తగరపువలస(భీమిలి): అంగరంగ వైభవంగా జరుగుతున్న భీమిలి ఉత్సవాలను చూస్తుంటే రెండు నెలల ముందే ఇక్కడి ప్రజలకు సంక్రాంతి వచ్చినట్టుందని రాష్ట్ర దేవదాయశాఖ మంత్రి వెలంపల్లి శ్రీనివాసరావు అన్నారు. శనివారం ఆయన తగరపువలసలో జ్యోతి ప్రజ్వలన చేసి బెలూన్లు ఎగురవేసి భీమిలి ఉత్సవాలను ప్రారంభించారు. ఈ సందర్భంగా ఆయన  మాట్లాడుతూ వైఎస్సార్‌సీపీ అదికారంలోకి వచ్చిన తరువాత ముఖ్యమంత్రి వై.ఎస్‌.జగన్‌మోహన్‌రెడ్డి, పర్యాటకశాఖ మంత్రి ముత్తంశెట్టి శ్రీనివాసరావు మనస్పూర్తిగా జరుపుతున్న ఉత్సవాలు ఇవి అని అన్నారు.  విశాఖ పార్లమెంట్‌ సభ్యుడు ఎం.వి.వి.సత్యనారాయణ మాట్లాడుతూ మంత్రి ముత్తంశెట్టి శ్రీనివాసరావు హయాంలో భీమిలి అభివృద్ధి చెందుతుందన్నారు.  రాష్ట్ర పర్యాటకశాఖ మంత్రి ముత్తంశెట్టి శ్రీనివాసరావు మాట్లాడుతూ విశాఖ, విజయనగరం పట్టణాల మద్య ఉన్న భీమిలిలో అతి పురాతన ఆలయాలతో బౌద్ధమతం విలసిల్లిన ప్రాంతమన్నారు. జిల్లాలో టూరిస్ట్‌లపై అరాచకాలు తగ్గించడానికి గాను టూరిస్ట్‌ పోలీస్‌ స్టేషన్‌ ఏర్పాటుకు సహకరించాలని సీపీ ఆర్కే మీనా, కలెక్టరు వినయ్‌చంద్‌లను కోరారు.  వీఎంఆర్‌డీఏ చైర్మన్‌ ద్రోణంరాజు శ్రీనివాస్‌ మాట్లాడుతూ దేశంలో రెండో మున్సిపాల్టీ అయిన భీమిలిలో జిల్లా అవసరాలకు కావలసిన ల్యాండ్‌ బ్యాంక్‌ ఉందన్నారు. జిల్లా అభివృద్ధికి ముఖ్యమంత్రి వై.ఎస్‌.జగన్‌మోహన్‌రెడ్డి, ఇంచార్జ్‌ మంత్రి కురసాల కన్నబాబు, జిల్లా మంత్రి ముత్తంశెట్టి శ్రీనివాసరావులు కంకణబద్ధులై ఉన్నారన్నారు. అధికారభాషా సంఘం అధ్యక్షుడు యార్లగడ్డ లక్ష్మీప్రసాద్‌ మాట్లాడుతూ ముఖ్యమంత్రి వై.ఎస్‌.జగన్‌మోహన్‌రెడ్డి ప్రతినెలా రాష్ట్రంలో కొండవీటి, విజయవాడ వంటి ఉత్సవాలు చేయాలని సూచిస్తే మంత్రి ముత్తంశెట్టి శ్రీనివాసరావు ముందుగా భీమిలి ప్రజలకు అవకాశం కలి్పంచారన్నారు. పాయకరావుపేట ఎమ్మెల్యే గొల్ల బాబూరావు మాట్లాడుతూ అత్యంత సుందరమైన భీమిలికి పండగ వచ్చిందన్నారు. పర్యాటకశాఖ ప్రిన్సిపల్‌ సెక్రటరీ ప్రవీణ్‌కుమార్‌ మాట్లాడుతూ రాష్ట్రంలో తూర్పుగోదావరిపులసకు,  నెల్లూరు ఫ్లెమింగ్‌ పక్షలకు, ఒంగోలు గిత్తలకు, కాకినాడ కాజాకు, అరకు కాఫీ, నర్సాపూర్‌ లేస్‌లు ఇలా కలంకారి, సిల్‌్క, కూచిపూడి వంటివి ప్రఖ్యాతమైనవి ఉన్నాయన్నారు. కలెక్టరు విజయ్‌చంద్‌ మాట్లాడుతూ మంత్రి ముత్తంశెట్టి శ్రీనివాసరావు భీమిలి ఉత్సవాల మాదిరిగానే రానున్న 6,7 నెలల్లో అరకు, విశాఖ ఉత్సవాలు విజయవంతం చేయాలని కోరారు. వేడుకలలో వైఎస్సార్‌సీపీ జిల్లా అధ్యక్షుడు వంశీకృష్ణ శ్రీనివాస్‌ అనకాపల్లి, విజయనగరం ఎంపీలు భీశెట్టి సత్యవతి, బెల్లాన చంద్రశేఖర్, నెల్లిమర్ల, గజపతినగరం ఎమ్మెల్యేలు బడుకొండ అప్పలనాయుడు, బొత్స అప్పలనరసయ్య, మాజీ ఎమ్మెల్యే మళ్ల విజయప్రసాద్, రాష్ట్ర నాయకులు కొయ్యప్రసాదరెడ్డి, రొంగలి జగన్నాథం,  నగర మహిళ అధ్యక్షురాలు గరికిన గౌరి తదితరులు పాల్గొన్నారు. 


