన టీఆర్‌ఎస్ నేతలు చాలామంది నాతో మాట్లాడుతున్నరు. ఇప్పటికే ఎనిమిది మంది ఎమ్మెల్యేలు నాతో మాట్లాడారు. కాంగ్రెస్ ముఖ్యులను కలిసి, పార్టీలో చేరుతామని అంటున్నరు. టీఆర్‌ఎస్‌పై ఉన్న గౌరవంతోనే ఆగుతున్నా. ఇంకా ఆలస్యం చేస్తే కేసీఆర్ తప్ప ఎవరూ టీఆర్‌ఎస్‌లో ఉండరు. టీడీపీ ఎమ్మెల్యేలు ముగ్గురు కాంగ్రెస్‌లో త్వరలోనే చేరుతున్నరు. కాంగ్రెస్ నేతలతో వారిని మాట్లాడిస్తున్న. టీఆర్‌ఎస్‌ను విలీనం చేయకుంటే ఆ పార్టీ ఎమ్మెల్యేలను కూడా కాంగ్రెస్‌తో మాట్లాడిస్తా’’ అని దిలీప్‌కుమార్ హెచ్చరించారు.  
  
  అత్యంత బలమైన శక్తిగా కాంగ్రెస్: విజయశాంతి
  ఒంటరిగా పోటీచేస్తే టీఆర్‌ఎస్‌కు 2014లో జరిగే ఎన్నికల్లో 10 - 12 సీట్లు దాటవని ఆ పార్టీ సస్పెన్షన్‌కు గురైన ఎంపీ ఎం.విజయశాంతి వ్యాఖ్యానించారు. హైదరాబాద్‌లోని విజయశాంతి నివాసంలో సోమవారం కలిసిన మీడియా ప్రతినిధులతో ఆమె మాట్లాడుతూ తెలంగాణలో రాజకీయంగా అత్యంత బలమైన రాజకీయ శక్తిగా కాంగ్రెస్ అవతరిస్తుందని చెప్పారు. తెలంగాణను ఇచ్చిన కాంగ్రెస్‌వైపే ప్రజలుంటారని, కాంగ్రెస్‌కు 80 స్థానాలు దాటుతాయని అభిప్రాయపడ్డారు. తెలంగాణలో ప్రభుత్వాన్ని కాంగ్రెస్సే ఏర్పాటుచేస్తుందని ప్రకటించారు. కాంగ్రెస్‌లో టీఆర్‌ఎస్ విలీనంపై స్పందించేందుకు నిరాకరించారు. టీఆర్‌ఎస్ నుండి ఇంకా షోకాజ్ నోటీసు అందలేదన్నారు. నోటీసు అందిన తర్వాత అందులో ప్రస్తావించిన అంశాలపై మాట్లాడతానని చెప్పారు. రాజకీయ భవిష్యత్తుపైనా అప్పుడే మాట్లాడుతానని తెలిపారు. కేసీఆర్ ఒక్కడితోనే తెలంగాణ రాలేదని, ఆయనొక్కడే క్రెడిట్ తీసుకుంటానంటే ఎవరూ అంగీకరించరని చెప్పారు. తెలంగాణకోసం ఎంతోమంది పోరాడితే వారిలో కేసీఆర్ కూడా ఒక్కరని విజయశాంతి వ్యాఖ్యానించారు. అసెంబ్లీకి పోటీచేయాలా, పార్లమెంటుకు పోటీ చేయాలా అనేది తర్వాత నిర్ణయించుకుంటానని చెప్పారు.