సాక్షి, హైదరాబాద్‌: స్పానిష్‌ ఓపెన్‌ జూనియర్‌ అంతర్జాతీయ బ్యాడ్మింటన్‌ టోర్నమెంట్‌లో హైదరాబాద్‌ అమ్మాయి జక్కా వైష్ణవి రెడ్డి చాంపియన్‌గా అవతరించింది. స్పెయిన్‌లోని ఒవియెడో నగరంలో జరిగిన ఈ టోర్నీ మహిళల సింగిల్స్‌ ఫైనల్లో టాప్‌ సీడ్‌ వైష్ణవి 21–9, 21–10తో మరియన్‌ లె టుర్డు (ఫ్రాన్స్‌)పై విజయం సాధించింది. టైటిల్‌ గెలిచే క్రమంలో 16 ఏళ్ల వైష్ణవి తన ప్రత్యర్థులకు ఒక్క గేమ్‌ కూడా కోల్పోకపోవడం విశేషం. తొలి రౌండ్‌లో ‘బై’ పొందిన వైష్ణవి రెండో రౌండ్‌లో 21–9, 21–12తో లారా విలాకోర్టా (స్పెయిన్‌)పై, మూడో రౌండ్‌లో 21–9, 21–19తో రొమేన్‌ క్లోటెక్స్‌ (ఫ్రాన్స్‌)పై, క్వార్టర్‌ ఫైనల్లో 21–10, 21–8తో మడుక్‌ లిండెర్స్‌ (నెదర్లాండ్స్‌)పై, సెమీఫైనల్లో 21–19, 21–5తో అమెరికాకు ప్రాతినిధ్యం వహిస్తున్న తెలుగు అమ్మాయి రూహీ రాజుపై గెలుపొందింది.    

న్యూఢిల్లీ: తెలుగమ్మాయి జక్కా వైష్ణవి రెడ్డి బెల్జియన్‌ జూనియర్‌ ఓపెన్‌ బ్యాడ్మింటన్‌ టోర్నీలో టైటిల్‌ చేజిక్కించుకుంది. మహిళల అండర్‌–19 సింగిల్స్‌ ఫైనల్లో ఆమె 21–19, 17–21, 21–12తో టాప్‌ సీడ్‌ వివియన్‌ సాండొర్‌హజి (హంగేరి)ని కంగుతినిపించింది. మరో వైపు ఇథియోపియా ఇంటర్నేషనల్‌ టోర్నమెంట్‌లో భారత్‌కు చెందిన అర్జున్‌–రామచంద్రన్‌ శ్లోక్‌ జంట విజేతగా నిలిచింది. పురుషుల డబుల్స్‌ ఫైనల్లో ఈ జోడి 21–6, 21–19తో బహదిన్‌ అహ్మద్‌–మహ్మద్‌ నాసిర్‌ మన్సూర్‌ (జోర్డాన్‌) జంటపై గెలిచింది. 


 ఆలిండియా సబ్-జూనియర్ బ్యాడ్మింటన్
 
 సాక్షి, హైదరాబాద్: ఆలిండియా సబ్-జూనియర్ ర్యాంకింగ్ బ్యాడ్మింటన్ టోర్నమెంట్‌లో తెలుగమ్మాయి జక్కా వైష్ణవి రెడ్డి మెరిసింది. తమిళనాడులోని శివకాశిలో ముగిసిన ఈ టోర్నమెంట్‌లో ఆమె అండర్-13 బాలికల సింగిల్స్ టైటిల్‌ను కైవసం చేసుకుంది. ఆదివారం జరిగిన ఫైనల్లో రెండో సీడ్ వైష్ణవి 21-4, 21-15తో నాలుగో సీడ్ ఉత్సవ పాలిట్ (పశ్చిమ బెంగాల్)పై గెలుపొందింది. ఆంధ్రప్రదేశ్ జోడీలు అండర్-15 బాల, బాలికల డబుల్స్‌లో విజేతలుగా నిలిచాయి. బాలుర ఫైనల్లో టాప్ సీడ్ గౌస్ షేక్-బషీర్ సయ్యద్ (ఏపీ) ద్వయం 21-19, 21-14తో మూడో సీడ్ నవనీత్-విష్ణువర్ధన్ గౌడ్ జంటపై విజయం సాధించగా, బాలికల ఫైనల్లో ఆరో సీడ్ షబానా బేగం-ప్రీతి (ఏపీ) జంట 20-22, 21-17, 21-13తో నివిత-వినోనా (తమిళనాడు) జోడిపై గెలిచింది.
 
 అండర్-13 బాలుర ఫైనల్లో రెండో సీడ్ ప్రియాన్షు రాజవత్ (మధ్యప్రదేశ్) 18-21, 21-12, 21-15తో ఐదో సీడ్ సూరజ్ చక్రవర్తి (బెంగాల్)పై గెలిచాడు. అండర్-13 బాలుర డబుల్స్‌లో చంద్రజిత్ సింగ్ (మధ్యప్రదేశ్)-అర్షద్ షేక్ (ఏపీ) జోడి 21-9, 19-21, 21-7తో అచ్యుతాదిత్య రావు-సాయిచరణ్ (ఏపీ) జంటపై నెగ్గింది. బాలికల ఫైనల్లో నాలుగో సీడ్ తాన్య హేమంత్-కీర్తన (కర్ణాటక) 21-17, 21-18తో ఉత్సవ పాలిట్ (బెంగాల్)-మేఘా పొతంశెట్టి (ఏపీ)పై గెలుపొందారు. అండర్-15 బాలబాలికల టైటిళ్లను దిశాంత దేబ్‌నాథ్ (బెంగాల్), ఆకర్షి కశ్యప్ (చండీగఢ్) గెలుచుకున్నారు. ఫైనల్లో టాప్ సీడ్ దిశాంత 25-23, 21-23, 21-11తో ఎయిమ్సన్ సింగ్ (మధ్యప్రదేశ్)పై విజయం సాధించగా, రెండో సీడ్ ఆకర్షి 17-21, 21-18, 21-16తో పూజ దెవ్లేకర్ (మహారాష్ట్ర)పై నెగ్గింది.