 మాజీ కేంద్ర మంత్రి బోళ్ల బుల్లి రామయ్య 
 ముగిసిన శతాబ్ది ఉత్సవాలు 
 రాజోలు : చదువుకున్న బడి కన్నతల్లి వంటిదని కేంద్ర మాజీ మంత్రి బోళ్ల బుల్లిరామయ్య అన్నారు. స్థానిక బాలుర ఉన్నత పాఠశాలలో నిర్వహిస్తున్న శతాబ్ది ఉత్సవాల ముగింపు సందర్భంగా ఆదివారం నిర్వహించి సమావేశంలో ఆయన ముఖ్యఅతిథిగా పాల్గొన్నారు. పాఠశాలలో  చదువుకున్న రోజులను ఈ సందర్భంగా ఆయన గుర్తు చేసుకున్నారు. కన్నతల్లిని, చదువుకున్న పాఠశాలను ఎవరూ మర్చిపోవద్దన్నారు. చదువుకున్న స్నేహితులను కలవడం సంతోషంగా ఉందన్నారు. ఎమ్మెల్యే గొల్లపల్లి సూర్యారావు అధ్యక్షతన నిర్వహించిన ఈ కార్యక్రమంలో బుల్లిరామయ్యను సత్కరించారు. ఉత్సవాలకు వచ్చిన పూర్వ విద్యార్థులకు భోజన సదుపాయం కల్పించిన ఆయనకు ఎమ్మెల్యే కృతజ్ఞతలు తెలిపారు. ఎమ్మెల్యే సూర్యారావు మాట్లాడుతూ ఈ ఉత్సవాలు నిర్వహించే అవకాశం రావడం ఆనందంగా ఉందన్నారు. వందేళ్ల చరిత్ర కలిగిన ఈ పాఠశాలకు హెచ్‌ఎంలుగా పనిచేసిన వారితోపాటు, రిటైర్డ్‌ ఉపాధ్యాయులు, ప్రస్తుత ఉపాధ్యాయులను  సత్కరించారు.
 చదువుకున్న రోజులు తిరిగిరావు : దర్శకుడు సుకుమార్‌ 
 చిన్నతనంలో ప్రాథమిక, ఉన్నత పాఠశాలల్లో చదువుకున్న రోజులు తిరిగిరావని ప్రముఖ దర్శకుడు సుకుమార్‌ అన్నారు. నాటి జ్ఞాపకాలు తీపిగుర్తులుగా నిలిచిపోతాయన్నారు. పూర్వపు రోజులే మంచివని, ప్రస్తుతం బిజీ జీవితాలతో పిల్లలతో గడపలేకపోతున్నారన్నారు. ఉత్సవాలకు విచ్చేసిన  స్నేహితులతో ఆయన గడిపారు. తనకు విద్య నేర్పిన మద్దుల రాధాకృష్ణ, సోమయాజులు మాస్టార్లను సుకుమార్‌ సత్కరించారు. అనంతరం సుకుమార్‌ను ఉత్సవ కమిటీ  సత్కరించింది. 
 రాజోలు అంటే అభిమానం : సినీ నటి హేమ 
 పుట్టిన పెరిగిన రాజోలు అంటే  అభిమానమని సినీ నటి హేమ అన్నారు. ఈఉత్సవాలకు ఆమె కుటుంబ సభ్యులతో సహ వచ్చారు. పిల్లలను బాగా చదివించాలని తల్లిదండ్రులకు సూచించారు. వారికి ఇబ్బందులు వస్తే అండగా నిలుస్తాన్నారు. ఉత్సవాలకు విచ్చేసిన హేమను ఉత్సవ కమిటీ సత్కరించింది. 


 గురుశిష్యుల అనుబంధం పెరగాలి 
 డిప్యూటీ సీఎం చినరాజప్ప
 వైభవంగా శతాబ్ది ఉత్సవాలు ప్రారంభం
 పూర్వ విద్యార్థులకు సత్కారం
 రాజోలు : విద్యార్థులకు మంచి నడవడి అలవర్చి వారిని మహోన్నతులుగా తీర్చిదిద్దాలని తద్వారా గురు శిష్యుల మధ్య అనుబంధం బలపడుతుందని డిప్యూటీ సీఎం నిమ్మకాయల చినరాజప్ప పేర్కొన్నారు. శనివారం రాజోలు బాలుర ఉన్నత పాఠశాల శతాబ్ది ఉత్సవాల్లో ఆయన ముఖ్యఅతిథిగా పాల్గొని ప్రసంగించారు. రాజోలు ఎమ్మెల్యే గొల్లపల్లి సూర్యారావు అధ్యక్షతన డిప్యూటీ సీఎం చినరాజప్ప, జెడ్పీ చైర్మన్‌ నామన రాంబాబు జ్యోతిప్రజ్వలన చేసి ఉత్సవాలను ప్రారంభించారు. తొలుత కూర్మా నరసింహారావు దంపతులు శంఖాన్ని పూరించి ఉత్సవాలకు స్వాగతం పలికారు. రాజప్ప మాట్లాడుతూ కార్పొరేట్‌ సంస్థల రాకతో విద్యా వ్యవస్థ పూర్తిగా చిన్నాభిన్న మైందన్నారు. తాము చదువుకునే రోజుల్లో ప్రభుత్వ పాఠశాలలే కీలకంగా నిలిచాయన్నారు. 50 ఏళ్ల క్రితం ఉన్న గురుశిష్యుల అనుబంధం ఇప్పుడు కనిపించడం లేదన్నారు. గురు శిష్యుల మధ్య ప్రేమానురాగాలు పెంచాలన్నారు. గతంలో వార్షికోత్సవాలు నిర్వహించేవారని ప్రస్తుతం ఆ సంస్కృతి పూర్తిగా తగ్గిపోయిందన్నారు. ‘నేను’ అని స్వార్థం చూపకుండా ‘మన సమాజం’ అనే భావన అందరిలో కలిగినప్పుడే అభివృద్ధి జరుగుతుందన్నారు. జెడ్పీ చైర్మన్‌ నామన రాంబాబు మాట్లాడుతూ ఎంతో మంది బాలుర ఉన్నత పాఠశాలలో చదివి ఉన్నత శిఖరాలకు చేరుకున్నారన్నారు. సుదూర ప్రాంతాల నుంచి పూర్వ విద్యార్థులు శతాబ్ది ఉత్సవాలకు రావడం సంతోషంగా ఉందన్నారు. సినీనటి హేమ మాట్లాడుతూ చదువును మధ్యలో ఆపకుండా ప్రతి ఒక్కరూ కనీసం డిగ్రీ వరకు చదువుకోవాలన్నారు. తొలుత ఎమ్మెల్యే సూర్యారావు జాతీయ, పాఠశాల పతాకాలను ఆవిష్కరించారు. పాఠశాల ఆవరణలో ఏర్పాటు చేసిన శతాబ్ది ఉత్సవ స్థూపం ఆవిష్కరించారు. రూ.32.50 లక్షలతో శతాబ్ది భవన విభాగం పనులకు శంకుస్థాపన చేశారు. 
 ‘శతాబ్ది శార్వాణి’ ఆవిష్కరణ 
 డిప్యూటీ సీఎం చినరాజప్ప, జెడ్పీ చైర్మన్‌ రాంబాబులు ‘శతాబ్ది శార్వాణి’ సంచికను ఆవిష్కరించారు. ఉత్సవాలను పురస్కరించుకుని జబర్దస్త్‌ టీం కామెడీ షో, వై.రామ్మోహనరావు మ్యాజిక్‌ షో, పాఠశాల విద్యార్థుల నృత్య ప్రదర్శనలు ఆకట్టుకున్నాయి. సీనియర్‌ పూర్వ విద్యార్థులు నున్న నాగేశ్వరరావు, హైకోర్టు న్యాయవాది వెంపరాల గోపాలకృష్ణ, కేశవరావు, మాధవరావు, కొండేపూడి వెంకట్రావు, కొమ్ముల సత్యనారాయణ స్వామి, ఆరుమిల్లి సుబ్బారావు, యర్రాప్రగడ రామకృష్ణ తదితరులను ఘనంగా సత్కరించారు. ఎంపీపీ అనచూరి సునీత, సర్పంచ్‌ మట్టా కృష్ణకుమారి, ఉత్సవ కమిటీ గౌరవ అధ్యక్షుడు పొన్నాడ హనుమంతరావు, అధ్యక్షుడు కోళ్ల వెంకన్న, ఆహ్వాన కమిటీ అధ్యక్షుడు ముదునూరి అక్కిరాజు, కన్వీనర్‌ పామర్తి రమణ, ప్రధాన కార్యదర్శి పొన్నాడ సూర్యారావు, కోశాధికారి కాసు శ్రీను, ఉత్సవాల ప్రచార కర్త దారపురెడ్డి బాబ్జి తదితరులు పాల్గొన్నారు.